Génesis 24

Abraani, Isaakini tempani jirinhakuspti

1Abraani kánekua t'arhepesptia, ka ACHA iámu ampe kóntespti. 2Abraani arhispti jántspiri jempani imani enka sánteru k'éripkia, enka iámentu ampe jinkunku jarhempka jatsikorhekua ampe jinkuni: Tsík'atakuarhu teruk'ani péra chéti ják'i.

3ACHA japantirurini uantakua íntsku, Ima enka auantarhu ka echeri anapu Diósïka, eskari no Kanaa anapu erákuaka jucheti uáp'eri témpani, eskaksï no ixu anapueuaka enkachi irekani jaka. 4Jucheti iretarhu ka juchetio niuaka, ka jimari erakuaka nanakani enka jucheti uáp'a Isaaki tempeuaka.

5Jántspiri arhispti:

Enka nanaka no uékaska jurhani, jatsiaka chéti uáp'ani jini páni enkari t'ú anapueka.

6Abraani arhispti: Ásï jama páni jucheti tatakani jini.

7ACHA enka auantarhu ka echerirhu anapu Diósïka, k'umanchekuarhu ka iretarhu uératini petasti enka jucheti táterika ka aiachestirini ka arhistirini: I echerini chéti sïrukuani íntskuaka ïsï jimpo ima ánjeli ma axaati urhechepantikini ka jiniri erakukuaka chéti uáp'eri témpani.

8Enka nanaka no uékaska jurhani t'unkeni jinkuni, ima uantakua xerekorhentaati. ¡K'óru ásï jáma páni jucheti tatakani jini! 9Jántspiri jempa tsikat'akuarhu teruk'ani péraakuspti ják'i Abraanini ka uantakua íntskuspti, ísï aiákuspti úni eska na arhipka. 10Tempeni kameiuchani erakuaspti ka niraspti jima enka acha jempa arhipka, pát'asti ampakiti ampe intsïmperata, enka na niárapka k'éri ireta Najori enka Mesopotamia jaka, 11ka jima tinkuixustaaspti kameiuechani k'éri iretarhu uanamukutini jima ni iáuani enka itsï jatak'a, xatini jántuespti enkaksï nanakecha ísï nirak'a p'itani. 12Ka jántiok'u uantaspti: ACHA, Diósï enkari jucheti Abraaniri Diósïka, kómu arhixakakini eskani íni jurhiatekua sési jámaaka, jucheti acha Abramini jarhoata. 13Ixu jarhaska itsï uérakuarhu í jántu enka nanakecha íni iretarhu anapue uáp'echa, itsï juka p'itani. 14Eska imaeuaka nanaka, enkani ji arhiaka: Késku chéti k'amukua jimpoka k'arhichaxaka ka eskari ima arhiaka: Itsïma, ka kameiuechantuni itsïmataauaka. Eska ima nanakeuaka enka erakukateuaka eska Isaakiri tempeuaka, ka ji ísï míteaka eska jarhuataxaka jucheti achani.

15Nótki jamperi k'amaraxapka uantani, enka Rebeka jimak'u ísï niárapka k'amukua ma inchantitini, Rebeka, Betueli uáp'espka, Betueli enka Milka uáp'epka enka Najori tempepka ka enka Abraaniri erachi jémpepka. 16Kánekua sési jáxespti ima nanaka, ka nótki ma tataka jinkuni k'uixapti, ima kétsemaspti itsï p'itani, k'amukua uiniraspti ka níntaxaptia. 17Jántspiri uirispti kúmani ka arhispti:

Intsïperini sáni itsï enka chéti k'amukuarhu jataka.

18Ima arhispti: Itsïma acha ka sóntku késkuspti k'amukua ka itsïmataspti.

19Ka enka na k'amarapkia itsïmatani, arhispti:

Nipa p'itakuani itsï chéti kameiuechantu, jurak'uksï uiniarhantani itsïmani.

20Sóntu sóntku chekakuarhu jatsiraspti itsï ka ménteru kétsemaspti sánteru itsï p'itani eskaksï kameiuecha itsïmapirinka. 21Jántspiri isku pakareraspti, ka no ma ampe uantaspti, jimpoka uékasïrempka míteni síni ACHA jarhoat'axapi enka ima nípka úni. 22Enkaksï kameiuecha na k'amarapkia itsïmani, jántspiri íntskuspti juk'urhakua ma mereari enka kuimu gramu k'uetsapepka ka máteru tsimani juk'akurhakua mereari enka iumu ekuatse gramu k'uetsapepka, 23ka arhispti:

Aiankurini sáni ¿Néri uáp'eski? ¿Ampante chéti táteo enkani ji uák'a íni chúrekua ják'orheni?

