Éxodo 10
10
Chóchuechaksï kánekua no sési jantskarasti.
1ACHA, Moisesini arhispti: Ni irecha exeni, ji mintsita irechani ka imeri jántspirichani mintsita chuperakuaka, jimpokani uékasïnka imechani exeraani jucheti uinhapekua.
2Ka eskari úaka chéti nimakuechani ka chéti sapichani aiakuani Ejiptu. Ka ísï jamaniksï míteati eskani ji ACHAeska.
3Moisesi ka Aaroni, irechani nirasptiksï exeni ka arhini: Ebreouecheri ACHA Diósï ísï uantasti: ¿Na jatiniri jamperi no jurak'utakorhea kuratsetakorheni? Ka ¡Jucheti iretani ínstkuni sésikua nirani jinteni marhuacheni!
4Ekari útasï inchantimentaska ka no jurak'uani nirani jucheti iretani, pauani chéti echerirhu iámu uiniataaka chóchuechani. 5Chóchuechaksï xáni uiniakurhaati enkari nóteru jamperi úaka echeri erantskani. Enka xáni uintsakua ka anhatapuni xanuata no ataka, imaksï iámu auati. 6Chéti juramukuecharhu ka chéti jántspiricheri ka iámu Ejiptu anapuecheri k'umanchekuarhu, iámuksï uiniaati, chéti tua anapuechaksï nómeni exesti xáni no sési ampe. Moisesi jima uéntaspti.
7Irecheri jántspiri jémpechaksï arhispti irechani: ¿Na jatini jamperi i acheti, kómu iresta juchantsïni? ¡Íntsaia sésikua eskaksï niuakia marhuakuni intecheri ACHA Diósïni!
¿Anti no míteski eska Ejiptu iámu ampe k'amantexakaia?
8Irecha ménteru Moisesi ka Aaronini uantap'aspti ka arhiaspti:
Ni je ka marhuaku je chári ACHA Diósïni. ¿Ne ka nésï niua?
9Moisesi arhispti:
Jucha iámentuechasïni niuaka, juchari sapicha, tata ka nana k'éricha, karichicha ka uákasïcha, nóchkani jucha k'uichetani ka kéts'ïtakuni niuaka ACHAni.
10Ka irecha arhiaspti: ¡ACHAt'u chá jinkuni niuatia! ¿Anti cha na arhaski eskaksïni ji jurak'uaka chári sapichani jinkuni nirani? Jinkunku jáma je, jimpokaksïni ji uák'a no sési kámani.
11Nóts'ï iámentuechani niuaka, tataka k'eratichaksï niuati ka marhuakua je ACHAni. Tátsekua irecha petarkorheaspti jima.
12Tátsekua ACHA, Moisesini arhispti:
Iápuru Ejiptu ísï t'antsira ka eska chóchuecha iámu Ejiptu jamaaka, ka eskaksï iámu auaka ampe enka no xanuata no ataka.
13Ka Moisesi iápuru ísï Ejiptu pirimu jimpo t'antsiraspti, ka ACHA úspti eska chúskutani ka erantskutani jurhiata antarakuarhu ísï tarhiapirinka, enka na erantepkia tarhiata chóchuechani juaspti. 14Ka Ejiptu uiniakurhasptiksï, xáni uánekuaksï chochuecha jamasïrempti, enka nómeni xanhaskorhepka, ka nómeni ixu urhepatini xanhaskorheati. 15Xáni uánespti enka p'apjantepka. Ka iámuksï arhaspti uitsakua ka amanhechakua anatapu akurhutaspti enka no xanuata ataapka. Enka Ejiptu xáni xunupentepka uitsakua o anhatapu, iámuksï arhaspti.
16Irecha uantap'aspti Moisesi ka Aaronini ka arhiaspti: ACHA chári Diósïni k'amanharintaska, ka cha jinkuni no sési úska.
17Kómu arhixakaksï enkats'ïni íni jimpo puáchentaka, tekachentsïtsïni ka ACHA Diósïni kómu arhije eskarini k'entitacheaka íni chóchuechani enkaksï xáni nósesi úcheni jaka.
18Moisesi jima uéntaspti enka irecha jápka, ka ACHAni kómu arhispti. 19Tátsekua ACHA uinhamentu tarhiataraspti, ka tarhiata chóchuechani iámu páspti ka japunta k'éri charhapitiru k'uanimaaspti. ¡No ma chóchu Ejiptu pakarasti! 20ACHA, irechani mintsita chúperakuspti ka ima inchats'ïmantaspti ka no jurak'uaspti Israeli uáp'echani nirani.
Iámu páp'akantespti.
21ACHA, Moisesini arhispti:
Ják'i auantarhu ísï karhata, ka Ejiptu xáni taiapiti páp'akanteati enka k'uiripu no uáka iáni exeni.
22Ka Moisesi tarhataspti ják'i auantarhu ísï ka tanimu jurhiatekua Ejiptu kánekua taiapiti páp'akantespti. 23Tanimu jurhiatekua nóksï úsïrempti exép'erani, tanimu jurhiatekua no nema manakorhespti, ka jima enkaksï Israeli uáp'echa irekapka jima jukaspti erak'utakua.
24Tátsekua irecha Moisesini uantap'aspti ka arhispti:
Ni je ACHAni marhuakuni ka pát'aje chári sapichani, chári karichichani ka uákasïchani ixu jarak'ua je.
25Ka Moisesi arhispti: ¡T'u jamperi jatsiska intskuani manakorherichani enkani jucha ACHA juchari Diósïni kéts'ïtakuaka!
26Juchari manakorhericha jucha pát'auaka, no pakaraati ni ma manakorheriri ték'i, jucha mankorherichani ACHAni úrauaka k'étsïtani, ka nóchi míteska néna kéts'ïtakuni, jimachi niaratini míteakia.
27ACHA, irechani mintsita chuperakuspti, ka ima inchentimespti no jurak'uani nirani; 28irecha ikiaspti ka arhispti Moisesini:
¡Kéntikucherini! ¡Ka ásteru méni jama xarhacheni! Ima jurhia enkarini xarhacheska, jíkini uantitarkorheaka.
29Ka Moisesi arhispti:
Ísï eskari na uantaka, ¡Nóterukini méni exeaka!
Currently Selected:
Éxodo 10: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
