लूका 9

येशू बारह चेलासिके प्रचार करैके लिए भेजल्कै

(मत्ती १०:५-१५; मर्कू ६:७-१३)

1तब येशू बारह चेलासिके एक्केसंगे बोलैल्कै आर ऊ ओकरासिके भूतसब निकालैके आर रोग-बेमारसब ठीक करैके सामर्थ्य आर अधिकार देल्कै। 2येशू ओकरासिके परमेश्वरके राज्यके बारेमे प्रचार करैले आर बेमारीसिके ठीक करैले भेजल्कै। 3ऊ ओकरासिके कहैल्कै, “तोरसिके यात्रामे रस्ताके लिए आपन संगमे कुछु नैल्याजो। लाठी, रोटी, पैसा, अलगसे कमिज, खानासमेत नैलिहैं। 4जे घरके आदमीसब तोरसिके स्वागत करैछौ, उटा गाँवसे बिदा नैहुऐतक उहे घरमे मैजमान बनिके र। 5कोनो जगहमे आदमीसब तोरासिके स्वीकार नैकर्तौ ते, ऊ आदमीसिके परमेश्वरसे मिलेवाला सजायके चेतावनी दियैके लिए उटा जगहसे निक्लैबेरियाँ तोरसिके पैरीमे लाग्ल धुर झाडी दिहैं।” 6तब ऊसब बिदा भेलै, आर खुश-खबरी प्रचार कर्ते आर सभे जगहमे रोगी-बेमारीसिके ठीक कर्ते गाँव-गाँवमे गेलै।

हेरोद राजा दुविधामे पड्लै

(मत्ती १४:१-१२; मर्कू ६:१४-२९)

7रोमी महाराजाके अधिनमे गालील जिलामे राज्य करेवाला हेरोद राजा उटा कामके चर्चा सुनल्कै जे येशू कर्ते रहै, यी सुनिके हेरोद राजा दुविधामे पडी गेलै कहिनेकी बहुते आदमीसब कहैल्कै कि, “यूहन्ना मुर्दासे जिन्दा भ्याके उठ्लै छे।” 8आर कतनें आदमीसब कहै कि, “एलिया दिखाई पड्लै छे” आरसब आदमी कहै, “पहेलाके कोनो परमेश्वरके वक्तामेसे एकझन मुर्दासे जिन्दा भ्याके उठ्लै छे।” 9तब हेरोद राजा एरं कहैल्कै, “यूहन्नाके मुडा हम्हीं काटैले लगैलियै। मगर यी आदमी के छै जकर विषयमे हमे एरं अदभुद बातसब सुनैछियै?” तब ऊ येशूके भेट करैके इच्छा कैल्कै।

येशू पाँच हजार आदमीके खिलैल्कै

(मत्ती १४:१३-२१; मर्कू ६:३०-४४; यूह ६:१-१४)

10येशूके भेज्ल बारह चुन्ल आर भेज्ल चेलासब प्रचार करिके वापस ऐलके बाद ऊसब आपनद्वारा कैल सभे बात येशूके सुनैल्कै। आर ऊ आपन चेलासिके ल्याके बेथसेदा गाँवमे गेलै। 11मगर यी बात जानीके बहुते आदमीसब ओकर पाछु-पाछु ऐलै। येशू आर ओकर चेलासब आदमीसिके स्वागत कैल्कै आर परमेश्वरके राज्यके विषयमे भी सुनैल्कै आर रोगी-बेमारीसिके ठीक कैल्कै। 12जब दिन डुबे लाग्लै तब बारह चेलासब आबिके ओकरा कहैल्कै, “एत्ते ते कुछु भी नैछै। यी आदमीसिके बिदा दह। आर ऊसब आस-पासके बजार आर गाँवसिमे जैके आपन लिए कुछु खाना किने सकै, कहिनेकी अपनासब एत्ते सुनसान जगहमे छियै”

