लूका 3

बप्तिस्मा दिएवाला यूहन्नाके प्रचार

(मत्ती ३:१-१२; मर्कू १:१-८; यूह १:१९-२८)

1रोमी महाराजा तिबेरियसके शासनकालके पन्ध्रमा सालमे पन्तियस राज्यपाल पिलातस यहूदिया प्रदेशके हाकिम रहै। ऊ समय हेरोद राजा गालील जिलाके शासक रहै, आर ओकर भ्या फिलिप एतुरिया आर त्राखोनितिसके क्षेत्रमे शासन कर्ते रहै, आर लुसानियस अबिलेनेके क्षेत्रमे शासन कर्ते रहै। 2हन्नास आर कैयाफा प्रधान पुजारीके समयमे परमेश्वरके वचन सुनसान जगहमे जकरियाके बेटा यूहन्नाके लगत ऐलै। 3बप्तिस्मा दिएवाला यूहन्ना यी प्रचार कर्ते यर्दन लद्दीके आस-पासके सभे इलाका महर ऐलै, “पाप करैले छोड आर परमेश्वरके तरफ मन लगा आर बप्तिस्मा ले आर परमेश्वर तोरसिके कैल पापसिके माफी देतौ।” 4परमेश्वरके वक्ता यशैया धरमशास्त्रमे एरं लिखल्कै छे:

“ओकर आवाज सुनसान जगहमे ऊ जोर-जोरसे हल्ला करिके आदमीसिके एरं कहते रहै,

‘प्रभुके रस्ता तैय्यार कर, ओकर रस्ता ठीक कर, जे रस्ता द्याके ऊ ऐतै।

5हरेक गहिर रस्ता भरि देल जैतै, हरेक उच्च भाग आर पहाड निच्चा कैल जैतै,

आर टेढ रस्ता सिधा हैतै आर उच्च नेमा रस्ता बराबर कैल जैतै।

6सब आदमीसब परमेश्वरके उद्धारके देख्तै।’ ”

7बहुते आदमीसब यूहन्नाके लगत बप्तिस्मा लियैले ऐलै। मगर यूहन्ना ओकरासिके कहैल्कै, “तुहेंसब जहरिला साँपके जुगुर दुष्ट छैं! तुहेंसब जे एखनिहौं तक पाप करैले छोडिके परमेश्वरके तरफ मन नैलगैलहैं छे, तैय्योपर तोरासिके के सिख्या देल्कौ कि परमेश्वरसे आबेवाला सजायसे बची जैभैं? 8तुहेंसब पाप करैले छोडिके परमेश्वरके तरफ मन लगैलहैं छे ते, यी बातके आपन व्यवहारद्वारा साबित कर। आर आपन मनमे यी सोचिके बेफिकिर नै भ्याजो कि, हमरसिके कुल-पिता ते ‘अब्राहम’ छै: हमे तोरासिके कहैछियौ कि, परमेश्वर यी पत्थलसिसे अब्राहमके लिए सन्तान पैदा करे सकैछै। 9जे आदमीसब पाप करैले छोडिके परमेश्वरके तरफ मन नैलगाबैछै, ऊ परमेश्वरद्वारा दोषी ठहरैल जैतै आर ओकरा आगिनमे झोंकी देल जैतै, ठीक ओहिने जेरंके कुढेर लेल आदमी उटा सभे गाछके जड काटिके आगिनमे झोंकी दैछै जे गाछ बढियाँ फल नैदैछै।” 10आदमीसब यूहन्नासे पुछल्कै, “हमेसब परमेश्वरके सजायसे बचैके लिए कि करियै?” 11यूहन्ना जबाब देल्कै, “जकरा दीटा कमिज छै, ऊ एकटा तकरा दहैं जकरा नैछै, आर जकर लगत ख्यावाला चीज छै उहो ओहिने कर।” 12कर असुल करेवालासब भी यूहन्नासे बप्तिस्मा लियैके ऐलै आर यूहन्नासे पुछल्कै, “हे गुरुजी हमेसब कि करियै?” 13ऊ जबाब देल्कै, “जतनें कर सरकार तोक्ले छै, ओकरसे बेसी नैले।” 14अहिने करिके सिपाहीसब पुछल्कै, “आब हमेसब कि करियै?” यूहन्ना कहैल्कै, “ककरो उप्पर अत्याचार करिके आर झुट्ठा दोष लग्याके पैसा नैले। मगर आपन दरमाहामे सन्तुष्ट र।” 15जे आदमीसब ख्रीष्टके जल्दी आबैके आशामे रहै ऊसब मनेमने यूहन्नाके बारेमे विचार कर्ते रहै कि कहीं इहे ते उद्धारकर्ता ख्रीष्ट नैछै। 16तब यूहन्ना ओत्ते भेल सभैके जबाब देल्कै, “हमे तोरासिके पानीसे बप्तिस्मा दैछियौ, मगर हमरासे शक्तिशाली एकटा आदमी आबेवाला छै, जकर जुत्ताके फित्ता खोलैके लायक हमे नैछियै, ऊ तोरासिके पवित्र आत्मा आर आगिनसे बप्तिस्मा देतौ। 17आपन खम्हारके अनाजके साफ करैके लिए ओकर सुप्पा ओकर हातमे छै। ऊ गहुमके साफ करिके ओकरा आपन बखारीमे जमा कर्तै, मगर भुस्साके ऊ आगिनमे जरैतै जे आगिन कहियो नैमिझाबैछै।” 18एरंके आरहौ बहुते वचनद्वारा शिक्षा देते हुवे बप्तिस्मा दिएवाला यूहन्ना आदमीसिके खुश-खबरी सुनैल्कै।