24Ima arhispti: Betueli uáp'eska, ima enka Milka ka Najori uáp'eka.

25Ka arhisptit'u: Juchenio ampantesti kánekua jima enka tríju jatakueka, jimari uák'a pakari ka mintsikorheni.

26Jimak'ani acháti tsérhukua antaskueraspti ka ACHAni k'éri ampe arhispti. 27Ka arhispti: K'éri ampeskari ACHA, jucheti juramuti Abraaniri Diósï, enka no jantiok'u jurak'uni jaka juramutini, ka urhechepaskari jucheti juramutiri k'umanchahrua jámperi.

28Rebeka uiripaantaspti nánte jémpo ini ampe uantantani. 29Rebekaeri erachi jempa Labani jakankurhisïrempti, Labáni uiripaspti nirani exeni imani tatachini enka itsï jatakuarhu jápka. 30Jimpoka erak'uspti jukak'urhakuechani pirempa jémpani, enka ima aiankuntapka na enka arhipka ima tatachi, Labani uiripaspti uérani exeni imani tatachini ka jima exespti, jima enka itsï jataka kameiuchani jinkuni. 31Ka arhispti:

ACHA enka úch'akukateka, incha kókuani ¿Antirisï uérakua pakara? Ják'orhekuakini ampantskaracheskia, ka kameiuachani ampatskarakuaska.

32Jántspiri inchaspti k'umanchekuarhu, ka Labani kuerach'akuaspti kameiuechani, ka t'irekua íntsaaspti ka jántspiriri pámpirichani ítsï kéntaaspti enkaksï jupantupirinka.

33Tátsekua t'irekua jatsirakuaspti. Ka ima no uékaspti t'ireni ka uantaspti:

Nótkini t'ireaka, urhetani uantak'a ampe enkani juka uantani.

Ka Labani arhispti: Uantaia.

34Achati uantaspti: Ji Abraaniri jántspiriska.

35Ka ACHA kánekua úch'akurasti jucheti juramutini, ka uánekua ampe íntskusti, karichichani, uákatsïchani, mereari, tiripiti, jántspiri tataka ka nanakechani, kameiuchani ka ch'anchakichani. 36Sara, jucheti juramutiri tempa, sapini ma kánkorhespti enka ka kutsïmepkia, ka jucheti juramuti iámentu ampe íntskuspti enka xáni jatsikorheka. 37Ka ji uantakua íntskuska jucheti juramutini, arhistirini: Ásï ixu Kananeo erakuku tempani jucheti uáp'a tatakani, ixu anapu enkani irekani jaka. 38Jucheniri níntaaka jucheti táteo ka jimari ka jimari erakuaka naki enka tempeuaka jucheti uáp'eri. 39Ka ji arhispka jucheti juramutini: Enka ima no uékaska jurhani 40Ka imarini arhispti: Ji méntu ísï ACHAeri xanhari jimpo jámaska, ísï jimpo ima axaati ánjelini ma, ka ima t'únkeni jinkuni niuati, ka t'uri erakuaka jucheti márkuecha jinkuni, jucheti táteo nanakani enka témpeuaka jucheti tatakeri. 41Enkari niraska jucheti táteo ka imaksïni no íntskuni nanakani, ísïri imani uantakua enkari íntspeka, imaniri nóteri jatsiaka anti uatanheani jimpo ima uantakua xerekorhentaaka.

