प्रेरितो काम 15

यरुशलेमो सभा

1ताहरेहे काही मांहे यहूदीया मेहेरोत आवीत पायहोह हीकाडूहु लाग्यु जोर मुसाआ रीतीवाही तुमाआ सुंताने होय ते तुमाहा उद्धार ने जोडनारू. 2पौलुस अने बरनबास तीयाम सहमत निमिले तेहलाम तीयाम एक वोडू वाद उबु रोला तेहलाम पौलुस अने बर्नबास तेहलूज त्याआं किबी होबती यांहा याआ समस्यांआ समाधानाकोता प्रेषित अने डाया यापो यरुशलेम माय मोकालीला कोता खरोज कोअयु. 3ते मंडली त्यापोरत मोक्ल्यीत जात ओमेत फनिके अने सामरिया यामरोत जात ओतलू आखे पायहोहो अन्य जाती मोनाहा परिवर्तनाआ विस्तारा सोबत सुवार्ता कोत तियाहा खुश कोईत ओते. 4फासाडी जांहा ते यरुशलेम माय पुग्या तेहलाम मंडळीना प्रेषितांनी अने डायु माहु त्याआं स्वागत-सत्कार कोअयु अने तिये त्याआरी परमेश्वराने जे किबी कोल्यु ओते ते आखे किबी तियाहा कोयु. 5यापो परुश्यांचा एक दल किबी विश्वासी उभे रोल्या अने कोयु, तियाआ सुंता अवश्य कोअयी जायलो अने तियाहा आज्ञा आप्यू जाअलो का मुसाचे नियमशास्त्राआ पालीत कोईओलो. 6याआ प्रश्नापो विचार कोइला कोअता प्रेषित तेहलूज डायु मांहे परस्पर एकठे उवे. 7एक जाखो वेल वादविवाद कोईलानंतर पेत्र उबु रोला अने तियाहा कोयु, पाहीही, तुमामे मालूमे होय का जाखो दियोआगाडी तुमामे परमेश्वर एक निवोड कोअयी ओती का माआद्वारे अन्य जाती मांहे सुवार्ता होमीजीलो अने विश्वास कोअनारू. 8अने मोनाहा ओलखिनारा परमेश्वराने आमाहा सन्मान तियाहा पण पवित्र आत्माआ वरदान आपित तियाआ संबधामे आपाआ साक्ष देखाडये, 9विश्वासाआ त्यापोरत तियाआ मोनाहां शुद्ध कोईत आमापो अने तीयाम काहीही भेदभाव देखाड्यो नाहा. 10तेहलाम ओमे शिष्याआ बोचीपे एक एहलो वोझो मेकीत ज्याहा आमाहा विसीत शकत नाहा अने आमाहा आगाडी डाये, तुमु परमेश्वरोओ परीक्षा काहा पालता? 11पोन आमाआ ताहा एहेलू विश्वास होय का प्रभू येशु कृपेणे जेहलो आमाहा तारण उवे होय तेहलूज आमाआं एहलो होय का तियाआ पण तारण उवे. 12यापो आखे जमाव ठावकू ओवयू अने बरनबास अने पौलाहा होमला लागाडीत तियाअ दिहरा अन्य जातीम रोत परमेश्वराने तीआद्वारे बेन अदभूत चिन्ह प्रकट कोल्यु ओते अने आश्चर्य काम कोल्यु ओते अने त्याआं वर्णन कोईत ओते.

याकुबोओ निर्णय

13त्याआं जांहा गोगीत उवे तेहलाम याकोब कोयो ओतु, ऐ, पाहीही माआ होमला, 14शिमोन लेतजा कोयु ओते का परमेश्वराने अन्यजातिमे किबी मांहोहो आपाआ नावाकोअता निवडीत आखाम पालील्यो केहलो प्रेम प्रकट कोल्यु ओते 15संदेष्ट्यांआ वचन पण त्याआरी मेळ बोअत्लू जेहलो का लेखिलो होय; 16“आय याआनंतर आवे, फासी आय उबु कोअही दाविदाआ कोजे पोडये होय, फासी फेडीत तियाआ खाडू बुजाडीन हीदू कोअनारू” 17याकोअता जे वाचले होय ते अन्य जाती जे आखे ओमे माआ नावो कोतल्ले तिये प्रभूआ होद कोईओलो, 18ए गोठी तेज प्रभू कोयो होय जी वर्षानुवर्षे याआ गोठीकोता तो प्रकट कोअत्लू. 19ह्याप्रमाणे माआ ओ निर्णय होय का आमाहा तियाअ माहुंहु जे अन्य जाती ओमेत ए परमेश्वराही वोलोलो होय, तियाहा त्रास आपुहू कायना, 20पोन जर आमाहा तियापो लेखित मोकलित का मूर्तीपोरोत अपवित्र कोयु खायलापोरोत सेटे रोअलो अने व्यभिचारापोरोत सेटे रोअलो गोलु दाबीन माअये गोयल्यु प्राणी याहा माहा खाअहू सेटे रोअलो अने रक्ताआ केधी खाऊ कायना. 21प्राचीन कालोलरोत मुस्साचे नियामशास्त्र प्रचार नगर-नगर माय होय हर एक शब्बाथ तेदीही मुस्साचे नियामशास्त्र प्रार्थना सभाम वाचले जात होय.

