ल़ेह-पेन 5
5
हननिया दाङ सफीरा
1हननिया माएँ मिह च्यी़ येहकें। ओहले खोगी पी़हमीगी मिहनदी सफीरा यिहन्गे। ओहले खुङ ङ्यी़गीॱआङ राहङगी स्यिहङ फेमा च्यी़ चोङसीन। 2ओहले खुङ ङ्यी़गी टे़ह क्याहप्ती चोङग्यो स्यिहङगी टाङगा सिपाज्यी राहङगी तेहन्दालाराङ खाजुम्बा पेहती पेह ज़्या़सीन। ओहले लेहमेन टाङगादी हननियागी ख्योङदी ल़ेह-पेनया़गी दिनला ज़्या़सीन। 3ओहजेला पत्रुसगी मासीन, “ए हननिया, नाम्पार-ताहक्पा थु ङ्याम्बु स्योप क्याहप्कें दाङ स्यिहङ चोङग्योगी टाङगा सिपाज्यी राहङ ङ्याम्बु ज़्या़गेन्गी ताम ती़ह गो-छ्येवागी काहन्डुमु पेहती ख्येगी सेमला काङ तेर्पा? 4स्यिहङ माहचोङबालाॱआङ ओ़ह स्यिहङ ख्येतीराङ येहकें। चोङ फान्ज्योॱआङ ओहलेगी ओहङग्योगी टाङगा ख्येतीराङ यिहम्बा। ख्येगी राहङगी सेमगी ने़जेबा तेर ख़ूज्ये येहकें। दि ल़ेहमु ल़ेह पेहकेन्गी साम्लु ख्येगी सेमला काहन्डुमु पेहती ओहङबा? ख्येगी मिहया़ला स्योप क्याहप्क्यो मिहम्बा, किन्ज्यो ङ्याम्बु गा स्योप क्याहप्क्यो यिहन।” 5दि ताम थे़-लुहङ मे़हबाराङ हननिया साला दाङे रिहल्दे स्यिसीन। दि ताम थे़गेन मिह थाम्ज्यी ज्यिबुराङ ज्यी़सीन। 6ओहले स्याराया़ लाहङदी रोहला रे़हगी तुम्दी फिला ख्योङदी साला पिहप्सीन।
7छ्युजी सुम तिङले हननियागी पी़हमी नाहङला ओहङसीन। ओहले हननियागी पी़हमी सफीराला राहङगी ख्योवा स्यिक्यो म़ेदी क्यी़ह म़ेहबा येहकें। 8ओहले पत्रुसगी, “ङाहला म़े ले, ख्या ङ्यी़गी स्यिहङ ओहजे टाङगालाराङ चोङग्यो यिहम्बा?” म़ेदी टी़हसीन। ओहले “लाहसो, ओ़हजेलाराङ चोङग्यो यिहम्बा” म़ेदी मोहगी मासीन। 9“ख्या ङ्यी़गी चो़वोगी थुला च्यिबे ङ्याहम च्येच्ये छोल्गे? त़ेदोङ, ख्येगी ख्योवाला साला पिहप्के मिहया़ नाहरे च्यी़राङ कोहला लेप सिहन्दी येह। खुङया़गी ख्येॱलाङ ओ़ह ल़ेहमुराङ पेहती साला पिहप्च्ये येह” म़ेदी पत्रुसकी मासीन। 10ओहजेला मोहॱआङ पत्रुसकी दिनलाराङ दाङे रिहल्दी स्यिसीन। ओहले स्याराया़ नाहङला ओहङसीन ओहले मोहॱलाङ स्यिक्यो थोङदी मोहगी रोह ख्येर्ती मोहगी ख्योवा पोहलाराङ साला पिहप्सीन। 11दि ल़ेहमु काहल फान्ज्यो छेन्छोककी#५:११ छेन्छोक : दि आङ-टा़हङला “छेन्छोक” म़ेदी माक्योदी चो़वो येशू मास्यीकाला यिह-छ्य़े पेहकेन यरूशलेमगी मिहया़ यिहम्बा। मिह दाङ दि ताम थे़गे मिह थाम्ज्यी ज्यी़दी का क्याहल्सीन।
याहम्जेन छ्येवागी ल़ेह दाङ ताक्छेनया़
