San Lucas 3

Juánu itsï atajtsïkpiriri jurhentperakua

1Enga Tiberio témbeni iúmu uéxurhini Roma juramuni jápkia, ka enga Pónsio Pilatu Judea juramuni jápka, Erodesi Galilea juramuxapti, Filipu Iturea ka Trakonitejtu juramuxapti, ka Abilene Lisania juramuxapti. Erodesi ka Filipu erachisptiksï. 2Anasi ka Kaifasiksï k'éri tátechespti. Jimajkani isï, Sakariasï uájpa Juánuni Diósïri uandakua niárakuspti, enga jimesï jámani jápka enga nónema irekaka. 3Ka Juánu iápuru iurhekua Jordanirhu uanamukuni isï jámaspti, arhijtsïkpeparini eska itsï atajtsïnhapiringa ka eskaksï Diósïni andarhentapiringa, ka eska ísï, Diósï púakuantaapiringa. 4I ambe ísï úkorhesti eska Diósïri uandari Isaiasi na karaka:

“Nema uinhachaxati jimesï enga nónema irekaka:

‘Achani xanhari ambatskakuntsï je;

Jurhimbendu ma xanhari mítaku je.

5Iámendu jauandekuechaksï uininhanhantaati,

ka iámendu juáta ka k'úmstechaksï p'arhikua jájtsïtanhantaati,

xanharicha engaksï k'untsïndeka jurhimbentskaranhantaatiksï,

ka nani enga penhendeka p'arhikjantskanhantaati.

6Ma parhakpeni exeati p'ímutantskua enga Diósï axani jaka.’ ”#3.4-6 Is 40.3-5; Bar 5.7.,#3.6 Lc 2.30-31; Tit 2.11.

7Enga uánekua ninhempka eska Juánu itsï atajtsïkuapiringa, ima ísï arhiasïrempti: “¡Akuitseni járhaticha! ¿Chánksïni ne arhiski eskajtsï úaka ikimperatani sïpakorhekuni enga janoni jaka? 8Jángua jimbo xarhata je eskajtsï sési jimbo chári irekuani jurhimberantaskia, ásï uéna je uandani: ‘¡Jucha Abraniri sïrukueska!’ Jimbokaksïni sési jimbosï arhijka eska Diósï úsïnga arini tsakapuechani jamberi Abraniri sïrukua úantaani. 9Ka támu, ch'aparakua uarhomukuntskakata jarhastia enga p'ukurichani sïrangua jinguni p'itaskuajka. Náki uéjki ma anhatapu enga nómbema marhuajka, ch'apanhasïndi ka chpírirhu k'uanijpanhasïndi.”#3.9 Mt 7.19.

10Jimajkanksï Juánuni kurhamarhespti:

–¿Ka jucha néna jámaia?

11Ka Juánu ísï arhiaspti:

–Ne enga tsimani xukuparhakua jatsika, íntskue ma imani enga nóma jatsika; ka ne enga t'irekua jatsikorheka, imani jinguni marhuate enga nómbema jinguni t'ireni jaka.

12Ístuksï máru tumina tánaticha andarheraspti itsï atajtsïkuekani, ka Juánunksï kurhamarhespti:

–Jurhentpiri, ¿Juchari jimbo ambe úkueski?

13Ka Juánu arhiaspti:

–Ásï nitamama je jukari maiampetarpeni eska xántku juramukata jaka.

14Ístuksï máru p'urhejkuticha kurhamarhespti:

–¿Ka andi jucha ambe uétarhenchasïnki úni?

Juánu arhiaspti:

–Ásï nemani ambe ma chéraparini euakorhe je ka níjtu ísku jatini nemani k'uaninharhitantani ambe ma enga no úka; ka jaiapanhentsï je eskajtsï xáni maiamunhajka.

