Matáyɔ 24
24
Yéso aúbisi nyɔngɔ á ngbɔɔkana éndu á Mokonga
(Ɔna phɔtɔ Mkɔ 13.1-2; Lók 21.5-6)
1Ɓî Yéso ɗájúani suɓi éndu á Mokonga, ɓagoigi nɛkɛ ɓáombîmisia ɓáongea te: «Ɔ́na phɔ́ etéte nde ɗáɓáphɛ̌ki n'éndu á Mokonga!» 2Mpɔ Yéso áǒgea te: «Ɓɔɔna kema ndɔ bui? Nenóngoɗi ɗoni gea, nna n'ɛtɛ nde aikande gǔ á dakɛ, bui angbɔɔkanande.»
Tambaga á ka mbenɔ á sungiaga á mokonda
(Ɔna phɔtɔ Mkɔ 13.3-13; Lók 21.7-19)
3Ɓî Yéso ɗáiki gǔ á mamba á Mijɛitúni, ɓagoigi nɛkɛ ɓáombîmisia, ɓáongoɗea ka mpɛphɛ te: «Ósongoɗea phɔ́ mbenɔ sina, nndɔ ageanande. Goto, mphangiɔ sina nde aúbisaeka mbenɔ á jua akɔ na á sungiaga á mokonda?» 4Yéso áǒsikisia te: «Ɛ́ngɛphani! Nkpa kanódemɛmbɛ. 5Nga, ɓakpa ɓásii ɓábikande k'ína ani, ɓáogea: ‹Eme aámbé, nende Kiísito.› Ɓáedemagande ɓakpa ɓásii phɛɛ. 6Ɓoɔ́kande ndu émani bíbí, na mbino émani á ɗanga. Ɓókoɓángɛ mɔnɔ gǎkɛ. Nga, nndɔ bui akeni átɔtɔkɛanɛ. Káɓɛku gǎkɛ sungiaga á mokonda ungɔ. 7Ɓato á k'ékuna moci ɓámanande na ɓato á k'ékuna nɛngbo, koɓoamɛ moci amanande na koɓoamɛ nɛngbo. Monganya na ɓaningina aɓande ka nji ɗanga-ɗanga. 8Kema ndɔ bui aɓande ɓea ɓoaé á k'ama mosá-mosá.
9Ɓánɔtɔngande ka tambisaga na mowa anu. Ɓakpa ɓɔbu ɓánokangeande ka nyɔngɔ á ina ani. 10Ka mbenɔ ndɔ, ɓakpa ɓásii ɓásagande ɓeekea nɛɓɔ. Ɓátɔnganande na kangeana. 11Ɓaɔtu-nyɔngɔ á mbɛa ɓásii ɓákiɗianande, ɓáǒdema ɓakpa ɓásii. 12Mpɔ ɓojeɗe aɛmbande, ekondi á ɓakpa ɓásii asiande. 13Nkpa nde aphiphiande gǎkɛ tambaga ndɔ na ka sungiaga í, mmbɔ aámbé aamande ka měma. 14Ɓáphɛande Mbino-Ánjá á koɓoamɛ ka Mokonda bui ka gea, ɓakpa ɓɔbu ɓáɗigimisɛ ú. Mpɔ sungiaga áojua.
Tambaga ángbó
(Ɔna phɔtɔ Mkɔ 13.14-23; Lók 21.20-24)
15Ɓɔmɔnande mmbé ɓáɔmɔphana: ‹Kema á soni nnde aɔjɔɔkisa endu á Mokonga›, mmbɔ Daniɛ́lɛ mɔtu-nyɔngɔ ndea Mokonga ɗáyɔngi nyɔngɔ akɛ#Ɔna Dan 9.27; 11.31; 12.11, ɓámbisande k'ɔ́ma á kanga ɓojeɗe. (Cɔ, oɓɛ ímbe ootanga óengekisa ye ánjá!) 16Ambe ɓunde ɓáɓande na Yudɛ́a ɓáteɛ gǔ á mamba. 17Mmbé aɓande ka ntɔndɔ éndu nɛkɛ, kákiɛmbɛ mɔnɔ ka gǎ bɛɗa nkumba nɛkɛ suɓi éndu. 18Mmbé aɓande ka ciko, kajɛmbɛ na nji ka bɛɗa á bɔngɔ nɛkɛ. 19Ngomi k'ésa ndɔ ka ɓama-kaeme na ɓama-mbɛnjɛ!
