यूहन्ना 18

ईसू हर बंदी बनाल जाथे

(मत्ती 26:47-56; मरकुस 14:43-50; लूका 22:47-53)

1तेकर ईसू हर पराथना कएर दारीस, त अपन चेला मन कर संगे, किदरोन नरवा कर ओ पार एगोट बगीचा में गईस। 2ईसू ला धोखा देवईया यहूदा हर ओ जघा ला जानत रहीस, काबरकि ईसू हर अपन चेला मन कर संगे ओजग जात रहीस। 3तेकर यहूदा हर तनिक रोमी सैनिक, अऊ तनिक मंदिर कर सिपाही, जेमन ला मुख याजक अऊ फरीसी मन भेजे रहीन, ओमन ला लेके ओ बगीचा में आईस, ओमन लालटेन, मसाल अऊ हथियार मन ला धरे रहीन। 4ईसू हर ओ जमो बात, जेहर ओजग होवईया रहीस, ओला जानत रहीस, तेकर ले ओहर निकलीस अऊ ओमन ठन पूछीस, “तुमन काके खोजत हा?” 5ओमन जबाब देहीन, “नासरत कर ईसू ला।” ईसू हर कहीस, “ओ मंए लागों।” ईसू ला धोखा देवईया यहूदो हर उहां ओमन संगे ठड़होए रहीस। 6जब ईसू हर ओमन ला ए कहीस, “ओ मंए लागों,” त ओमन पाछू घुंचिन अऊ भुईंया में गिर परीन। 7तेकर ईसू हर फेर ओमन जग पूछीस, “तुमन काके खोजत हा?” ओमन कहीन, “नासरत कर ईसू ला।” 8ईसू हर ओमन ला जबाब देहीस, “मंए तो तुमन के कएह दारे हों कि ओ मंए लागों। तेकर ले अगर तुमन मोके खोजत हा, त एमन ला जाए देआ।” 9ए बात ला ओहर एकर बर कहीस कि जेला ओहर कहे रहीस, ओ बात हर पूरा हो जाए, “जेमन ला तंए मोके देहे रहे, ओमन में ले मंए एकोच झन ला नई गंवाए।”

10तेकर समोन पतरस, जेकर जग तलवाएर रहीस, ओहर ओला खींच के निकालीस, अऊ महायाजक कर सेवक कर जवनी कान ला काएट देहीस, अऊ ओ सेवक कर नांव मलखुस रहीस। 11तेकर ईसू हर पतरस ला कहीस, “अपन तलवाएर ला जेमे ले निकाले रहे ओमे राख, जे दुख ला दाऊ हर मोर बर राखीस हवे, का ओला मंए नई सहूं?”

ईसू ला हन्ना ठन ले जाथें

12तेकर रोमी सैनिक मन अऊ ओमन कर सुबेदार, अऊ मंदिर कर सिपाही मन ईसू ला धएर के बाएंध लेहीन, 13अऊ ओमन ओके धएर के आगू हना जग ले गईन, काबरकि ओहर ओ बछर कर महायाजक काइफा कर ससुर रहीस। 14एहर ओही काइफा रहीस, जेहर यहूदी नेता मन ला, ए सलाव देहे रहीस कि बढ़ियां होतीस, अगर एगोट आदमी हर जमो मईनसे मन बरीक मरतीस।

पतरस हर ईसू कर पहिलो दाएर इनकार करथे

(मत्ती 26:69-70; मरकुस 14:66-68; लूका 22:55-57)

15समोन पतरस अऊ एगोट दूसर चेला, ईसू कर पाछू गईन। ए चेला हर महायाजक कर चिन्हार रहीस। एकरे ले ईसू कर संगे ओहर महायाजक कर अंगन में गईस। 16बकिन पतरस बाहरी दुरा में ठड़होए रहीस, तेकर ओ दूसर चेला जेहर महायाजक कर चिन्हार रहीस, ओहर बाहरी निकेल के दुरा कर पहरा-दारीन ला कहिके, पतरस ला भीतरी ले गईस। 17ओ दासी जेहर पहरा-दारीन रहीस, पतरस ला पूछीस, “का तंहूच तो ए मईनसे कर चेला में ले एक झन लागस?” पतरस हर कहीस, “मंए ना लागों।” 18जाड़ कर मारे गुलाम मन अऊ अधिकारी मन, कोईला बाएर के आगी तापत रहीन, अऊ पतरसोच हर ओमन कर संगे ठड़होए के, आगी तापत रहीस।

महायाजक हर ईसू ठन पूछताछ करथे

(मत्ती 26:59-66; मरकुस 14:55-64; लूका 22:66-71)

19तेकर महायाजक हर ईसू ठन ओकर चेला मन कर, अऊ ओकर उपदेस कर बारे में पूछताछ करीस। 20ईसू हर ओके जबाब देहीस, “मंए मईनसे मन जग खुईल के गोठियाए हवों, मंए धरम सभा कर घर मन में, अऊ परमेस्वर कर मंदिर कर अंगन में, जिहां सब यहूदी मन जूटत रहीन, हमेसा उपदेस देहे हवों, मंए लुकाए के कांहीच नई कहे हवों। 21तंए मोर जग काबर पूछथस? सुनोईया मन जग पूछ, जेमन मोर बात ला सुनीन हवें, ओमन जानथें कि मंए का कहे हवों।”

