Mark 8

Iysanıń tórt mıń adamdı toyǵızıwı

(Mat 15:32-39)

1Sol kúnleri kóp xalıq jıynaldı. Olardıń jeytuǵın hesh nársesi bolmaǵanlıqtan, Iysa shákirtlerin janına shaqırıp alıp:

2– Xalıqqa janım ashıp tur. Olar úsh kúnnen beri Meniń qasımda bolıp, jeytuǵın hesh nársesi joq. 3Eger olardı ash halında úylerine jibersem, jolda hálsirep qaladı. Jáne de, olardıń geybirewleri uzaqtan kelgen, – dedi.

4Shákirtleri Oǵan juwap berip:

– Kim usınday bir elsiz jerde sonshelli adamdı toydırıw ushın nan taba aladı? – dedi.

5Iysa olardan:

– Neshe nanıńız bar? – dep soradı.

Olar:

– Jetew, – dep juwap berdi.

6Sonda Iysa xalıqqa jerge otırıwdı buyırdı. Jeti nandı alıp, Qudayǵa shúkirlik etti hám tarqatıw ushın, shákirtlerine sındırıp berdi. Shákirtleri xalıqqa tarqattı. 7Olarda jáne bir neshe kishi balıq ta bar edi. Iysa Qudayǵa shúkirlik etip, olardı da tarqatıwdı buyırdı. 8Xalıq jep toydı hám awısıp qalǵan bóleklerdi jıynap, jeti sebet toltırdı. 9Ol jerde tórt mıńǵa shamalas adam bar edi. Iysa adamlardı tarqatıp jiberdi 10hám shákirtleri menen dárriw qayıqqa minip, Dalmanuta úlkesine ketti.

Iysadan káramatlı belgi kórsetiwdi talap etiw

(Mat 16:1-4)

11Pariseyler Iysaǵa kelip, Onıń menen tartısa basladı hám Onı sınap kóriw ushın, aspannan káramatlı belgi kórsetiwdi talap etti. 12Iysa awır gúrsinip:

– Nege bul áwlad káramatlı belgi talap etip atır? Shının aytıp turman: bul áwladqa hesh qanday káramatlı belgi kórsetilmeydi, – dedi.

13Sońınan olardı qaldırıp, jáne qayıqqa mindi de, arǵı jaǵaǵa ketti.

Jalǵan tálimatlardan saq bolıńlar!

(Mat 16:5-12)

14Shákirtleri ózleri menen birge nan alıwdı umıtıp ketip, qayıqta tek ǵana bir nan bar edi. 15Iysa olardı eskertip:

– Abaylańlar, pariseylerdiń hám Hirodtıń ashıtqısınan saq bolıńlar! – dedi.

16Olar:

– Nanımız joq bolǵanlıqtan usılay dedi, – dep, óz ara aytısa basladı.

17Iysa bunı bilip, olardan:

– Nege sizler nanıńızdıń joqlıǵın aytısıp tursızlar? Elege deyin kórmey hám túsinbey tursızlar ma? Elege deyin kewillerińiz soqır ma? 18Nege kózlerińiz bola tura kórmeysizler, qulaqlarıńız bola tura esitpeysizler? Eslerińizde joq pa? 19Men bes nandı bes mıń adamǵa sındırıp bergenimde, awısqan bóleklerdi jıynap neshe sebet toltırdıńlar? – dep soradı.

– On eki, – dep juwap berdi olar.

20Iysa jáne:

– Men jeti nandı sındırıp, tórt mıń adamǵa bólistirgenimde, awısqan bóleklerdi jıynap neshe sebet toltırdıńlar? – dep soradı.

– Jeti, – dep juwap berdi olar.

21Iysa olarǵa:

– Sonda ele de túsinbedińler me? – dedi.

Iysanıń Betsaydada soqır adamǵa shıpa beriwi

22Iysa shákirtleri menen Betsaydaǵa kelgende, adamlar Iysaǵa bir soqır adamdı ákelip, oǵan qolın tiygiziwin ótindi. 23Iysa soqır adamnıń qolınan uslap, onı awıldıń sırtına alıp shıqtı. Onıń kózlerine túkirip, onıń ústine qolların qoydı da:

– Bir nárse kórip tursań ba? – dep soradı.

24Ol qarap:

– Adamlardı kórip turman. Olar júrip baratırǵan tereklerge uqsaydı, – dedi.

25Sonda Iysa onıń kózlerine jáne qolların qoyǵanda, ol tigilip qaradı da, shıpa tawıp, hámmesin anıq kóre basladı. 26Iysa onı úyine jiberip, oǵan:

– Awılǵa barma! – dedi.

Petrdiń Iysanıń Masiyx ekenligin moyınlawı

(Mat 16:13-20; Luk 9:18-21)

27Iysa Óz shákirtleri menen Filip Kesariyasındaǵı awıllarǵa ketti. Jol boyı shákirtlerinen:

– Meni adamlar kim dep sanaydı? – dep soradı.

28Olar juwap berip:

– Birewler shomıldırıwshı Yaqıya, ekinshiler Iliyas, taǵı basqalar payǵambarlardıń biri desedi, – dedi.

29Iysa olardan:

– Al sizler Meni kim dep sanaysızlar? – dep soradı.

Petr juwap berip:

– Sen – Masiyxsań, – dedi.

30Sonda Iysa olarǵa Ózi haqqında hesh kimge aytpawdı eskertti.

Iysanıń Óz ólimi hám qayta tiriliwi haqqında bildiriwi

(Mat 16:21-28; Luk 9:22-27)

31Iysa Adam Ulınıń kóp azap shegip, aqsaqallar, bas ruwxaniyler hám diniy muǵallimler tárepinen qabıl alınbay óltiriliwi hám úshinshi kúni qayta tiriliwi tiyis ekenligin olarǵa úyrete basladı. 32Ol bul haqqında ashıq-aydın ayttı. Biraq Petr Onı shetke shaqırıp alıp, qarsı sóyley basladı. 33Iysa burılıp, Óziniń basqa shákirtlerine qaradı da, Petrge qatań juwap berip:

– Joq bol kózimnen, shaytan! Sen Qudaydıń emes, al adamnıń islerin oylap tursań, – dedi.

34Sońınan Iysa shákirtleri menen xalıqtı Ózine shaqırıp alıp:

– Kim de kim Maǵan ergisi kelse, ózinen keshsin hám óz atanaq aǵashın arqalap, Meniń izime ersin. 35Sebebi kim de kim óz janın saqlamaqshı bolsa, onı joǵaltadı. Al kim de kim óz janın Men hám Xosh Xabar ushın joǵaltsa, onı saqlap qaladı. 36Adam pútkil dúnyanı iyelep alıp, biraq óz janın joǵaltsa, bunnan oǵan ne payda? 37Ol óz janı ushın qanday tólem bere aladı? 38Eger kim de kim usı opasız hám gúnakar áwladta Mennen hám Meniń sózlerimnen arlansa, Adam Ulı da Ákesiniń saltanatında Óziniń muxaddes perishteleri menen kelgende, onnan arlanadı, – dedi.

Currently Selected:

Mark 8: QrqMK22

Highlight

Copy