यूहन्ना 19

ईसू ला मिरतु दंड देहल जाथे

1तेकर पीलातूस हर ईसू ला लेके, ओके कोड़ा में पीटवाईस। 2अऊ सिपाही मन कांटा कर मुकूट बनाए के ओकर मूड़े खाएप देहीन, अऊ ओमन ईसू ला एगोट भंटा रंग कर ओढ़ना ला पहिराईन। 3अऊ ओमन ओकर जग आए-आए के मजाक उड़ाईन अऊ कहीन, “ए यहूदी मन कर राजा, पालंगी।” अऊ ईसू ला झापड़ मारीन।

4तेकर राएजपाल पीलातूस हर फेर गढ़ी ले बाहरी आईस, अऊ ओ यहूदी नेता मन ला कहीस, “सुना, मंए ईसू ला तुमन जग बाहरी लानत हों, तेमेकि तुमन जाएन लेआ कि मंए ओमें कांहीच दोस नई पाएं।” 5त ईसू हर कंटा कर मुकुट, अऊ भंटा रंग कर ओढ़ना पहिरल बाहरी आईस। तेकर राएजपाल पीलातूस हर ओमन ला कहीस “देखा, एहर ओही मईनसे लागे।” 6जब मुख याजक मन, अऊ मंदिर कर पहरादार मन ओके देखीन, त किरलाए कहीन “एके कुरूस में चघाए के मरवाए दे, कुरूस में चघाए के मरवाए दे” तेकर राएजपाल पीलातूस हर ओमन ला कहीस, “तुंही मन एके ले जावा, अऊ कुरूस में चघाए के मरवाए देआ, काबरकि मंए एकर ऊपरे कांहीच दोस नई पाएं।” 7त यहूदी नेता मन पीलातूस ला जबाब देहीन, “हमरो एक ठे कानहूंन हवे, अऊ ओ कानहूंन कर अनुसार ए माएर देहे कर लाएक हवे, काबरकि एहर अपन-आप ला, परमेस्वर कर बेटा बनाईस।” 8जे घनी पीलातूस हर ए गोएठ ला सुनीस, त ओहर अऊ डराए गईस। 9त ओहर गढ़ी में जाए के ईसू ला पूछीस, “तंए कहां कर लागस?” बकिन ईसू हर ओके कांहीच जबाब नई देहीस। 10तेकर पीलातूस हर ईसू ला कहीस, “तंए मोर जग काबर नई गोठियास? का तंए नई जानस, कि तोके ला छोंड़े कर अऊ कुरूस में चघाए के माएर मरवाएयोच कर अधिकार मोर जग हवे।”

11त ईसू हर जबाब देहीस “अगर तोके परमेस्वर कती ले, ए अधिकार नई देहल जातीस, त मोर ऊपरे तोर कांहीच अधिकार नई रतीस, ओकरे ले जेहर मोके तोर हाथे धरूवाईस हवे, ओहर तोरोच ले बगरा दोसी हवे।”

12एला सुईन के पीलातूस हर, ईसू ला छोंड़े कर कोसिस करीस। बकिन यहूदी नेता मन किरलाए-किरलाए के पीलातूस ला कहीन, “अगर तंए ए मईनसे ला छोंएड़ देबे, त तंए कएसर महाराजा कर संगता नई कहाबे, अऊ जे कोनो अपन-आप ला राजा बनाथे, ओहर कैसर महाराजा कर दुसमन हवे।” 13जे घनी पीलातूस ए बात ला सुनीस, त ईसू ला बाहरी लानीस। अऊ ओहर नियाओ कर सिंहासन में बईठीस, जेहर एगोट पखना कर चबूतरा रहीस, जेला इबरानी भासा में “गबता” कहत रहीन। 14एहर फसह तिहार कर तियारी कर दिन रहीस अऊ ओ मझेनी जुआर रहीस, तेकर पीलातूस हर यहूदी मन ला कहीस “देखा, एही हर लागे तुमन कर राजा।” 15बकिन ओमन अऊ किरलाए के कहीन, “एके ले जा, एके ले जा, एके कुरूस में चघा।” तेकर पीलातूस हर ओमन ला पूछीस, “का मंए तुमन कर राजा ला कुरूस ऊपरे चघाए देओं?” त महायाजक मन जबाब देहीन, “कैसर महाराजा कर छोंएड़ हमर अऊ कोनो राजा नईए।” 16तेकर पीलातूस हर ईसू ला कुरूस में चघाए के मरवाए बर, ओमन कर हाथे सोंएप देहीस।