12ल़ेह-पेनया़गी मिहया़गी पाहरक्यीला याहम्जेन छ्येवागी ल़ेहया़ पेहती माहङबुराङ ताक्छेनया़ तेन्गो येहकें। चो़वो येशूला यिह-छ्य़े पेहकेन मिह थाम्ज्यी सेम च्यी़ डी़दी सोलोमन माएँ कोहम्ज्युरला जोम्दी येहकें। 13लेहमेन मिहया़गी खुङया़ ङ्याम्बु टी़हज्येला आप-छ्ये मा़हखु। यिहॱनाङ मिहया़गी खुङया़ला ज्यिबुराङ चा़ पेहको येहकें। 14मिह माहङबुराङ, क्येप-ख्योवा दाङ पी़हमी-पेहजा ङ्यिकाराङगी चो़वोला सेमले खाल्दी खुङया़गी टाहङजीला खेन पा़हज्ये छ़ूसीन। 15मिहया़गी नेहपाया़ला लाहम-लाहमला ख्योङसीन, ओहले पत्रुस डोएँमु खोगी टिहप्सा च्यी़ यिहॱना़ खुङ नाहङगी रेहरे खाला क्याहप्च्यु म़ेदी तेङगो तिङदे ङ्याल तेर्को येहकें। 16यरूशलेमगी साहर-सुहरला येहकेन क्याहसालेगीॱआङ मिह माहङबुराङ ओहङसीन। खुङया़गी नेहपाया़ दाङ मेहचाङा नाम्स्यी स्य़ूहक्यो मिहया़ला ख्योङसीन ओहले खुङ थाम्ज्यी टा़हसीन।
ल़ेह-पेनया़ला तुहक्पु तेरक्यो
17ओहले पूजाहारी गो-छ्येवा दाङ खोगी रो़ह सदुकीया़गी ल़ेह-पेनया़ला ज्यिबुराङ ठादो पेहसीन। 18ओहले खुङया़गी ल़ेह-पेनया़ला ज़ुङदी चोन-खाङला लू़सीन। 19यिहॱनाङ ओ़ह कुहङमुराङ स्यिहङगामकी स्याहप्च्यी च्यी़गी चोन-खाङगी कोह खा फ़ेदी ल़ेह-पेनया़ला फिला ख्योङदी दि ल़ेहमु सुङ नाङसीन, 20“सोङ, छ्योखाङला लाहङदी दि मिहली साम्बागी तेहन्दाला मिह थाम्ज्यीलाराङ स्येतोङ।” 21ओ़ह स्याहल ङ्यिहन्दी खुङ ङाटुराङ छ्योखाङला काहल्दी मिहया़ला लोप्च्ये छ़ूसीन। ओहले पूजाहारी गो-छ्येवा दाङ खोगी रो़हया़गी इस्राएली गोबा थाम्ज्यीला छो़बाला क़े क्याहप्सीन। ओ़ह तिङले खुङया़गी ल़ेह-पेनया़ला चोन-खाङले तेन ख्येर-स्यो म़ेदी मिहया़ला ताङ चाहङसीन।
22यिहॱनाङ माक्मीया़ चोन-खाङला ओहङदी ताएँमुनी खुङगी ल़ेह-पेनया़ला माहथोङ। ओ़ह सोङबे खुङया़ लो़ह काहल्दी दि ल़ेहमु लेहङगु स्येसीन, 23“चोन-खाङगी कोहॱनी या़हबु पेहतीराङ क्याहप्क्यो दु, चोन-खाङ सुङगेन माक्मीया़ॱआङ कोहलाराङ लाहङदी तेहक्यो दु। यिहॱनाङ कोह फ़ेदी ताएँमुनी नाहङला सुॱआङ मिहन्दु।” 24ओहले छ्योखाङगी पोम्बो दाङ पूजाहारी छ्यिम्बुया़गी दि लेहङगु थ़े फान्ज्यो “ता़ह च्यि डोएँ यिहम्बानी?” म़ेदी खुङ ल़ेह-पेनया़गी तेहन्दाला थामा थोमे काहल्सीन। 25ओ़हजेलाराङ मेहन्दा च्यी़ ओहङदी, “सेन नाङदोङ, ख्या फे़बेया़गी चोन-खाङला लू़क्योगी मिहया़नी छ्योखाङला लाहङदी मिहया़ला लोप्च्युङ तेर्केनॱराङ येह” म़ेदी मासीन। 26दि ल़ेहमु थे़दी पोम्बो दाङ माक्मीया़ ल़ेह-पेनया़ला लेहन्ज्येला काहल्सीन। मिहया़गी तोह क्याहप्ती सेटो माएँ ज्यी़सुगी खुङया़ला ठो़ माहताङबा पेहती लो़ ख्योङसीन।
27ओहले खुङया़गी ल़ेह-पेनया़ला छो़बागी दिनला लाहङ च्य़ूसीन, ओहले पूजाहारी गो-छ्येवागी खुङया़ला टी़हसीन, 28“ङ्यिहगी ख्याला येशूगी छेनला सुॱलाङ च्यिॱआङ माहलोप म़ेदी माक्यो येहकें, यिहम्बानी मिहम्बा? त़ेदोङ, ख्याया़गी राहङगी लोप्च्युङया़ यरूशलेम काहङग्यालाराङ टाम्सीन दु। तोहरोङ, ख्यागी ओ़ह येशूला सेक्योगी ङ्य़ेहबा ङ्यिह थो़ला गा काल्ज्ये छोल्ग्यो दु!”#मत्ती २७:२५