20Mɛmani Mokonga ka gea, ɓókoteɛ mɔnɔ ka mbenɔ á ɓɛjɔ, kaɓɛ k'ésa á saɓáto. 21Nga, ka mbenɔ ndɔ, tambaga ángbó nde káɓimbɛmɔnɔ ɓî mokonda ákpangɛ na ka kɛ̌kɛ. Na tambaga nɛngbo ɓíndɔ káɓáeka ye#Ɔna Dan 12.1. 22Atú oɓá Mokonga na kángbîmisi mbenɔ kau, ámbé ka ɓakpa kátóamɛeka. Angbîmisande gǎkɛ ú ka nyɔngɔ á ɓakpa ndɔ ɗáɛsɔmbu. 23A gǎkɛ oɓá nkpa n'anɔ́tɔ̌mi te: ‹Kiísito awani!› kaɓɛ: ‹A kosi›, ɓókǒɓeekeɛmbɛ. 24Nga, ɓakiísito á mbɛa, na ɓaɔtu-nyɔngɔ á mbɛa, ɓákiɗianande, ɓáɔtɔtɔkisa ketangaɔ na mphangiɔ ángbó phɛɛ ka dema á ɓunde Mokonga aɛsɔmbu. 25Cɔ, ɔ́kani phɔ́! Ɗégɔɓi ye na nenóngoɗi nyɔngɔ nde bui mosá.
26A gǎkɛ oɓá na ɓánongoɗi gea: ‹Aámbé a ka nkanda!›, ɓókógɛ mɔnɔ kó. Kaɓɛ na ɓánogi: ‹Aámbé aɛsɔmɛani wani›, ɓókómɓeekeɛmbɛ. 27Muna-Nkpa abikande ɓea phenua á mbua na koba nde aobenya ka toka n'okomo, áoga n'oyonga. 28Ɔma nde mǒnda á nyama aogua, aunge ɓandia ɓáodondanaga ɓei.
Ja á Muna-Nkpa
(Ɔna phɔtɔ Mkɔ 13.24-27; Lók 21.25-28)
29Cɔ, mɔngɔ ímoci mbusa á matú á tambaga,
maní aɓande kaiphiɔ, songe kábɛnyɛku, ɓasɛɛngɔa ɓáguande.
Na kema ákpɛkpɛ bui nnde á na koba, aɗengande.#Ɔna Isa 13.10; 34.4; Ɛjɛ 32.7; Yɔɛ́li 2.10; 3.4
30Mphangiɔ á Muna-Nkpa asɛnɛkande na koba na ɓukpɛkpɛ ángbó. Cɔ, ɓato á ka mokonda ɓɔbu ɓátaɓokanagande. Ɓámɔnande Muna-Nkpa n'akiɗiani k'egugu á na koba na ɓukpɛkpɛ na ɓophómbia#Ɔna Dan 7.13. 31Ɛsɔ á mbengu ángbó aɔ́kɛkanande, n'aetekande ɓamalaéka nci gena á ka mokonda: Ɓáedondanisande ɓundɔ Mokonga ɗáɛsɔmbu ka mokonda bui.
Mɛní á me nde ɓáɔmɔphana mtini
(Ɔna phɔtɔ Mkɔ 13.28-31; Lók 21.29-33)
32Engekisani phɔ́ mɛní á me nde ɓáɔmɔphana mtini: Ɓɔ ye ɔɔna gea, ntabi í n'akpangi tɛisa nsô á kasa, ɓôúba te, matú á okame a ye tɔ bíbí. 33Ɓo ye ɔɔna nyɔngɔ ndɔ bui n'atɔtɔkɛani, úbáni gea Muna-Nkpa a ye tɔ bíbí, amame ka kǐo á endu. 34Nenóngoɗi ɗoni gea, ɛɓɔkɔti nde kásiɛku kema ndɔ bui na kákiɗianimbɛ. 35Koba na mokonda, anyɛ́nyande. Nyɔngɔ nɛmɔ gǎkɛ unge kányɛ́nyɛku.
