Matáyɔ 26
26
Maca á mowa Yéso
(Ɔna phɔtɔ Mkɔ 14.1-2; Lók 22.1-2; Yoá 11.45-53)
1Mbenɔ nde Yéso ɗágɔɓi ye ɓɔphɛi nɛkɛ bui, áǒngoɗea ɓagoigi nɛkɛ te: 2«Ɓooúba gea te, mbusa ésa iɓɛ, aɓande jaí á Pasáka#Ɔna Jua 12.1-27. Wa, ɓántɔngande Muna-Nkpa ka gǎ kɔkɛaga akɛ ka moyangɔ.»
3Cɔ, ɓagbɛga á ɓatoɓeigi-phɛ́a na ɓagbɛga á ka nji ndea Ɓayúda, ɗáɓádondanigi mɔtɛ á Kayápha, ngbɛga á ɓatoɓeigi-phɛ́a. 4Ɓáoɓóa kimoci moangɔ á dunga á Yéso ka ɓɔsɔmɛa na kusa akɛ. 5Ɓáoianaga te, kákeni dunga akɛ ka mbenɔ á maseye ka gea, ɓakpa ɓákáyombokɛmbɛ.
Nke aɗuki nkoki ka mɔ̌ á Yéso
(Ɔna phɔtɔ Mkɔ 14.3-9; Yoá 12.1-8)
6Esa imoci, Yéso ɗátú na Bɛtanía, ɗáiki k'éndu á Simɔ́ni, mmbɔ ɗátú na kukuwa á sǔ. 7Wa, nke áombîmisia Yéso na ngbanda n'atúmi na nkoki ésombi akpɛ phɛɛ. Áonɗukiaga ka mɔ̌ mbenɔ nde ɗáoeaga. 8Ɓî ɓagoigi nɛkɛ ɓáɔni ɓó, ɓáɔɓɛa, ɓáɔyɔnga te: «Nke nde aúji kema nde k'éke? 9Nga, ɓátú ndiu osombisa ú k'ésombi akpɛ phɛɛ, na gabea á ɓaúki imɔna í.» 10Yéso áoúba kanisia aɓɔ, áǒngoɗea te: «Ka nyɔngɔ éke nde ɓoontambisaga nke nde ka měma? Kema nde agi ka phɔani aánjá. 11Ɓona ɓato á ɓuyɛnɛ esa bui bíbí anu#Ɔna Tɔl 15.11. Eme kéɓɛku gǎkɛ na ɓenu wani esa bui. 12Amosǐ nkoki ka ɓɔngisiaga á nyama ani mosá á umba ani#Ɔna Mkɔ 14.8. 13Nenóngoɗi ɗoni gea, ɔma bui nde ɓátɔmiagande Mbino-Ánjá nde ka mokonda, ɓátɔmiagande kema nde nke nde agi na ɓánkanisiande.»
Yúda antɔngi Yéso
(Ɔna phɔtɔ Mkɔ 14.10-11; Lók 22.3-6)
14Cɔ, Yúda Isikaliɔ́ta mmbɔ ɗátú ka ɓagoigi nkama na ɓaɓɛ (12) ndea Yéso, áoga mɔtɛ á ɓagbɛga á ɓatobeigi-phɛ́a. 15Áǒɓúsia te: «Aoɓá na nɛntɔngi Yéso mɔtɛ-anu ekende ɓomopande?» Mpɔ ɓɔ, ɓáontagea Yúda imɔna nkama isaɔ (30), ɓáɔmbɛɗekisa#Ɔna Jak 11.12. 16Súa wa, Yúda áokpanga kaɓa mbenɔ ánjá á dungisa Yéso.
Yéso a ka jaí á Pasáka kimoci na ɓagoigi nɛkɛ
(Ɔna phɔtɔ Mkɔ 14.12-21; Lók 22.7-14,21-23; Yoá 13.21-30)
17Ɗáɓi ye esa á ko ímoci á maseye á mokati kanga cacu, ɓagoigi ɓáobika ongoɗea Yéso te: «Ɔma sina nde ɔsɔmbu ka gea ɓɛ́ɔmbɛ kakɔ eea á Pasáka?» 18Yéso áǒngoɗea te: «Gǎni ka ntanga-nji, nkpa moci anódondande kó, ɓóngoɗeɛ gea, Mɔkɔta agi te: ‹Mbenɔ nɛmɔ akpeengeani ye tɔ. Mɔtɛ-akɔ unge ɓeguande jaí á Pasáka kimoci na ɓagoigi nɛmɔ.›» 19Mpɔ, ɓagoigi ɓáogea ɓíndɔ Yéso ɗáesosi, ɓáɔɓɔngisiaga eea á Pasáka.
