Génesis 23
23
Enka Sara uarhipka ka jatsinhantani
1Sara kuimu ekuatse ka tempeni iumu tsimani uéxurhini (127) jatirispti enka uarhipka. 2Sara, Kuiriati-Arbá uarhispti enka Jebronika, Kanaa echeri jimpo. Abraani uekuspti ka míntakuspti jurhiatechani Sarani. 3Enka Abraani k'amarapkia uékuni uarhirini, Jiti anapuechani niraspti jirinhantaani ka arhiaspti:
4Ji no ixu anapueska, atarachentsïtsïni echeri ma enkani uáka uarhiri jucheti jántani.
5Jiti anapuechaksï arhispti Abraanini:
6Táta juchari kurhaa: T'úri jinteska Diósïri erakukata juchantsïni jinkuni, uák'ari jatsintani chéti uarhirini jima enka kánekua sési jánteka, no nemakini ampe arhiati, okini no jiák'utani jarhani eskari uarhirini jatsintaaka.
7Abrani jauaraspti ka Jiti anapuechani japantiru tsekurhua antaskueraspti, 8ka arhiaspti: Enka ísïka eskats'ïni íntskuaka sésikua eskani ji jucheti uarhiri ixu jatsintaaka, arhichets'ïni Efróni enka Sóaari uáp'eka.
9Eskarini jiáretaaka Macpelá, jima enka chári echerirhu jinkuni píkuni jaka, arhi je eskani maiamuaka na enka xáni kurhak'orheaka ka ísï úni jamani jatsikorheaka uarhiri jántskua cha jinkuni.
10Efróni, Jiti anapuecha jinkuni jarhaspti jimpoka jima irekaspka, ka iámentu jima anapuechani japarini enkaksï k'éri iretarhu jamukutini jápka arhispti Abraanini ka arhiskapi:
11No k'aunisïnti acha jucheti, sésirini kurhaa, íntsïkorheakakini echeri ka ístu uarhiri jántskua enka jima jaka, ixu anapuechani japarini ísï uantaxaka, jatsintsï chéti jima chéti uarhini.
12Abraani tsérhukua antaskuespti jima anapuechani janhanharhiani, 13Abraani arhispti:
Efrónini, sési kurhaa, jikini maiamuntaaka ka jikini íntskuaka na enka xáni jukaparhaka ima echeri, ka tátsekua jatsintaaka jucheti urhirini.
14Efróni arhispti:
15Kurhaa jucheti acha, ima echeri ma irepeta (400) tumina taiákata tiripiti jukaparhasti, tumina nóma ampe mésti, ni, ka jatsintsï chéti uarhirini.
16Abraani jiókorhespti na enka xáni tumina jimpo arhipka Efróni, ka k'uiripu japantiru maiamuspti ma irepeta (400). 17Imani jatsikorhekua enka Efróni, Macpela jatsipka jurhiata antarakuarhu ísï, ka uarhiri jántskua, p'ukuricha ka iámentu ampe enka xáni jima jápka. 18Abraanini íntskuspti, ka Jiti anapuechaksï ísï mítetixapti ka iámentu imecha enkaksï jima k'éri iretarhu inchempka.
19Abraani jatsintaspti Sarani enka imeri tempa jémpepka Macpelá, Mamre jurhiata antarakuarhu ísï enka Jebronika enka Kanaá jaka. 20Ima echeri ka uarhiri játsinkua Abraani pakataspti enkaksï Jiti anapuecha íntskupka.
Currently Selected:
Génesis 23: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
