Matta 7

Basqalardı húkim etpeńler!

(Luk 6:37-38, 41-42)

1– Basqalardı húkim etpeńler, sonda sizler de húkim etilmeysiz. 2Óytkeni sizler basqalardı qanday húkim etseńler, ózlerińiz de sonday húkim etilesizler. Qanday ólshem menen ólshep berseńler, ózlerińizge de sonday ólshem menen ólshep beriledi. 3Sen nege tuwısqanıńnıń kózindegi shópti kórip turıp, óz kózińdegi qadanı sezbeyseń? 4Óz kózińde qada bola tura, qalay: «Qáne, kózińdegi shópti alıp taslayın», – dep tuwısqanıńa aytasań? 5Háy, eki júzli! Dáslep óz kózińdegi qadanı alıp tasla, sonda anıq kórip, tuwısqanıńnıń kózindegi shópti alıp taslay alasań.

6Muxaddes zattı iytlerge bermeńler, hinji-marjanlarıńızdı shoshqalardıń aldına taslamańlar. Olar hinjilerińizdi ayaqları menen basqılap, aylanıp kelip ózlerińizdi tilkimlep taslaydı.

Sorańlar, izleńler, esikti qaǵıńlar!

(Luk 11:9-13)

7– Sorańlar, sizlerge beriledi. Izleńler, tabasızlar. Esikti qaǵıńlar, ol sizlerge ashıladı. 8Óytkeni soraǵan hár bir adam aladı, izlegen tabadı, esik qaqqanǵa ashıladı. 9Sizlerdiń arańızda ulı nan sorasa, tas beretuǵın adam bar ma? 10Ya bolmasa, balıq sorasa, oǵan jılan beretuǵın bar ma? 11Ózlerińiz jaman bola tura, balalarıńızǵa jaqsı sıylar beriwdi bilseńiz, onda aspandaǵı Ákeńiz Ózinen soraǵanlarǵa qanshelli kóp iygilikler beredi!

12Solay etip, hámme iste adamlardıń ózlerińizge ne islewin qáleseńler, sizler de olarǵa sonı isleńler. Muxaddes Nızamnıń da, payǵambarlardıń Jazıwlarınıń da mánisi usı.

Tar qapıdan kirińler!

(Luk 13:24)

13– Tar qapıdan kirińler. Óytkeni nabıt bolıwǵa aparatuǵın qapı keń, jol da enli, onıń menen júretuǵınlar kóp. 14Al ómirge aparatuǵın qapı tar, jol da ensiz, onı tabatuǵınlar az.

Terek miywesinen biliner

(Mat 12:33-35; Luk 6:43-44)

15– Jalǵan payǵambarlardan saq bolıńlar! Olar qoy terisin jamılıp sizlerge keledi, biraq ishlerinde olar jırtqısh qasqırlar. 16Sizler olardı miywesinen bilesizler. Sheńgelden júzim yamasa oshaǵannan ánjir jıynay alasız ba? 17Hár bir jaqsı terek jaqsı miywe beredi, jaman terek jaman miywe beredi. 18Jaqsı terek jaman miywe, jaman terek jaqsı miywe bere almaydı. 19Jaqsı miywe bermeytuǵın hár bir terek shabılıp, otqa taslanadı. 20Solay etip, sizler olardı miywesinen bilesizler.

21Maǵan: «Iye! Iye!» degenniń hár biri emes, tek aspandaǵı Ákemniń erkin orınlawshı Aspan Patshalıǵına kiredi. 22Zamannıń aqırǵı kúninde kóbisi Maǵan: «Iye! Iye! Bizler Seniń atıń menen payǵambarshılıq etip, Seniń atıń menen jinlerdi quwıp shıǵarmadıq pa? Seniń atıń menen kóp káramatlar islemedik pe?» – deydi. 23Sonda Men olarǵa: «Men sizlerdi hesh qashan tanıǵan emespen, Mennen awlaq ketińler, háy, nızamdı buzıwshılar!» – dep ashıq aytaman.

Aqıllılıq hám aqılsızlıq

(Luk 6:47-49)

24– Solay etip, Meniń usı sózlerimdi tıńlap, olardı orınlawshılardıń hár biri óz úyin jartas ústine salǵan aqıllı adamǵa uqsaydı. 25Jawın jawıp, dáryalar tasıp, samal esip, bul úydi soqqıladı, biraq ol jartas ústine salınǵanlıqtan qulamadı. 26Al Meniń usı sózlerimdi tıńlap, olardı orınlamaytuǵınlardıń hár biri óz úyin shege qum ústine salǵan aqılsız adamǵa uqsaydı. 27Jawın jawıp, dáryalar tasıp, samal esip, bul úydi suw basqanda, ol qulap, qattı qıyraldı.

28Iysa usı sózlerdi aytıp bolǵanda, xalıq Onıń tálimine tań qaldı. 29Sebebi Ol diniy muǵallimler sıyaqlı emes, al Óz biyligi menen adamlarǵa tálim berdi.

Currently Selected:

Matta 7: QrqMK22

Highlight

Copy