20Ka gɔgɔmana á esa, Yéso áoika na ɓagoigi nɛkɛ nkama na ɓaɓɛ (12) k'ɔ́ma á eaga. 21Cɔ, mbenɔ nde ɗáɓáoeaga, Yéso áǒngoɗea te: «Nenóngoɗi ɗoni gea, ka ɓenu moci amɔtɔngande.» 22Ɓagoigi nɛkɛ ɓáoianaga phɛɛ, nkpa na nkpa ka ɔlɔ aɓɔ áomúsia Yéso te: «Mɔkɔta, nna phɔ́ eme?» 23Yéso áǒsikisia te: «Mmbé aotambua k'ɔphɛphɛ nde kádǔmani#Ɔna Mkɔ 14.20 kimoci n'eme, aámbé amɔtɔngande. 24Muna-Nkpa akuande ɓíndɔ ɓáɗundu suɓi á Ɓuku á Mokonga ka phɔakɛ#Ɔna Jab 22.2-19; Isa 53. Ande gǎkɛ ngomi phɛɛ ka mmbé antɔngi Muna-Nkpa! Atú ye phɔ́ oɓá ánjá ka nkpa ndɔ, ámbé ɗákáɓɔkɔtɛani.» 25Yúda, mmbɔ ɗántɔngi Yéso, áomúsia te: «Ngoisigi, nna phɔ́ eme?» Yéso áonsikisia te: «A tɔ ɓíndɔ ɔyɔngi.»
Yéso na ɓagoigi nɛkɛ ɓá k'eea á ɔngana
(Ɔna phɔtɔ Mkɔ 14.22-26; Lók 22.14-20; 1 Ɓkt 11.23-25)
26Ɓî ɗáɓátú oeaga, Yéso áɔbɛɗa mokati, mbusa á yɛ sega Mokonga, áoɓúnaga mokati ndɔɔ, áǒgabea ɓagoigi nɛkɛ. Aǒngoɗea te: «Bɛɗani ú ɓóeɛ, nnde ande nyama ani.» 27Â phɔtɔ ɔbɛɗa kiɓe á divai, áonsega Mokonga k'ɛmɛmi, áǒɓopha, ɓáonoa ɓɔbu. Yéso áǒgea: «Noani ú ɓenu ɓɔbu 28nga, nnde ande magia ani, magia á ɔngana nnde aɗǔkani ka nyɔngɔ á ima ɓojeɗe á ɓakpa ɓásii. 29Nenóngoɗi gea, kpanga á kɛ̌kɛnde, kénoɛeka ye divai nde na ka ɓî negaeka tɔ onoa nnde á kɛ̌kɛ kimoci na ɓenu ka koɓoamɛ ndea Abɛ.» 30Mbusa á ɓɔ émbá#Jab 113—118, ɓáoga ka mamba á Mijɛitúni.
Yéso aɔtu gea Pɛ́tɛɛ anganande
(Ɔna phɔtɔ Mkɔ 14.27-31; Lók 22.31-34; Yoá 13.36-38)
31Mpɔ Yéso áǒgea ɓagoigi nɛkɛ te: «Kesande kǐpha ɓenu ɓɔbu ɓoguande ka ɓeekea nɛnu ka nyɔngɔ ani ɓíndɔ ɗáɓáɗundu suɓi á Ɓuku á Mokonga:
‹Nenkusande mɓondigi-ɓamɔgɔgɔ,
na nsamba á ɓamɔgɔgɔ ndɔ ɓáphanjekanande#Ɔna Jak 13.7.›
32Mbusa á jujúka ani ka kukuwa, negande gǎkɛ onoɓondea na Galiláya.» 33Pɛ́tɛɛ áongoɗea te: «Nanga ɓadani ɓɔbu ɓákosaga, eme kékosagɛeka gǎkɛ.» 34Yéso áonsikisia te: «Nekongoɗi ɗoni gea, omongánande kesande kǐpha mɔngɔ isaɔ mosá á ɔsa kɔkɔ.» 35Pɛ́tɛɛ áongoɗea Yéso te: «Kéongánɛku. Nanga áɓá kukuwa, ɓesíande kimoci.»
