YouVersion Logo
Search Icon

प्रेरितो काम 13

13
बरनाबास अने शाउलोहो मुकल्या
1अन्ताकियाआ मंडली मेहे भविष्य कोनारा अने उपदेशक ओता जेहलो बरनबास अने शिमोन नीगर अने लुकीयुस कुरेनी अने चारुबी वुगरया देसाआ राजू हेरोदेसाआ सग्गू पाही मनाहीम अने शौल. 2जाहा ते उपास कोईत प्रभूहु उपासना कोईत ओते, तेहलाम पवित्र आत्मावांहि कोइतलु, माविषयी बरनबास अने शौल ला तियाअ कामा कोअता अलग को ज्याआ याकोअता आय तियाहा हादिलो होय. 3तेहलाम तिये उपास अने प्रार्थना कोईत तियापो आथे मेकीत आप्लु.
पौलुस पेल्ली प्रचार यात्रा
4आखरी तो पवित्र आत्माआ मोकलील्या सलुकीयात गोये अने तीहीरोत नावेपो सोडवीत कुप्रास गोये, 5अने सलमीस पेल, परमेश्वाराआ वचन यहुदीयाआ प्रार्थना कोआत होमल्ये योहान तियाआ सेवक पावर ओतु. 6ते तिया आखे बेटामेरोत चालीत पाफुस पर्यंत पुगीतगोयू तियाहा तीइही बर्येषु नावाआ यहुदी जादूटोणा अने ठोग साक्ष आपणारो मिल्यू. 7तो तीहीइ सुभेदार सिर्ग्य पौलुसो आरी ओतु, जो बुद्धीमान माहु ओतु तिये बर्णबा अने शाऊल आपारी हादीत परमेश्वरोओ वचन होमलिलो इच्छा उवी. 8पोन अलीम जादू कोनारू (तियाआ नावाआ अर्थ ओच होय) ईये तियाआ विरोध कोईत सुबेदाराआ विश्वासाआ थोबाडीला काम कोईत ओतु. 9तेहलाम शौलाआ ज्याआ नाव पौलुस पण ओते पवित्र आत्मावांहि पुरोओत ओतगोयु तिया जागे एक-एक लागाडी पालील्यो, अने कोयु, 10ओ आखे कापट्यांने अने हुशार डोआवाही पोईअला शैतानाआ पोऱ्या, अवघ्या धर्मिआ दुश्मन, नाहाकोत तू प्रभूउ हीदू मार्गाला विपरीत कोईत सोडविणारू नाहा काहा? 11ओमे पाला, प्रभूआ आथे तापो लाग्यू होय अने तू किबी वेल पर्यंत आंदलू रोही अने सूर्याला पालनारू नाहा तेहलाम लागेज थुके पोदिलाकोअत अने तियाआ डोआपो आंदारी आवयी अने तो इही तीही होद कोहू लाग्यू काहाके का कोडाआ तेबी आथे तोईत चाले एह्ली तियाआ परिस्थिती ओती. 12तेहलाम सुबेदाराआ जे उवे ओते तियाहा पालीत अने प्रभूउ शिक्षणापोरोत चक्कित ओतगोयु विश्वास कोअयु.
पिसिदियाआ आन्ताकिया मेहे पौलुसोओ उपदेश
13पौलुस अने तियाआ होबती पाफुस हून तारवात बोहित पंफूलिया पिर्गा इंही आव्ये अने योहान तियाहा सोडीत यरुशलेम ला निहित गोल्यो. 14पिर्गापोरोत आगाडी जात ते पिसिदियातील अन्ताकीयाम पुग्या अने शब्बाथाआ तेदीही प्रार्थना कोआत जात बोह्ये. 15नियमशास्त्राम अने संदेष्ट्याआ पुस्तकामेहे वाचल्यापोरोत सभास्थानात अधिकार्यांवाही कोत मोकल्ये, “ओ पाहीही, केधी मांहाहा शिक्षणा कोअता तुमाआ मोनामे किबी होय ताहा कोआ” 16तेहलाम पौलुस उबुरोत अने आताई खुण कोईत कोहू लाग्यू, इस्राएल मेहे, अने परमेश्वरोओ बिनारा, होमला, 17तियाअ इस्राएल मांहाहा परमेश्वराने आमा आगला डायाहा निवडीत लेदलेएने जांहा ते मांहे मिसर देशामेने दिहरा देशोओ ओतगोयु रोत ओनेतेह्लाम तियाआ प्रगती कोअयी अने पराक्रमी ओतु कोईत काढीत लेधलो. 