માર્ક 11

ઇસુ યરુશાલેમ શેહેરુમે જાહે

(માથ. 21:1-11; લુક. 19:28-40; યોહ. 12:12-19)

1જાહાં ઇસુ આને તીયા ચેલા યરુશાલેમ શેહેરુ પાહી આલા, તાંહા તે બેથફગે આને બેથેનિયા બાર્યા ગાંવુ પાહી પોચ્યા, તે ગાંવ જેતુનુ ચાળવાવાલા ડોગુ પાહી હાય આને તીયાહા તીયા ચેલામેને બેન ચેલાહાને ઇ આખીન મોકલ્યા કા, 2“તુમુહુ હુંબર્યા ગાંવુમે જાઅ, આને તીહી વિહતાજ તુમનેહે એક ફુરક્યા બોચાલે બાંદલો હેહા, જીયાપે આમી લુગ કેડોજ નાહા બોઠો, તીયાલે સોળી લી આવા. 3જો કેડો બી તુમનેહે ફુચે, ‘એહેકી કાહા કેતાહા?’ તાંહા તુમુહુ આખજા, ‘ઇસુ આમા પ્રભુલે તીયા જરુર હાય,’ આને તોઅ તુરુતુજ તીયાલે ઇહી મોકલી દી.”

4ચેલા ગાંવુમે ગીયા આને તીયાહા બારે ચોવઠામે બાંણા પાહી એક ફુરક્યા બોચાલે ખુટા આરી બાંદલો હેયો, આને તે તીયાલે સોળા લાગ્યા. 5તીયામેને જે તીહી ઉબલા આથા તે આખાં લાગ્યા, “ઇ કાય કી રીયાહા, ફુરક્યા બોચાલે કાહા સોળતાહા?” 6આને ચેલાહા જેહકી ઇસુહુ આખલો આથો, તીયાહા તેહકીજ તીયાહાને આખી દેખાવ્યો; તાંહા લોકુહુ તીયા ફુરક્યા બોચાલે તીયાહાને લી જાંઅ દેદો. 7તીયાહા ફુરક્યા બોચાલે ઇસુ પાહી લાવીન તીયાપે પોતળે ટાક્યે, આને ઇસુ તીયાપે બોહી ગીયો આને યેરુશાલેમુ વેલ જાઅ લાગ્યો. 8આને ખુબુજ લોકુહુ ઇસુ આગાળી વાટીપે પોતળે ફાત્યે, આને બીજા લોકુહુ તીયાલે સન્માન દા ખાતુર ખેતુમેને ચાળા ડાગ્યા રોંડી-રોંડી વાટીપે ફેલાવી દેધ્યા. 9થોડાક લોક ઇસુ આગાળી-આગાળી જાતલા આને થોડાક ફાચાળી-ફાચાળી ચાલી આવતલા, તે બાદા ખુશીકી બોમ્બલુતલા, “હોશાના#11:9 હોશાના એક આરામી ભાષા શબ્દો હાય તીયા ખેરો અર્થ હાય “આમનેહે વાચાવ” પેન ફાચે તીયા ઉપયોગ લોકુ સ્વાગતુ આને વાહ-વાહ કેરા ખાતુર કેરામે આવેહે.,” “જો દેવું નાવુંકી આવેહે, તીયાપે પરમેહેરુ કૃપા હાય. 10આપુ આગલો ડાયો દાઉદુ રાજા હોચ્યો એક રાજા પરમેહેરુ કૃપા આરી રાજ કેરા આવેહે; જો હોરગામ રેહે, તીયા પરમેહેરુ હોશાના કેરા.”

11આને જાંહા ઇસુ યરુશાલેમ શેહેરુમે પોચ્યો, તાંહા તોઅ દેવળુમે ગીયો, આને તીયાહા ચારુસોમકી બાદીજ વસ્તુહુને ધ્યાનુકી હેયો, આને ફાચે શેહેરુમેને જાતો રીયો, કાહાકા પેલ્લાનેજ વા લાગી ગેહલી, ફાચે પોતા ચેલાહા આરી બેથેનિયા ગાંવુમે જાઅ ખાતુર નીગ્યો.