Ɓagoigi ɓuangbo ɓɔbu ɓáɔyɔnga phɔtɔ ɓó.
Yéso aɔmɛma Mokonga na Gɛtɛsɛmáni
(Ɔna phɔtɔ Mkɔ 14.32-42; Lók 22.39-46)
36Mpɔ, Yéso áoga na ɓagoigi nɛkɛ k'ɔ́ma nde ɓáɔɔphana Gɛtɛsɛmáni#26.36 Ka ɛyɔngi á Kialamɛ́a, Gɛtɛsɛmáni ande ɔma á kama gamba. Áǒngoɗea te: «Ikani wani. Négɛ phɔ́ kosi k'aphe á mɛma á Mokonga.» 37Áɔmbɛɗa Pɛ́tɛɛ na ɓaniki-ɓǒko ɓaɓɛ ɓunde á Jɛbɛdáyɔ. Wa, áoɓá na ɓɔmbɛ na ágátana á měma. 38Áǒngoɗea te: «Měma ani atúmi na ɓɔmbɛ á kukuwa, ikani wani, ɓókoɗɛmbɛ ɓíndɔ eme kéɗɛku.»
39Áɔsɛkɛɗa mosá ábɔa, áɔgɔtɔma, endóndó akɛ áogbondoa oɗo, áɔmɛma ɓe: «Abɛ, aoɓá n'atɔtɔkɛani, gesa kani ɗanga kiɓe ndee. Kaɓɛmbɛ ka mɔphɛ ani, áɓɛ ndiu ɓíndɔ okondi.» 40Mpɔ, áǒjiia ɓagoigi nɛkɛ ɓasaɔ ndɔɔ. Áǒdonda na ɓá ka tɔ̌, áongoɗea Pɛ́tɛɛ te: «Ɓɔ́kɔ́ɔtɔka phɛá tɔ̌ kimoci n'eme ka mbenɔ moci tɔ? 41Cɔ, ɓókoɗɛmbɛ, mɛmani Mokonga gea te, ɓókoguɛmbɛ ka mbenɔ á tombaga, měma ana ɓukpɛkpɛ, nyama gǎkɛ aunge aɔlɔmani.»
42Â goto osɛkɛɗa mosá ábɔa ka mɔngɔ á ko iɓɛ, áɔmɛma ɓe: «Abɛ, aoɓá kiɓe nde na nnaɔtɔka n'anyɛ́nyi, kángá eme noa í, ambe mɔphɛ nɛkɔ átɔtɔkɛanɛ!» 43Mpɔ, â goto ǒdonda na ɓáɗe nga, ɗáɓáoyengia na tɔ̌. 44Yéso â goto ǒɗóa, áosɛkɛɗa mosá, â goto omɛma ka mɔngɔ á ko isaɔ, ɛmɛmi ndɔ moci.
45Mpɔ, â goto ǒjiia ɓagoigi nɛkɛ ndɔɔ. Áǒngoɗea te: «Ɓophɔ́ma tɔ ka tɔ̌ na úmbia? Mpɔ ye tɔ mbenɔ ajú. Ɓámbisande Muna-Nkpa ka njaga á ɓakpa ɓájeɗe. 46Máni, ɓégɛ! Mmbé aomokusisa a ye tɔ bíbí!»