18तो किबी सालीह वर्षापर्यंत जंगलामेहे त्याआं सहन कोईत रोला, 19अने कनान देशामेने सात जाती नाश कोईत तियाआ देश साडे चारहोव सालोमेहे तियाआ कनान देशामेने कोईत लेदो. 20याआ तिया तिये शमूएल संदेष्टा पर्यंत तियाहा न्याय कोअनारा ठेरवीही 21तियाआ तिया तिये एक राजा माग्ये तेहलाम परमेश्वराने सालीह वोर्हार्याकोअता बन्यामीन वंशजातील एक मांहु अर्थात कीश पुत्र शाऊल तियापो राज्य कोआडे. 22तिया तियाहा अलग कोईत दाविदाला तियाआ राजा बनविल्यो ज्याआ विषया माय तिये साक्ष आप्यी माहु एक मांहु इशायाआ पुत्र दावीद, माआ मोनाहारखे माहु मिल्यू होय तोज माआ आखी इच्छा पुरो कोअही. 23तियाआ वंशामेहे परमेश्वराने आपाआ प्रतिज्ञाच्या नुसार इस्राएल जागे एक उद्धारकर्ता अर्थात येशुहू मोक्ल्यीत. 24तियाआ आविलाआ आगाडी योहानाई इस्राएल माय मोन फेरवित बाप्तिस्मे चा प्रचार कोअयु. 25जांहा यूहन्ना आपाआ सेवा पुरो कोईलापो ओतु, तेहलाम तिये कोयु, तुमु माहु नाहाकोत होमजीतेहे? आय तो नाहा, नहाते पाला माआ नंतर एक आविलो होय तियाआ गुडाहा बुट पण काडीला आय योग्य नाहा. 26ओ पाहीही, तुमु जे अब्राहमोओ पोऱ्ये होय, अने परमेश्वरा आगाडीही रोडतले तुमाही याज उद्धाराआ वचन मोक्ल्यीत होय. 27काहाके का यरुशलेमाआ रोनाराहाआ अने तियाआ मुख्य याजकवाही तियाहा ओलखे नाहा अने संदेष्टाआ गोठी होमज्या नाहा जे हर एक शब्बाथाआ तेदीही वाचले जातेहे याकोअता तियाहा दोषी ठेरवीत तियाअ गोथिहिई पुरो कोल्यु. 28तिये माईत ताकिला कोअता योग्य दोष तीयाम जोड्यू नाहा तेबी पिलातुसोपोरोत विनंती कोअयी का तियाहा माईत टाक्ये जालो. 29जांहा तिये तियाआ विषयामे लेखल्यी आखे गोठी पुरो कोअयी का तियाहा वधस्तंभाआ वरून उतारीत कब्रोमेहे मेक्ल्ये. 30पोन परमेश्वराने तियाहा मोल्यामरोत जिवंत कोल्यु, 31अने ते तियाहा जे तियापरोत गलील रोत यरूशलेम आव्ये ओते जाअखो दिहेजा देखाहे रोला माहूक आगाडी ओमे तोज साक्षी रोल्या होय. 32आमू तिया प्रतिज्ञाच्या विषया माय जी आगला आरी कोअयी गोयी ओती तेज सुवार्ता होमलाड्यू, 33का परमेश्वराने येशुहू जिवंत कोईत तेज प्रतिज्ञा आमा सतानासाठी पुरो कोअयी जेहलो का दिहरा स्तोत्रसहिता माय पण लेखिलो होय, “तू माआ पुत्र होय, आज तू माहु जोल्मो आप्यू होय” 34अने तियाआ याज रीतीवाही मोल्यामरोत जिवंत कोण्याविषयी माय पण का तो केधीज साधिलोओ नाहा तिये ऐहलेच कोयु, आय दाविदाउपोओ पवित्र अने न सेलाणारी कृपा तुमापो पण कोअही. 35याकोअता तिये एक फासी स्तोत्र सहीतामेहे कोयु होय, तू आपाआ पवित्र जोह सोडुहू आपी नाहा. 