ल़ेह-पेन 4
4
पत्रुस दाङ यूहन्नाला ज़ुङग्यो
1पत्रुस दाङ यूहन्ना मिहया़ ङ्याम्बु दि रोहवा पेहती ताम मे तेहकेमु पूजाहारीया़, सदुकीया़ ओहले छ्योखाङगी माक्पेन खुङसाला ओहङसीन। 2ओहले पत्रुस दाङ यूहन्नागी, “येशू टोहङदे येहपाराङ सोम्बो ज़्याङ नाङग्यो सोङबे लेहमेन मिहया़ॱआङ स्यिदीले येहपाराङ सोम्बो लो़हज्ये येह” म़ेदी मिहया़ला लोप्कें थे़गोराङ खुङया़ स्यिहताङ लाहङसीन। 3ओहले खुङया़गी पत्रुस दाङ यूहन्नाला ज़ुङदे नाहङबार च्युङ थु चोन-खाङला ज़्या़सीन, च्यिबेमाना ओहजेला नाहम सो-सिहन्दे येहकें 4यिहॱनाङ लोप्च्युङ ङ्यिहन्गेया़ नाहङला मिह माहङबुगीराङ येशूला यिह छ्य़ेसीन, ओहले यिह-छ्य़े पेहकेन क्येप-ख्योवाया़गी टाहङजी तोङरा ङाजे काहल्सीन।
5नाहङबार च्युङ खुङगी पूजाहारीया़, पोम्बोया़ ओहले छ्य़े-ठिमकी लोबेनया़ यरूशलेमला जोम्सीन। 6ओ़ह छो़बाला हन्नास माएँ गो-छ्येवा पूजाहारी, खोगी ङ्येहवा डोएँगी कैयाफा, यूहन्ना, अलेक्जेन्डर दाङ खोगी लेहमेन ङ्यिन्जेन-ङ्येहवाॱया़ङ येहकें। 7खुङया़गी पत्रुस दाङ यूहन्नाला छो़बागी दिनला ख्योङदी “ख्यागी का़हन्दी ओङ दाङ सुगी मिहनला दि कुच्या मिहला टा़ह च्य़ूक्यो?” म़ेदी टी़हसीन।
8ओहले नाम्पार-ताहक्पा थुगी काहङदी पत्रुसगी खुङया़ला मासीन, “मिहया़गी पोम्बो दाङ पूजाहारीया़ 9तिहरीङ ङ्यिहया़गी दि कुच्या मिहला टा़ह च्य़ूदी या़हबु ल़ेह पेहक्योगी तेहन्दाला राहङ फे़बेया़गी दि खोला काहन्डुमु पेहती टा़ह च्य़ूक्यो माएँ ताम राहङ फे़बेया़गी ङ्यिह लाहमले ङोह स्ये़ज्ये थु जे नाङसीन माना, 10राहङ फ़ेबेॱया दाङ इस्राएलगी मिह थाम्ज्यीला क्यी़ह ओहङज्यु, राहङ फे़बेया़गी दिनला लाहङदी तेहक्यो दि मिह नासरतगी येशू मास्यीकागी छेनला टा़हक्यो यिहम्बा। राहङ फ़ेबेॱयागीदी येशूला क्याहङस्यीङला च्याङदी से नाङसीन। यिहॱनाङ किन्ज्योगी येशूला टोहङग्यो ग्या़लेगी सोम्बो ज़्याङ च्य़ू नाङसीन। 11येशूगी तेहन्दाला सुङरापला दि ल़ेहमु म़ेदी प्री़हदी येह–
चिक्सो-खे़बाया़गी फेन मे़हथोएँ म़ेदी क्युर ज़्या़क्योगी तोह,
तिहरीङ ओ़ह तोहॱराङ ब्रामकी सुहर-तोह काहल्सीन।#भज ११८:२२
12चो़वो येशू च्यी़गी मिहम्बा लेहमेन सुगीॱआङ थार्पा थोप च्य़ू मी़हखुएँ। किन्ज्योगी येशूगी छेन मिहम्बानी जाम्बुलीङला लेहमेन च्यिॱआङ मिहन नाङदी म़ेह।”