ईसू ला कुरूस कर ऊपरे चघाल जाथे

(मत्ती 27:32-44; मरकुस 15:21-32; लूका 23:26-43)

17“तेकर ओमन ईसू ला ले गईन। अऊ ओहर अपन कुरूस ला डोएह के, बाहरी निकलीस अऊ ओ जघा में गईस, जेला ‘खोपड़ी कर जघा कथें’ अऊ इबरानी भासा में एला ‘गुलगुता’ कथें। 18ओजग ईसू कर संगे ओमन अऊ दुई झे मईनसे मन ला कुरूस में चघाईन, एक झन ला ओकर जवनी कती, अऊ दूसर झन ला ओकर डेरी कती, अऊ ईसू ला ओमन कर मझार में चघाईन।” 19पीलातूस हर ओकर दोस कर बारे में, एगोट पुठा में लिख के कुरूस ऊपरे टंगवाए देहे रहीस, जेमे एकस लिखल रहीस, “एहर नासरत गांव कर ईसू, जेहर यहूदी मन कर राजा लागे।” 20ए दोस कर बारे में लिखल चिट्ठी ला ढेरेच यहूदी मन पढ़ीन, काबरकि ओ जघा, जिहां ईसू ला कुरूस में चघाए रहीन, ओहर सहर कर लिघे रहीस। अऊ ओ चिट्ठी हर इब्रानी, लतीनी अऊ यूनानी, ए तीनो भासा में लिखल रहीस। 21तेकर यहूदी मन कर मुख याजक मन, पीलातूस ठन कहीन, “यहूदी मन कर राजा झईन लिख, बकिन एकस लिख कि ए मईनसे हर कहीस, मंए यहूदी मन कर राजा लागों।” 22त पीलातूस हर जबाब देहीस, “मंए जेला लिख देहें, ओला लिख देहें।”

23जब सिपाही मन ईसू ला कुरूस में चघाए दारीन, त ओमन ओकर ओढ़ना ला लेके चाएर बांटा करीन। अऊ चाएरो झन एक-एक ठे लेहीन, अऊ ईसू कर अंगोच ला लेहीन अऊ ओकर अंगा हर तो खिलल नई रहीस, बकिन एहर ऊपर ले खाल तक एकेच ठे बूनल रहीस। 24तेकर ले ओमन एक दूसर के कहीन, “एला हमरे नई चीरी, बकिन एकर बर चिट्ठी डाली कि एहर काकर होही।” ए गोएठ हर एकर बर होईस कि पबितर किताब में लिखल गोएठ हर पूरा होए,

“ओमन मोर ओढ़ना ला बांएट लेहीन

अऊ मोर अंगा बर चिट्ठी डालीन।” अऊ सिपाही मन एहीच कस करीन।

25ईसू कर कुरूस कर लिघे में ओकर दाई, अऊ ओकर मोसी मरियम, जेहर कलोपास कर परानी रहीस, अऊ मरियम मगदलीनी, ओ तीनो झेमन ओजग ठड़होए रहीन। 26जे घनी ईसू हर अपन दाई, अऊ ओ चेला जेकर ठन ओ ढेरेच मया करत रहीस, लिघे ठड़होवल देखीस, त अपन दाई ला कहीस, “ए दाई, देख, एहर तोर बेटा लागे।” 27तेकर ईसू हर अपन ओ चेला ला कहीस, “एहर तोर दाई लागे।” अऊ ओही घनी ले ओ चेला हर, ईसू कर दाई ला अपन घरे ले गईस।

ईसू कुरूस में मरथे

(मत्ती 27:45-56; मरकुस 15:33-41; लूका 23:44-49)