36कोईत दाविद ताहा परमेश्वरोओ इच्छेनुसार आपाआ टेमे सेवा कोईत हुवीत गोल्यो अने आपाआ पूर्वजांमेरोत जात मिल्यू अने होडीत पण गोल्यो. 37पोन परमेश्वराने ज्याहा जिवंत कोल्यु तो होडहु शकला नाहा. 38याकोअता ओ पाहीही, तुमु पण होमजीत ल्या का याआमे त्यापोरत पापाआ माफी घोषणा तुमामे आप्यी जात होय. 39अने ज्या गोठीमेहे तुमु मोशेए नियमशास्त्राआ त्यापोरत निर्दोष ठरू शकत नाहा तियाआ आखामे हर एक जोओ विश्वास कोअनारू तियाआ त्यापोरत निर्दोष ओलखिणारा. 40याकोअता सावध रो एहलो ओवुहू कायना का संदेष्ट्याआ पुस्तकांमेहे आव्ये होय ते तुमापो न आवे. 41ऐ निंदा कोअनारावाही, पाला अने आश्चर्य को अने निबरीत जा, काहाके आय तुमाआ दिहोमे एक काम कोअत्लू एहलो काम का केधी कोडु तुमाही तियाआ चर्चा कोअयेते केधी तुमु विश्वास कोअनारू नाहा.
आन्ताकिया मेहे पौलुस अने बरनाबास
42तियाआ बारथे निधाआ टायमोमें मांहे तियाहा विनंती कोहू लागाडीत का आगाडी शब्बाथाआ तेदीही आमाहा ए गोठी फासी होम्लाड्यू जावा. 43जांहा मंदिरो मिटीग समाप्त उवी तेहलाम यहुद्यातील अने भक्तीमान यहुदी यामेऱ्या बहुतेक मांहे पौलुस अने बर्णबा याहा फासाडी गोये एने तिये तियाहा गोठी कोत होमजाद्योहो का परमेश्वरोओ कृपेमध्ये रो. 44आगाडी शब्बाथाआ तेदीही नगराहा बहुतेक मांहे परमेश्वरोओ वचन होम्लाड़लो कोअता एकठे ओतगोयु गोये. 45पोन यहुदी गोर्दी पालहु हेवाकोइत पोईत गोये अने निंदा कोअताज पौलुसच्या गोठोही विरोधाम गोगू लागाडीत. 46तेहलाम पौलुस अने बर्णबा आरी न बिकर्या कोहू लागाडीत, “आवश्यक ओते का परमेश्वरोओ वचन पहीले तुमामे होमल्ये जेहे कोइत जांहा तुमु तियाहा द्र कोईत आपत्ले अने आपाहा सार्वकालिक जिवनाआ योग्य ठरावीत नाहा ताहा पाला आमाहा अन्य जातीमेहे फिरीवलो.” 47काहाके का प्रभूऊ ए आज्ञा आप्यी होय का, “आय ताहु अन्य जातीकोता प्रकाश एहलो ठेरवीही होय, काहाके तू धरतीई आखिर पर्यंत उद्धाराआ बायणो होय.” 48ओ होमलित अन्यजाति आनंदाम उवे अने परमेश्वरोओ वचनाचा गौरव वर्णवू लागे एने आपारी सार्वकालिक जीवना कोअता ठेरवीही गोये ओते तिये विश्वास कोअयु. 49ताहा प्रभूऊ तियाअ आखे देशामेने पसरू लागाडीत. 50यहुदीयाआ भक्तीमान अने मोडो बोअयीही अने नगरामेहे प्रमुख माहुंहु चिथाळ्ये अने पौलुस अने बरनबास विरूध छळ कोईत तियाहा आपाआ सीमापार काढीत आप्लु. 51ताहा तेए तियाआ आगाडी आपाआ गुडाआ धूळ फोकडीत इकुनियुम निहित गोये. 52अने शिष्य आनंदावाही अने पवित्र आत्माआ पुरोओत उवनारा गोये.

Highlight

Share

Copy

None

Want to have your highlights saved across all your devices? Sign up or sign in