Éxodo 9
9
Uákasïchaksï iámu uarhispti
1Tátsekua ACHA, Moisesini arhispti: Ni irechani exeni ka arhi: ACHA, Israeli anapuecheri Diósï uantasti: Jurak'ua nirani jucheti iretani eskats'ïni marhuacheaka.
2Enkari útasï p'ínkuani jaka, ka nóri jurak'uani nirani, 3ACHAkini ikimeati ka manakorherichakini enkari xáni úatarhu jatsiaka iámu uantikucheauati, tekechuechani, ch'anchakichani, kameiuchani, uákasïchani, karichichani, ka iámukini k'amantskacheati. 4Ka ACHA erakuauati manakorherichani Israelicheri ka Ejiptu anapuecheri, ka nóma Israeliri mananorherini uántikuati.
5ACHA uantarixati na enka jatini ísï úkorheaka, ka uantaspti:
Ji ACHA pauani ísï úaka íni k'éri iretarhu.
6Ka pauantekuarhu ACHA, iámentu ampe ísï úspti, Ejiptu anapu manakorherichaksï iámentu uarhispti, ka Israeli anapuecheri manakorheri nóma uarhispti. 7Irecha axaspti exerkorheni, ka jimaksï exespti eska Israeli anapuecheri manakorheni nóma uarhispka. Irecha inchantimentaspti ka sánteru no jurak'uspti iretani nirani.
Iámu xuta jukarhekorhenhaspti
8Tátsekua ACHA, Moisesi ka Aaronini arhispti: Parhankuarhu t'upuri jápu ma kunuk'urhakua p'itap'a je, ka eska Moisesi irecha japantiru k'uanincheaka.
9T'upuri jápu, t'upuri úkorhentaati ka iámu Ejiptu antatseraati ka k'uiripuechaksï ka manorherichani no sési úkuauati iámu xúta antatanhaati ka iuani jatats'ïati.
10Moisesi ka Aaroni t'upuri jápu p'itap'aspti ka irecha japantiru k'uaninchespti, ka k'uiripu ka manakorhericha xúta jukanhaspti ka iauni jatats'ïspti. 11Ka xerpirichaksï no úspti Moisesini antani, jimpokaksï imat'u jukarhekorhespka ka ístu Ejiptu anapuecha. 12ACHA úspti eska irecha inchantimepirinka ka eska no jurak'uapirinka nirani, eska na arhipkia Moisesini.
K'éri ma xanuaspti
13ACHA, Moisesini juramukuspti: Pauani xarhentku jauaraaka, ni niuakari irechani exeni ka arhiakari: ACHA, Diósï enka Ebreo anapuecheri Diósïka ísï uantasïnti: Intskua sésikua jucheti iretani nirani eskarini marhuacheaka.
14Jimpo enkari no intskuaska sésikua, iásï k'óru uánekua ikimekua axacheaaka chéti jántspirichani ka chéti iretani ka míteakari eska no jarhaska máteru diósï eska ji ma parhakpeni. 15Iásï sánterukini uánekua no sési ampe axacheaka, t'unkeni ka chéti iretani k'amantskantaaka. 16Jíkini íntskuska sésikua irekani, jimpokakini uékaska jucheti uinhapekua xarhatacheni, ka eskani ma parhakpeni mítenhapirinka. 17Ka útasïri, inchantimentaska jucheti iretani no íntsaani sésikua. 18Pauani i jantora úaka eska k'éri ma xanuauaka, nómeni xáni k'éri ma xanuasti Ejiptu enka xáni Ejiptueka. 19Ísï jimpo tánakorheanta manakorherichani ka iámentu ampe enkari xáni uérakua jatsika, jimpo ne enka k'uiripu o manakorheni no ióncheaka uarhiati.
20Máruksï irecheri jántspiricha ACHAeri uantakuani kurharini chéspti, ka nirasptiksï manakorherichani tanakorheantaani ka ionchetaani, 21ka imaksï enkaksï ísku kurhaapka ACHAeri uantakuani, nóksï tanantaaspti manakorherichani ka erankutichani. 22Tátsekua ACHA arhispti Moisesini:
Tarhata ják'ini auantarhu t'antsirani ísï, ka iápuru Ejiptu xanuaukati ka iámu xanuarheani manakorherichani ka erankutichani, ka iámu ataati uitsakuechani.
23Ka Moisesi auantarhu kuiruncheni ísï paspti, ka ACHA úspti eska k'érati Ejiptu piritapirinka ka kánekua xanuapirinka. 24Xanuaspti ka xanuata piritakua jinkuni jeuekurhispti, kánekua k'éri ma xanuaspti, en xani Ejiptueka nomeni xáni no sési janhaskorhespti. 25Ka xanuata iámentu ampeni enka xáni uérakua jápka ataspti, k'uiripuechani ka manakorherichani, ka uitsakuani iámu ataaspti ka p'ukurichani iámu ch'auantikuapsti Ejiptu. 26Goseni ménku no xánuaspti, jima enkaksï Israeli anapuecha irekapka.
27Tátsekua irecha, Moisesi ka Aaronini uantap'aspti ka arhiaspti: Iásï k'óruni no sési úska. ACHA sési ústi, ji ka jucheti iretasï no sési úti.
28ACHAni kómu arhije eska nóteru xáni k'érati piritakua chararaaka, ka eska nóteru xáni k'éri xanuataaka. Nóteru inchantimentaaka nóksïni jurak'uni nirani, iásï k'óru ni je.
29Moisesi arhispti: Íni iretarhuku enkani uékuntaska, ACHAni komu arhiaka ják'i tarhataparini, ka xanuata ka piritakua anhakuatseati, ísï míteaka eska ACHAeska echeri.
30Mítetixaka eskari t'u, ni chéti jántspiricha ACHA Diósïni janhanharhiaka.
31Uitsakua enka piruakua p'itanhak'a, ka ima enka trijueni jaxeka Sebada arhinka, xanuata iámu atasti. 32K'óru tríjuni ka máteru uitsakua enka piruakua p'itanhak'a imani xanuata no ataaspti jimpo jimaksï nótki antarasïrempka.
33Moisesi iretarhu uéakuntaspti jima enka irecha jápka, kómu arhispti ACHani ják'i tarhataparini, ka nóteru piritaspti ni xanuapi, niteru janipi. 34Enka irecha exepka eska ióskia, ménteru inchantimentaspti ka no jurak'uaspti nirani, níksï imecheri jántspiricha uékapi eskaksï nipirinka. 35Irecha inchantimentaspti ménteru no jiaretaani niran, Israeli uáp'echani, ísï eska ACHA na Moisesini arhirini japka.
Currently Selected:
Éxodo 9: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
