Matáyɔ 27
27
Ɓánge na Yéso mɔtɛ á Pilátɔ
(Ɔna phɔtɔ Mkɔ 15.1; Lók 23.1-2; Yoá 18.28-32)
1Cɔ, mama í ka mɔkɛsuɛ, ɓagbɛga á ɓatobeigi-phɛ́a, ɓagbɛga á ka nji ɗáɓádondanigi, ka bisa á moangɔ á kusisa á Yéso. 2Mbusa á ɓoaga akɛ, ɓáonga ně mosá á Pilátɔ, mɔkɔta nde amamei nji á Yudɛ́a.
Yúda ěkpati
(Ɔna phɔtɔ Eku 1.18-19)
3Cɔ, Yúda, mmbɔ ɗántɔngi Yéso aɔni ye na ɓáteni nyɔngɔ ndea Yéso akpɛ, áɔ̌ɓɛia ka měma. Áǒsikisia ɓagbɛga á ɓatoɓeigi-phɛ́a na ɓagbɛga á ka nji, imɔna nkama isaɔ (30) ndɔɔ. 4Aǒngoɗea te: «Negi ɓojeɗe, ka kusisa nkpa nde nna na ɓojeɗe!» Ɓáonsikisia gea: «Ɓéké na nyɔngɔ kíndɔ, nndɔ ande nyɔngɔ nɛkɔ sasakɔ!» 5Yúda áomaka imɔna ndɔ suɓi éndu á Mokonga, áoga ǒkpata. 6Cɔ, ɓagbɛga á ɓatoɓeigi-phɛ́a ɓáɔbɛɗa imɔna ndɔ, ɓáogea te: «Kákeni ɓébisɛ imɔna nde suɓi á jɔ á ɛkɔmi á endu á Mokonga, ka nyɔngɔ nde, ande ophendɔ á magia á nkpa.» 7Cɔ, mbusa aɓɔ ɔ́kana, ɓáɔbɛɗa imɔna ndɔ, ɓáosomba ciko á mɓɔngisigi-mbungu, ka bisa í ngbangbata ka umbaga á ɓakɛni. 8Ka nyɔngɔ índɔ unge, ɗáɓáɔphani ciko ndɔ: «ciko á magia» na ka kesande. 9Mpɔ nyɔngɔ ndɔ Yɛɛmía mɔtu-nyɔngɔ ndea Mokonga ɗáyɔngi áɔtɔtɔkɛana gea: «Ɗáɓábɛɗi imɔna nkama isaɔ (30), nndɔ Ɓaisilaɛ́li ɗáɓáɔ́kani ka phenda ka phɔakɛ, 10na somba á ciko ndea mɓɔngisigi-mbungu, ɓíndɔ Mɔkɔta ɗámososi.»
Ɓámbiki na Yéso mosá á Pilátɔ
(Ɔna phɔtɔ Mkɔ 15.2-5; Lók 23.3-5; Yoá 18.33-38)
11Cɔ, ɓî ɗáɓánge na Yéso mosá á mɔkɔta Pilátɔ, Pilátɔ áomúsia te: «Oɓɛ, onde moamɛ ndea Ɓayúda?» Yéso áonsikisia te: «Oɓɛ ámbé ɔyɔngi.» 12Mbenɔ nde ɓakɔta á ɓatobeigi-phɛ́a na ɓagbɛga á ka nji ɗáɓáɔntɔnga, kěsikisiɛ gǎkɛ ka nyɔngɔ. 13Cɔ, Pilátɔ â goto omúsia te: «Moko! Kómaɔɔ́ka nyɔngɔ nde ɓáɔkɔtɔnga ně kuungaáni ee?» 14Yéso kánsikisiɛ ka nyɔngɔ. Kaɓondɔ, mɔkɔta áoyayama phɛɛ.
Pilátɔ ateni akpɛ nyɔngɔ á kukuwa á Yéso
(Ɔna phɔtɔ Mkɔ 15.6-15; Lók 23.13-25; Yoá 18.39—19.16)
15Cɔ, ka jaí bui á Pasáka, mɔkɔta ɗáɛmbani na koɗa á nto á mekakɔ moci, mmbé ɓakpa ɗáɓáonkonda. 16Ka matú ndɔ, ɗátú na nto á mekakɔ moci n'aombi phɛɛ, ina akɛ Yéso Balába#27.16 Ɓuku ásii á kala nna na ina nde Yéso.. 17Ɓî ɓakpa ɗáɓádondanigi, Pilátɔ áǒɓúsia: «Ɓokondi nénkoɗɛ kanu nkpa sina, Yéso Balába, kaɓɛ Yéso mmbɔ ɓáɔmɔphana Kiísito ndɔ?» 18Nga, Pilátɔ ɗáúbi gea, ɗáɓántɔgi Yéso ka nyɔngɔ á nsengo.
