लूका 10

येशू सत्तरटा चेलासिके प्रचारके काममे भेजल्कै

1एकरबाद प्रभु येशू आरहौ सत्तरटा चेलासिके चुनल्कै। जे-जे गाँव आर सहरसिमे येशू जैके लिए योजना बनैल्कै रहे, येशू ओकरासिके आपनसे आगु दी-दी झन करिके सभे सहर आर गाँवमे भेजल्कै। 2येशू ओकरासिके कहैल्कै, “जेरंके खेतमे बहुते फसल हैछै, एरंको बहुते आदमीसब छै जे परमेश्वरके वचन सुनैके लिए तैय्यार छै। मगर परमेश्वरके राज्यके बारेमे बताबैके लिए आदमीसब कम छै। सेल्याके फसलके प्रभुके संगे प्रार्थना कर ताकी परमेश्वरके राज्यके बारेमे आदमीसिके बताबैके लिए बहुते आदमीसिके भेजी दौ। 3आब तुहेंसब जो। देख्, भेंडासिके खटिहासिके बीचमे भेज्ल जुगुर हमे तोरासिके आदमीसिके बीचमे भेजैछियौ। 4तुहेंसब आपन संगमे पैसा, झोला, जुत्ता कुछु नैले, आर रस्तामे कक्रहौ नमस्कार भी नैकर। 5जब तोरासिके कोनो आदमी आपन घरमे स्वागत करैछौ ते पहेला, ‘यी घरमे शान्ति बास करै’ कहिके आशीर्वाद दहैं। 6अगर ओत्ते परमेश्वरके संगे शान्ति चाहेवाला आदमी रहैछै ते तोरसिके शान्ति ओकर संगमे रहतै। मगर शान्ति नैचाहेवाला आदमीसब छै ते तोरसिके शान्ति तोरेसिके लगत वापस घुमिके ऐतौ। 7तुहेंसब उहे घरमे बास बैठ आर ऊसब जे खाना खैले दैछौ उटा खो, कहिनेकी जनके ओकर रोजी मिलना चाही। घरे-घर बास नैबैठ। 8जब तुहेंसब कोनो सहरमे जैछैं आर ओत्करो आदमीसब तोरसिके स्वागत करैछौ, तब तोरसिके आगुमे देल खाना खो। 9ओत्ते भेल रोगी-बेमारीसिके ठीक कर आर ओकरासिके कहैं, ‘परमेश्वरके राज्य तोरसिके नज्दिकमे ऐल छौ।’ 10मगर जब तुहेंसब कोनो सहरमे जैछैं आर ओत्करो आदमीसब तोरासिके स्वीकार नैकरैछौ, तब निक्लीके उटा सहरके रस्तासिमे जो, आर आदमीसिके क, 11हमरसिके पैरीके धुर भी तोरसिके विरुद्धमे हमेसब तोरसिके चेतावनीके लिए झाडैछियौ, फेर भी यी जरुर जान कि परमेश्वरके राज्य नज्दिक ऐल छै। 12हमे तोरासिके कहैछियौ, न्यायके दिनमे उटा सजाय जे परमेश्वर सदोम सहरके आदमीसिके देल्कै, उटा सजाय बहुते कम हैतै जे सजाय परमेश्वर तोरासिके देतौ।”

विश्वास नैकरेवाला सहरके आदमीसिके दशा

(मत्ती ११:२०-२७; १३:१६-१७)

13तोरसिके लिए यी बहुते भयानक हैतौ, ऊ आदमीसब जे खोराजीन सहरमे रहैछै! तोरसिके लिए यी बहुते भयानक हैतौ, ऊ आदमीसब जे बेथसेदा गाँवमे रहैछै! कहिनेकी तोरसिके सहरसिमे कैल शक्तिशाली कामसब टुरोस सहर आर सिदोन सहरमे कैल जैतियै ते ओत्करो आदमीसब तहिये बोराके कपडा लग्याके क्षौर घस्तियै, यी देखाबैके लिए कि ऊसब पाप करैले छोडिके परमेश्वरके तरफ मन लग्या लेल्कै छे। 14मगर हमे तोरासिके कहैछियौ, न्यायके दिनमे परमेश्वर तोरासिसे कम सजाय टुरोस सहर आर सिदोन सहरके आदमीसिके देतै। 15आर हे कफर्नहुम गाँवके आदमीसब, कि तुहेंसब सोचैछैं कि परमेश्वर तोरासिके उप्पर स्वर्गतक उठैतौ? जरुर तुहेंसब नै उठैल जैभैं, मगर तुहेंसब नरकमे खसैल जैभैं।

