Mark 9

1Iysa olarǵa jáne:

– Sizlerge shının aytaman: bul jerde turǵanlardıń geybirewleri Qudaydıń Patshalıǵınıń Óz qúdireti menen kelgenin kórmegenshe, ólmeydi, – dedi.

Iysanıń túr-túsiniń ózgeriwi

(Mat 17:1-13; Luk 9:28-36)

2Aradan altı kún ótkennen soń, Iysa tek Petr, Yaqıp hám Yuxandı alıp, bálent bir tawǵa shıqtı. Sonda olardıń aldında Iysanıń túr-túsi ózgerdi. 3Onıń kiyimi jarqırap ketip, qarday appaq túske endi. Jer júzinde hesh bir kir juwıwshı bunday qılıp aǵarta almas edi. 4Sonda olarǵa Iliyas hám Muwsa payǵambarlar kórinip, Iysa menen sóylesip turdı. 5Petr Iysaǵa:

– Ustaz, bizlerdiń bul jerde bolǵanımız qanday jaqsı! Bizler úsh qos qurayıq: birewin Saǵan, birewin Muwsaǵa, birewin Iliyasqa, – dedi.

6Petr bul sózlerdi ne aytarın bilmegenlikten ayttı, óytkeni shákirtler qattı qorqıp qalǵan edi.

7Sol waqıtta bir bult payda bolıp, olardı qapladı. Bulttan:

– Bul – Meniń súyikli Ulım!#9:7 Zab 2:7. Onıń aytqanın tıńlańlar! – degen saza esitildi.

8Shákirtleri birden ján-jaǵına qaraǵanda, ózleriniń qasında Iysadan basqa hesh kimdi kórmedi.

9Tawdan tómen túsip baratırǵanda, Iysa olarǵa:

– Adam Ulı ólimnen qayta tirilgenshe, bul kórgenlerińizdi hesh kimge aytpańlar, – dep buyırdı.

10Olar bul waqıyanı sır saqlap, «ólimnen qayta tiriliw» degenniń ne ekenligi haqqında bir-birinen soraytuǵın edi. 11Shákirtleri Iysadan:

– Nege diniy muǵallimler aldı menen Iliyas keliwi shárt deydi? – dep soradı.

12Iysa olarǵa juwap berip:

– Durıs, aldı menen Iliyas kelip, hámmesin dúzetedi.#9:12 Mal 4:5-6. Biraq nege Adam Ulı kóp azap shegip, qabıllanbawı shárt, dep jazılǵan? 13Sizlerge aytatuǵınım: Iliyas kelgen edi. Biraq ol haqqında jazılǵanday, adamlar oǵan qálegenin islep, jaman qatnasta boldı, – dedi.

Iysanıń jin urǵan balaǵa shıpa beriwi

(Mat 17:14-20; Luk 9:37-43)

14Olar basqa shákirtlerine qaytıp kelgende, shákirtlerdi qorshaǵan kóp xalıqtı hám olar menen tartısıp turǵan diniy muǵallimlerdi kórdi. 15Pútkil xalıq Iysanı kóriwden tań qalıstı hám juwırısıp kelip, Oǵan sálem berdi. 16Iysa olardan:

– Olar menen ne haqqında tartısıp tursızlar? – dep soradı.

17Xalıq arasınan bir adam Oǵan juwap berip:

– Ustaz! Men Saǵan tilsiz ruwx urǵanlıqtan gúńelek bolıp qalǵan balamdı alıp keldim. 18Balamdı ruwx tutqanda, jerge jıǵadı. Onıń awzında kóbik payda boladı hám ol tislerin qayrap, qatıp qaladı. Men Seniń shákirtlerińnen jawız ruwxtı quwıp shıǵarıwdı ótingen edim, biraq olardıń qolınan kelmedi, – dedi.

19Sonda Iysa olarǵa:

– Háy, isenbeytuǵın áwlad! Men qashanǵa deyin sizler menen birge bolaman? Qashanǵa deyin sizlerge shıdayman? Balanı Maǵan alıp kelińler, – dedi.

20Olar balanı Iysaǵa alıp keldi. Iysanı kóriwden ruwx balanı dárriw qaltırattı. Bala jerge jıǵıldı da, awzınan kóbigi aǵıp, awnap jattı. 21Sonda Iysa balanıń ákesinen:

– Bunday bolǵanına qansha waqıt boldı? – dep soradı.

Ákesi:

– Kishkene bala waqtınan usınday. 22Ruwx onı óltirmekshi bolıp, neshe márte otqa da, suwǵa da tasladı. Eger qolıńnan kelse, bizlerdi ayap, járdem ete gór, – dedi.

23Iysa oǵan:

– Eger qolıńnan kelse, deyseń be? Isenetuǵın adamǵa hámme nárse múmkin, – dedi.

24Balanıń ákesi dárhal jılap jiberip:

– Men isenemen, az isenimimniń bekkem bolıwına járdem et! – dep baqırdı.

25Xalıqtıń juwırısıp kiyatırǵanın kórgende Iysa jawız ruwxqa keyip:

– Háy, tilsiz hám gereń ruwx! Buyıraman: onnan shıǵıp ket hám qaytıp oǵan kiriwshi bolma, – dedi.