19Cɔ, ɓî Pilátɔ ɗáiki ka kankaanga á tena á nyɔngɔ, nkakɛ áontekisia mbino gea: «Kǒngisɛ mɔnɔ ka nyɔngɔ ndea nto á koɗoni ndɔ nga, kesande kǐpha netambigi phɛɛ ka njeki ka nyɔngɔ akɛ.»
20Mpɔ ɓakɔta á ɓagbɛga á ɓatoɓeigi-phɛ́a na ɓagbɛga á ka nji ɓáǒphɛa ɓakpa gea, ɓámɛmɛ koɗa á Balába, na ɓánkusɛ ndiu Yéso. 21Mpɔ mɔkɔta Pilátɔ, áǒúsia: «Ka ɓakpa nde ɓá ɓaɓɛ, ka ɓɔ sina mmbé ɓokondi nénkoɗɛ kanu sɔsɔɓɛ á ɓɔ?» Ɓáonsikisia te: «Balába!» 22Mpɔ, Pilátɔ â goto kǒúsia: «Cɔ, nengeande Yéso mmbɔ ɓáɔmɔphana Kiísito n'eke?» Ɓáonsikisia ɓɔbu gea: «Nkɔkɛagani gǔ á moyangɔ!» 23Â goto kǒúsia te: «Cɔ, ɓojeɗe sina nde atógi?» Ɓɔ, ɓâ gǎkɛ ɔyɔnga n'ɛsɔ akpɛ phɛɛ gea: «Nkɔkɛagani gǔ á moyangɔ!» 24Ɓî Pilátɔ ɗáɔni te kátɔkɛku ye n'agi kema, na oyombɔ á ɓakpa n'aǒyamea, áɔbɛɗa iɓo, áosokosa njaga akɛ mosá á ɓakpa ɓɔbu, n'aɔyɔnga gea: «Mengombo á nkpa nde, nna k'éme, a ye tɔ ka ɓenu!» 25Ɓakpa ɓɔbu ɓáosikisia te: «Ambe mengombo akɛ áɓɛ gǔ asu na ɓaniki nɛsu!» 26Mpɔ, Pilátɔ áonkoɗisa kaɓɔ Balába, â gǎkɛ omɓindisa Yéso, áonɗeketa ka gea, ɓánkɔkɛɛgɛ gǔ á moyangɔ.
Ɓato émani ɓáɔntɛbɛaga Yéso
(Ɔna phɔtɔ Mkɔ 15.16-20; Yoá 19.2-3)
27Mbusa, ɓato émani ndea mɔkɔta Pilátɔ ɓáondunga Yéso, ɓáonga ně k'éndu ndea mɔkɔta, ɓato émani ɓáodondanaga ɓɔbu, ɓáontimba. 28Ɓáomphúia ngɔ́mbɛ nɛkɛ, ɓáɔmɔ́lisa nkanjo ánjɛ. 29Ɓáomakea ka mɔ̌ akɛ kúku ɓínde á ɓakɔta, na ɓáɓɔngisigi na ngenge. Ɓáɔmbɛɗisa motumbɔ á manganga ka njaga á mǔku. Ɓáogbuka muanku mosá akɛ, ɓáɔntɛbɛaga na gea akɛ te: «Moamɛ ndea Ɓayúda samba!» 30Ɓáonsúia soki, ɓáɔbɛɗa motumbɔ á manganga ndɔ, ɓáɔmɓɛta ně ka mɔ̌. 31Mbusa á tɛbɛaga á Yéso, ɓáomphúia nkanjo ánjɛ ndɔ, ɓáɔmɔ́lisa goto ngɔ́mbɛ nɛkɛ, ɓáonga ně ka kɔkɛaga akɛ gǔ á moyangɔ.
