प्रेरितो काम 12

हेरोदेसोओ हिंसा

1ती वेले हेरोदेस राजा बी मंडली पोओ काही जाणा पोओ दोमीला कोअता त्यापोओ आथ टाक्यु. 2तिये योहानाआ पाही याकोब याहा तलवारीकी माईत टाकिलाकोअता लागाडले. 3जांहा तिये पालील्यो का यहुदी मांहे जीयेतीये आनंदाम ओये तेहलाम तिये पेत्राहा पण तोईत लेधलो तेदीही बेखमीर रोटाआ ओते. 4तिये तियाहा जेलूम कोईत तुरुगामे टाक्ये, अने चोर शिपायामेहे चोर पहाराम मेकल्ये आव विचाराआ का वल्हाडण तीवारे उवेताहा तियाहा मांहाहा आगाडी लेतावे.

पतरसो बंदीगृह सी छुटकारु

5बंदी कोअमे पेत्र जेलूम ओतु परंतु मंडली एकाग्रतेने परमेश्वराही प्रार्थना कोईत ओते. 6जांहा हेरोद तियाहा माहूक आगाडी अनावर ओतु तियाआ राती पेत्राहा बेन हाकूलवाही बांध्यू बेन शिपाया माय हुव्यू ओतु अने रखवाली कोआ बाअनापो जेलों कोआ रक्षण कोईत ओते. 7पाला, प्रभूआ एक स्वर्गदूत आविलो उबु रोला अने तियाअ जेलूम प्रकाश सोमक्यू अने तिये पेत्राआ खांदापो आथे थापटून तियाहा उठाडीलो अने कोयु, उठ, वेगु को, अने तियाआ आथोम रोत हाकूल उगाडीत खाडी पोड्यो. 8तेहलाम स्वर्गदूत तियाहा कोयु, कोमोर बांध अने आपाआ बूट कालीत ले, अने तिये तेहलूज नंतर तिये कोयु, आपाआ कापडे कालीत माआ फासाडी आव. 9तो निहित तियाआ फासाडी गोल्यो परंतु ओ मालुम निमिले काजे किबी स्वर्गदूत कोईत ओते ते होपनो होय नहाते ओ होमजाडीत होय का आय दर्शन पालीत होय. 10तेहलाम ते पोयतो अने राखोन उनकीत तियाअ लोखंडाआ फाटकापो पुग्या जे नगराही होय तो त्याकोअता आपोआप उगाडीत गोल्यो अने ते निहित एकाच वाट चालीत गोये अने लागेज स्वर्गदूत तियाहा सोडीत निहित गोल्यो. 11तेहलाम पेत्राई पाहीपो आविलो कोयु ओमे आय खोरो ओलखीत लेदो होय का प्रभूऊ आपाआ स्वर्गदूत मोकलित माहु हेरोदाआ आथोम रोत सोडवीत लेधलो, अने यहुदीयाहा आखी आशा तोडीत आप्यी होय. 12ओ ध्यानाम आवेताहा तो तियाअ योहानाहा याह्ही मरियाआ कोआ आवयू जो मार्क कोअहो जात्लू तिही जाअखो मांहे एकठे प्रार्थना कोईत ओते. 13जाहा तिये दरवाजाआ कोडी खिडकी ठोकीही रुदा नावाआ दासी पालुहू आवयी ओती. 14पेत्राआ शब्द ओलखीत तिये आनंदाआ आगाडी फाटक उगडालू नाहा, परंतु गुगदिलो विसमे गोयी अने कोयु का पेत्र बाअनापो उबु होय. 15तिये तियाहा कोयु, तू वेढी उवी होय, परंतु ती खात्रीवाही गोगल्यी ऐहलेच होय तेहलाम तिये कोइतलु, तियाआ स्वर्गदूत होय, 16पोने पेत्र देताच ओतु आखरी तिये खिडकी उगडाव्यी अने तियाहा पालीत आश्चर्य चक्कित उवे, 17तेहलाम तिये तियाहा ओतु कोईत इशारु कोअयु का ठावकू रो, अने तिये कोयु का प्रभूऊ तियाहा कोडला रीतीवाही तियाहा-तियाहा जेलूमाने काढीत लाविले फासाडी कोयु, याकोब अने पायहोहो ए गोठी कोत द्यायची फासाडी तो दिहीरा जागापो निहित गोल्यो. 18वेगी शिपायामेहे कापाली उडाली का पेत्राआ नाहाकोत उवे. 19जांहा हेरोदावाही तियाहा होदिलो अने मिल्यू नाहा राखवाली कोनाराहा तोपासित आज्ञा आप्यी का ते माईत टाक्ये जाय अने ते यहुदीयाहा सोडीत कैसरीयामे आविलो रोल्या.

हेरेदेस कीड़ा पोडित मोअयु

20हेरोद सोरकरांवर अने सीदोन माहाहूपो जास्तीज अप्रसन्न ओतु याकोअता ते एकचित ओतगोयु तियाआ जागे आव्ये अने बलस्त याआ जोराट्यांचा एक कर्मचारी ओतु तियाहा होमजाडीत मेल कोहू इच्छिता काहाके राजाहा देशामेने तियाआ देशोओ पालीत पोषणाआ उवनारा ओते, 21ठेरविल्ये दीही हेरोद राजवस्त्र कालीत सिहासनापो बोहयु अने तियाहा भाषण आपुहू लाग्यू. 22तेहलाम मांहे आयडीत उठे ओ ताहा माअहा नाहा देवाआ शब्द होय 23तियाआ क्षणाला प्रभूउ होमला स्वर्गदूतांवाही लागेज तियाहा माअये, काहाके तिये परमेश्वरोओ गौरव आप्लु नाहा अने तो किडे लागित मोईत गोल्यो. 24परंतु परमेश्वरोओ वचन वोदतो अने फैलीत गोये. 25जाहा बर्णबा अने शाऊल आपाआ सेवा पुरो कोअयी ताहा योहान जो मार्क कोअहो जात्लू आरी घेऊन यरुशलेम ला गोल्यो.

Currently Selected:

प्रेरितो काम 12: NOINT

Highlight

Copy