Génesis 25

Abraani ka Keturaeri sïrukua

1Abraani máteru nanakani kurhentaspti enka Ketura jakankurhimka. 2Ka imani nanaka jinkuni Simrani, Joksani, Medani, Madiani, Isbaki ka Suajeni káaspitksï. 3Joksani, Sebani kámaspti ka Dedani ka Dedani Asurimini ka Letusimi ka Leumimini káaspti. 4Ka Madiani arichani káaspi: Efa, Eferi, Janoki, Abida, ka Elda. Iámentu íksï Ketura uáp'espti. 5Abraani iámu ampe Isaakini íntskuspti enka xáni jatsikorhepka. 6Ka máteru uáp'echa enka nanachichani jinkuni káapka, sánhani ampek'u íntsïkorheaspti, ka jurhiata antarakua ísï axaaspti, iáuani jarharhetini jima enka Isaaki jápka.

Enka Abraani uarhipka ka jántani

7Abraani, iumu tanimu ekuatse ka tempeni iumu (175) uéxurhini irekaspti. 8Abraani, kánekua k'éritini ka uánekua uéxurhini jatiri uarhispti ka tsípekua euanhantaspti ka niraspti imeri márkuechani jinkuni. 9Imeri uáp'echa Isaaki ka Ismaeli jatsintasptiksï Makpela uarhiri jántskuarhu, jima enka Efroni kánkorhempka ima enka Sójari uáp'epka, ima enka Jitita anapuepka enka Mamre urhepatini jaka. 10Imani echeri Abraani jitita anapuechani piákuaspiti ka jima jántaspti Abraani ka Sara ima enka tempepka. 11Enka na Abraani uarhipkia, Diosï, Isaakini úch'akuraspti enka uáp'epka. Isaaki jima pakaraspti irekani enka itsï jatapka, Enka tsípiti jaka ka enka exép'eni jaka.

Ismaelirhu sïrukua

12Íksï jintesti Ismaeliri uáp'echa, enka Abraani uáp'epka, enka Abraani Agari jinkuni kámapka enka Ejiptu anapuepka enka Saraeri jántspiripka. 13Íksï jintesti Ismaeli uáp'echa: Nebaioti urheta antap'enuspti, ka tátsekua Kedari, Adbeli ka Mibsani, 14Misma, Duma, Massa, 15Jadari, Temá, Jeturi, Nafísi ka Kedema. 16Íksï jintesti Ismaeli uáp'echa ka iretecha ka tempeni tsimani iretarhu anapu juramuticha.

17Ka Ismaeli kuimu ekuatse ka témpeni iumu tsimani (137) uéxurhini irekaspti, ka tátse uarhispti ka niraspti imeri márkuechani jinkuni. 18Imeri irecha japantiru uarhispti, Ka Israeli sïrukuecha Javila uératini irekaspti Shuri jamperi, ísï eska Asiria uératini jurhani Ejiptu urhepatini parak'a.

Jakobi ka Esauperi antap'enukua

19Íksï jintesti Isaakiri sïrukuecha ima enka Abraani uáp'epka: Abraani Isaakini kámaspti. 20Isaaki tsimani ekuatse (40) uéxurhini jatirispti enka Rebekani kurhepka imani enka Betueli uáp'a nanakepka, enka Arameo anapuepka enka Paddani Arami jaka, enka Labaniri pirenchipka enka Arameo anapuepka. 21Isaaki kómu arhispti ACHAni eska Rebeka enka tepaepka úpirinka sapini kámani jimpoka no úsïrempka sapi kámani, ka ACHA kurhaspti kómu akua ka kóntespti sapini ma. 22Tsimani sapichaksï k'uparhatarhu uénaspti uarhiperani, ka ima uantaspti: Enka méntku ísï ísïuaka, ampe úni ísï irekaa niraspti ACHAni kurhamarheni. 23ACHA arhispti:

Chéti k'uparhatarhu tsimani k'érati iretechaksï jarhasti,

chéti k'uparhatarhu arhukurhitiniksï jurhaxati,

ma sánteru uinhapeati eska

ka k'érini sapichuni

máteru, marhuakuati.

24Enka niarapkia jurhia enka ima ampakentapirinka, jima k'úparhatarhu tsimani charhakuecha jarhaspti. 25Ima enka urheta antap'enupka charhots'ïspti ka tisïrhekorheni, ima Esau jakankurhitanhaspti. 26Ka tátsekua erachi jempa antap'enuspti ima irhanturhakua Esaúri jupikakutini antap'enuspti, ka imaniksï Jakobi jakankurhitaspti. Isaaki tanimu ekuatse ka tempeni (70) uéxurhini jatirispti enka sapichani káapka.

Esaú atarantaspti imeri jarhamekua urhetikua

27Sapichaksï k'éraspti, ka Esau juátarhu ánchekorhesïrempti ka kánekua jurhenaspti manakorhe ataani, ka Jakobi kuakuarhu jarhasïrempti irekani. 28Isaaki kánkekua xenchasïrempti Esauni jimpoka jankorhesïrempka t'irekua ampe jirinhakorheni imani ampe enka xáni atauenka, ka Rebeka kánekua exenchasïrempti Jakobuni.

29Ma jurhiani, Jakobu k'uiripeta úmantaspti ka Esau juatarhu uératini niantaxapti kánekua kuataratini, 30Ka Jakobi arhispti:

Inteni k'uiripeta charhapiti úmantskatarini íntsku t'irerani, jimpokani kánekua kuataratixaka.

Jimposï Edomi jakankurhitanhapti.

31Jakobi arhispti: Atarachentsïrini jarhamekua enkari urhetini jimpo antakorheka.

32Esau arhispti:

Ji ampe úraa jarhamekua urhetikua, nóchkani sáni jimpoterkusïni jaki, uarhixaka.

33Jakobi arhispti: Íntskurini uantakua. Ka Esau íntskuspti uantakua Jakobini, ka atarakuntaspti jarhamekua enka urheti antap'enutini antanhak'a.

34Jakobi íntskuspti Esauni kurhinta ka t'asïni íntskuspti, Esau t'irespti ka itsïmaspti, jauaraspti na uéraspti, isï jamanisï Esau no aiápenhentapti jarhemakua enka urheti antap'enutini antanhak'a.

Currently Selected:

Génesis 25: BI-PURHE

Highlight

Copy