Ɓáɔnkɔkɛaga Yéso gǔ á moyangɔ
(Ɔna phɔtɔ Mkɔ 15.21-32; Lók 23.26-43; Yoá 19.17-27)
32Ka juana á ɓato émani, ɓáodondana na nto á ka nji Kuɛ́nɛ, ina akɛ Simɔ́ni, ɓato émani ɓáonkumbisa moyangɔ ndea Yéso. 33Ɓáokiɗia k'ɔ́ma nde ɓáɔɔphana Gɔlgɔ́ta, ande gea: «Ɔma á gangata.» 34Wa, ɓáomopha Yéso divai na ɓádaɗu na kema á k'onoa nɛngbo nnde aájia phɛɛ. Yéso áokengea, â gǎkɛ áɔkpɛma noa í.
35Mbusa á kɔkɛaga akɛ ka moyangɔ, ɓáɔɓɛta ɓana-mɛlɔɛ, ka gabisanaga á ngɔ́mbɛ nɛkɛ#Ɔna Jab 22.19. 36Mbusa, ɓáoika wa ka amba akɛ. 37Ɓáobisa gǔ á mɔ̌ akɛ, gáo ábɔa na ɓáɗundu kantíti á tena á nyɔngɔ nɛkɛ akpɛ ɓe: «MMBE ANDE YÉSO, MOAMƐ NDEA ƁAYÚDA.» 38Ɓâ phɔtɔ ɔ̌kɔkɛaga ka moyangɔ kimoci na yɛ, ɓakukuɓa ɓaɓɛ kimoci na Yéso, moci ka njaga akɛ á mǔku na ɓaangbo ka njaga akɛ á nkei#Ɔna Isa 53.12.
39Ɓakpa nde ɗáɓáɔnyɛ́nya wa, ɗáɓáombóma, na kɔngɔmiaga akɛ na mɔ̌ #Ɔna Jab 22.8 40ɓáogea: «Oɓɛ, ɗókondi ngbɔa endu á Mokonga na phɛ̌ka í k'ésa isaɔ#Ɔna Yoá 2.19, cɔ, óamisa sasakɔ! Aoɓá n'onde Muna-Mokonga, kia phɔ́ ka moyangɔ!»
41Ɓakɔta á ɓatoɓeigi-phɛ́a, ɓaɗundu-ɛɔphi na ɓagbɛga ɓâ phɔtɔ ɔntɛbɛaga na gea: 42«Ɗáeamisi ɓakpa ɓuangbo, nna gǎkɛ ɔtɔka n'ěamisi sasakɛ ee! Ande moamɛ ndea Ɓaisilaɛ́li, ambe ákiɛ pɛ kɛ̌kɛnde ka moyangɔ, mpɔ ɓemɓeekeande. 43Ɗáobisa měma akɛ ka Mokonga. Cɔ, kaɓɛ Mokonga n'ankondi ánamisɛ kɛ̌kɛnde! Nga, ɗági te: ‹Nende Muna-Mokonga#Ɔna Jab 22.9.›» 44Ɓakukuɓa nde ɗáɓɛ̌kɔkɛigi ka moyangɔ kimoci na Yéso, ɓâ phɔtɔ onsungisiaga ɓó.
Kukuwa á Yéso
(Ɔna phɔtɔ Mkɔ 15.33-41; Lók 23.44-49; Yoá 19.28-30)
45Kpangá ka kantende, keiphe ɗágbukumi mokonda bui ka mbenɔ isaɔ. 46Ka mbenɔ á ko isaɔ í, Yéso áɔyɔnga akpɛ gea: «Ɛlɔ́i, Ɛlɔ́i, lama sabakatáni!» Ande gea te: «Mokonga nɛmɔ, Mokonga nɛmɔ. Omoɗeketi ka ɓo?#Ɔna Jab 22.2» 47Ka ɓakpa nde ɗáɓátú wa, ɓî ɗáɓáɔ́ki nyɔngɔ ndɔ, ɓáogea: «Nkpa nde, amɔphani Elía!» 48Kaɓɔ moci áoga mbangɔ, áɔbɛɗa siphɔngɔ#27.48 Siphɔngɔ ande kema ɓea pámba nnde aomuma iɓo., áoubia ka divai nde aángai-ngai. Áokpatikisa ka manganga, áonɗaphisia Yéso gea, ámumɛ ú#Ɔna Jab 69.22. 49Ɓuangbo ɓâ gǎkɛ ɔyɔnga te: «Ɗeketa, ɓɛ́ɔnɛ phɔ́, ámbé Elía abikande onamisa!»