13मगर येशू ओकरासिके कहैल्कै, “तुहींसब ओकरासिके कुछु खैले दहैं।” तब ऊसब कहैल्कै, “हमरसिके लगत पाँचटा रोटी आर दीटा माछके सिवाय आर कुछु नैछै, नैते हमरासिके जैके यी सभे आदमीसिके लिए खाना किने पड्तै।” 14ओत्ते पाँच हजार जतनें मरदसब रहै। तब येशू आपन चेलासिके कहैल्कै, “ओकरासिके पचास-पचासके समूहमे बैठा।” 15चेलासब आदमीसिके ओहिने करिके बैठैल्कै। 16तब येशू उटा पाँचटा रोटी आर दीटा माछ ल्याके स्वर्गमहर देखिके परमेश्वरके धन्यवाद देल्कै तब ऊ रोटी आर माछ तोडीके आदमीसिके पर्सीके दियैले चेलासिके देल्कै। 17तब सभेको खैल्कै आर अघैलै। जब सभेको खाना खैल्कै तब चेलासब रोटी आर माछके उगर्ल रोटीके टुकरासब जमा कैल्कै। ओकरासे बारह ढाकी भरि गेलै।

येशू उद्धार दिएवाला ख्रीष्ट

(मत्ती १६:१३-२३; मर्कू ८:२७-३३)

18एकबेर येशू असकल्ले प्रार्थना कर्ते रहै, आर चेलासब भी ओकरसंगे रहै, तब ऊ चेलासिके पुछल्कै, “आदमीसब हमर विषयमे कि कहैछै?” 19ऊसब कहैल्कै, “कुछु आदमीसब कहैछै कि तुहें बप्तिस्मा दिएवाला यूहन्ना छह; दोसरसिके कहना छै कि तुहें परमेश्वरके वक्ता एलिया छह। आर आरहौ आदमीसब कहैछै पहेलाके कोनो परमेश्वरके वक्तासिमेसे कोय एकझन फेर मुर्दासे जिन्दा भ्याके उठ्लै छे।” 20येशू ओकरासिके पुछल्कै, “मगर तुहेंसब अपने आपमे कोन्ची सोचैछैं, कि हमे के छियै?” पत्रुस जबाब द्याके कहैल्कै, “तुहें परमेश्वरसे भेज्ल गेल ख्रीष्ट छह।” 21तब येशू ओकरासिके आदेश देल्कै कि ओकर बारेमे यी बात कक्रहौ नैकहिहैं।

22येशू आपन चेलासिके बात बुझैते कहैल्कै, “हमे, आदमीके बेटा बहुते भयानक चीजसिके भोग्बै, आर यहूदी आदमीसिके अगुवासब, प्रमुख पुजारीसब आर यहूदी धरमशास्त्रके पण्डितसब हमरासे नफरत कर्तै आर हमर जान मार्तै आर तेसर दिन हमे फेर मुर्दासे जिन्दा भ्याके उठ्बै।”

येशूके अनुसरण करैके मतलब

(मत्ती १६:२४-२८; मर्कू ८:३४-९:१)

23तब ऊ सभैके कहैल्कै, “अगर कोय हमर चेला बनैले चाहैछैं ते तोरासिके आपन योजना आर हितके छोडे पड्तौ। ओकरा हमर लिए मरैके लिए भी तैय्यार रहे पड्तै। अन्तमे, ओकरा हमर चेलाके रुपमे हमर अनुसरण करे पड्तै। 24कहिनेकी जे यी धर्तीपर आपन जीवन बचाबैके कोशिश कर्तै, ऊसब सच्चा जीवन नैपाबे सक्तै। मगर तुहेंसब जे हमर कारण आपन जीवन दैछैं, सच्चा जीवन पैभैं। 25तुहें संसारमे सभे चीज प्राप्त करि लेल्हैं मगर परमेश्वरके साथ कहियो खतम नैहुएवाला जीवन पाबैके मौका खतम क्या देल्हैं ते, तोरा कोनो फैदा नैहैतौ। 26अगर तोरासिमेसे कोय भी हमरा आपन परमेश्वरके रुपमे स्वीकार करैले आर हमर शिक्षाके पालन करैले इन्कार करैछै, कहिनेकी तुहें डराबैछैं कि एरंको पापी आदमीसब तोर मजाक उडैतौ, तब हमे, आदमीके बेटा इन्कार कर्बौ कि तुहें हमर चेला छैं, जब हमे पवित्र स्वर्गदूतसिके साथ धर्तीपर वापस ऐबै। तब सभेको हमर चम्कल तेजके देख्तै जे हमर पिताके जुगुर छै।” 27मगर सच्चे हमे तोरासिके कहैछियौ, “तोरासिमेसे क्या झन एत्ते खडा छैं, ऊसब देख्तै कि ओकरसिके मरैसे पहेला परमेश्वरके राज्य आबी गेलै छे।”

येशूके रुप परिवर्तन

(मत्ती १७:१-८; मर्कू ९:२-८)