Dunga á Yéso
(Ɔna phɔtɔ Mkɔ 14.43-50; Lók 22.47-53; Yoá 18.3-12)
47Mbenɔ nde Yéso ɗá phɔ́tɔ ɔyɔnga, Yúda mmbé ɗátú ka ɓagoigi nkama na ɓaɓɛ (12) ndea Yéso, áokiɗiana cɛɗɛ! Usɛsɛ á ɓakpa ɗáɓáomɓea. Ɓuangbo ɗáɓábɛɗi píndí, ɓuangbo gbutu. Ɓagbɛga á ɓatoɓeigi-phɛ́a na ɓagbɛga á ka nji ndea Ɓayúda ɓáunge ɗáɓáeteki. 48Cɔ, ntɔngi ndɔ Yúda, ɗéúbisi ɓakpa mphangiɔ ndee: «Nkpa nde nemumbiande, yɛ aámbɔ. Ndungani.» 49Cɔ, mɔngɔ moci, Yúda áombîmisia Yéso, áongea te: «Ngoisigi samba!» Mpɔ, áomumbia. 50Yéso áonsikisia: «Dani, gea kema nde obikíí.» Cɔ, ɓakpa ndɔ ɗáɓáomɓea Yúda, ɓáɔsɛkɛɗa, ɓáǒdungia ka Yéso na dunga akɛ.
51Ka ɓunde Yéso ɗáotámbága na ɓɔ, moci áophúiana píndí nɛkɛ, áonkita mbɛɗanigi ndea ngbɛga á ɓatoɓeigi-phɛ́a, áotena kɛcuɛ akɛ cé#Ɔna Yoá 18.26! 52Mpɔ Yéso áongoɗea ngoigi ndɔ te: «Sikisa píndí nɛkɔ ka paaɓɔ, ka nyɔngɔ nde ɓundɔ ɓáomana na píndí, ɓásiande tɔ na píndí. 53Kóoúba gea te, netókeni ɔphana á Abɛ, ámotekisiɛ mɔngɔ ímoci ekombo émani á ɓamalaéka kɔnyɛ́nya nkama moci na iɓɛ (12)? 54Ɗétúogea ɓó ámbé nyɔngɔ á Ɓuku á Mokonga ɗátɔ́tɔtɔkɛanaeka gǎkɛ ɓó. Nga, agi ambe áɓɛ ɓó!»
55Mpɔ Yéso áǒngoɗea usɛsɛ á ɓakpa ndɔ te: «Ɓokiɗi na píndí na gbutu ka dunga ani ɓea moege-ɓakpa? Cɔ, esa bui ɗɛ́ɔnɔphɛa k'éndu á Mokonga, ɗóɓókómodungi. 56Nnde bui ajú gǎkɛ tɔ ka gea, nyɔngɔ nde ɓaɔtu-nyɔngɔ ndea Mokonga ɗáɓáɗundu suɓi á Ɓuku á Mokonga, átɔtɔkɛanɛ.» Mpɔ, ɓagoigi ɓɔbu ɓáonkamba, ɓáotea.
Yéso mosá á ɓateni-nyɔngɔ
(Ɔna phɔtɔ Mkɔ 14.53-65; Lók 22.54-55,63-71; Yoá 18.13-14,19-24)
57Ɓunde ɗáɓándungi Yéso, ɓáonga ně mɔtɛ á Kayápha, kuɓî ngbɛga á ɓatoɓeigi-phɛ́a, ɓaɗundu-ɛɔphi na ɓagbɛga ɗáɓádondanigi. 58Cɔ, Pɛ́tɛɛ ɗáomɓea Yéso mbusa ɗanga na yɛ na ka ɓî ɗájú k'éndu ndea ngbɛga á ɓatoɓeigi-phɛ́a. Ajú ye, áongia ka ntanga éndu ndɔ, áoika kimoci na ɓabɛɗanigi ka ɔna ámbé nyɔngɔ ndɔ asungiagande ɓó.