15Ísï jánhaspti kánekua eroeronharhinhani ka kurhamarhekorhenhasïrempti: “¿Andi Juánu Krístueia?”#3.15 Exe je Lc 2.11 16Ka Juánu iámendu arhiaspti: “Sési jimbo jíksïni itsï jimbojku itsï atajtsïkuxaka; k'óru jurhaxati ma engaksïni Espiritu Sántu ka chpíri jimbo pímbinhajkuntaaka. Ima jíndeni jinguni sánderu k'éri ambesti, xáni k'éristi engani jamberi no nitatarheka imeri kuarhachichani kuerandukuani. 17Kátakutarakua jupikapuxatia, ka tríjuni kátakuati, ka pájani jarharetaati. Tríjuni patsakorheati, ka pájani kurhintaati chpírirhu enga nómeni pójpeaka.”#3.17 Mt 13.42,50. Sobre la imagen empleada, véase Mt 3.12 n.

18Ísï jámaparini ka máteru uánekua ambe jimbo arhistatspeparini; Juánu ambakiti aiangperakuani aiangpesïrempti. 19Juramuti Erodesintu xukaspti, jimboka imeri erachi témba Erodiasïni kúrhetixapka, ka iámu imani ambe jimbojtu enga xáni nósesi ambe niátapka; 20ka Erodesi kújtsïnchakorhesptiteru, enga Juánuni ónhatarkorhepka.

Jesusijtu itsï atajtsïkunhaspti

21Arisï úkorhespti enga Juánu itsï atajtsïkpeni jápka, Jesusijtu itsï atajtsïkunhaspti; ka enga na uandamukukorheni jápka, auanda mítakorhespti 22ka Espiritu Sántu, jipunhini jásï ma kétsespti andajtsïkuerani, ka auandarhu kurhanchekorhespti uandakua ma enga ísï arhimpka:

–T'úri jucheti uátsïti xénhchakateska, engani ji erakuka.

Jesusiri sïrukua

23Jesusi ma ekuatse témbeni uéxurhini isï jatirispti enga imeri úkuani uénapka. Ka uandanhasïrempti eska Jose uájpespka. Ka Jose Eli uájpespti, 24ka Eli Matati uájpespti, ka Matati Lebiri, ka Lebi Mélkiri, ka Mélki Janairi, ka Janai Joseri, 25ka Jose Matatiasïri, ka Matatiasï Amosiri, ka Amosi Naumiri, ka Naumi Esliri, ka Esli Nagairi, 26ka Nagai Máatiri, ka Máati Matatiasïri, ka Matatiasï Semeiri, ka Semei Josekiri, ka Joseki Joderi, 27ka Joda Joananiri, ka Joanani Reseri, ka Resa Sorobabeliri, ka Sorobabeli Salatieliri, ka Salatieli Neriri, 28ka Neri Mélkiri ka Mélki Adiri, ka Adi Kosamiri, ka Kosami Elmadamiri, ka Elmadami Eriri, 29Ka Eri Josueri, ka Josue Elieseriri, ka Elieseri Jorimiri, ka Jorimi Matatiri, 30ka Matati Lebiri, ka Lebi Simeoniri, ka Simeoni Juderi, ka Juda Joseri, ka Jose Jonamiri, ka Jonami Eliakimiri, 31ka Eliakimi Melea uájpespti, ka Melea Menairi, ka Mena Matateri, ka Matata Nataniri, 32ka Natani Dabiri, ka Dabi Isairi, ka Isai Obediri, ka Obedi Bóosiri, ka Bóosi Salmoniri, ka Salmoni Náasoniri, 33ka Náasoni Aminadabiri, ka Aminadabi Adminiri, ka Admini Arniri, ka Arni Jesroniri, ka Jesroni Fáresiri, ka Fáresi Juderi, 34ka Juda Jakobu uájpespti, ka Jakobu Isaakiri, ka Isaaki Abraniri, ka Abrani Táreri, ka Táre Najoriri, 35ka Najori Serukiri, ka Seruki Ragaueri, ka Ragau Pélejiri, ka Péleji Eberiri, ka Eberi Selajiri, 36ka Selaji Kainaniri, ka Kainani Arfaksadiri, ka Arfaksadi Semiri, ka Semi Noéri, ka Noe Lamekiri, 37ka Lameki Matusaleni uájpespti, ka Matusaleni Enokiri, ka Enoki Jarediri, ka Jaredi Malaleliri, ka Malaleli Kainaniri, 38ka Kainani Enosi uájpespti, ka Enosi Setiri, ka Seti Adaniri, ka Adani Diósï uájpespti.

Currently Selected:

San Lucas 3: BI-PURHE

Highlight

Copy