26Sonda ruwx shıńǵırıp, balanı qattı qaltırattı da, onnan shıǵıp ketti. Bala ólidey bolıp jatırǵanlıqtan, adamlardıń kóbisi:

– Ol ólip qaldı, – dedi.

27Biraq Iysa onı qolınan uslap turǵızǵanda, ol ornınan turdı.

28Iysa úyge kirgennen keyin, shákirtleri awlaqta Onnan:

– Bizler nege jawız ruwxtı quwıp shıǵara almadıq? – dep soradı.

29Iysa olarǵa juwap berip:

– Jinlerdiń bunday túrin tek duwa etiw arqalı quwıp shıǵarıwǵa boladı, – dedi.

Iysanıń jáne Óz ólimi hám qayta tiriliwi haqqında bildiriwi

(Mat 17:22-23; Luk 9:43-45)

30Sol jerden shıǵıp, olar Galila arqalı ótti. Iysa bunı hesh kimniń bilmewin qáledi. 31Sebebi Ol shákirtlerine tálim berip:

– Adam Ulı adamlardıń qolına uslap beriledi, olar Onı óltiredi hám óltirilgennen keyin, Ol úshinshi kúni qayta tiriledi, – dedi.

32Biraq shákirtleri bul sózlerdiń mánisin túsinbedi, al sorayın dese qorqtı.

Aspan Patshalıǵında eń ullı kim?

(Mat 18:1-5; Luk 9:46-48)

33Olar Kaparnahumǵa keldi. Iysa úyde bolǵanda, shákirtlerinen:

– Jol boyı ne haqqında tartıstıńlar? – dep soradı.

34Biraq olar úndemedi. Óytkeni olar jol boyı arasında kimniń eń ullı ekenligi haqqında tartısqan edi. 35Iysa otırıp, on eki shákirtin shaqırıp aldı da, olarǵa:

– Eger kim de kim birinshi bolǵısı kelse, sol eń sońǵı bolıp, hámmege xızmet etiwi shárt, – dedi.

36Soń kishkene bir balanı alıp, olardıń ortasına turǵızdı da, onı qushaqlap:

37– Kim de kim mınaday kishkene bir balanı Meniń atım ushın qabıl etse, onıń Meni qabıl etkeni boladı. Al kim de kim Meni qabıl etse, onıń tek Meni emes, al Meni Jibergendi qabıl etkeni boladı, – dedi.

Bizlerge qarsı bolmaǵan – bizlerdiń tárepdarımız

(Luk 9:49-50)

38Yuxan Iysaǵa:

– Ustaz! Seniń atıń menen jinlerdi quwıp shıǵarıp júrgen bir adamdı kórdik. Biraq ol bizlerge erip júrmegenlikten, oǵan tıyım saldıq, – dedi.

39Al Iysa bılay dedi:

– Oǵan tıyım salmańlar, sebebi Meniń atım menen káramat kórsetkenlerdiń hesh qaysısı da Men tuwralı jaqın arada jaman sóz ayta almaydı. 40Óytkeni kim de kim bizlerge qarsı bolmasa, ol bizlerdiń tárepdarımız. 41Sizlerge shının aytıp turman: kim de kim Masiyxqa tiyisli bolǵanıńız sebepli, Meniń atım ushın sizlerge bir kese suw ishkizse, ol sıysız qalmaydı.

Azǵırılıp gúna islemeń

(Mat 18:6-9; Luk 17:1-2)

42– Jáne de, kim de kim Maǵan isenetuǵın mına kishkenelerdiń birewin azǵırsa, onıń moynına úlken digirman tası baylanıp teńizge taslanǵanı oǵan jaqsıraq boladı. 43Eger seni qolıń azǵırsa, onı shawıp tasla. Eki qolıń menen dozaqqa, sónbes otqa taslanǵanıńnan góre, sholaq bolıp máńgilik ómirge eriskeniń jaqsıraq. [44#Mrk 9:44 Bazı qoljazbalarda usı ayat 48-ayat penen birdey.] 45Eger seni ayaǵıń azǵırsa, onı shawıp tasla. Eki ayaǵıń menen dozaqqa taslanǵanıńnan góre, sholaq bolıp máńgilik ómirge eriskeniń jaqsıraq. [46#Mrk 9:46 Bazı qoljazbalarda usı ayat 48-ayat penen birdey.] 47Eger seni kóziń azǵırsa, onı oyıp tasla. Eki kóziń menen dozaqqa taslanǵanıńnan góre, jalǵız kóziń menen Qudaydıń Patshalıǵına kirgeniń jaqsıraq. Dozaqta 48«olardı jep atırǵan qurt ta ólmeydi, jandırıp atırǵan ot ta sónbeydi»#9:48 Iysh 66:24..

49Zatlardıń otta sınalıp, duz benen tazalanǵanı sıyaqlı, hár bir adam solay sınalıp, tazalanadı#Mrk 9:49 Bazı qoljazbalarda mına sózler de bar: «Barlıq qurbanlıqlar duz benen duzlanadı»..

50Duz – jaqsı nárse. Biraq duz óz kúshin joytsa, onı qalay jáne shorlı qılıwǵa boladı? Ishińizde duz bolsın, bir-birińiz benen tatıw jasańlar, – dedi.

Currently Selected:

Mark 9: QrqMK22

Highlight

Copy