Matáyɔ 25
25
Yéso aɔtɔmiaga mɛní á ɓaseka nkama (10)
1Koɓoamɛ á na koba aɓande ɓea eganí á ɓaseka nkama (10) ɓundɔ ɗáɓábɛɗi ɔbɛa nɛɓɔ ka gǎ dondanisa á mǒko éyamani. 2Sɔsɔɓɛ aɓɔ, ɓɔku ɓabóbó, ɓɔku ɓâ gǎkɛ ɔɛngɛpha. 3Ɓundɔ ɗáɓábóbóki ɗáɓábɛɗi ɔbɛa nɛɓɔ kángá á bɛɗa á gamba nɛngbo. 4Ɓundɔ ɗáɓáɛngɛphi, ɓáɔbɛɗa ngbanda á gamba n'ɔbɛa nɛɓɔ. 5Ɓî mǒko éyamani ɗáíphi ka bika, tɔ̌ áɔ̌bɛɗa baseka ndɔ, ɓɔbu ɓáoɗa.
6Ai tɔ ka gabekana ésa eongo áɔɔ́kɛkana: ‹Mǒko éyamani aámbé! Júanani ka dondanisa akɛ!› 7Mpɔ baseka ndɔ nkama (10), ɓáojujuka, ka ɓɔngisiaga ɔbɛa nɛɓɔ. 8Ɓundɔ ɓabóbó ndɔ, ɓáɔ̌mɛmaga ɓundɔ ɓaɛngɛphi gea: ‹Ósopani phɔ́ ka gamba nɛnu nga, ɔbɛa ínɛsu aímiki.› 9Ɓaɛngɛphi ɓáǒsikisia te: ‹Ɓɛɛndɔ! Kákpeengeanɛku ka ɓesu na ɓenu, gǎni k'aphe á somba nɛnu mɔtɛ á ɓasombisigi.› 10Ai ye ɓî ɓabóbó ɗáɓáoga k'aphe á somba gamba, mǒko éyamani â gǎkɛ okiɗia. Ɓundɔ ɓɔku ɗáɓáɛɓɔngisigi, ɓáongia na mǒko éyamani k'éndu ɛ́kɛka, ɓáophembeketea kǐo. 11Mbusa, ɓundɔ ɓabóbó ndɔ ɓáojúa, ɓáotoɓeaga: ‹Mɔkɔta hoo! Mɔkɔta! Ósoúkuia phɔ́!› 12Mɔkɔta áǒsikisia te: ‹Nenóngoɗi ɗoni gea, kéonóúba!›»
13Yéso áɔsɛkisia yɔnga te: «Ɛ́ngɛphani nga, ɓókóoúba kaɓɛ esa, kaɓɛ mbenɔ.»
Yéso aɔtɔmiaga mɛní á ɓabɛɗanigi ɓasaɔ
(Ɔna phɔtɔ Lók 19.11-27)
14«A ɓea mǒko moci mmbé ɗáogea ámɛɛ tamba, áɔ̌ɓɔphana ɓabɛɗanigi nɛkɛ ka ɗeketea aɓɔ nkumba nɛkɛ. 15Áomopha moci imɔna á láté ɓɔku, ɓaangbo iɓɛ na ɓaangbo moci ka ɓeana na okuu á nkpa na nkpa. Mpɔ áoga. 16Mmbɔ ɗábɛɗi imɔna á láté ɓɔku, áoga k'aphe á sombeanaga na sombisaga á nkumba, áɔtɔa nɛngbo imɔna á láté ɓɔku. 17Mmbɔ ɗábɛɗi imɔna á láté iɓɛ, áogea ɓíndɔ dakɛ ɗági. Áɔtɔa nɛngbo imɔna á láté iɓɛ. 18Mmbɔ ɗábɛɗi imɔna á láté moci, áoga otongea ejimba, áɔsɔmɛa imɔna ndea mɔkɔta nɛkɛ.
19Mbusa ésa ásii, mɔkɔta ndea ɓabɛɗanigi ndɔ, áosikianaga. Áɔ̌ɓɔphana ɓabɛɗanigi nɛkɛ ka yɔngaga na ɓɔ ka nyɔngɔ á nkumba nde ɗáeɗeketei. 20Mmbɔ ɗábɛɗi imɔna á láté ɓɔku, áombîmisia, áɔmɔnisa imɔna á láté nɛngbo ɓɔku, áongea: ‹Mɔkɔta! Ɗómopi tɔ imɔna á láté ɓɔku. Nɛngbo ɓɔku nnde nɛtɔi aungee!› 21Mɔkɔta nɛkɛ áongea te: ‹Onde mbɛɗanigi anjánjá na nto á koɗoni. Ɓî ɔɔnisi gea onde nto á koɗoni ka kema ábɔa, mpɔ ye tɔ nekophande kɔkɔta á mamea kema ásii. Cɔ, bika ɓéguɛ jaí kimoci!›
22Mmbɔ ɗábɛɗi imɔna á láté iɓɛ, â phɔtɔ ombîmisia mɔkɔta, áongea te: ‹Mɔkɔta! Ɗómopi tɔ imɔna á láté iɓɛ. Nɛngbo iɓɛ nde nɛtɔi aungee.› 23Mɔkɔta nɛkɛ áongea te: ‹Onde mbɛɗanigi anjánjá na nto á koɗoni. Ɓî ɔɔnisi gea onde nto á koɗoni ka kema ábɔa, mpɔ ye tɔ nekophande kɔkɔta á mamea kema ásii. Cɔ, bika ɓeguɛ jaí kimoci!›
24Mmbɔ ɗábɛɗi imɔna á láté moci áombîmisia mɔkɔta, áongea te: ‹Mɔkɔta! Nɛmɔɔúba gea te, onde nkpa akpɛkpɛ: Ooɗungua ɔma nde kókonanigi, ɔɔkɔngɔa ɔma nde kómisí mbó. 25Netú na kɔɓɔɓɔkɔ, kaɓondɔ, néoga ɔsɔmɛa imɔna nɛkɔ suɓi á oɗo. Cɔ, nkumba nɛkɔ ungee!› 26Mɔkɔta nɛkɛ áonsikisia te: ‹Onde mbɛɗanigi ajeɗe, nkusi nde ca! Otóúbi gea neoɗungua ɔma nde kékonanigi na kɔngɔa ɔma nde kémisí mbó. 27Ɗótuobisa imɔna nɛmɔ ka banki ámbé ka ja ani ɗétóbɛɗande na ɓáyamɛi nɛngbo gǔ índɔ.
