યોહાન 17

ઇસુ પ્રાર્થના કેહે કા પરમેહેર તીયા નાવ ઉચો કે

1ઇસુહુ પોતા ચેલાહાને તે ગોઠયા આખ્યા, તાંહા ઇસુહુ જુગુવેલે હેયો, આને પરમેહેરુલે પ્રાર્થના કેયી, “ઓ પરમેહેર બાહકા, માઅ દુઃખ વેઠુલો આને મોરુલુ હાય તોઅ સમય આવી ગીયોહો, લોકુ આગલા માઅ નાવ ઉચો વાદાવ, ઈયા ખાતુર કા આંય બી તીયા આગલા તોઅ નાવ વાદાવુ.” 2કાહાકા કા તુયુહુ પોયરાલે બાદા લોકુપે અધિકાર આપ્યોહો, ઈયા ખાતુર કા પોયરો બી તીયા બાદા લોકુહુને અનંત જીવન આપે, જો તુયુહુ તીયાલે આપ્યોહો. 3આને અનંત જીવન ઇ હાય, કા લોક તુલે એકુ-એક હાચા પરમેહેરુલે, આને ઇસુ ખ્રિસ્તુલે જીયાલે તુયુહુ મોક્લ્યોહો તીયાલે ઓખી સેકે. 4જો કામ તુયુહુ માને કેરા દેદલો, તીયાલે પુરો કીને માયુહુ તોરતીપે તોઅ મહિમા કેયીહી. 5આને આમી, ઓ પરમેહેર બાહકા, જગત બોન્યો તીયા પેલ્લા જે મહિમા માપે આથી, તે મહિમા આંય ફાચો તોહી આવેહે, તાંહા આપીને માઅ નાવ ઉચો કેજે.

ઇસુ પોતા ચેલા ખાતુર પરમેહેરુલે પ્રાર્થના કેહે

6“તુયુહુ માને જગતુમેને થોડેક માંહે આપલે, માયુહુ તીયાહાને તુ કેહેડા હોચ્યો હાય, તોઅ આખી દેખાવ્યો, તે માંહે તોઅ આથે, આને તે માને તુયુહુ આપલે, તીયાહા તોઅ આજ્ઞા પાલન કેયોહો.” 7આમી તે જાંય ગીયાહા, કા જે કાય બી આજ્ઞા તુયુહુ માને દેદીહી, તોઅ બાદો તોપેનેજ માને મીલ્યોહો. 8કાહાલ કા, જે ગોઠયા તુયુહુ માને આપલ્યા, માયુહુ તીયુ ગોઠીને તીયાહી હુદી પોચવી દેધ્યાહા; આને તીયાહા તે બાધ્યા ગોઠયા માની બી લેધ્યાહા, આને ખેરોજ જાંય ગીયાહા, કા આંય તોઅ હીને આલોહો, આને તીયાહા માની બી લેદોહો, કા તુયુહુજ માને મોકલ્યોહો.

9આંય તુલે વિનંતી કીહુ, કા તુ તીયાહાને મદદ કે, ઈયા જગતુમે જે લોક તોઅ નાહ, તીયા માટે આંય તુલે વિનંતી નાહ કેતો, પેન જીયાહાને તુ માઅ ચેલા બોણા ખાતુર માંહી લી આલોહો, તીયા ખાતુર આંય તુલે વિનંતી કીહુ, કાહાકા તે તોઅ લોક હાય. 10આને માઅ બાદા ચેલા તોજ હાય; આને જે તોઅ લોક હાય તે બાદા માઅ બી હાય; આને તીયા લોકુ આગાળી માઅ મહિમા વેયી.