16येशू चेलासिके कहैल्कै, “जे तोरसिके बात सुनैछै, ऊ हमर बात सुनैछै। जे तोरासिके अस्वीकार करैछै, ऊ हमरा अस्वीकार करैछै, आर जे हमरा अस्वीकार करैछै, ऊ हमरा भेजेवाला परमेश्वरके अस्वीकार करैछै।”

17येशूके भेज्ल ऊ सत्तरटा चेलासब आनन्दके साथ वापस घुमिके ऐलै आर खुशी हैते प्रभुके कहैल्कै, “प्रभु, भूतसब भी हमर बात मानल्कै जब हमेसब ओकरासिके तोर नाममे आज्ञा देलियै।” 18येशू चेलासिके कहैल्कै, “हमे देख्लियै कि शैतान हारिके अचानक स्वर्गसे बिजलीके जेरं खस्ते देख्लियै। 19हमे तोरासिके साँप आर बिच्छुसिके कुच्लैके आर दुश्मनके (शैतान) सभे सामर्थ्यके उप्पर अधिकार देलियौ छे आर कोनो चीज तोरासिके हानी नैकर्तौ। 20तैय्योपर भूतसब तोरसिके आज्ञा मानैछै कहिके खुशी नैहु, मगर तोरसिके नाम स्वर्गमे लिख्ल छै कहिके खुशी हु।”

21तखनिहैं येशू पवित्र आत्मामे आनन्दित भ्याके कहैल्कै, “हे पिता, आकाश आर धर्तीके प्रभु, हमे तोरा धन्यवाद चढाबैछिहौं, कहिनेकी तुहें यी बात बुद्धिमान आर समझदार आदमीसे गुप्त राखिके जे आदमीसब बच्चासिके जुगुर छै ओकरासिके प्रकट कैलह छे। हँ पिता, तोरा इहे बढियाँ लाग्लहौं। 22हमर पिता सभे चीज हमर हातमे देल्कै छे, बेटा के छै कहिके पिताके सिवाय आर कोय नैचिन्हैछै। पिता के छै कहिके बेटाके सिवाय आर कोय नैचिन्हैछै। आर ऊसब चिन्हैछै जकर लगत बेटा पिताके प्रकट करैके इच्छा करैछै।”

23तब येशू चेलासिके महर घुमिके असकल्लेमे कहैल्कै, “धन्य छै उटा आँख जेसब तोरसिके देख्ल यी बातसब देखैछै। 24कहिनेकी हमे तोरासिके कहैछियौ, तुहेंसब जे देख्लहैं आर सुन्लहैं छे, से देखैले बहुते परमेश्वरके वक्ता आर राजासब देखैले बडका इच्छा कैल्कै रहे, मगर ऊसब देखैले भी नैपैल्कै, आर सुनैले भी नैपैल्कै।”

बढियाँ पडोसीके खिसा

(मत्ती २२:३४-४०; मर्कू १२:२८-३१)

25एक दिन जब येशू आदमीसिके शिक्षा देते रहै, एकटा यहूदी धरमशास्त्रके पण्डित येशूके फसाबैके युक्ति कर्ते पुछल्कै, “हे गुरु, हमे कोन काम करियै कि परमेश्वर हमरा कहियो खतम नैहुएवाला जीवन दै?” 26येशू ओकरा कहैल्कै, “मूसाके विधि-विधानमे कि लिख्ल छै? तुहें ओकर व्याख्या केरंके करैछैं?” 27यी बात सुनिके ऊ आदमी जबाब देल्कै, “लिख्ल छै कि,

‘तुहें आपन परमेश्वरसे आपन पुरा हृदय, पुरा जान, पुरा शक्ति आर पुरा मनके साथ प्रेम कर’