28तेकर ईसू हर, जाएन गईस कि अब सब जाएत हर पूरा होए गईस हवे, तब ओहर पबितर किताब कर लिखल बात ला, पूरा होए बर एकस कहीस, “मोके पियासत हवे।” 29ओजग अमट मेरावल अंगूर कर रस ले भरल, एगोट भांड़ा मड़हाल रहीस। त ओमन तनिक रुवा ला, ओ रस में बोएथ के, जूफा नांव कर भूंदरा कर एक ठे लाठी में बाएंध के, ओकर मूंह में छुवाईन। 30जे घनी ईसू हर ओ रस ला चिखीस, त ओहर कहीस, “सब जाएत हर पूरा होए गईस” अऊ मुड़ ला नवाए के, अपन परान ला छोंएड़ देहीस।

31ओ दिन हर फसह तिहार कर, तियारी कर दिन रहीस। पबितर दिन में ककरो लास हर कुरूस में झईन लटके रहे, काबरकि पबितर दिन हर, ओमन बर एगोट खास दिन रहीस। तेकर ले यहूदी नेता मन पीलातूस जग बिनती करीन कि ओमन कर गोड़ ला टोएर देहल जाए, अऊ ओमन ला उताएर देहल जाए। 32एकरले सिपाही मन आईन, अऊ ओमन पहिले मईनसे कर गोड़ ला टोरीन, तेकर दूसरोच मईनसे कर गोड़ ला टोरीन, जेमन ईसू कर संगे कुरूस में चघाल गए रहीन। 33बकिन जब ओमन ईसू ठन आए के, देखीन कि ओ मएर गईस हवे, तेकर ले ओमन ओकर गोड़ ला नई टोरीन। 34बकिन सिपाही में ले एक झन हर एगोट भाला ले, ईसू कर पांजर ला बेध देहीस, अऊ ओमे ले तुरतेंच लहू अऊ पानी निकलीस। 35जे मईनसे हर एला देखीस, ओहर एकस गवाही देहीस, अऊ ओकर गवाही हर सही हवे, अऊ ओहर जानथे कि ओहर सही कहथे, ताकि तुंहूच मन बिस्वास करा। 36ए गोएठ हर एकर बर होईस, ताकि पबितर किताब कर लिखल बचन हर पूरा होए “ओकर एकोठे हाड़ा हर टोरल नई जाही।” 37पबितर किताब कर अऊ एगोट दूसर जघा में एकस लिखल हवे कि जेमन ओके बेधीन हवें, ओमन ओके देखहीं।

ईसू ला मरघेटिया में गाड़थें

(मत्ती 27:57-61; मरकुस 15:42-47; लूका 23:50-56)

38ए सब होए कर पाछू, अरमतियाह सहर कर यूसुफ, जेहर ईसू कर चेला रहीस (बकिन ओहर यहूदी नेता मन कर डर कर मारे, ए बात ला लुकाए के राखे रहीस) ओहर राएजपाल पीलातूस जग बिनती करीस, “का मंए ईसू कर लास ला ले जाए सकत हों?” त पीलातूस हर ओकर बिनती ला माएन लेहीस, तेकर यूसुफ हर आए के, ओकर लास ला ले गईस। 39अऊ नीकूदेमूस, जेहर पहिले एक दिन राती जुआर ईसू ठन गए रहीस, ओहूच हर करीबन चालीस किलो गंधरस, अऊ एलवा नांव कर गमकेदार चीज ला मिलाए के, यूसुफ कर संगे गईस। 40तेकर ओमन ईसू कर लास ला लेहीन, अऊ यहूदी मन कर गाड़े कर रीती कर अनुसार, लास में ओ गमकेदार चीज ला लगाईन, अऊ ओला कफन में लपेटीन। 41जिहां ईसू ला कुरूस में चघाल गए रहीस, ओजग एगोट बगीचा रहीस अऊ ओ बगीचा में एगोट नांवा मठ रहीस, जेमें कभों कोनो ला नई राखे रहीन। 42ओ दिन हर यहूदी मन कर तियारी कर दिन रहीस, अऊ ओ मरघेटिया हर ठांवे रहीस, तेकर ले ओमन ईसू कर लास ला उहां राखीन।

Currently Selected:

यूहन्ना 19: SGJ

Highlight

Copy