42Iásï enkani niarapkia ítsï uératirhu, uantaspka: ACHA, jucheti juramuti Abraaniri Diosï, enkari t'u uékaska ji sési jámaka íni jurhiatekua íni xanhari jimpo, 43ixu jarhaska iásï ítsï uératirhu. Eska ima nanaka enka uéraaka itsï p'itani, ka enkani ji arhik'a: Intsïmperini sáni ítsï enka chéti k'amukuarhu jatarini jaka 44ka imarini arhintaaka: Itsïma, ka p'itakuauaka itsï chéti kameiuechani, eska imaeuaka enkari t'u erakuaka enka tempeuaka jucheti jántspiriri uáp'a. 45Nótkini jamperi k'amaraxapka ísï uantani, enka Rebekani exepka k'amukua ichantitini enka jini kétsemani jápka itsï p'itani. Ka ji arhispka: Intsïmperini sáni ítsï. 46Ima sóntku késkuspti k'amukua ka arhisptirini: Itsïma ka kameiuacheni itsïmatauaka ka itsïmaspka ka ístu itsïmataaspti kameiuchani. 47Ka ji k'urhamarhespka: ¿Néri uáp'eski? Ka imarini arhispti: Ji Betueli uáp'eska, Najori ka Milka uáp'a. Jimak'ani uirhipu ma jatsirhukuska ka jukak'urhakua inchak'urhataspka. 48Tátsekua tinkuixurhiska ka kómu arhispka ACHAni, imani enka Abraani jucheti juramutiri Diósïka, enkarini sési páka xanhari jimpo, ka jucheti juramutiri erachini uáp'eka nanakani erakuka. 49Arhits'ï je, cha uékasïni ísï úni eska jucheti juramuti na erokorheni jaka, ka enkats'ï no uékaaka, sési jimpots'ï arhi je, ka ji ísï mítetini jauaka.

50Labani ka Betueli uantasptiksï: I ACHAeri sésikuesti, ka jucha no uák'a uantani ni sési, ni no sési.

51Jimini jatsiska Rebekani: Pa ka eska chéti juramutiri uáp'a tempa uák'a, ísï eska ACHA na uantaka.

52Enka Abraaniri jántspiri kurhaapka, ACHA japantiru tsérhukua antaskueraspti. 53Jántspiri uekach'akua, jukak'urhakua mereari ka tiripiti ampe p'itaakuspti ka Rebekani íntsaaspti ka imeri mími jempani ka imeri nánte jempani. 54Jántspiri ka imeri pámpiricha enkaksï ima jinkuni jamani jápka, t'iresptiksï ka itsïmasptiksï, ka jimaksï pakaraspti k'uini. Pauanteku xarhentkuksï jauaraspti ka ima uantaspti:

Chári sésikua jimpo, jucha nintaakia juchari juramutio.

55Rebekeri erachi ka nánte jempa uantasptiksï:

Eska nanaka jucha jinkuni pakaraaka tempeni jurhiatekua ísï, ka tátsekua uát'i nirani ia.

56Ima uantaspti:

Iásï enkarini ACHA jarhuataka, ásïts'ïni p'ínku je sánteru, íntskuntsï sésikua jucha nintani juchari jántspiri jinkuni.

57Ka imaksï uantaspti:

Ju je uantap'ani nanakani imanicha kurhamarheaka.

58Uantap'asptiksï Rebekani ka kurhamarhesptiksï:

¿Niuari íni jinkuni? Ka ima uantaspti:

Jo niuaka.

59Tsïnkuasptiksï Rebekani ka nanaka enka t'arhexerapka, ka Abraaniri jántspirini ka imechani enkaksï pampeni nípka. 60Ka úch'akurasptiksï Rebekani arhiparini:

¡Juchari pirenchi,

eska chéti sïrukua kánekua k'éaka,

ka eska chéti sïrukua antauaka chéti ikiatspirichani

ka eska antauaka k'érati iretechani!

61Rebeka ka nanaka enkaksï jántspi jémpepka jauaraspti ka kameiuechaniksï jataaspti ka chuxapasti, jántspirini ka ima ísï paspti Rebekani.

62Isaaki enka Néguebi anapuepka, jima uératini junkuaxapti enka itsï jatapka enka arhinhak'a enka tsípiti jaka ka enkarini exek'a. 63Xatinispti enka Isaaki juatarhu nípka xanharani, tsimani kameiuechani exeaspti eskaksï antarheraxapka. 64Rebekat'u eraueraspti Isakini ka kameiurhu kétsespti. 65Rebeka kurhamarhespti jántspirini:

¿Néski inte tataka enka juatarhu jamani jaka, ka enkats'ïni jurhani jaka kumani?

Ka ima arhispti:

Jucheti juramusti. Jimak'ani ima p'ikuspti ónharhikua ka onharispti.

66Jántspiri iámu ampe aiánkustaspti Isaakini, enka xani úpka 67ka Isaaki incharaspti Sarao enka nánte jémpepka Rebekani ka jima jinkuni sési p'iurherantaspti enka xáni no sési p'ikurherempka imani jimpo enka nánte jémpa uarhipka.

Currently Selected:

Génesis 24: BI-PURHE

Highlight

Copy