29ओहले पत्रुस दाङ लेहमेन ल़ेह-पेनया़गी मासीन, “ङ्यिहगी मिहया़गी माक्यो तामला मिहम्बा, किन्ज्योगी सुङ नाङग्योकी स्याहलला गा ङ्यिहन कोहएँ। 30ख्या फे़बेया़गी क्याहङस्यीङला च्याङदी सेक्योगी येशूला ङ्यिहगी आख्ये मे़हमेया़गी किन्ज्योगी येहपाराङ सोम्बो ज़्याङ च्य़ू नाङसीन। 31इस्राएली मिहया़गी सेमगी स्या़बा पेहती तिहक्पालेगी कोहङदा ज्योर्च्यु म़ेदी किन्ज्योगी येशूला थार्पा नाङगेन क्याहल्बु ज़ो नाङदी राहङगी योबा ङो़गी ज़्य़ू-ठिला ज़्या़ नाङसीन। 32दि थाम्ज्यी तामगी ङ्यिह पाङबु येहबा, ओहले किन्ज्योगी राहङगी का ङ्यिहन्गेनया़ला नाङग्योकी नाम्पार-ताहक्पा थुगीॱआङ पाङबु नाङगेराङ येह।”
33दि ताम थे़दी गोबाया़ स्यिहताङगी मी़राङ माहथोङ, ओहले ल़ेह-पेनया़ला सेच्ये छोल्सीन। 34ओहजे ती़हजीला गमलिएल माएँ मिहन थो़क्यो फरिसी छो़बागी दिनला लाहङसीन। खो छ्य़े-ठिम ताङगेन्गी गोबा यिहन्गे सोङबे मिह थाम्ज्यीगी चा़ पेहको येहकें। खोगी ल़ेह-पेनया़ला याहम्बीज्यीगी तेहन्दाला फिला ताङ चाहङदोङ म़ेदी का नाङसीन। 35ओ़ह तिङले गमलिएलगी छो़क्यो गोबाया़ला मासीन, “ए इस्राएली रो़हया़, ओ़ह मिहया़ला ख्यागी च्यि पेहच्ये पेहक्यो? जेम्बु पेहतोङ! 36ङ्यिहमा तोबाज्यी तोहङले थुदास माएँ मेहन्दा च्यी़, ‘ङाह मिह छ्यिम्बु यिहम्बा’ म़ेदी थेन्ग्यो येहकें। ओहले मिह ज्य़िप्क्याजेगी खोला तिङ ङ्या़सीन। तिङले खोला टाहया़गी सेसीन, ओहले खोला तिङ ङ्या़एँ मिहया़ फेतोर कोहतोर काहल्दी खोगी मिहनराङ तोङदी काहल्सीन। 37ओ़हगी तिङले येहपाराङ गालीलगी यहूदा माएँ मिह च्यी़ मिहगी टाहङजी तुहएँ ती़हजीला थेन ओहङसीन। ओहले मिह माहङबुगीराङ खोला तिङ ङ्या़सीन। ओहले खोॱलाङ से फान्ज्यो तिङ ङ्या़एँ मिहया़ फेतोर कोहतोर काहल्सीन। 38ओ़ह सोङगोराङ ङाह राहङ फे़बेया़ला माउ येह, ओ़ह मिहया़ला च्यिॱआङ माहबे, खुङला ताङ चाहङदोङ। त़ेदोङ, दि ताम खुङ राहङगीराङ ज़ोक्यो यिहॱना़ खुङया़ तोङदी डोज्ये येह। 39यिहॱनाङ दि किन्ज्यो ङो़ले यिहन्सीमानानी ख्या फे़बेया़गी दि मिहया़ला का़ मी़हखुएँ। का़हलेॱआङ का़ज्ये पेहसीमाना ख्यागी किन्ज्योला टा़ह पेहक्यो म़ेदी ङोह स्ये़ज्ये येह।”
40ओहले छो़क्यो गोबाया़गी गमलिएलगी ताम ङ्यिहन्सीन। यिहॱनाङ, गोबाया़गी ल़ेह-पेनया़ला नाहङला क़े क्याहप्ती तुहङ च्य़ूसीन। ओहले, “येहपाराङ येशूगी मिहनला नाहमॱआङ लोप्च्युङ माहतेर” म़ेदी ताङ चाहङसीन। 41ओहले ल़ेह-पेनया़ येशूगी छेनला तुहक्पु दाङ स्ये़हन्डील खुर्च्ये सी़हसीन माएँ तामला ज्यिबुराङ क़ेहनाङ पेहती छो़बा क्याहप्क्यो ग्या़लेगी फिला थेन्दी काहल्सीन। 42ओहले ङ्यिहमा टाहङमा छ्योखाङ दाङ मिहया़गी खाङबा-खाङबाला काहल्दी, “येशूॱराङ थार्पा थोप च्य़ू नाङगेन मास्यीका यिहन” म़ेदी लेहङगु या़हबु स्येच्ये माहक्युर।
Currently Selected:
ल़ेह-पेन 5: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
