San Lucas 5

Uánekua kurucha p'itamanhasti

(Mt 4.18-22; Mc 1.16-20)

1Ma xanhari ísï úkorhespti enga Jesusi Genesareti anapu japundarhu uanamukuni jámani jápka, ísï p'ikuarherasïrempti eskaksï pucharaxapka enga xáni uáni uékanhempka Diósïri aiangperakuani kurhanhani. 2Ka japundarhu uanamukutini tsimani icharhuta teparichani exeaspti. Ka uarhorichaksï kétsespti cheremakuechani uaromantaani. 3Ka Jesusi Simoniri icharhuta teparirhu jataspti, ka kómarhispti eska sáni inchamapiringa. Tátsekua teparirhu uaxarhukuspti ka jima uératini uénaspti jurhentpeni. 4Enga na k'amarapka uandani, Simonini arhispti:

–Inchama sánderu teparini ka cheremakuechani jima k'uanimaa je uarhuni.

5Ka Simoni arhispti:

–Jurhentpiri, erantskutakuskachi uarhoni ka nómachi p'itamaska; ka jimboka t'u uandasïnga, ménderuchi k'uanimaaka.

6Engaksï na ménderu k'uanimapka, uánekuaksï kurucha p'ímaspti, tsapakurhixaptiksïa cheremakuecha engaksï xáni uáni p'itamapka. 7Jimajkanksï níjkurhakuaspti máteruechani engaksï máteru teparirhu jámani jápka eskaksï nipiringa jarhuataani p'ímantani. Nirasptiksï jarhuataani ka tsimanksï teparichani sési uiniraaspti ka uekamexaptiksïa jamberi xáni uáni p'itamatini. 8Simoni Pédru ísï exeparini Jesusini tinguixurhikuspti ka arhini:

–¡Acha, jarharentsïrini jimbokani ji k'amanharhintstiska!

9Simoni ka iámenduksï chérakorhetixapti xáni uánekua kurucha p'itamaatini. 10Santiagu ka Juánu, Sebedeo uájpechajtuksï chéxapti, ima engaksï Simoni jinguni jámani jápka. Ka Jesusi Simonini arhispti:

–Ásï che, iásï uératiniri k'uiripu tánatiuaka.

11Jimajkanksï icharhutechani uémantaaspti; jurarkusptiksï iámendu ambe ka chúxapasptiksï.

Jesusi xúta jukarini ma ambakerantasti

(Mt 8.1-4; Mc 1.40-45)

12Ma jurhiatekua, enga Jesusi ireta ma jimbo jámani jápka, acheti xútku ma jima jarhaspti; ka enga Jesusini exepka, kápatseraspti ka kómarhispti:

–Acha, engari uékaaka, úakarini ambakerantani.

13Ka Jesusi p'árhespti uandaparini:

–Uékasïnga. ¡Ambakentsïa!

P'amenchati sóntku xúta jupinapaspti. 14Ka Jesusi juramukuspti arhini:

–Ásï nemani aiangu; táta jinguntku ni, tátechaksï míte eskari ambakentaskia, ka pa kéjtsïtakua eskamendu Moisesi na juramukata jurajkuka.

15Enga úpka, sánderu mítekorhepaxapti, ka uánekua tángorhenhantasïrempti kurhajchani ka eska ambakerantaapiringa. 16K'óru Jesusi kéndikusïrempti uandamukukorheni jimesï enga nónema jámempka.

Jesusi púakuntasti ka ambakerantasti achetini enga no újka xanharani

(Mt 9.1-8; Mc 2.1-12)

17Ma xanhari enga Jesusi jurhentpeni jápka, jimaksï uaxakaspti máru fariseuecha ka máru juramukua jurhentpiricha engaksï Galilea ka Judea ka Jerusaleni uératini jutipka. Ka Acheri uinhapekua Jesusi jinguni xarharaxapti enga p'amenchatichani ambakerantauempka. 18Jimajkanksï niáraspti máru engaksï jatatsekua ma jimbo pérapka achetini ma enga no úempka xanharani. Ka uéksïremptiksï incharani Jesusini pérakuni, 19ka nóksï úsïrempti incharani, jimboka uánekua janhaspka; ísï jimboksïsï k'umanchekuani jini p'enojtsïtapti ka p'amenchatinksï jimesï kénhaspti jatatsekua jatsiakutini Jesusini pérakuni. 20Ka eka Jesusi exepka na engaksï xáni mintsikempka, p'amenchatini arhispti:

–P'íchpiri, k'amanharhintskuechaniri púamenhantaskia.

