मरकुस 13

आखरी दिन कर चिन्हा

(मत्ती 24:1-2; लूका 21:5-6)

1जब ईसू हर परमेस्वर कर मंदिर ले निकलत रहीस, तब ओकर चेला में ले एक झन हर ओके ला कहीस, “ए गुरूजी, इहां देख, कईसना बड़खा-बड़खा पखना अऊ कईसना सुघर मकान हवे।” 2ईसू हर ओकर जग कहीस, “का तुमन इहां बड़खा-बड़खा मकान देखत हवा, इहां एको ठन पखना नई बांचही, जेहर गिराल नई जाही।” 3जब ईसू हर जैतून नांव कर पहार उपरे मंदिर कर देखार में बईठे रहीस, तब पतरस, याकूब, यूहन्ना अऊ अंदरियास मन अलगे जाए के ओकर जग पूछीन, 4“हमके ला बता कि ए बात मन कब होहीं? अऊ जे घनी ए बात मन होहीं, त ओ घनी कर चिन्हा का होही?” 5ईसू हर ओमन जग कहे लागीस, “सवाचेती रहा कि तुमन ला कोनो बहकाए झईन पाए। 6ढेरे झेमन मोर नांव में आए के कहीं, ‘मंए मसीह लागों!’ अऊ ओमन ढेरेच मईनसे मन ला बहकाहीं। 7जब तुमन चाएरो कती ले लड़ाई कर गोएठ ला सुनीहा, तब डराए झईन जईहा, काबरकि ए बात हर होए बर जरूरी हवे, बकिन ओ घनी दुनिया कर अंत नई होही। 8काबरकि जाति ऊपरे जाति अऊ देस ऊपरे देस एक दूसर कर बिरोध में लड़ाई करहीं, जघा-जघा में भुईंडोल होही अऊ अकाल परही, एहर तो दुख परेसानी कर सुरुवात होही। 9बकिन तुमन अपन में सवाचेती रईहा, काबरकि मईनसे मन तुमन ला कोट-कछेरी में सोंपहीं अऊ धरम सभा कर घर में पीटवाहीं अऊ सासन करोईया अऊ राजा मन कर आगू में तुमन ला ठड़हुवाए देहीं, बकिन एहर तुमन बरीक मोर गवाही देहे कर मोका होही। 10अऊ ए जरूरी हवे कि सबले आगू सुघर खभेर हर सब जाति कर मईनसे मन ला सूनाल जाही। 11जब तुमन ला कोट-कछेरी में सोंपहीं, तब आगू ले फिकर झईन करीहा कि हमरे का कहबो, बकिन जे कुछ तुमन ला ओही घनी बताल जाही, ओहीच ला कईहा, काबरकि बोलोईया तुमन नई होईहा, बकिन पबितर आत्मा होही। 12भाई हर भाई ला अऊ दाऊ हर बेटा ला मारे बर सोंपहीं अऊ लईका मन दाई-दाऊ कर बिरोध में उईठ बईठहीं अऊ ओमन ला मरुवाए दारहीं। 13मोर नांव कर चलते, सब मईनसे मन तुमन जग बैर करहीं, बकिन जेमन आखरी तक धीरज धरे रहीं, ओमने कर उद्धार होही।”

महासंकट कर घरी

(मत्ती 24:15-28; लूका 21:20-24)