28यीसब बातके लगभग आठ दिनके बाद पत्रुस, यूहन्ना आर याकूबके आपन संगमे ल्याके प्रार्थना करैले बडका पहाडमे गेलै। 29जब ऊ प्रार्थना कर्ते रहै, अचानक परमेश्वर येशूके रुप बदली देल्कै। तब ओकर पिन्हल कपडा बिजली चमक्ल जेरं उजरा भेलै। 30अचानक दी झन प्रकट भेलै, आर ऊसब येशूसंगे बातचित कर्ते रहै। ऊसब मूसा आर एलिया रहै। 31ऊसब स्वर्गीय महिमासे चमकते रहै। ऊसब यी विषयमे बातचित कर्ते रहै, कि परमेश्वरके योजना मुताबिक जल्दी ही यरूशलेम सहरमे केरंके येशूके मौत हैतै। 32आब पत्रुस आर ओकर संगीसब निनबास्ल रहै। मगर निनसे उठ्लके बाद ऊसब येशूके स्वर्गके महिमाके उजेतमे आरहौ दीटा आदमीके संगे बातचित कर्ते देखल्कै। 33जब ऊ दीटा आदमीसब ओकरसे बिदा भ्याके जैते रहै तब पत्रुस येशूके कहैल्कै, “गुरुजी, अपनासब एत्ते आबिके बढियाँ कैलियै। अपनासब एत्ते तीनटा परमेश्वरके बास-स्थान बनाब, एकटा तोर लिए, एकटा मूसाके लिए, आर एकटा एलियाके लिए।” आपन बोल्ल बातके ओकरा खियाले नैभेलै। 34पत्रुस यी बात बोल्तहैं-बोल्तहैं एकटा बादल आबिके ओकरासिके झाँपल्कै, आर बादलसे झाँप्ल जैबेरियाँ चेलासिके डर भेलै। 35तब परमेश्वर बादलसे बोल्लै, “यी हमर बेटा छै, जकरा हमे चुन्लियै छे, तुहेंसब एकर बात सुन” 36यी आवाज बन्द भेलके बाद चेलासब खाली येशूके देखल्कै। तखनी देख्ल बात चेलासब कक्रहौ नैकहैल्कै।

भूत लाग्ल आदमीके येशू ठीक कैल्कै

(मत्ती १७:१४-१८; मर्कू ९:१४-२७)

37एक दिनके बाद येशू आर ओकर चेलासब जब पहाडसे उतर्लै, आदमीसिके एकटा बडका भीड ओकरासे भेट करैले दौडिके ऐलै। 38आदमीसिके भीडसे एकटा आदमी जोरसे कहैल्कै, “गुरुजी हमे तोरा बिन्ती करैछिहौं, हमर बेटापर कृपा-दृष्टि कर, कहिनेकी ऊ हमर एक्केटा बेटा छै।” 39भूत घुरी-घुरी एकरा धरैछै आर चिकर्ते मुर्छा पडैछै। मुखसे गौंज निकाल्ते लोटैछै आर चोट नैलगाबैतक भूत ओकरा नैछोडैछै। 40भूतके निकाली दै कहिके हमे तोर चेलासिके बिन्ती कैलिहौं, मगर ऊसब नैनिकाले सकल्कै। 41तब येशू जबाब देल्कै, “हे अविश्वासी आर हठी आदमीसब, हमे कहियातक तोरसिकेलगत रहबौ? तोरासिके कतनें सहियौ?” तकरबाद येशू लडकाके बाबुके कहैल्कै, “तोर बेटाके एत्ते आन!” 42जब ऊ ऐतहैं रहै कि भूत ओकरा पट्किके मोचारे लाग्लै, मगर येशू ऊ भूतके धोपल्कै, आर ऊ लडकाके ठीक करिके ओकर बाबुके जिम्मा लगैल्कै।

येशू फेर आपन मौतके बारेमे चर्चा कैल्कै

(मत्ती १७:२२-२३; मर्कू ९:३०-३२)

43तब सभे आदमीसब परमेश्वरके महानता देखिके ऊसब चकित भेलै। येशूके कैल सभे काममे आदमीसिके चकित भेल देखिके, ऊ आपन चेलासिके कहैल्कै, 44यीसब बात जे हमे तोरासिके कहैछियौ, नैभुलिहैं, जल्दी ही कोय, हमे, आदमीके बेटाके दुश्मनसिके हातमे पक्ड्या देतै 45मगर चेलासब यी बात नैबुझल्कै। यी बात बुझे सकैके ज्ञान चेलासिके नैहुऐके कारणसे येशू कि कहैले खोजल्कै से बात चेलासब विचार करैले नैसकल्कै। चेलासिके यी बातके विषयमे येशूसे पुछैले डर लाग्लै।

सभैसे बडका के?

