Matta 8

Iysanıń teri keselligine shalınǵan adamǵa shıpa beriwi

(Mrk 1:40-45; Luk 5:12-16)

1Iysa tawdan túskende, izine kóp xalıq erdi. 2Sonda Onıń qasına teri keselligine shalınǵan bir adam kelip, ayaǵına jıǵıldı da:

– Iyem, eger Sen qáleseń, meni kesellikten tazalay alasań, – dedi.

3Iysa qolın sozıp, oǵan tiygizdi de:

– Qáleymen, tazalan! – dedi.

Teri keselligine shalınǵan adam sol waqıtta-aq tazalanıp shıpa taptı. 4Iysa oǵan:

– Abaylı bol, bunı hesh kimge aytpa! Biraq ruwxaniyge barıp ózińdi kórset te, teri keselliginen tazalanǵanıńdı adamlarǵa dálillew ushın, Muwsa buyırǵan qurbanlıqtı ber,#8:4 Leb 14:1-32. – dedi.

Rimli júzbasınıń isenimi

(Luk 7:1-10)

5Iysa Kaparnahumǵa kirgen waqıtta Onıń qasına bir rimli júzbası kelip:

6– Iyem, meniń xızmetshim láń bolıp, qattı qıynalıp úyde jatır, – dep Onnan járdem soradı.

7Iysa oǵan:

– Men barıp, oǵan shıpa beremen, – dedi.

8Al júzbası:

– Iyem, Seniń shańaraǵıma keliwińe men ılayıqlı emespen. Tek bir sóz ǵana aytsań, xızmetshim jazılıp ketedi. 9Óytkeni men de birewdiń qol astındaǵı adamman, ózime baǵınıshlı áskerlerim de bar. Olardıń birewine «bar» desem, baradı, ekinshisine «kel» desem, keledi, qulıma «mınanı isle» desem, isleydi, – dep juwap qaytardı.

10Bulardı esitken Iysa tań qalıp, izine erip kiyatırǵanlarǵa:

– Sizlerge shının aytıp turman: Men bunday isenimdi Izrailda da ushıratpaǵan edim. 11Sizlerge aytatuǵınım: shıǵıstan hám batıstan kóp adamlar kelip, Ibrayım, Ísaq hám Yaqıp penen birge Aspan Patshalıǵında dasturxanlas boladı. 12Al Patshalıqtıń miyrasxorları sırtqa, qarańǵılıqqa shıǵarıp taslanadı. Sol jerde olar jılap, pushayman jeydi – dedi.

13Sonnan soń, Iysa júzbasıǵa:

– Bara ber, seniń isenimińe qaray bolsın! – dedi.

Júzbasınıń xızmetshisi sol waqıtta-aq jazılıp ketti.

Iysanıń kóp adamlarǵa shıpa beriwi

(Mrk 1:29-34; Luk 4:38-41)

14Iysa Petrdiń úyine kelip, onıń qáyin enesiniń ıssılıǵı kóterilip, awırıp jatırǵanın kórdi. 15Iysa hayaldıń qolına qolın tiygizgende, ıssılıǵı tústi hám hayal ornınan turıp, Oǵan xızmet etti.

16Kesh bolǵanda, adamlar Iysaǵa jin urǵan kóp adamlardı alıp keldi. Iysa olardaǵı jawız ruwxlardı Óziniń sózi menen quwıp shıǵarıp, awırǵanlardıń hámmesine shıpa berdi. 17Bular Iyshaya payǵambar arqalı aytılǵan mına sózlerdiń orınlanıwı ushın boldı:

«Ol keselliklerimizdi Ózine aldı,

Awırıwlarımızdı Ózine júkledi»#8:17 Iysh 53:4..

Iysaǵa shákirt bolıwdıń shártleri

(Luk 9:57-62)

18Iysa dógeregine jıynalǵan kóp xalıqtı kórgende, shákirtlerine kóldiń arǵı jaǵasına ótiwdi buyırdı. 19Sonda bir diniy muǵallim kelip, Oǵan:

– Ustaz, Sen qayaqqa barsań da, men Saǵan eremen, – dedi.

20Iysa oǵan:

– Túlkilerdiń inleri, aspandaǵı quslardıń uyaları bar. Biraq Adam Ulınıń#8:20 Adam Ulı – Iysa Masiyx Ózin kóbinese usılay atadı, sózlikke qarań. bas qoyıp tınıǵatuǵın ornı da joq, – dedi.

21Jáne bir shákirti Oǵan:

– Iyem, dáslep barıp, ákemdi jerlewime ruxsat et, – dedi.

22Biraq Iysa oǵan:

– Maǵan er. Ólilerdi jerlewdi ólilerdiń ózlerine qaldır, – dedi.

Iysanıń dawıldı toqtatıwı

(Mrk 4:35-41; Luk 8:22-25)

23Iysa qayıqqa mingende, shákirtleri de Onıń izinen mindi. 24Kólde tosattan kúshli dawıl kóterilip, tolqınlar qayıqtı suwǵa toltıra basladı. Al Iysa uyıqlap jatır edi. 25Sonda shákirtleri Oǵan jaqınlap keldi de, Onı oyatıp:

– Iyem! Bizlerdi qutqar, nabıt bolajaqpız! – dedi.

26Iysa olarǵa:

– Nege bunshama qorqasızlar, háy, isenimi azlar? – dedi de, turıp samalǵa hám kólge tıyım salǵanda, awır tınıshlıq ornadı.

27Adamlar tań qalısıp:

– Samaldı da, tolqınlardı da Ózine boysındıratuǵın bul kim? – desti.

Jin urǵan eki adamnıń shıpa tabıwı

(Mrk 5:1-20; Luk 8:26-39)

28Iysa arǵı jaǵadaǵı Gadara úlkesine kelgende, qábirlerdiń arasınan kiyatırǵan jin urǵan eki adamdı ushırattı. Olar júdá qáhárli bolǵanlıqtan, bul jol menen ótiwge hesh kimniń batılı barmaytuǵın edi. 29Olar qıshqırısıp:

– Qudaydıń Ulı Iysa, Seniń bizler menen ne jumısıń bar? Bul jerge bizlerdi waqtı kelmesten burın azaplawǵa keldiń be? – dedi.

30Olardan alısıraqta bir úlken shoshqa padası jayılıp júrgen edi. 31Jinler Iysaǵa:

– Eger bizlerdi quwıp shıǵaratuǵın bolsań, shoshqalardıń padasına jiber, – dep jalındı.

32Sonda Iysa olarǵa:

– Barıńlar, – dedi.

Jinler adamlardan shıǵıp, shoshqalardıń ishine kirdi. Sonda shoshqalardıń hámmesi juwırısıp, tik jardan kólge tústi de, suwda nabıt boldı.

33Shoshqa baǵıwshılar qashıp qalaǵa barıp, bárin xabarladı hám jin urǵanlarǵa ne bolǵanın da aytıp berdi. 34Sonda qalanıń barlıq turǵınları Iysanıń aldına shıqtı. Olar Onı kórgende, úlkeden shıǵıp ketiwin ótindi.

Currently Selected:

Matta 8: QrqMK22

Highlight

Copy