50Yéso â goto okoga, áɔɗɔɛa. 51Cɔ, ka mbenɔ ndɔ, ngɔ́mbɛ á suɓi éndu á Mokonga áɔnyɔka ka phaeka iɓɛ, k'égo áobika osungia kusi. Oɗo áoɗenga, okanga áobomokaga. 52Bóta áoúkukanaga, ɓato á kanga ɓojeɗe ɓásii ɓáojujuka ka kukuwa. 53Ɓáojuana ka bóta, na mbusa á jujúka á Yéso ka kukuwa, ɓáongia ka Yɛusalɛ́ma, nji á kanga á ɓojeɗe, ɓakpa ɓásii ɓáɔ̌ɓɔna.
54Moamɛ á ɓato émani na ɓundɔ ɗáɓátú na yɛ ka amba á Yéso, ɓî ɓáɔni ɓaningina na kema bubui nde ɗágeani, ɓáoɓá na kɔɓɔɓɔkɔ phɛɛ, ɓáogea: «Ɗoni nkpa nde ɗátú Muna-Mokonga ɗoni!» 55Ɓake ɓásii ɗáɓátú wa, ɓunde ɗáɓáɔɔnjia ɗanga. Ɓɔ, ɗáɓátú ɓake nde ɗáɓátóki na Yéso na Galiláya na ɓáɔmbɛɗaneaga. 56Sɔsɔɓɛ á ɓake ndɔ, ɗátú Malía nseka á ka nji Magadála, Malía amakɛ na Yakɔ́ɓɔ na Yɔsɛ́phu, na ama ɓana Jɛbɛdáyɔ.
Yɔsɛ́phu amúmbi Yéso
(Ɔna phɔtɔ Mkɔ 15.42-47; Lók 23.50-56; Yoá 19.38-42)
57Aɓi ye ɔgɔgɔ, ntɔi moci ina akɛ Yɔsɛ́phu áokiɗia. Yɛ, ɗátú nto á ka ntanga-nji Aimatɛ́a. 58Áoga mɔtɛ á mɔkɔta Pilátɔ, áɔmɛma mǒnda á Yéso. Pilátɔ áososea gea, ɓámophɛ ú. 59Cɔ, Yɔsɛ́phu áɔbɛɗa mǒnda ndɔ, áoɓóaga ú na sanda nde nna na nkíkí. 60Áoúmba ú suɓi ka kubu ókanga á kɛ̌kɛ, nnde ɗátongi, ka phɔa akɛ sasakɛ. Áoingitisaga ɛtɛ ángbó ka ɗáká na aphe á iso á bóta, mpɔ áoga. 61Malía nseka á ka Magadála na Malía ɓaangbo, ɗáɓáiki wa, k'ɔ́ma nde ɗáɔɛnjiana na bóta.
Ɓato émani ɓáoamba bóta á Yéso
62Cɔ, mama í, mbusa á esa á ɓɔngisiaga á saɓáto, ɓagbɛga á ɓatoɓeigi-phɛ́a na Ɓaphaisáyɔ, ɓáoga kimoci mɔtɛ á mɔkɔta Pilátɔ, 63ɓáongoɗea te: «Mɔkɔta, ɓekanisi te, mbenɔ nde ndemigi ndɔ ɗáoenda, ɗáyɔngi te: ‹Mbusa á esa isaɔ, nejujukande ka kukuwa.› 64Ambe, ósoseɛ ɓáambɛ bóta ndɔ phɛɛ k'ésa isaɔ ka ɓanga gea, ɓagoigi nɛkɛ ɓákáúɓɛmbɛ mǒnda akɛ na ngoɗea á ɓakpa te: ‹Ajujúki ka kukuwa!› Ámbé odemayɔ índe á kɛ̌kɛ aɓande ájeɗe phɛɛ kɔnyɛ́nya nndɔ á mosá.» 65Pilátɔ áǒsikisia te: «Ɓato émani ɓáunge. Gǎni ɓóambɛ phɛɛ bóta ɓíndɔ akeni.» 66Ɓáoga ka bóta, ɓáoamba ú, mbusa ɓáophembeketea bóta n'etae ángbó, ɓáǒbisa ɓato émani ka amba á bóta ndɔɔ.
Currently Selected:
Matáyɔ 27: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