बिगर यहूदी विश्वासिही पत्र

22फासाडी प्रेषित अने डाये योग्य मंडली आरी खरोज कोअयु का तिआमेरीते किबी माहुंहु निवडीत यहूदा अने बरनबास त्याआरी अन्ताकीया मोक्ल्यीत जालो तेहलाम तियाहा बरसब्बास कोयु पौलुस अने सिलास ला निवडीत लेधलो ते पाहीमे आखे प्रमुख ओते. 23तिये तियाआ आथोमेहे ओ पत्र मोक्ल्यीत, तुमाआ पाही, डायु अने प्रेषित यापोरोत अन्ताकीया, सिरीया अने किलीकीया त्यापोरोत अन्यजाति पायहोहो नमस्कार मोकल्यीत. 24आमाहा जोयरोत होमल्यु होय का आमाहा न विचारामे आमामेरोत किबी माहु जात आपाआ शब्दामे तुमामे दु:ख आप्लु होय अने तुमाआ मनाहे अस्थिर कोल्यु होय. 25आमाहा आखाज परस्पर सहमत ओतगोयु ओ खरोज कोअयु होय का आमाहा आपामे रोत किबी माहुंहु निवडाआ अने आपाआ प्रिय बरनबास अने पौलुस त्याआरी तियाहा तुमाआरी मोकलित. 26ते ओच मांहे होय जिये आमा प्रभू येशु ख्रिस्ताच्या नावाकोअता आपाआ जीवापो उदार ओवल्यु एहलो ओते. 27आमाहा यहुदा अने सिलास ला मोकलित होय ते तुमामे आपाआ मुखोवाही याआ आखे गोठी कोअही. 28पवित्र आत्माहा ओ आखे मालूमे होय का तुमामे याआ आवश्यक गोठी व्यतिरिक्त दिहरा गोठीही वोझो तुमापो आवहू न आपलो, 29मूर्तीपो चढविलेले रोटू तुमु खाऊ, रक्त कायना अने गोलु दाबीन मारुहुपोत प्राणी अने व्यभिचार ह्यापोरोत सेटे रो जर तुमु याआ गोठीपो स्वताला सेटे मेकल्ये ताहा तुमाआ कल्याण उवे अने श्रेमकुशल उवे. 30ह्याप्रमाणे तियाहा मोकलित आप्लु अने ते अन्ताकीया जात पुग्या तियाअ जागापो तिये धर्म मिटीग हादिलो अने तियाहा ओ पत्र आप्लु. 31पत्र वासित तियाहा ओ प्रोस्ताहन जोडयेहे तियापो तिये आनंद कोअयु 32यहुदा अने सिलास जे ओ बेन खुद संदेष्टे ओते पाही तियाहा उत्साहामे कोईत अने दृढता प्रदान कोईत एक जाखो टाईमापोजा प्रवचन हिकाड्ये. 33त्याजागे किबी वेल थोबीलो बादमे पाहीही तियाहा शांतीपूर्वकाआ तियामेहे जागे फासी मोक्ल्यीत जिये तियाहा मोक्ल्यीत ओते. 34पोन सीलासाह तीही रोअलो हाजो लाग्यो. 35पौलुस अने बरनबास इये फासी किबी वेल अन्ताकीया माय कालीत अने जास्तीज दिहरा मांहाआरी तिये प्रभूउ वचनाआ शिक्षण आपित माहुंमे सुवार्ता प्रचार कोअयी.

पौलुस अने बरनाबास मेहे मतभेद

36किबी दिहो नंतर बरनबासला पौलाने कोयु, “आव, आपु ज्या-ज्या नगरामे आपु प्रभूउ वचनाचा प्रचार कोअयु होय त्याजागे आपाआ पायहोंआरी जात पाल्हू का ते नाहाकोत कोईत होय” 37बरनबासला वाटेम का मार्क कोयु योहानाई पण आपाआ आरी आवे. 38पोन पौलाहा ओ ठीक वाटेम का आपाआरी कोडाआ एन लेदलेए ज्याआपोरोत पंफूलिया माय तियाहा सोडये अने प्रभूउ कामोम तो त्याआरी रोला नाहा. 39यापो तियाअ बेनुमे तीव्र विरोध निर्माण ओवयू परिणामी ओ उवे का ते एक दिहरा त्यापोरोत अलग उवे बरनबास मार्क ला घेऊन पाअयोंआ जहाजापो साइप्रस साले गोये.

पौलुसोओ (सिलासोरी) दूसरी प्रचार यात्रा

40पौलुस सिलास ला निवडीत त्याजागेरोत निहित गोल्यो अने पाहीही तियाहा प्रभूउ अनुग्रह संरक्षणाम होफहोपिन आप्लु, 41तेहलाम पौलुस सिरीया अने किलीकीयहा यात्रा कोईत त्याजागे ओतल्या मंडळीना सुदृढ कोईत रोला.

Currently Selected:

प्रेरितो काम 15: NOINT

Highlight

Copy