19मगर हेरोद राजा आपन भ्याके पतनी हेरोदियासके आपनसंगे राखैके कारण यूहन्ना ओकरा धोपल्कै रहे। आर ओकर आरहौ पापसब भी देख्या देल्कै। 20सेल्याके हेरोद राजा यूहन्नाके जेलमे ध्या देल्कै एरंके ऊ आपन सभे दुष्कर्ममे आरहौ एकटा कुकर्म बढैल्कै।

यूहन्नाके द्वारा येशूके बप्तिस्मा

(मत्ती ३:१३-१७; मर्कू १:९-११; यूह १:३२-३४)

21सभे आदमीके बप्तिस्मा लेलके बाद येशू भी बप्तिस्मा लेल्कै, बप्तिस्माके बाद जखन ऊ प्रार्थना कर्ते रहै, तब आकाश उघर्लै। 22आर पवित्र आत्मा शारीरिक रुपमे पेर्वाके जुगुर येशूके उप्परमे उतर्लै आर स्वर्गसे परमेश्वर बोल्लै आर येशूके कहैल्कै, “तुहें हमर प्यारा बेटा छैं, तोरासे हमे बहुते खुश छियौ।”

येशूके वंशावली

(मत्ती १:१-१७)

23येशू जखन आपन सेवाके काम काज शुरु कैल्कै येशू लगभग तीस सालके रहै। आदमीसब ओकरा योसेफके बेटा कहै, योसेफ एलीके बेटा रहै। 24एली मत्तातके बेटा रहै, मत्तात लेवीके बेटा रहै, लेवी मल्कीके बेटा रहै, मल्की यान्नाके बेटा रहै, यान्ना योसेफके बेटा रहै। 25योसेफ मताथियासके बेटा रहै, मत्ताथियास आमोसके बेटा रहै, आमोस नहुमके बेटा रहै, नहुम इसलीके बेटा रहै, इसली नग्गैके बेटा रहै। 26नग्गै माथके बेटा रहै, माथ मत्ताथियासके बेटा रहै, मत्ताथियास सेमैनके बेटा रहै, सेमैन योसेखके बेटा रहै, योसेख योदाके बेटा रहै। 27योदा योआननके बेटा रहै, योआनन रेसाके बेटा रहै, रेसा यरुबाबेलके बेटा रहै, यरुबाबेल शाल्तिएलके बेटा रहै, शाल्तिएल नेरीके बेटा रहै। 28नेरी मल्कीके बेटा रहै, मल्की अदीके बेटा रहै, अदी कोसामके बेटा रहै, कोसाम एलमादमके बेटा रहै, एलमादम एरके बेटा रहै। 29एर यहोशूके बेटा रहै, यहोशू एलीएजरके बेटा रहै, एलीएजर योरीमके बेटा रहै, योरीम मत्तातके बेटा रहै, मत्तात लेवीके बेटा रहै, 30लेवी शिमियोनके बेटा, रहै शिमियोन यहूदाके बेटा रहै, यहूदा योसेफके बेटा रहै, योसेफ योनानके बेटा रहै, योनान एल्याकिमके बेटा रहै, 31एल्याकिम मलेआके बेटा रहै, मलेआ मिन्नाके बेटा रहै, मिन्ना मताथाके बेटा रहै, मताथा नातानके बेटा रहै, नातान दाऊद राजाके बेटा रहै। 32दाऊद यिशैके बेटा रहै, यिशै ओबेदके बेटा रहै, ओबेद बोअजके बेटा रहै, बोअज सल्मोनके बेटा रहै, सल्मोन नहशोनके बेटा रहै। 33नहशोन अम्मिनादाबके बेटा रहै, अम्मिनादाब आरामके बेटा रहै, आराम हेस्रोनके बेटा रहै, हेस्रोन फारसके बेटा रहै, फारेस यहूदाके बेटा रहै। 34यहूदा याकूबके बेटा रहै, याकूब इसहाकके बेटा रहै, इसहाक अब्राहमके बेटा रहै, अब्राहम तेरहके बेटा रहै, तेरह नाहोरके बेटा रहै। 35नाहोर सरुगके बेटा रहै, सरुग रऊके बेटा रहै, रऊ पेलेगके बेटा रहै, पेलेग एबेरके बेटा रहै, एबेर शेलहके बेटा रहै, 36शेलह केनानके बेटा रहै, केनान अर्पक्षदके बेटा रहै, अर्पक्षद शेमके बेटा रहै, शेम नूहके बेटा रहै, नूह लेमेखके बेटा रहै। 37लेमेख मतुशेलहके बेटा रहै, मतुशेलह हनोकके बेटा रहै, हनोक येरेदके बेटा रहै, येरेद महलालेलके बेटा रहै, महलालेल केनानके बेटा रहै। 38केनान एनोशके बेटा रहै, एनोश शेतके बेटा रहै, शेत आदमके बेटा रहै, आदम परमेश्वरके बेटा रहै।

Currently Selected:

लूका 3: KYVNT

Highlight

Copy