मरकुस 12

कसरिहा किसान मन कर अहना

(मत्ती 21:33-46; लूका 20:9-19)

1फेर ईसू हर अहना में ओमन जग गोठियाए लागीस, “कोनो मईनसे हर एगोट अंगूर कर बारी लगाईस अऊ ओकर चाएरो कती घोरना घोरीस अऊ अंगूर कर रस ला निकाले बर एगोट ढोड़गा कोड़ीस अऊ एगोट माचा बनाईस, तेकर किसान मन ला अधियां देके ओहर परदेस चएल देहीस। 2जब पाके कर घरी आईस, ओहर अंगूर कर बांटा ला लेहे बर एगोट सेवक ला भेजीस। 3बकिन ओ अधियांदार मन सेवक ला धईर के मारीन अऊ जुछा हाथ फिराए देहीन। 4तेकर ओ मालीक हर अऊ दूसर सेवक ला ओमन जग भेजीस, बकिन ओमन ओके देख के ओकर मूड़ी ला मारीन, अऊ ओकर ढेरेच निंदा करीन। 5फेर ओहर दूसर झेला अऊ भेजीस, त ओमन ओके माएर देहीन, तेकर ओहर ढेरेच झन ला भेजते रहीस अऊ ओमन कोनो ला मारीन अऊ कोनो ला मरुवाए दारीन। 6अब ओकर जग भेजे बर एकेच झन बांचे रहीस, जेहर ओकर दुलरुवा बेटा रहीस, आखरी में ओहर ओहू ला ओमन जग ए सोंएच के भेजीस कि ओमन मोर बेटा कर माएन करहीं। 7बकिन ओमन एक दूसर ला कहीन, ‘एही हर तो पाछू ए बारी कर हकदार होही, आवा, एके ला हमरे मरुवाए दारी, तेकर ए सब हक हर हमर होए जाही।’ 8अऊ ओमन ओला धएर के माएर मरुवाईन अऊ अंगूर कर बारी कर बाहरी फेंक देहीन।”

9“तेकर ले जब अंगूर कर बारी कर मालीक हर आही त का करही? ओहर आए के अधियांदार मन ला मरुवाए देही अऊ अंगूर कर बारी ला दूसर झन ला दे देही। 10का तुमन परमेस्वर कर किताब में ए बचन ला नई पढ़े हवा, ‘जे पखना ला राएज मीसतिरी मन बेकार समेझ लेहीन, ओही हर कोनहा कर मुख पखना बएन गईस। 11एहर परभू कती ले होईस अऊ हमर नजेर में अदभूद हवे’!” 12तेकर मुख याजक अऊ कानहूंन कर सिखोईया मन ओके ला बंदी बनाए बर चाहीन, काबरकि ओमन जानत रहीन, कि ओहर हमर बिरोध में ए अहना ला कहीस हे, बकिन ओमन भीड़ कर मईनसे मन ला डराईन, अऊ ओमन ओके छोंएड़ के चएल देहीन।

लगान देहे बर ठीक हवे कि नही

(मत्ती 22:15-22; लूका 20:20-26)

13तेकर ओमन ईसू ला गोएठ में फंसाए बर ओकर जग फरीसी अऊ हेरोदी मन ला भेजीन। 14ओमन आए के ओकर जग कहे लागीन, “ए गुरूजी, हमरे जानथी कि तंए सही हवस अऊ मईनसे मन का सोंचहीं एकर चिंता नई करस, काबरकि तंए मईनसे कर मूंह ला देख के नई गोठियास, बकिन परमेस्वर कर डगर ला सही-सही बताथस। त महाराजा केसर ला लगान देहे बर, कानहूंन कर अनुसार ठीक हवे कि नहीं? 15हमरे देई कि नहीं?” बकिन ईसू हर ओमन कर कपट ला जाएन के ओमन जग कहीस, “तुमन मोके काबर फंसाए बर करत हवा? मोके एक ठे रोम देस कर सीका ला देआ मंए ओला देखहूं।” 16ओमन देहीन अऊ ओहर ओमन ला पूछीस, “एमे काकर चेहरा कर छाप अऊ नांव हवे?” ओमन कहीन, “महाराजा कैसर कर।” 17ईसू हर ओमन जग कहीस, “जेहर महाराजा कैसर कर हवे, ओला केसर के देआ अऊ जेहर परमेस्वर कर हवे, ओला परमेस्वर के देआ।” तब ओमन ओकर बात कर उपरे ढेरेच अचमहों करे लागीन।

अवईया जिनगी कर बात

(मत्ती 22:23-33; लूका 20:27-40)