વગર ફલવા અંજીરુ ચાળ

(માથ. 21:18-19)

12બીજે દિહ જાહાં તે બેથેનિયા ગાંવુમેને નીગ્યા, તાંહા ઇસુલે પુખ લાગી. 13આને તોઅ દુરને અંજીરુ એક લીલા ચાળવાલ હીને પાહી ગીયો કા, ઇ હેરા ખાતુર કા જાંણે તીયામે કાયક ફલ મીલે; પેન પાને છોડીને કાયજ નાય મીલ્યો; કાહાકા ફલ લાગુલી સમય નાય આથો. 14તીયા લીદે ઇસુહુ તીયા ચાળવાલ આખ્યો, “આમીને તુ કીદીહીજ ફલ નાય દી સેકો.” આને તીયા ચેલા ઉનાયજ રેહલા આથા.

મંદિરુમે વેપાર કેનારાહાને ઇસુ ઓળી કાડેહે

(માથ. 21:12-17; લુક. 19:45-48; યોહ. 2:13-22)

15ફાચે ઇસુ આને તીયા ચેલા યરુશાલેમુ શેહેરુમ આલા, આને તે દેવળુ ચોવઠામે ગીયા, તાંહા ઇસુહુ તીયા લોકુહુને દેવળુમેને બારે કાડા ચાલુ કેયો, જે બલિદાનુ ખાતુર ઉપયોગ વેનારે જાનવર આને બીજી વસ્તુહુને વેચા આને લાઅ કામ કી રેહલા; તીયાહા પોયસા બોદલુનારા ટેબલ પોલટાવી દેદા, આને કબુતરુ વેચનારા પીન્જરા બી પોલટાવી દેદા. 16આને તીયાહા લોકુહુને આદેશ દેદો કા, તે દેવળુ ચોવઠામે વસ્તુહુને લાવુલો આને લી જાવુલો બંદ કે. 17આને તીયાહા ઉપદેશ કીને આખ્યો, “પવિત્રશાસ્ત્રમે ઇ લેખલો કા, માંઅ દેવળ બાદી જાતિ લોકુ ખાતુર પ્રાર્થના પોંગો આખાય; પેન તુમુહુ ઇયાલ ડાખુ ગુફા હોચે જાગો બોનાવી દેદોહો.” 18જાહાં મુખ્યો યાજક આને મુસા નિયમ હિક્વુનારા ઉનાયા કા, ઇસુહુ કાય કેયો આને કાય આખ્યો, તાંહા તે તીયાલે મારા ખાતુર મોકો હોદા લાગ્યા, પેન કાહાકા જો કાય બી તીયાહા હિક્વ્યો લોકુહુ તીયાલે પુરી રીતીકી સ્વીકાર કી લેદો, ઈયા લીદે તે તીયા વાદતી લોક પ્રિયતાકી બીતલા. 19આને વાઅતો વીયો, તાંહા ઇસુ આને તીયા ચેલા શેહેરુલ છોડીને બેથેનિયા ગાંવુ વેલ જાતા રીયા.

હુકલા અંજીરુ ચાળાપેને હિકામણ

(માથ. 21:20-22)

