Matta 6

Sawap isler tuwralı

1– Abaylańlar, sizler sawap islerińizdi adamlarǵa kórsetiw ushın, olardıń aldında islemeńler. Olay etseńler, sizlerge aspandaǵı Ákeńizden sıylıq bolmaydı.

2Solay etip, sen qayır-sadaqa bergenińde, eki júzliler sıyaqlı jar salma. Bundaylar adamlar maqtasın dep, májilisxanalarda hám kóshelerde usılay isleydi. Sizlerge shının aytıp turman: olar álle qashan óz sıyların alıp boldı. 3Sen qayır-sadaqa bergenińde, oń qolıńnıń ne islegenin sol qolıń bilmesin. 4Sonda sen qılǵan qayırlı is jasırın boladı hám jasırınlıqtı kóriwshi Ákeń saǵan qaytaradı.

Duwa etiw tuwralı

(Luk 11:2-4)

5– Duwa etkenińizde, adamlarǵa kórsetiw ushın májilisxanalarda hám kóshelerdiń múyeshlerinde turıp duwa etiwdi jaqsı kóretuǵın eki júzliler sıyaqlı bolmańlar. Sizlerge shının aytıp turman: olar álle qashan óz sıyların alıp boldı. 6Al sen duwa etkenińde bólmeńe kirip, esigińdi japqanıńnan soń, kózge kórinbeytuǵın Ákeńe duwa et! Sonda jasırınlıqtı kóriwshi Ákeń saǵan qaytaradı.

7Duwa etkenińizde, butqa tabınıwshılar sıyaqlı mıljıńǵa berilmeńler. Olar kóp sóylesek tıńlar dep oylaydı. 8Sizler olarǵa uqsamańlar. Sebebi Ákeńiz nege mútáj ekenligińizdi Onnan soramasıńızdan aldın biledi. 9Sonlıqtan sizler bılay dep duwa etińler:

Aspandaǵı Ákemiz!

Seniń atıń muxaddes bola bersin.

10Seniń Patshalıǵıń kelsin.

Aspanda orınlanǵanı sıyaqlı,

Jerde de Seniń erkiń orınlansın.

11Bizlerge búgin de kúndelikli nanımızdı bere gór.

12Bizlerge gúna islegenlerdi keshirgenimizdey,

Bizlerdiń de gúnalarımızdı keshire gór.

13Bizlerdiń azǵırılıwımızǵa jol qoymay,

Shaytannan qutqara gór.

Sebebi Patshalıq ta, qúdiret te, ullılıq ta máńgilikke Seniki. Awmiyin.

14Eger sizlerge gúna islegenlerdi keshirseńler, aspandaǵı Ákeńiz de sizlerdi keshiredi. 15Al eger sizlerge gúna islegenlerdi keshirmeseńler, Ákeńiz de gúnalarıńızdı keshirmeydi.

Oraza tutıw tuwralı

16– Oraza tutqanıńızda, eki júzliler sıyaqlı muńayıp júrmeńler. Olar adamlarǵa oraza tutıwshı bolıp kóriniw ushın ǵana ajarın buzıp júredi. Sizlerge shının aytaman: olar álle qashan óz sıyların alıp boldı. 17Sen oraza tutqanıńda, shashıńa átir may jaǵıp, betińdi juw. 18Solay etip, oraza tutqanıń adamlarǵa emes, al kózge kórinbeytuǵın Ákeńe kórinsin. Jasırınlıqtı kóriwshi Ákeń saǵan qaytaradı.

Joǵalmaytuǵın baylıq

(Luk 12:33-36; 16:13)

19– Ózlerińizge jer betinde baylıq jıynamańlar. Bul jerde onı kúye de jeydi, tat ta basadı, urılar da buzıp kirip urlaydı. 20Al ózlerińizge aspanda baylıq jıynańlar. Sol jerde onı kúye de jemeydi, tat ta baspaydı, urılar da buzıp kirip urlamaydı. 21Óytkeni baylıǵıńız qay jerde bolsa, júregińiz de sol jerde boladı.

22Kóz – deneniń shıraǵı. Sonlıqtan da, eger kóziń saw bolsa, pútkil deneń de jarıq boladı. 23Eger kóziń saw bolmasa, pútkil deneń de qarańǵı boladı. Sonlıqtan eger ishińdegi jarıq qarańǵı bolsa, onda qarańǵılıqtıń ózi qanshelli tas túnek boladı!

24Hesh kim eki xojayınǵa xızmet ete almaydı. Sebebi ol birewin jek kórip, ekinshisin jaqsı kóredi yamasa birewine sadıq bolıp, ekinshisine itibarsız qaraydı. Sizler hám Qudayǵa, hám baylıqqa birdey xızmet ete almaysızlar.

Táshiwishlenbeńler!

(Luk 12:22-31)

25– Sonlıqtan sizlerge aytatuǵınım: janıńız ushın ne iship, ne jeymiz dep, deneńiz ushın ne kiyemiz dep táshiwishlenbeńler. Jan awqattan, dene kiyimnen artıq emes pe? 26Aspandaǵı quslarǵa qarańlar! Olar ekpeydi de, ormaydı da, telekke jıynamaydı da, al aspandaǵı Ákeńiz olardı asıraydı. Sizler olardan anaǵurlım artıq emessizler me? 27Táshiwishleniw sebepli, kim sizlerdiń arańızda óz ómirin bir saatqa bolsa da uzayta aladı? 28Kiyim tuwralı nege táshiwishlenesizler? Daladaǵı lala gúllerdiń qalay ósip turǵanına qarańlar! Olar miynet te etpeydi, jip te iyirmeydi. 29Al sizlerge aytatuǵınım: Sulayman da óziniń sán-saltanatında usılardıń birewindey sánli kiyinbegen edi. 30Eger búgin dalada ósip turǵanı menen, erteń oshaqqa taslanatuǵın shópti Quday usılay kiyindirse, sizlerdi olardan da artıq kiyindirmes pe edi, háy, isenimi azlar!

31Sonlıqtan da: «Ne iship, ne jeymiz?» yamasa «Ne kiyemiz?» – dep táshiwishlenbeńler. 32Óytkeni usılardıń hámmesin bul dúnyaǵa tiyisli adamlar izlep júredi. Usı nárselerdiń hámmesine mútáj ekenińizdi aspandaǵı Ákeńiz biledi. 33Eń aldı menen Qudaydıń Patshalıǵın hám Onıń haqlıǵın izleńler! Sonda bulardıń hámmesi sizlerge qosımsha etip beriledi. 34Solay etip, erteńgi kún tuwralı táshiwishlenbeńler! Sebebi erteńgi kún ózi ushın ózi ǵam jeydi. Hár kúnniń óz ǵamı ózine jetedi.

Currently Selected:

Matta 6: QrqMK22

Highlight

Copy