59Cɔ, ɓagbɛga á ɓatobeigi-phɛ́a, na ɓato á ntua á tena á nyɔngɔ ndea Ɓayúda, ɗáɓátú okaɓa nyɔngɔ ɗanga-ɗanga ka kusisa á Yéso ɓákáɔnɛ gǎkɛ, 60nanga ɓatɔngi á mbɛa ɓásii ɗáɓájú ka ɓetekeaga akɛ na nyɔngɔ#Ɔna Jab 27.12; 35.11, nyɔngɔ nɛɓɔ ɗátú tɔ akpɛ ka ɓeekea í. Ka sungiaga, ɓakpa ɓaɓɛ ɓáojúa, 61ɓáogea te: «Nkpa nde ɗáyɔngi te: ‹Nɛɔtɔka na nɛngbɔi endu á Mokonga na phɛka í k'ésa isaɔ#Ɔna Yoá 2.19.›»
62Ngbɛga á ɓatoɓeigi-phɛ́a áoma, áongoɗea Yéso te: «Kó tanda na ka nyɔngɔ á sikisa k'índe ɓaɔkɔtɔnga bui?» 63Yéso áɔphɔnga, phioo! Ngbɛga á ɓatoɓeigi-phɛ́a áongoɗea Yéso te: «K'ína á Mokonga mmbé aoenda, ósongoɗea phɔ́ aoɓá n'ɔmɔ̂ Masíya Muna-Mokonga ɗoni.» 64Mpɔ Yéso áongoɗea te: «O ye yɔngi ú. Nekongoɗi gea, kpanga á kɛ̌kɛnde ɓɔmɔnande Muna-Nkpa n'aiki ka njaga á mǔku á Mɛna-ɓukpɛkpɛ, n'asɛnɛki k'égugu á na koba#Ɔna Jab 110.1; Dan 7.13.»
65Cɔ, ngbɛga á ɓatoɓeigi-phɛ́a áɔnyɔa ngɔ́mbɛ nɛkɛ jɔɛ! Áogea te: «Ambómi Mokonga! Ɓéké ye na siki á nɗigimisi. Ɓɔɔ́ki ɓî ambómi Mokonga. 66Cɔ, kanisia anu aɓo?» Ɓáonsikisia te: «Akeni tɔ ákuwɛ#Ɔna Ɓlw 24.16 nga, agi ájeɗe.» 67Mpɔ, ɓáonsúia soki ka keongi, ɓáomɓinda, ɓáontaia ka ngaga, 68ɓáongea te: «Ɔ́sɔtɔmia phɔ́, oɓɛ Kiísito, mmbé Mokonga ɗánsɔmbu, ani mmbé akɔɓɛti?»
Onganɔ ndea Pɛ́tɛɛ
69Wandɔ, Pɛ́tɛɛ áoika ka nsɛngɛ ka ntanga. Nke moci mbɛɗanigi ndea moamɛ ndɔ, áombikia Pɛ́tɛɛ, áongea te: «Oɓɛ, ɗótú phɔtɔ otamba kimoci na Yéso ɓa Galiláya.»
70Pɛ́tɛɛ áongána mosá á ɓakpa ɓɔbu te: «Caa! Kéoúba nyɔngɔ nde ɔɔyɔnga.»
71Mpɔ áoga bíbí á kǐo á na ntanga. Kó, nke ɓaangbo mbɛɗanigi áɔmɔna, áǒngoɗea ɓundɔ ɗáɓátú wa gea: «Mmbé ɗátú na Yéso ɓa Najalɛ́ti.» 72Pɛ́tɛɛ â goto ongána na ɔphá te: «Kéomúba nkpa ndee.»
73Mbusa, ɓakpa nde ɗáɓátú wa, ɓáɔnsɛkɛɗɛa Pɛ́tɛɛ, ɓáongoɗea te: «Ɗoni, onde ka ɓakpa ndɔ. Yɔngɛa akɔ aongoɗokisi tɔ base.» 74Mpɔ, Pɛ́tɛɛ â ye tɔ ɔɔphá ɓe: «Aoɓá na nɛyɔngi mbɛa, idɔngɔ ani tɔndɔ. Kaɓɛ na neomúba nkpa ndee, Mokonga ámotambisɛgɛ.»
Mɔngɔ ímoci, kɔkɔ áɔɔsa: Kɔ kɔ kɔ ikiɔɔɔ! 75Wa, Pɛ́tɛɛ áokanisia nyɔngɔ nde Yéso ɗángoɗi gea: «Mosa á ɔsa kɔkɔ, omonganande mɔngɔ isaɔ mosá á ɓakpa.» Aojuana ka nsɛngɛ, aokpanga ngamɔ akpɛ phɛɛ, ka nyɔngɔ nde ɗángani Yéso.
Currently Selected:
Matáyɔ 26: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