22जब ईसू हर एकस कहीस, त ओकर लिघे में ठड़होवल एगोट मंदिर कर सिपाही हर, ईसू के झापड़ मारीस अऊ कहीस, “का तंए महायाजक ला अईसना जबाब देथस?” 23ईसू हर ओके जबाब देहीस, “अगर मंए कांही गलत बात कहे हों, त ओ गलती ला बता, बकिन अगर मंए सही बात कहें, त मोके काबर मारथस?” 24फेर हना हर ईसू के बांधले-बांधल महायाजक काइफा जग भेज देहीस।

पतरस हर दूसर अऊ तीसर दाएर ईसू कर इनकार करथे

(मत्ती 26:71-75; मरकुस 14:69-72; लूका 22:58-62)

25समोन पतरस हर ओजग ठड़होए के आगी तापत रहीस, तेकर ले ओजग कर मईनसे मन ओके पूछीन, “का तंहूच ओकर चेला में ले एक झन लागस?” त पतरस हर इनकार कएर के कहीस, “मंए ना लागों।” 26महायाजक कर एक झन सेवक ओजग रहीस, जेकर कान ला पतरस काटे रहीस, ओहर ओकर घराना कर रहीस। ओहर पतरस जग पूछीस, “का मंए तोके ईसू कर संगे बारी में नई देखे रहें?” 27तेकर पतरस हर फेर इनकार करीस अऊ तुरतेंच मुरगा हर बासीस।

राएजपाल पीलातूस कर आगू में ईसू के लेजीन

(मत्ती 27:1-2,11-14; मरकुस 15:1-5; लूका 23:1-5)

28तेकर ओमन ईसू ला काइफा महायाजक कर घर ले, रोमी राएजपाल कर गढ़ी में ले गईन। अऊ ओ घरी भिनसरहा जुआर रहीस। यहूदी नेता मन खुद गढ़ी कर भीतरी नई गईन, तेमेकि ओमन असुध झईन होएं#18:28 यहूदी मन आने जाति मन कर घरे नई जात रहीन, बकिन रोमी राएजपाल हर आने जाति कर रहीस।, बकिन फसह कर भोज ला खाए सकें। 29तेकर ले राएजपाल पीलातूस हर ओमन जग बाहरी आईस, अऊ पूछीस, “तुमन ए मईनसे कर ऊपरे का बात कर दोस लगात हवा?” 30ओमन ओके जबाब देहींन, “अगर ए मईनसे हर अपराधी नई रतीस, त हमरे एके ला तोर जग नई सोंपतेन।”

31पीलातूस हर ओमन ला कहीस, “तुमन एके ले जावा, अऊ अपन कानहूंन कर अनुसार एकर नियाओ करा।” त यहूदी नेता मन ओके कहीन, “ककरो जान लेहे कर अधिकार हमर जग नईए।” 32एहर एकर बर होईस कि ईसू कर ओ बात हर पूरा होए जाए, जेला ओहर आगुवे ले बताए रहीस कि मंए कईसे मरहूं।

33तेकर राएजपाल पीलातूस हर फेर गढ़ी कर भीतरी गईस अऊ ईसू ला बलाए के ओकर जग पूछीस, “का तंए यहूदी मन कर राजा लागस?”

34ईसू हर ओके जबाब देहीस, “का तंए ए गोएठ ला अपन कती ले कथस कि तोके दूसर झेमन मोर बारे में बताईन हवें?” 35त पीलातूस हर कहीस “का तंए सोंचथस कि मंए यहूदी लागों? तोर अपन जाति कर मईनसे मन अऊ बड़खा याजक मन, तोके मोर हाथ में सोंपीन हवें, बता तंए का करे हस?” 36त ईसू हर कहीस, “मोर राएज ए संसार कर ना लागे, अगर मोर राएज ए संसार कर रहतीस, त मोर सेवक मन लड़तीन अऊ मंए यहूदी नेता मन कर हाथ में सोंपल नई जातें, बकिन मोर राएज इहां कर ना लागे।”

37एला सुईन के राएजपाल पीलातूस हर ईसू जग कहीस “त का तंए एगोट राजा लागस?” ईसू हर जबाब देहीस “तंए सही कहत हस कि मंए एगोट राजा लागों। मंए एकरे बरीक जनम लेहें अऊ एकरे ले संसार में आए हों, ताकि सत कर गवाही देवों। जे कोनो सत ला मानथे, ओहर मोर गोएठ ला सुनथे।”

38पीलातूस हर ओकर जग पूछीस, “ए सत का हवे?” एकस कहिके पीलातूस हर यहूदी नेता मन जग फेर बाहरी गईस, अऊ ओमन जग कहीस, “मंए तो ओकर ऊपरे कांहीच दोस नई पाएं। 39बकिन एहर तुमन कर चलन हवे कि मंए फसह कर तिहार घरी में, तुमन बर एगोट बंदी ला छोंएड़ देवों, का तुमन चाहथा कि मंए तुमन बर, यहूदी मन कर राजा ला छोंएड़ देवों?” 40तेकर ओमन फेर किरलाए के कहीन, “एके ला नहीं, बकिन हमर बर बरअबा ला छोंएड़ दे।” अऊ ओ बरअबा हर एगोट दंगा करोईया रहीस।

Currently Selected:

यूहन्ना 18: SGJ

Highlight

Copy