आर ‘तुहें आपन पडोसीसे ओतनें ही प्रेम कर जतनें तुहें अपने आपसे करैछैं।’ ”

28येशू ओकरासिके कहैल्कै, “तुहें ठीक जबाब देल्हैं। ओहिने कर आर तुहें कहियो खतम नैहुएवाला जीवन पैभैं।” 29मगर ऊ आपने कामके सही ठहराबैके लिए (यानिकी गैर-यहूदी आदमीसिके प्रेम नैकरिहैं) येशूके कहैल्कै, “हमर पडोसी के छै ते?” 30येशू एकटा खिसाद्वारा ओकरा जबाब देल्कै, “एकटा आदमी यरूशलेम सहरसे यरिहो सहरमहर जैते रहै। डकेतसब ओकरा घेरिके हमला करिके ओकर कपडा आर हरेक चीज जे ओकरलगत रहै ओकरासे छिनी लेल्कै आर मारपिट करिके ओकरा अध्मरुव करिके छोडिके चल गेलै। 31संजोगसे एकटा यहूदी पुजारी उहे रस्ता द्याके जैते रहै आर उटा अध्मरुव आदमीके देखिके ऊ सहायता नैकरिके दोसर महर घुमिके गेलै। 32ओहिने करिके एकटा लेवी कुलके आदमी, जे यरूशलेम सहरके परमेश्वरके मन्दिरमे काम कर्ते रहै उहे द्याके ऐते रहै। उहो ओकरा देखिके सहायता नैकरिके दोसर द्याके घुमिके गेलै। 33मगर सामरिया प्रदेशके एकटा सामरी आदमी आपन यात्रामे जैते रहै। ऊ उटा अध्मरुव आदमीके देखल्कै आर ओकरलगत ऐलै। ऊ अध्मरुव आदमीके देखिके ओकर मन दयासे भरि गेलै। 34आर ओकरलगत जैके तेल आर अंगुरके मद्द लग्याके ओकर घा सिमे पट्टी बान्ही देल्कै। तकरबाद ऊ आपन गधामे ओकरा चढ्याके एकटा धरमशालाके आनिके ओकर देखभाल कैल्कै। 35एक दिनके बाद ऊ धरमशालाके मालिकके दीटा चानीके सिक्का द्याके कहैल्कै, ‘एकर देखभाल कर आरहौ बेसी खर्चा लाग्तै ते हमे उन्हरसे घुमिके आबैके समयमे तोरा द्या देभौं।’ ” 36येशू ओकरासिके पुछल्कै, “तोरसिके विचारमे यी तीन आदमीसिमेसे डकेतके द्वारा हमला भेल आदमीके पडोसी के भेलै?” 37ऊ कहैल्कै, “ऊ आदमीपर जे दया देखैल्कै ऊ ओकर पडोसी छै।” तब येशू ओकरा कहैल्कै, “जो, तुहें भी ओहिने कर।”

येशू मार्था आर मरियमके घरमे

38येशू आर ओकर चेलासब जैबेरियाँ कोनो एकटा गाँवमे पुग्लै। ओत्ते मार्था नामके एकटा जनानी ओकरासिके आपन घरमे स्वागत कैल्कै। 39मरियम नाम भेल ओकर एकटा बहिन भी रहै, जे येशूके पैरी लगत बैठिके येशूके शिक्षा सुन्ते रहै। 40मगर मार्था खाना बनाबैके काममे व्यस्त रहै। ऊ येशूके लगत आबिके कहैल्कै, “प्रभुजी हमर बहिनसब काम करैके लिए हमरा असकल्ले छोडिदेल्कै छे। कि तुहें वास्ता नैराखैछह? ओकरा कह ते, ऊ हमरा सहायता कर्तै।” 41मगर प्रभु येशू जबाब द्याके ओकरासिके कहैल्कै, “मार्था, ए मार्था तुहें बहुते बातके विषयमे चिन्ता करैछैं आर व्याकुल हैछैं। 42खाली एक्केटा बात चिन्ता करैके योग्य छै। मरियम एकरा खोजी लेल्कै छे, आर एकरा यी नै छिन्ल जैतै।”

Currently Selected:

लूका 10: KYVNT

Highlight

Copy