20બીજા દિહુલે વેગીવેલ, જાહાં ઇસુ આને તીયા ચેલા ફાચે યેરુશાલેમુ વેલ જાતલા, તાંહા તીયાહા અંજીરુ ચાળાલે હેયો; તોઅ પુરી રીતીકી મુલાહીને હુકાય ગેહલો આથો. 21પિત્તરુલે તે ગોઠ ઇત આલી, જે ઇસુહુ તીયાલે આખલી; તાંહા પિત્તરુહુ આખ્યો, “ઓ ગુરુજી, હેઅ, ઇ અંજીરુ ચાળ જીયાલે તુયુહુ હારાપ દેદલો, તોઅ મુલાહીને હુકાય ગીયોહો.” 22ઇસુહુ તીયાલે જવાબ દેદો, “વિશ્વાસ કેરા જો તુમુહુ માગ્યોહો, પરમેહેર તુમનેહે દી. 23આંય તુમનેહે ખેરોજ આખુહુ કા, જો કેડો ઈયા ડોગુલે આખે, ‘ઉપટાય જો, આને સમુદ્રમે જાયને પોળી જો,’ આને તોઅ મનુમે શોક માઅ કેહો, પેન ભોરુચો કે કા, જો તીયાહા માગ્યોહો પરમેહેર તીયા માટે કેરી, તાંહા પરમેહેર તીયા માટે તેહકીજ કેરી. 24ઈયા ખાતુર આંય તુમનેહે આખુહુ કા, જો કાય બી તુમુહુ પ્રાર્થના કીને માંગાહા, તાંહા વિશ્વાસ કેરા કા પરમેહેરુહુ પેલ્લાનેજ તુમા પ્રાર્થના સ્વીકાર કી લેદીહી, આને પરમેહેર તુમા માટે તોઅ કેરી. 25આને જાહાં તુમુહુ ઉબારીને પ્રાર્થના કેતાહા, તાંહા જો કેડો બી તુમા ગુનેગાર વેરી, તીયાલે માફ કેરા તાંહા હોરગામેને બાહકો બી તુમા પાપ માફ કેરી. 26પેન કાદાચે તુમુહુ માફ નાય કેરા તા તુમા બાહકો જો હોરગામ હાય, તોબી તુમા પાપ માફ નાય કેરી.”

ઇસુ અધિકારુ રુપુમ સવાલ

(માથ. 21:23-27; લુક. 20:1-8)

27ફાચે ઇસુ આને તીયા ચેલા યરુશાલેમ શેહેરુમ ફાચા આલા, આને જાહાં ઇસુ દેવળુમે ફિરતલો, તાંહા મુખ્યો યાજકે આને મુસા નિયમ હિક્વુનારા આને યહુદી લોકુ વડીલ તીયા પાહી આવીને ફુચ્ચા લાગ્યા. 28“જે કામે તુયુહુ કેયેહે, તીયાહાને કેરા ખાતુર તોપે કાય અધિકાર હાય? એહકી કેરુલો અધિકાર તુલ કેડાહા દેદોહો?” 29ઇસુહુ તીયાલે આખ્યો, “આંય બી તુલ એક ગોઠ ફુચુહુ; જો તુ માન જવાબ દેહો તા આંય તુમનેહે આખેહે, કા ઇ કામ કેલ્લા અધિકારુકી કીહુ. 30યોહાનુલ બાપ્તીસ્મો આપા ખાતુર કેડાહા મોકલ્યોહો? કાય તોઅ પરમેહેરુ વેલને આથો કા, માંહા હીંને આથો? માન જવાબ ધ્યા.” 31તાંહા તે એકબીજા આરી ચર્ચા કેરાં લાગ્યા કા, જો આપુહુ આખજી હોરગામેને પરમેહેરુ વેલને, તા તોઅ આપનેહે ફુચી કા, ફાચે તુમુહુ તીયાપે વિશ્વાસ કાહા નાહા કેયો? 32આને જો આપુહુ આખજી, માંહા વેલને હાય, તા લોકુ બીખ હાય, કાહાકા બાદે જાંઅતેહે કા યોહાન પરમેહેરુ વેલને હાચો ભવિષ્યવક્તા આથો. 33આને તીયાહા ઇસુલે જવાબ દેદો કા, “આમુહુ નાહા જાંઅતા કા યોહાનુલે બાપ્તીસ્મો દા ખાતુર કેડાહા મોકલ્યો,” ઇસુહુ તીયાહાને આખ્યો, “આંય બી તુમુનેહે નાહ આખતો કા, ઇ કામ આંય કેલ્લા અધિકારુકી કીહુ.”

Currently Selected:

માર્ક 11: DUBNT

Highlight

Copy