13पत्रुस दाङ यूहन्ना माहङबु मा़हटाहबा मिह यिहन्गे यिहॱनाङ खुङ ङ्यी़गी मा़हन्ज्यीबा पेहती ताम मासीन। दि थोङदी मिह थाम्ज्यी ह्अ ल़ेहसीन। ओहले खुङया़गी पत्रुस दाङ यूहन्ना येशू ङ्याम्बुराङ तेहक्यो दु म़ेदी क्यी़ह ज्योर्सीन। 14यिहॱनाङ ओ़ह कुच्या मिह टा़हदी पत्रुस दाङ यूहन्ना ङ्याम्बुराङ लाहङदी तेहक्यो थोङगोराङ खुङगी च्यिॱआङ मा मा़हखु। 15ओ़ह सुङगोराङ खुङया़गी पत्रुस दाङ यूहन्नाला छो़बा नाहङले फिला सोङ म़ेदी ताङ चाहङसीन ओहले खुङया़दी टे़ह क्याहप्च्ये छ़ूसीन, 16“ता़ह दि मिहया़ला ओहराङ च्यि पेहच्ये? खुङगी पेहक्योगी याहम्जेन छ्येवागी ल़ेहया़ यरूशलेमगी मिह थाम्ज्यीगी क्यी़ह ज्योर सिहन्दी येह। ता़ह ओहराङगी दि तामला मिहम्बा म़ेदीनी मा मी़हखु। 17यिहॱनाङ, दि ताम लेहमेन मिहया़गी पाहरक्यीला टाहम च्य़ूज्ये मेहयोहङगे। ओ़ह सोङबे खुङया़ला ‘ता़ह यिहन्ज्यु येशूगी छेनला लोप्च्युङ सुॱलाङ माहतेर’ म़ेदी मा कोहकें म़ेदी टे़ह क्याहप्सीन।”
18ओहले खुङ ङ्यी़ला नाहङला क़े क्याहप्ती “ता़ह यिहन्ज्यु येशूगी छेनला सु ङ्याम्बुॱआङ ताम माहमा ओहले माहलोप!” म़ेदी ज्यी़-ङोर तेन्दी मासीन। 19ओहजेला पत्रुस दाङ यूहन्नागी मासीन, “ख्या फे़बेया़गी सुङ नाङग्योकी स्याहल ङ्यिहन्ज्ये नि किन्ज्योगी सुङ नाङग्योकी स्याहल ङ्यिहन्ज्ये, किन्ज्योगी दिनला का़हन्दी ठाबे यिहम्बा, ख्या फ़ेबेॱया राहङगीराङ साम्लु ताङ नाङदोङ ला़ह। 20च्यिबेमाना ङ्यिहगी थोङग्यो दाङ थे़क्योगी तामया़ मा़हमेबा पेहतीनी तेहॱराङ मी़हखुएँ।” 21दि थे़दी खुङया़गी खुङ ङ्यी़ला तोहरोङ ठो़ तेन्दी ताङ चाहङसीन। खुङया़गी पत्रुस दाङ यूहन्नाला ङ्य़ेहबा काल्ज्येला च्यिॱआङ तामया़ माहन्ज्योर च्यिबेमाना खुङया़गी पेहक्योगी याहम्जेम्बा ल़ेहया़ थोङग्यो सोङबे मिह थाम्ज्यीगी किन्ज्योला त़ेरा तेच्या फुल्गेराङ येहकें। 22दि रोहवा याहम्जेन छ्येवाच्यी पेहती टा़हक्यो मिहगी लो़ह, लो़ह-ज़्यिप-च्यु म़ेदीॱआङ ल्हाक्पु काहल्दी येहकें।
स्युक ज्योर्च्येला सोल्वाङ ताप्क्यो
23पत्रुस दाङ यूहन्ना ओ़ह ग्या़लेगी थेन्दी राहङ रो़हया़साला काहल्दी पूजाहारी छ्यिम्बु दाङ पोम्बोया़गी माक्योगी थाम्ज्यीराङ तामया़ खुङला स्येसीन। 24दि ल़ेहमु ताम थ़े फान्ज्यो खुङ थाम्ज्यीराङ रुहप्ती किन्ज्यो ङ्याम्बु दि ल़ेहमु म़ेदी सोल्वाङ ताप्सीन, “ओ़ ओङज्या छ्यिम्बु नोम्गेन्गी चो़वो किन्ज्यो!, साज्या, नाम्ज्या, छो-क्याहम्जो ओहले ओ़हला येहकेन्गी रेबेॱराङ से़हया़ राहङगीराङ ज़ो नाङसीन।#प्रस २०:११; नहे ९:६; भज १४६:६ 25किन्ज्योगी राहङगी नाम्पार-ताहक्पा थु लाहमले ङ्यिहगी चावा दाऊदगी स्याहलले दि ल़ेहमु पेहती सुङ नाङसीन,
‘लेहमेन क्यिहपाया़ च्यिबे स्यिहताङ पेहकें?