28Cɔ, mutani nguɗua imɔna á láté ndɔ, ɓómophɛ mmbé aně nkama (10). 29Nga, nkpa buakɛ mmbé ana ka kema, atɔande nɛngbo áoɓá ně ásii. Mmbé nna gǎkɛ na kau ɓámutande n'ǐnde atójigi ně. 30Mmakani mbɛɗanigi jǎi-jǎi ndɔ ka nsɛgɛ ka kaiphiɔ, kó aɓande ngamɔ na ea á minyɔ.›
Tena á nyɔngɔ á ka sungiaga
31Mbenɔ nde Muna-Nkpa abikande k'óbebɔ nɛkɛ kimoci na ɓamalaéka ɓɔbu, aikande ka kankaanga á koɓoamɛ. 32Ɓakpa ɓɔbu á ka mokonda ɓátúndukanagande mosá akɛ, mpɔ áǒkatanisa ɓakpa, ɓea nambigi ɓanyama n'aǒkatanisa ɓamɛmɛ na ɓamɔgɔgɔ. 33Aebisande ɓamɔgɔgɔ ka njaga akɛ á mǔku, â gǎkɛ ǒbisa ɓamɛmɛ ka njaga akɛ á nkei.
34Cɔ, Mɔkɔta aengoɗeande ɓundɔ ɓáɓande ka njaga akɛ á mǔku te: ‹Bikani, ɓenu íɓundɔ Abɛ anóbisíí njaga, tɔani koɓoamɛ nde ɗáɓáɓɔngisigi ka ɓenu, kpanga á ɓî ɗáɓáconji mokonda. 35Nga, ɓî ɗétú na nja, ɗóɓomopi kema á koeea. Ɓî ɗétú n'ɛnyɔta, ɗóɓomopi iɓo á onoa. Ɓî ɗétú mɔkɛni, ɗóɓomosesi. 36Ɓî ɗétú ndúmbú, ɗóɓomɔɔ́lisi ngɔ́mbɛ. Ɓî ɗétú na ngobo, ɗóɓobiki omoenga. Ɓî ɗétú ka mekakɔ, ɗóɓobiki kɔmɔɛnjia.›
37Ɓato á koɗoni ɓánsikisiande te: ‹Mɔkɔta, mbenɔ sina nde ɗɛ́ɓɛkɔɔni n'ona nja n'ɛnyɔta, ɓéokopha kema á koeea na iɓo á onoa? 38Mbenɔ sina nde ɗɛ́ɓɛkɔɔni ɓea mɔkɛni, ɓéokosesea? Mbenɔ sina nde ɗɛ́ɓɛkɔɔni n'óndúmbú, ɓɛ́ɔkɔɔ́lisa ngɔ́mbɛ? 39Mbenɔ sina nde ɗɛ́ɓɛkɔɔni n'ona ngobo, kaɓɛ n'oka mekakɔ, ɓéobika kɔkɔɛnjia?› 40Moamɛ aesikisiande te: ‹Nenóngoɗi ɗoni gea, kema nde ɓoogea ka ɓadani íɓundɔ ɓáná na ɓoombia, aunge ɓo ye gi k'eme.›
41Mpɔ ěgeande ɓundɔ ɓá ka njaga akɛ á nkei: ‹Tókani bíbí ani! Ɓánɔsɛmɛigi. Gǎni k'ɛɛmbɛ á nsa mɛyɔ nnde ɗáɓáɓɔngisigi ka nketi na ɓamalaéka nɛkɛ. 42Nga, ɓî ɗétú na nja, ɗóɓokómopi kema á koeea. Ɓî ɗétú n'ɛnyɔta, ɗóɓokómopi iɓo á onoa. 43Ɓî ɗétú mɔkɛni, ɗóɓokómosesi. Ɓî ɗétú ndumbu, ɗóɓokómɔɔ́lisi ngɔ́mbɛ. Ɓî ɗétú na ngobo, kaɓɛ ka mekakɔ, ɗóɓokómoengi na ɛnjiani.›
44Mpɔ ɓáonsikisia te: ‹Mbenɔ sina nde ɗɛ́ɓɛkɔɔni na nja, n'ɛnyɔta, n'onde mɔkɛni, n'ondúmbú, n'ona ngobo, n'oka mekakɔ, ɓékékoenge tanda?› 45Moamɛ aesikisiande te: ‹Nenóngoɗi ɗoni gea, kema nde ɓɔkpɛmi gea í ka phɔa dani mmbɔ nna na ɓoombia, aunge ɓo ye kpɛmi phɔtɔ gea í k'éme.› 46Cɔ, ɓɔ, ɓágande otambanga mɛyɔ. Ɓato á koɗoni gǎkɛ ɓáɓande na enda á mɛyɔ#Ɔna Dan 12.2.»
Currently Selected:
Matáyɔ 25: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
