Éxodo 12
12
K'uinchekua enka mianhantka enkaksï p'imutanhantapka
1Acha, Moisesi ka Aaronini uantaxekuspti Ejiptu ka arhiaspti:
2I kutsï, chári jimpo jinteuati, kutsï enka uénaaka ma uéxurhini. 3Arhia je iámu Israeli iretarhu anapuechani: Eska tempeni jurhiatekua íni kutsï jimpo, iámentu tatecha enkaksï márkuecharhu úrhetsïkutika, karichi sapichuni ma erakuaka, mántani karichi sapichu mántani márkuecharhu. 4Enka ma k'umanchekuarhu no uánekua irenhaaka, ka exeniksï no úni k'amachani karichi sapichuni, tate enka k'umachekuarhu úrhets'ïkuk'a niuati máteru márkuechani jimak'u ísï anapuechani arhiani eskaksï márku úkorhentaaka, ka eskaksï exeaka na enka sési arhustanhaaka karichi sapichu iámentuecha séskueni arhani. 5Karichi sapichu arisï jaxeati: Eska no kutsïtiuaka, eska ma uéxurhini jatiriuaka ka enka sési jáxeaka ka imari erakuaka enkaksï uánekua karichicha jaka. 6Karichi sapichuni arhuta ka patsa je, témpeni t'ámu jurhiatekua íni kutsï, imani jurhiatekua iámentu Israeli anapuecha karichi sapichuni tirimarhantu ka chúrekua jamperi uántikukorheati. 7Iurhiri sáni p'iku je ka anhamarhekuechani enka mikuani p'ínkuni jaka, jima atamuta k'umachekuarhu enkats'ï t'ireaaka. 8Chúrekua ka t'ipakata ántsï je, kurhinta no xarhipiti jukari jinkuni, ka xakua k'ameri jinkuni. 9K'uiripeta sési ninirakateuati ka no jamakateuati, ni churhipu úkata, uirixatateuati ép'u, jantsiricha ka sïturhi ampe. 10Enka xáni pakamunhaaka, enka jámeri jurhiatekua antaraska, t'uini iámu kurhiraia. 11Xukuparhakua jukantatini, kuarhachi inchanturhatini ka tenhexkorhekua jupikatini t'ire je ka sóntku t'ire je, jimpoka ACHAeri nitamakua k'uinchekueska. 12Imani chúrekua ji ACHA Ejiptu parhiakuaka, ka iámentu tata enkaksï úrheta antap'ekuka atauaka, k'uiripuni ka manakorherin, ka Ejiptu anapu diósïchani maimpetaraaka.
13Ka iurhiri enkats'ï atamutaaka, ji exerini míteaka eska cha jima jarhaska, ka no anhaxurhiaka jima, ka jima no jauati uarhikua ka jima no nósesi úkorheati. 14Ampe enka imani jurhia úkorheaka, ásï méni mirikurhi je, ka ni eska chári sïrukua mirikurhiaka, ACHAntsï k'uínchekua úkuntaaka, memechani uéntani ka eska juramueni pakaraaka. 15ACHA uantaspti: Iúmu tsimani jurhiatekuats'ï kurhinta no xarhipiti jukari auaka, uénani jamani miuni iúmu tsimani jurhiatekua eska chári k'umanchekuarhu no jauaka xarhiperakua, ka k'amarhukuni jámperi iúmu tsimani jurhiatekua, enka nema arhaska kurhinta xarhipiti jukari, ima petaparhatanhantaati ka nóteru Israeliuati. 16Uénani jámani iumu tsimani jurhiatekua, tánkorhentaakats'ï jinteni uantatsekorhecheni, uénani ka k'amarhukuni jamani jurhiatekuechani tánkorhentakats'ï, no nema ánchekorheati, imak'uksïsï ánchekorheati enka úmantaaka. 17K'uínchekua úntsï je kurhinta no xarhipiti jukariri, jimpoka ima jurhiatekuespti enkaksïni Ejiptu kéntitapka, chári sïrukuechaksï méntku ísï miantaati i jurhiatekua. 18Ma kutsï inchamani, tempeni t'ámu jurhiatekua ka ma ekuatse ma jurhiatekua xatini jimpo, kurhinta no xarhipiti jukari imantsï auaka. 19Iúmu tsimani jurhiatekua, nóts'ï jatsiaka xarhiperakua k'umanchekuarhu. Enka nema kurhinta xarhipiti jukari auaka, no ixu anapu o ixu anapu, chúnhaati jima ueratini enkaksï Israeli anapuecha jaka. 20Nóts'ï jamaaka ampe arhani enka xarhipiti jukariuaka, nani uék'its'ï irekani jarhani, kurhinta no xarhipi jukari aje.
21Tátsekua Moisesi iámentu tata k'ératichani Israeli anapuechani uantap'aspti ka arhiaspti: Ni je ka karichi sapichuni ma eraku je, táchani márkuecha ka kéts'ïta jiáni enkats'ï p'imutanhaaka. 22Ch'akxarhuéni jásï uitsakua p'ikuje ka iurhiri atarhuta je, imani iurhiri enkats'ï taporhukuka ka tsimani amanharhekuechani enka ómukuani p'ínkuni jaka atarhea je. No nema uéraati chéni jempo imani jurhiatekua. 23Jimpoka ACHA, Ejiptu ísï nitamaaka ka atauati uantikuani Ejiptu anapuechani, enka ACHA eramutaaka iurhiri amanharhekuarhu jima anapuechani nóma ampe úkuauati. 24I juramukueni pakaraati, enka cha ka chári sapicha jatsiaka juramukuani méntku ísï kurhantirani. 25Enkats'ï na inchakuakia jima enkaksïni ACHA aiacheka, ísïts'ï úaka eska juramukua na arhik'a. 26Ka enkaksïni chári sapicha kurhamarheaka: ¿Ampe arhikuekasïni k'uínchekua?, 27Cháts'ï aiankuantauaka: ACHAeri kets'ïtakuesti, enka miánhantka, ima jurhiatekua enka ACHA, Ejiptu, Israeli anapuecheri k'umanchikuarhu eramutapka ka nitamapani ka nóts'ï uantikuni, ka Ejiptu anapuechani uantikuani. Israeli anapuechaksï tsérhukua antaskueraspti ka k'éri arhisptiksï.