(मत्ती १८:१-५; मर्कू ९:३३-४०)

46तब बारह चेलासिके बीचमे सभैसे बडका के छै कहिके एक दोसरमे बहस चल्लै। 47मगर येशू ओकरसिके मनके विचार मालुम करिके एकटा बच्चाके कोरामे ल्याके आपन बगलमे राखल्कै, 48आर ओकरासिके कहैल्कै, “जे हमर नाममे यी बच्चाके स्वागत करैछै, ऊ हमरा स्वागत करैछै, आर जे हमरा स्वागत करैछै, ऊ हमरा भेजेवालाके स्वागत करैछै। कहिनेकी तोरासिमेसे जे सभैसे छोट बनैछै उहे बडका हैछै।”

49तब यूहन्ना ओकरा कहैल्कै, “गुरुजी, एकटा आदमीके तोर नामके शक्तिसे भूत भगैते हमेसब देख्लियै। हमेसब ओकरा ओरं नैकरैले कहैलियै, कहिनेकी ऊ चेला आपनसिमेसे नैरहै।” 50मगर येशू ओकरा कहैल्कै, “ओकरा नैरोक, जे हमर दुश्मन नैछै ऊ हमर दोस्त छै।”

सामरी आदमीसब येशूके सत्कार नैकैल्कै

51जब येशूके स्वर्ग उठ्याके लजाबैके दिन नज्दिक ऐलै, तब ऊ यरूशलेम सहर जैके फैसला कैल्कै। 52येशू आपनसे पहेला कुछु समाद दिएवाला आदमीसिके भेजल्कै। ऊसब बिदा भ्याके सामरी आदमीसिके एकटा गाँवमे येशूके लिए तैय्यारी करैले गेलै। 53मगर उटा गाँवमे आदमीसब येशूके स्वागत नैकैल्कै, कहिनेकी ऊ यरूशलेम सहरके तरफ जैते रहै। 54यी देखिके ओकर चेलासब याकूब आर यूहन्ना कहैल्कै, “प्रभुजी, कि तुहें चाहैछ कि एकरासिके भसम करैके लिए स्वर्गसे आगिन बरसै कहिके हमेसब आज्ञा दियै?” 55यी बात सुनिके येशू ओकरसिके तरफ घुमिके ओकरासिके धोपल्कै। 56तकरबाद येशू ओकरासिके ल्याके दोसर गाँवमे गेलै।

चेलाके गुण

(मत्ती ८:१९-२२)

57येशू आर ओकर चेलासब रस्तामे जैबेरियाँ, एकटा आदमी आबिके येशूके कहैल्कै, “हमे तोर चेला बनैके लिए तुहें जते जैभ तोर पाछु-पाछु जैभौं।” 58येशू ओकरा कहैल्कै, “खटिहाके बिल आर आकाशके चिडियासिके खोय्ता छै, मगर हमे, आदमीके बेटाके संगे एकटा घर भी नैछै जते हमे सुते सकियै।”

59येशू दोसर एकटा आदमीके कहैल्कै, “हमर चेला बन।” मगर ऊ आदमी कहैल्कै, “हे प्रभु, पहेला हमरा आपन घर वापस जैले द्या। हमर बाबुके मर्लके बाद, हमे ओकरा गाड्बै आर फेर हमे आबिके तोर चेला बन्भौं।” 60ऊ ओकरा कहैल्कै, “जे आदमीसब आत्मिक रुपसे मर्ल छै, ओकरासिके आपन मुर्दाके आपनहैं गाडैले दहैं। मगर तुहें जैके परमेश्वरके राज्यके खुश-खबरी प्रचार कर।” 61दोसर आदमी भी कहैल्कै, प्रभु, हमे तोर पाछु ऐभौं, मगर पहेला आपन घरके आदमीसिसे बिदा लियैले द्या। 62मगर येशू ओकरा कहैल्कै, आपन हात हरमे लग्याके पाछु महर देखेवाला कोय भी परमेश्वरके राज्यके योग्य नैहैछै।

Currently Selected:

लूका 9: KYVNT

Highlight

Copy