14(जेमन पढ़ोईया हवें ओमन समेझ लें) “ओ घनी कोनो घिनक चीज मंदिर में ढुईक जाहीं अऊ ओहर मंदिर ला असुध कएर देही, ते घनी मईनसे मन मंदिर ला छोंएड़ के भाएग जाहीं। जे जग ओ चीज ला नई होएक चाही, ओजग ठड़होवल देखहीं ओ घरी जेमन एहूदिया जिला में होहीं, ओमन पहार कर ऊपरे जरूर भाएग जाहीं। 15जेमन छत में रहीं, ओमन घर में कांही लेहे बर खालहे झईन उतरें अऊ भीतरी झईन जाएं। 16अऊ जेमन खेत में रहीं, ओमन अपन ओढ़ना लेहे बर पाछू झईन फिरें। 17ओ दिन में जेमन आसापती अऊ दूध पीयात रहीं, ओमन बर हाय-हाय! 18अऊ पराथना करीहा कि ए सब जाएत हर, जड़हा महीना में झईन होए। 19काबरकि ओ दिन अईसना दुख तकलीफ कर दिन होही कि जब ले परमेस्वर हर ए दुनिया ला बनाईसे, तब ले आएज तक नई होईसे अऊ कभों नई होही। 20अगर परभू ओ दिन मन ला नई घटाही, त कोनोच जीव मन नई बांचहीं, बकिन परभू हर अपन चुनल मन कर चलते, जेमन ला परभू चुनीस हवे, ओमन बर ओ दिन ला घटाईस हे।” 21“ओ घनी तुमन ला कोनो हर कही, ‘देखा, मसीह इहां हवे,’ चाहे ‘देखा, मसीह उहां हवे,’ ते घनी ओ बात में बिस्वास झईन करीहा। 22काबरकि झूठा मसीह मन अऊ झूठा अगमजानी मन परगट होहीं अऊ चिन्हा चमत्कार देखाहीं, अगर होए सकथे त, चुनल मईनसे मन ला बहकाए देहीं। 23अब तुमन सवाचेती रईहा, काबरकि सुना, मंए तुमन के सब बात मन ला आगू ले बताए देहे हवों। 24ओ दिन में दुख तकलीफ कर पाछू, बेर हर अंधार होए जाही अऊ जोन हर इंजोर नई देही, 25अऊ अगास कर तरईया मन गिरे लागहीं अऊ अगास कर सक्ति मन हिलाल जाहीं। 26तेकर मईनसे मन मईनसे कर बेटा ला बड़खा सामर्थ अऊ महिमा कर संगे, बदरी में आवत देखहीं। 27ओ जुआर ओहर अपन सरगदूत मन ला भेज के, धरती कर सुरू ले अगास कर ठुठूंग तक, अपन चुनल मईनसे मन ला एक जग जुटाही।”

28अंजीर कर रूख ले ए अहना ला सीखा, जब ओकर डार हर कोंअर-कोंअर होए जाथे, अऊ पतई निकले लागथे, तब तुमन जाएन लेथा कि घमनी कर दिन लिघे हवे। 29एही कस जब तुमन ए सब जाएत ला होवत देखीहा, त जाएन लेईहा कि ओ घरी हर लिघे हवे अऊ दुरेच में हवे। 30मंए तुमन ला फूरोंच कहथों, “जब ले ए सब बात मन पूरा नई होए जाहीं, तब ले ए पीढ़ी कर मईनसे मन नई मरहीं। 31अगास अऊ धरती हर टएल जाही, बकिन मोर बचन हर कभों नई टलही।”

कोनो ओ दिन ला नई जाने

(मत्ती 24:36-44)

32“ओ दिन अऊ ओ घरी कर बारे में कोनो नई जानें, न सरगदूत मन अऊ न बेटा बकिन सिरीप दाऊ हर जानथे। 33सुना, सवाचेती रईहा अऊ पराथना करत रईहा, काबरकि तुमन नई जानथा कि ओ घरी हर कब आही। 34एहर ओ मईनसे मन कर हाल हवे, जेहर परदेस जाए कर जुआर अपन घर ला छोंएड़ के जाथे अऊ अपन दास मन ला अधिकार देथे अऊ हर एक झेमन ला ओमन कर काम बताथे अऊ पहरादार ला जागते रहे बर अगियां देथे। 35एकर बर तुमन जागते रहा, काबरकि तुमन नई जानथा कि घर कर मालीक हर कोन जुआर आही, सांझ जुआर कि आधा राती कि मूरगा बसता कि भिनसरहा। 36अईसना झईन होए कि ओहर अनचकहा आए के तुमन ला सूतत पाए। 37अऊ जेला मंए तुमन ला कहथों, ओला सब झन ला कहथों कि जागत रईहा।”

Currently Selected:

मरकुस 13: SGJ

Highlight

Copy