प्रेरितो काम 14
14
पौलुस अने बरनाबासो इकुनियुम मेहे विरोध
1इकुनियुम मेहे ऐहलो उवे का ते यहुदीयाआ मंदिरोमेहे आरी-आरी गोये ऐहली गोर्दी उवी का ते यहूदी अने यूनानी बेनु मेहे खोब जोओ विश्वास कोअयू. 2पोन विश्वास नाहा कोअनारे यहुदीयाआ अन्यजाति मोन पाही वर्गा विरुद्ध दुषित कोल्यु. 3ते खूप दीही पर्यंत तीइही रोल्या अने आगाडी भरोसाआ निर्भीडपणे गोगीत ओते अने ते तियाआ आथोवाही चिन्ह अने अदभूत काम कोराळीत आपाआ कृपापो वचनापो साक्ष आपित ओतु. 4पोन नगरामेहे मांहुंमे फुट पोडीत गोयी ओती ह्याआ केते जोओ ताहा यहुदी जागे अने केते प्रेषिताहि ओतगोयु गोये. 5पण जांहा दिहरे जाती अने यहुदीया अपमान अने तियापो डोन्योमार कोइला कोअता आपाआ मुख्य याजकआरी तियाआ जागे नाह्ये, 6ताहा ते आव गोठीई होमजीत गोये, अने लुकवनिया प्रांतामे लुस्त्र अने दर्बे नगरामे अने आहाने पाहने प्रांतात निहित गोये 7अने तीइही सुवार्ता प्रचार कोहू लागाडीत.
लुस्रा मेहे एक लेंग्डू हाजु ओवयु
8लुस्त्रमध्ये एक मांहु बोहयु ओतु तो गुडावांही लेगडू ओतु तो जन्मापोतच लेंगडू ओतु कोईत तो केधी जातलू ने ओतू. 9तो पौलाहा गोठी कोअत्लू तेहलाम होमलित ओतु पौलाने तिया जागे टक लागाडी पाल्लये, का तियाहा हाजो उविला विश्वास होय, 10अने वोडा शब्दाम कोयु, आपाआ गुडापो वारुई उबु रो. 11माहु पौलाचे ओ काम पालीत लुकवानियाआ भाषम वोडा आवाजोमें कोयु, देव मांहाहा रुपोमे आमापो उतरित आव्ये होय. 12तिये बरनबासला ज्यूस अने पौलाहा हर्मास एहलो कोयु, काहाके तो गोठी कोअलाआ मुख्य ओतु. 13ज्यूसोओ मंदिराआ पुजारी जो तियाआ नगरआ आगाडी ओतु बोयलो अने मालू बाअनापाही लाविले अने ते माअहाआ आगाडी बलिदान कोईलो ओते. 14पण बर्णबा अने पौलुस प्रेषिताआ जांहा ओ होमल्यु ताहा आपाआ कापडे फाडीलो अने माहुंमे शिरून अने आयडीत कोहू लागाडीत, 15अरे माहुहू, तुमु नाहाकोत कोईत होय? आमाहा पण ताहा तुमा सारखा दुख हुख देखणारो मांहु होये आने तुमामे सुवार्ता प्रचार होमलित ओते का तुमु आव व्यर्थ वस्तुवाही अलग ओतगोयु जिवंत परमेश्वराही फिरा जीयेतीये होर्गा अने धोरती अने दर्या अने जे किबी त्यापोरोत बोनाडहि होय. 16तिये गोईल्या वेळेला आखे जातीही आपाआ-आपाआ सोडकोपो चालीलो आप्लु. 17तेबी पण तिये आपाआ माह साक्षी विरहित रोहू आप्लु नाहा पण तो हाजो कोईत रोल्या अने जुगोम पर्जन्य अने फोल आपनारो ऋतू तुमामे आपित तुमाआ मनाहे रोटू अने आनंदावाही कोईत रोला. 18ओ कोत पण तिये माहुंहु वोडा कठीनमेहे बलि तियाहा प्रयत्नाआ तोअये. 19फासाडी अंतुखिया अने इकुनियुम ईहिरोत केते यहुदी आव्ये तिये महुअ मोन वाडीत पौलाहा डोन्योमार कोअयु अने तो मोल्यु एहलो होमजीत तियाहा नगराबाहेर खेचीत टाकीत आप्लु. 20तियाआ भोवती शिष्य एखातेदेवतांहा तो उठ्यू अने नगरामे निहित आवयू फासाडी दिहरा तेदीही बरनबास आरी दर्बेस निहित गोल्यो.
सीरियाआ अन्ताकीया आवलोओ
21अने तिया नगरामे सुवार्ता कोहू अने शिष्य बोनाडीला फासाडी ते लुस्त्रा इकुनियुम अने अन्ताकीया मेहे फिरित आवये, 22अने शिष्याआ मनाहे स्थिर कोईत अने विश्वासामेहे स्थिर बोणीत रोअलाकाजे ओ कोत प्रोत्साहित कोईत रोल्या आमाहा वोडो दुख विसित परमेश्वरोओ राज्याम प्रवेश कोईओलो होय. 23फासाडी तिये हर एक मंडली डाये नियुक्त कोईत उपास आरी प्रार्थना कोअयी अने तिये ख्रिस्ताच्या आथोमेहे होपित आप्लु ज्यापो तिये विश्वास कोअयु ओतु. 24तेहलाम ते जाआत्लू पिसिदियामधून पंफूलिया पुग्या, 25फासाडी पिरगामध्ये वचन कोत इटली माय गोये, 26तीहीरोत ते जहाजाने अन्ताकीया माय गोये जीही परमेश्वरोओ कृपेमध्ये तियाअ कामा कोअता होपिल्ये गोये ज्याहा तिये पुरो कोल्यु ओते. 27तीही पोतडहु तिये मंडली एकठे कोल्यु अने जे किबी परमेश्वराने तियाहा पोरोत कोल्यु ओते ते कोत देखाये ओते अने ओ पण का तेहे परमेश्वराने जे अन्य जाती नाहा त्याकोअता विश्वासाआ दरवाजू उगाडीत आप्यू. 28तेहलाम ते शिष्याआरी जास्तीज दीही रोल्या.
Currently Selected:
प्रेरितो काम 14: NOINT
Highlight
Share
Copy

Want to have your highlights saved across all your devices? Sign up or sign in
Noiri (नोयरी) Bible by The Love Fellowship is licensed under Creative Commons Attribution-ShareAlike 4.0 License.