18फेर सदूकी दल कर लोग मन कथें कि जेमन मएर गईन हवें, ओमन फेर जी के नई उठें, ओमन में ले थोरोक झेमन आए के ईसू जग पूछीन, 19“ए गुरूजी, मूसा हर हमर बर लिखीस हवे, अगर ककरो भाई बिगर लईका करे मएर जाए अऊ ओकर परानी रईह जाए, त ओकर भाई ओकर परानी संगे बिहाओ कएर ले अऊ अपन भाई बर लईका जनमाए। 20माएन लेआ कि सात भाई रहीन अऊ बड़खा भाई हर बिहाओ कएर के, बिगर लईका करे मएर गईस। 21तब दूसर भाई हर अपन भाई कर परानी ला बिहाओ कएर लेहीस अऊ ओहू हर बिगर लईका करे मएर गईस अऊ तीसरोच भाई कर वईसनेच होईस। 22त एही कस सातो भाई मन बिगर लईका करे मएर गईन, तेकर पाछू ओ सवांगीनोच हर मएर गईस। 23अब बतावा, जब मरल मईनसे मन जी उठहीं, त ओ सवांगीन हर काकर परानी होही, काबरकि ओहर तो सातो झन कर परानी होए गए रहीस।” 24ईसू हर ओमन जग कहीस, “तुमन कर पबितर किताब हर का सिखाथे ओला नई जानथा अऊ परमेस्वर कर सामर्थ ला भी नई जानथा? एकरले भटेक गए हवा। 25बकिन जेमन मरल में ले जी उठहीं, ओ सवांग अऊ सवांगीन मन कर सादी बिहाओ नई होही, बकिन ओमन सरग में सरगदूत मन कस होहीं। 26मरल कर पाछू जी उठे कर बारे में तुमन का नई जानथा, मूसा कर किताब में झाड़ी कर किसा ला नई पढ़े हवा कि परमेस्वर हर ओकर जग कहीस, मंए अबराहम कर परमेस्वर अऊ इसहाक कर परमेस्वर अऊ याकूब कर परमेस्वर लागों? 27परमेस्वर मरल मन कर नहीं, बकिन जीयत मन कर परमेस्वर लागे, तुमन ढेरेच भटेक गए हवा।”

सबले बड़खा अगियां

(मत्ती 22:34-40; लूका 10:25-28)

28ओमन बहस करत रहीन ते घरी एगोट कानहूंन कर सिखोईया हर ओजग आईस। ओहर ए जाएन के कि ईसू हर ओमन ला सुघर जबाब देहीस, तेकर ले ओकर जग पूछीस, “सबले बड़खा अगियां कोन हर लागे?” 29ईसू हर ओके जबाब देहीस, “सबले बड़खा अगियां एहर लागे, ए इसराएली मन सुना, परभू हमर परमेस्वर हर एकेच झन परभू लागे। 30अऊ तुमन परभू परमेस्वर ला अपन पूरा मन अऊ अपन पूरा परान ले अऊ अपन पूरा बुधी अऊ अपन पूरा सक्ति कर संगे मया करीहा। 31अऊ दूसर सबले बड़खा अगियां ए लागे, ‘तुमन अपन परोसी ला अपने कस मया करीहा।’ एकरले बड़खा अऊ कोनो अगियां नईए।” 32त ओहर ईसू जग कहीस, “ए गुरूजी, ढेरेच सुघर बात हवे, तंए सहीच कहे। परमेस्वर एकेच ठन हवे अऊ ओके छोंएड़ कोई दूसर परमेस्वर नईए। 33अऊ ओके अपन पूरा मन अऊ अपन पूरा परान अऊ अपन पूरा बुधी अऊ अपन पूरा सक्ति कर संगे मया करबे अऊ अपन परोसी ला अपनेच जईसना मया करबे, एहर सब होमबली अऊ बलिदान ले बएढ़ के हवे।” 34ईसू हर देखीस कि ओहर समेझ बूझ के जबाब देहीस, तेकर ले ओके कहीस, “तंए परमेस्वर कर राएज ले दुरीहां नई हस।” अऊ फेर कोनो ला ईसू जग कांही पूछे कर हिमेत नई होईस।

मसीह दाऊद कर संतान लागे

(मत्ती 22:41-46; लूका 20:41-44)

35फेर ईसू हर परमेस्वर कर मंदिर कर अंगन में उपदेस देहत रहीस, त पूछीस, “कानहूंन कर सिखोईया मन कईसे में कथें कि मसीह हर दाऊद राजा कर संतान लागे? 36दाऊद राजा हर खुद पबितर आत्मा में होए के कहीसे,

परभू हर मोर परभू जग कहीस,

जब तक मंए तोर बईरी मन ला

तोर गोड़ कर तरी नई कएर देहूं

तब तक मोर जवनी कती में बईठ।”

37“दाऊद राजा हर तो खुद ओला परभू कथे, त फेर ओकर बेटा कहां ले होही?” त भीड़ कर मईनसे मन ओकर गोएठ ला ढेरेच खुसी ले सुनत रहीन। 38ईसू हर ओमन ला सिखाए के कहीस, “कानहूंन कर सिखोईया मन ले सवाचेती रईहा, ओमन लमा-लमा ओढ़ना पहिर के इते-ऊते बूले बर चाहथें, अऊ बजार में मरजाद कर संगे जोहार चाहथें, 39अऊ ओमन धरम सभा में मुख आसन में बईठे बर अऊ खाए कर जुआर ओमन माएन-मरजाद कर जघा में बईठे बर चाहथें। 40ओमन अदावेंन मन कर धन दौलत ला लुईट लेथें अऊ दूसर के देखाए बर ढेरेच जुआर ले पराथना करथें, एमन ढेरे भारी दंड ला पाहीं।”

गरीब अदावेंन कर दान

(लूका 21:1-4)

41ईसू हर परमेस्वर कर मंदिर कर दान पेटी कर आगू में बईठ के देखत रहीस कि मईनसे मन पईसा कईसे चघाथें अऊ धनी मन ढेरेच धन चघाईन। 42त एगोट गरीब अदावेंन हर आए के, दुई गोट तांमा कर सीका ला चघाईस। 43तेकर ओहर अपन चेला मन ला अपन जग बलाए के कहीस, “मंए तुमन जग फूरोंच कहथों कि ए गरीब अदावेंन हर दान पेटी में सब झन ले बगरा भेंट चघाईस हवे; 44काबरकि ओमन अपन बगरा धन में ले भेंट देहीन हवें, बकिन ए सवांगीन हर ढेरेच गरीब हवे, तबो ले जिनगी जीए बर जे जाएत ओकर जग रहीस, ओ सब जाएत ला दे देहीस।”

Currently Selected:

मरकुस 12: SGJ

Highlight

Copy