11આમી આંય જગતુમે વાદારે સમય નાહ રેનારો, આંય માહરીજ તોહી આવનારો હાય, પેન માઅ ચેલા જગતુમુજ રેનારા હાય; ઓ પવિત્ર બાહકા, તોઅ સામર્થ્ય નાવુકી કી તીયાહાને સુરક્ષામે રાખજે, કા જેહકી તોઅ આને માઅ એકુજ દીમાક હાય, તેહકીજ તીયા બી એકુજ દીમાક રેઅ. 12જાંહા આંય તીયા આરી આથો, તાંહા જો નાવ તુયુહુ માને આપલો, તીયા નાવુ તાકતુકી માયુહુ તીયા રક્ષા કેયી, આને માયુહુ દેખ-રેખ કેયી, આને જો પસંદ નાય આથો, તીયામેને એક ટાકાય ગેહલો, ઈયા ખાતુર કા પવિત્રશાસ્ત્રમે લેખલો આથો, તોઅ પુરો વેઅ. 13આમી આંય તોહી આવુહુ, આને આંય જગતુમે હાય, તાંવુજ એ ગોઠયા આખુહુ, કા જેહેકી માયુહુ ખુશી અનુભવ કેયોહો, તેહેકી માઅ ચેલા બી પુરી રીતીકી ખુશી અનુભવ કે. 14માયુહુ તોઅ ગોઠ તીયાહાને પોચવી દેદીહી; આને જગતુ લોકુહુ તીયા આરી નફરત કેયી, કાહાકા જેહેકી માઅ જગતુ આરી સંબંધ નાહ તેહકીજ તીયા બી જગતુ આરી સંબંધ નાહ. 15તુ માઅ ચેલાહાને જગતુમેને લીઅ લેઅ, એહેકી આંય તુલે પ્રાર્થના નાહ કેતો, પેન એહેકી પ્રાર્થના કીહુ, કા તીયાહાને તુ શૈતાનુકી તીયા રક્ષા કે. 16જેહેકી માઅ જગતુ આરી સંબંધ નાહ, તેહકીજ તીયા બી જગતુ આરી સંબંધ નાહ. 17તોઅ વચન સત્ય હાય, ઈયા ખાતુર તીયાહાને તોઅ સેવા કેરા ખાતુર જગતુ બીજા લોકુમેને અલગ કે. 18જેહેકી તીયુહુ માને જગતુમે મોકલ્યોહો, તેહેકીજ માયુહુ બી તીયાહાને જગતુમે મોકલ્યાહા. 19આને તીયા ફાયદા માટે, આંય પોતાલે અલગ કીહુ, ઈયા ખાતુર કા તેબી સત્ય લીદે પોતાલે તોઅ સેવા માટે અલગ કે.

ઇસુ પોતે બાદા વિશ્વાસી લોકુ ખાતુર પ્રાર્થના કેહે

20“આંય ખાલી માઅ ચેલા માટે ઓતોજ નાહ પ્રાર્થના કેતો, પેન તીયા ગોઠ ઉનાયને જે માપે વિશ્વાસ કેરી, તીયા માટે બી આંય પ્રાર્થના કીહુ.” 21ઓ બાહકા, આંય પ્રાર્થના કીહુ, કા ઈયા જગતુ જે લોક માપે વિશ્વાસ કેતાહા, તે બાદા એક વેઅ; જેહેકી તુ માઅ આરી હાય, આને આંય તોઅ આરી હાય, આંય પ્રાર્થના કીહુ કા એ બાદા લોક બી આપુ આરી એક વેઅ, તાંહા જગતુ લોક વિશ્વાસ કેરી કા તુયુહુ માને મોકલ્યોહો. 22આને જેહેકી તુયુહુ માને મહિમા આપીહી, તેહકીજ માયુહુ બી તીયાહાને મહિમા આપીહી, ઈયા ખાતુર કા જેહેકી આપુહુ એક હાય, તેહકીજ તેબી એક બોની રેઅ. 23જેહેકી આંય તીયા આરી મીલીને રીહુ, આને તુ માઅ આરી મીલીને રીહો, તેહેકી તે એક-બીજા આરી મીલીને રેઅ, ઈયા ખાતુર કા જગતુ લોક જાંય સેકે કા તુયુહુ માને મોકલ્યોહો, આને તીયાહાને ઇ બી ખબર પોળે કા જેહેકી તુયુહુ માપે પ્રેમ રાખ્યોહો, તેહકીજ આંય બી માઅ ચેલાપે પ્રેમ રાખેહે. 24“ઓ બાહકા, માઅ એહેડી ઈચ્છા હાય, કા જે ચેલા તુયુહુ માને દેદાહા, આંય જીહી હોરગામે રેહે, તીહી તે ચેલા બી માઅ આરી રેઅ, આને જે મહિમા તુયુહુ માને આપીહી, તે મહિમા તેબી હી સેકે, એહેડી માઅ ઈચ્છા હાય; કાહાકા તુયુહુ જગત નાહ બોન્યો તીયા પેલ્લા, માઅ આરી પ્રેમ રાખલો.” 25ઓ ન્યાયી (હાચાયુ વાલા) પરમેહેર બાહકા, જગતુ લોકુહુ માને નાહ ઓખ્યો, પેન માયુહુ તુલે ઓખ્યોહો, કા તુ કેડો હાય, આને માઅ ચેલા બી જાંતાહા, કા તુયુહુ માને મોકલ્યોહો. 26આને તુ કેડો હાય, તોઅ માયુહુ તીયાહાને આખી દેખાવ્યોહો, આને આંય આજી બી આખી દેખાવતો રેહે, કા જેહેકી તુ માપે પ્રેમ રાખોહો, તેહેકીજ તેબી બીજાપે પ્રેમ રાખે, આને આંય પવિત્રઆત્મા રુપુમે તીયામે રેહે.

Currently Selected:

યોહાન 17: DUBNT

Highlight

Copy