28K'uiripu Israeli anapu niraspti ka iámentu ampeksï ísï úspti eska ACHA na Moisesi ka Aaroni juramukupka.
Uáp'a tata urhetichaksï uarhispti
29Teruk'ani chúrekua, ACHA iámentu tataka urhetichani Ejiptu anapuechani ataaspti uántikuani. Iámuksï uarhispti, irecha uáp'a enka juramukuarhu niárapirinka ka k'ataka uáp'a jámperi enka urhetika. Ístuksï iámentu Ejiptu anapu manakorhericha enkaksï úrheti antap'enupka uarhispti. 30Chúrekuaksï irecha, ka imeri jántspiricha ka Ejiptu anapuecha jauaraspti, ka kánekua uénhaspti jima iápuru k'umanchekuarhu uarhiri jarhaspka. 31Imani chúrekua irecha Moisesi ka Aaronini uantap'aaspti ka arhiaspti: Íni iretarhu kéntiku je, ka Israeli uáp'echat'uksï kéntiku je, ni je chári ACHAni marhuakuni, ísï eskats'ï na kurhak'orheni jápka.
32Eskats'ï na kurhak'orheni jápka, pá je chári karichi ka uákasïchani. ¡Ka úch'akurats'ïni je jintentu!
33Ejiptu anapuechaksï arhiaspti Israeli uáp'echani eskaksï sóntku uéakupirinka Ejiptu, jimpokaksï uarhixapka chéni. 34Israeli anapuechaksï tsïreri takusïrhu ma jatsiakuspti, nóksï uékani eska ima xarhipirinka. 35Israeli anapuechaksï ísï úspti eska Moisesi na arhiapka, Ejiptu anapuechani kurhakuani tirhintikua, uék'achakua tiripiti ka mereari, ka ístu takusï ampe kurhakuani. 36ACHA úspti eskaksï Ejiptu anapuecha sési exeapirinka Israeli anapuechani, ka eskaksï Ejiptu anapuecha iámentu ampe íntsapirinka enkaksï xáni kurhakuapka, Israeli anapuechaksï ísï jámani iámentu ampe euakorheaspti.
Israeli anapuechaksï Ejiptu uéakuspti
37Israeli anapuechaksï Ramesesi k'éri iretarhu uéraspti ka Sukoti iretarhuksï niáraspti. Ma, ma irepeta ka témpeni ekuatse miliksïksï (600,000) nirasïrempti tatachicha xanharakorheni, no miuaparini sapichani. 38Mámaru jasï k'uiripu niraspti uékuni, jima anapuecha ka no jima anapuecha, ka karichi ka uákasïchani pát'asptiksï. 39Ejiptu anapuechaksï arhiaspti eskaksï sóntku uéakupirinka jima, ka nóksï jamperi úspti t'irekua pát'akorheni, tsïrerik'uksï pát'apti ka tsïreri nótki xarhipesïrempti, ka imaniksï kurhinta úraspti.
40Israeli anapuechaksï ma irepeta ka ma ekuatse ka témpeni (430) uéxurhini Ejiptu irekaspti, 41ima jurhiatekua enkaksï antakutapka ma irepeta ka ma ekuatse ka témpeni (430) uéxurhini, Ejiptu uéakusptiksï. 42Imani chúrekua ACHA Israeli uáp'echani Ejiptu p'imutantaaspti. Ísï jimpo iámentu chári sïrukuecha eskaksï no méni mirikurhiaka.
K'uínchekueri enkaksï uéakupka juramukua
43ACHA, Moisesi ka Aaronini arhispti: I jintesti k'uínchekua enkats'ï uékupka juramukua. Uérakua anapu no úati arhani karichi sapichuni.
44Jántspiri tumina jimpo piákata ima uáti arhani, enka na sïkuiri p'ikuts'ïkumenhaakia. 45Imat'u no uáti arhani enka uérakua anapueka o enka ánchekorhentku nirak'a jima. 46K'umanchekuarhu anhati karichi sapichu, ka no sáni petanhaati k'uiripeta, ka no ma úni k'epekunhaati. 47Iámentu Israeli anapuecha ísï uáti. 48Enka nema no jima anapu t'unkeni jinkuni irekaka ka uékani uékukueri k'uinchetani ACHAni, urheta sïkuiri p'ikuts'ïkue ka tátsekua uátirini k'uinchetani, ka jiáni uératini ísïuati eska Israeli anapu ma. K'óru nema enka nótki sïkuiri p'ikutsïkuni jauaka uáti ima k'uiripeta arhani. 49Juramukua mák'ueni marhuauati ixu anapuecha ka uérakua anapuecha enka cha jinkuni irekaaka.
50Iámentu Israeli uáp'echa ísï úspti eska ACHA, Moisesi ka Aaronini na arhiapka. 51Imani jurhiatekua ACHA, Israeli anapuechani Ejiptu p'ímutantaspti.
Currently Selected:
Éxodo 12: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