Mokonga tɔndɔ aámbé aoúba mbenɔ á sungiaga
(Ɔna phɔtɔ Mkɔ 13.32-37; Lók 17.26-30,34-36)
36Ka nyɔngɔ á esa ndɔ na mbenɔ ndɔ, nna na nkpa nde aoúba ú. Kaɓɛ ɓamalaéka na koba, kaɓɛ eme Muna-Nkpa, tɔndɔ Abɛ. 37Nyɔngɔ nde ɗányɛ́nyi ka matú ndea Nɔ́a, aunge aɓande phɔtɔ ka matú á bika á Muna-Nkpa. 38Nga, ka matú ndɔ, mosá á tuma á iɓo phɛɛ, ɓakpa ɗáɓáoeaga, ɓáonoa, ɓáɔɔmana na ɔmanisa á ɓaniki nɛɓɔ na ka ɓî Nɔ́a ɗángí suɓi á koko ángbó#Ɔna Nkp 6.9; 7.6. 39Ɗáɓákáosenda ka kema, na ka ɓî iɓo ɗátúmi phɛɛ áǒmia ɓɔbu#Ɔna Nkp 7.7-24. Aɓáeka tɔ ɓó esa nde Muna-Nkpa abikaeka.
40Cɔ, ɓǒko ɓaɓɛ ɓáɓande ka ciko: Ɓámbɛɗande moci, ɓáonɗeketa ɓaangbo. 41Ɓake ɓaɓɛ ɓágogande mbuka ka etae: Ɓámbɛɗande moci, ɓáonsaga ɓaangbo. 42Cɔ, ɛ́ngɛphani nga, ɓókóoúba esa nde Mɔkɔta nɛnu abikaeka. 43Ɔ́kani ánjá! Ɗátúoɓá mɛna-endu n'aúbi esa nde nkukuɓa amúɓiande, ámbé ɗáphɛi tɔ̌ ka gea nkukuɓa ndɔ kángiɛmbɛ k'éndu nɛkɛ. 44Kaɓondɔ unge, ɓenu phɔtɔ ɔ́ɓɔngisiagani nga, Muna-Nkpa abikande ka mbenɔ nde ɓókóosenda.
Mɛní á mbɛɗanigi anjánjá na mbɛɗanigi ajeɗe
(Ɔna phɔtɔ Lók 12.41-48)
45Cɔ, mbɛɗanigi sina mmbé aanjánjá n'aoúbapha mmbé mɔkɔta nɛkɛ amophi ophangɔ gǔ á ɓabɛɗanigi ɓuangbo ka gabea ɓɔ eea ka mbenɔ nde ɓákondi? 46Maseye ka mbɛɗanigi ndɔ, mbenɔ nde mɔkɔta nɛkɛ aoja, áondonda n'aobɛɗanaga ekuma ndɔɔ. 47Nenóngoɗi ɗoni gea, mɔkɔta amophande ophangɔ á nkumba nɛkɛ bui. 48Cɔ, a gǎkɛ oɓá n'ande mɓɛɗanigi ajeɗe, ěgeande sisakɛ: ‹Mɔkɔta aíphi phɛɛ!› 49Áokpanga ɓinda á ɓadakɛ íɓunde aobɛɗanaga na ɓɔ, aeagande na noa kimoci na ɓato á ɓoita. 50Cɔ, Mɔkɔta nɛkɛ ajúande k'ésa nde kátúosenda na ka mbenɔ nde nnaoúba. 51Mɔkɔta nɛkɛ amɔnisande ka ɓɔngɔ na ɓinda akɛ ɓea ɓato á maibe na bisa akɛ k'ɔ́ma nde agámande na ea á minyɔ.
Currently Selected:
Matáyɔ 24: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