21Ka jimajkanksï juramukua jurhentpiricha ka fariseuecha uénaspti eratseni: “¿Néski i enga tekajka Diósïni tájpanharhikuni? ¿Andi no Diósïjkusï újki k'amanharhintskuechani púatspentani?”

22K'óru Jesusi míteparini ambe engaksï eratseni jápka, kurhamarheaspti:

–¿Andijtsïsï ísï eratsejki? 23¿Ambe sánderu no úkua jukaski, arhini: “K'amanharhintskuechaniri púamenhantaskia”, o arhini: “Jauara ka xanhara”? 24Ka nirasïngaksïni mítetarani eska íni parhakpeni acheti Uájpa juramukua jatsiska k'amanharhintskuechani púatspeantaani.

Jimajkani p'amenchatini arhispti:

–Arhixakakini, jauara ka k'arhantani chéti jatatsekuani ka ni níntani.

25Sóntkusontku, ima enga no úempka xanharani jauaraspti, ka iámenduechaksï exexapti, k'arhantaspti jatatsekuani enga jatatsetini jápka ka níntaspti Diósïni k'éri ambe arhipantani. 26Ka iámenduechaksï ísku pakareraspti ka Diósïnksï k'éri ambe arhispti, ka iámu chéparinksï uandaspti:

–Iásïchi kánekua k'éri ka sési jásï ambe exeska.

Jesusi Lebini ióarhisti

(Mt 9.9-13; Mc 2.13-17)

27Ka tátsekua Jesusi uéraspti ka tumina Roma axakua tánatini ma exespti enga Lebi arhinhempka, ka jima uaxakatixapti enga tumina tánempka. Ka Jesusi arhispti:

–Chúxapurini.

28Jimajkani Lebi jauaraspti, ka iámendu ambe jurajkuspti ka Jesusini chúxapaspti.

29Ísï tátsekua Lebi chénjembo k'éri ma jarhojpekua jatsispti; ka uánekua máteru tumina tánaticha tángorhenhaspti, ka márkuksï uaxakatixapti. 30Ka fariseouechaksï juramukua jurhentpiricha jinguni uénaspti Jesusiri jurhengorherichani arhinhchaani, arhiaparini:

–¿Andijtsïsï tumina tánaticha ka k'amanharhintsticha jinguni t'ireni ka kauini jaki?

31Ka Jesusi arhiaspti:

–Imaksï tsinajpirini no uétarhenchasïndi engaksï no p'amenchani jaka, engaksï sési jámani jaka; tsinajpirinksï p'amenchatichasï uétarhenchajti. 32K'amanharhintstichanisïni juka tánantaani, eskaksï Diósïni andarhentaaka; no imechani engaksï sési jaka.

Kurhamarhperakua k'arhinda jakueri

(Mt 9.14-17; Mc 2.18-22)

33Ka Jesusinksï jimajku arhispti:

–Juánueri jurhengorhericha ka fariseuecheri jurhengorherichajtuksï méntkuksï k'arhinda jarhasïndi ka méntkuksï uandamukukorheni jarhasïndi, ka chéti jurhengorherichaksï méntku t'ireni ka kauini jarhasïndi.

34Ka Jesusi arhiaspti:

–¿Andi úsïntsï cha k'arhinda jatsiani tembucheri pámbetpirichani, enga tembucha imecha jinguni jauaka? 35K'óru niáraati jurhiata engaksï tembuchani kénditaaka; ka enga janoaka ima jurhiatekua, jimajkani k'óruksï k'arhinda jauati.

36Arini terukutarantskua arhiaspti:

–Nónema takusï jimbanhe, takusï tamapu jimbo maiarasïndi; jimboka takusï jimbanhe ísku tsîjpeaka; kájtu, jimbanhe no kasïpeati tamapu jinguni. 37Ka nójtu kauikua jimbanhe sïkuiri úrakatarhu jatsiranhasïndi, jimboka úberi itsïrhukua jimbanhe sïkuirini tsapakusïnga, ka kauikua tsînchesïndi, ka sïkuirijtu ambendarhekorheni. 38Jimbosï úberi itsïrhukua sïkuiri jimbanherhu jatsirakueti. 39Ka nónema jarhasti enga kauikua sési xarhiperakatani ts'émutini, tátsekua auaka no iámu xarhiperakatani, jimboka uandasïnga: “Sési xarhiperakata sánderu áspesti.”

Currently Selected:

San Lucas 5: BI-PURHE

Highlight

Copy