Éxodo 11

Uantakata jarhaspti eskaksï iámentu tataka úrheticha uarhipirinka

1ACHA arhispti Moisesini: Máteru ikimeauaka axakuaka irechani ka Ejiptuni anapuechani. Tátsekuarhuksïni jurak'uati nirani, ka méntkusts'ï ueakuaka ka nóteruts'ï méni k'uanhatseaka.

2Ni iásï ka Israeli anapuechani arhia eskaksï iámentu tataka ka nanakecha enkaskï imecho no iáuani ísï irekaka eskaksï kurhakuauaka uekach'akua ka tirhintikua ampe enka tiripiti ka mereariuaka.

3Ka ACHA úspti eskaksï Ejiptu anapuecha sési exeapirinka Israeli anapuecha. Moisesit'uksï Ejiptu anapuecha, ka irecheri ánchekorheticha janhanharhisïrempti.

4Moisesi ísï uantaspti: ACHArini ísï arhisti, eskaksïni aiánkupirinka: Teruk'ani chúrekua Ejiptu uanaakurhaaka.

5Iámentu márkuecha Ejiptu anapuecha, ima tataka enka urheti antap'enuka uarhiati, irecho anapu enka urheti antap'enuka uarhiati, ka ima enka urheti antap'enuka urhurakuarhu anapu jántspiri uáp'a, ka iámentu manakorheri tsiueraticha enkaksï urheti antap'enuka. 6Ejiptu uinhachanhaati xáni uénhani, no méni xáni no sési úkorhexapti, ka nóteru méni xáni no sési úkorheati. 7K'óru Israeli anapu k'uiripu jinkuni ni ma uíchu jua jua arhia Israeli anapu ni manakorherini, ka ísïksï míteati eskaksïni ACHA sési arhukutixaka Ejiptu ka Israeli anapuechi jinkuni. 8Ka iámentu chéti jántspiricha, jintentsïni juati exeni ép'u t'énhsatatini, ka t'u japarinktsï uantaati: Ni ia ka pát'a chéti iretani enkakini chúxapaaka. Ka ji uékuaka. Enka na k'amarapkia aiankuni irechani, Moisesi kánekua ikiatinku uéntaspti jima enka irecha jápka.

9ACHA, Moisesini arhispti:

Irecha inchentimentaati nóksïni jiánkuni, ka ji sánteru xarhataaka jucheti uinhapekua.

10Ka Moisesi ka Aaroni úsptiksï iámentu ampe enka xáni ACHA arhiapka, irecha japantiru, jimpoka ACHA inchantimetaraspka irechani no jiánkuani nirani Israeli anapuechani.

Currently Selected:

Éxodo 11: BI-PURHE

Highlight

Copy