मिहया़गी स्यिती काम्बुगी तामया़ च्यिबे साम्लु ताङबा?#भज २:१,२
26किन्ज्यो दाङ किन्ज्योगी दाम नाङग्यो थार्पा नाङगेन मास्यीकाला टा़ह पेहच्येला
जाम्बुलीङगी क्याहल्बुया़ दाङ पोम्बोया़ ङ्याम्बुराङ जोम्दी येह’।”
27“तेहम्बाराङ राहङगी दाम नाङग्यो, राहङगी नाम्पार-ताहक्पा स्याहप्च्यी येशूला टा़ह पेहती हेरोद दाङ पन्तियस पिलातस खुङ ङ्यी़, ओहले लेहमेन क्यिहपा दाङ इस्राएलीया़ ङ्याम्बु दि क्याहसाला जोम्दी येहकें।#लूक २३:७-११; मत्ती २७:१,२; मर्क १५:१; लूक २३:१; यूह १८:२८,२९ 28यिहॱनाङ किन्ज्योगी ओङ दाङ थु ङो़ले किन्ज्योगी तोहङलेराङ साम्लु ताङ नाङग्यो ल़ेहमुराङ खुङया़गी ल़ेह पेहसीन। 29ओ़ चो़वो, खुङया़गी तेन्ग्योकी ज्यी़-ङोर ङो़ले ज़ी़-नाङदोङ। ओहले राहङगी सुङदेन स्युक छ्यिम्बु पेहती स्येच्येला राहङगी स्याहप्तो स्युहएँया़ला स्युक नाङदोङ। 30राहङगी योक्पुया़ला, राहङला स्याहप्तो स्युहएँ नाम्पार-ताहक्पा येशूगी छेनला नेहपाया़ला टा़ह च्य़ूज्येला ओहले याहम्जेम्बागी ल़ेहया़ पेहती ताक्छेनया़ तेन्ज्येला स्युक नाङदोङ।”
31दि रोहवा पेहती सोल्वाङ ताप सिहन फान्ज्यो खुङ छो़दी तेहक्यो ग्या़ युहङसीन। ओहले खुङ थाम्ज्यी नाम्पार-ताहक्पा थुगी काहङसीन ओहले खुङगी किन्ज्योगी सुङदेन मा़हन्ज्यीबा पेहती स्येती काहल्सीन।
यिह-छ्य़ेबाया़गी पी़मा क्युह
32यिह-छ्य़ेबाया़ सेम च्यी़, लो च्यी़ पेहती तेहको येहकें। खुङया़ नाहङला येहकेन्गी थाम्ज्यीराङ से़हया़ “दि ङाहती यिहन” म़ेदी मेहमाएँ येहकें, यिहॱनाङ खुङया़गी क्युह नोहरया़ पी़मा येहकें।#ल़ेह २:४४,४५ 33चो़वो येशू टोहङ नाङदी येहपाराङ सोम्बो ज़्याङ नाङग्योकी तेहन्दाला ल़ेह-पेनया़गी स्युक छ्यिम्बु पेहती स्येको येहकें, ओहले खुङ थाम्ज्यी थो़ला किन्ज्योगी काटीन येहकें। 34खुङया़ नाहङला सुॱलाङ च्यि से़हदीॱआङ कोम्बु मेहयोहङ येहकें, च्यिबेमाना काहजे मिहया़ स्यिहङगी ताहक्पु येहकें खुङया़गी ओ़ह स्यिहङया़ चोङदी, 35ओहले ओहङग्योगी टाङगाया़ ल़ेह-पेनया़ साला ख्योङगो येहकें ओहले खुङया़गी सु सुला कोहपु येहबा खुङला के़ह तेर्को येहकें।
36ता़ह साइप्रस क्याहल-खापगी लेवी माएँ क्यिहपागी योसेफ, खोला ल़ेह-पेनया़गी बारनाबास माएँ मिहन ज़्या़क्यो येहकें, (दि माक्यो तेहन्दादी लेहमेन मिहला निङरु दाङ स्युक क्ये च्य़ूएँगी मिह यिहम्बा।) 37ओहले खोगीॱआङ राहङगी स्यिहङ चोङदी टाङगा थाम्ज्यी ल़ेह-पेनया़ला चि क्याहप्सीन।
Currently Selected:
ल़ेह-पेन 4: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
