Marcos 6

Jesús Nazaretnu ꞌiá

(Mt 13.53-58; Lc 4.16-30)

1Anuax cuanx ca Jesús anuaxa canicë me anu cuancëxa. Cuancëbë ca aín ꞌunánmicë unicama abë cuancëxa. 2Cuanx bëbaxun ca anun ñu mëëtima nëtë ꞌain, anua judíos unicama timë́ti xubunu atsínxun bana ñuixunquin ꞌunánmiacëxa. Usoquian bana ñuia cuati ca unicama aín patsanëx ratuti canancëxa:

—¿Uin cara ënë uni usaquian bana ñuiti ꞌunánmiax? ¿Uisai quicë cara a ñuicë bana ënëx ꞌic? ¿Uisoquin cara uni itsin ꞌacëma ñu ꞌain? 3Carpinteroishi ca ënëx ꞌicën, Marían tuá. Ax ca Jacobo ꞌimainun José ꞌimainun Judas ꞌimainun Simón aín xucën ꞌicën. Aín chirabacëcamaribi ca ënu nubë ꞌicën, ¿usa cat? —quiax canancëxa.

Usai canani ca aín bana cuaisama tani ami nishacëxa. 4Ami nishcëxun ca Jesusan atu cacëxa:

—An Nucën Papa Dios quicë bana uni ñuixuncë unían bana ñuixunia ca unin cuatia. Usa ꞌaínbi ca axa anuax canicë unían, anuaxbia canicë menuxun bana ñuixunia, anu ꞌicë unicama ꞌimainun aín aintsi ꞌibucama ꞌimainun axa aín xubunu ꞌicëcamanribi cuaisama tania.

5Usaquian ax quicësabi oquin aín bana cuatiama ca Jesusan, uni itsían ꞌacëma ñu anu ꞌicë unicama ꞌaxuanma ꞌicën. Uni ꞌinsíncë ꞌitsama, ashi cuni ca aín mëcënan ramëquin pëxcüacëxa. 6An ca asérabi Nucën Papa Diosan cushínbi ñu ꞌaia quixuan sinaniama isi ca Jesús —¿uisa ꞌaish cara ënë unicama ësa ꞌicë? —quixun sinani ratúacëxa. Usai ꞌitancëx ca aín nëtënuax ëma chucúmaracamanu cuanquin Jesusan unicama bana ñuixuancëxa.

Bana ñuixunuan aín ꞌunánmicë unicama Jesusan xua

(Mt 10.5-15; Lc 9.1-6)

7Jesusan ca aín ꞌunánmicë uni mëcën rabë́ ꞌimainun rabë́ a timëxun aín cushi anúan ñunshin ꞌatima uninua chiquínti ꞌinántancëxun bëtsi bëtsi ëmanua cuanun quixun rabë́ rabë́ xuacëxa. 8Xuquin ca ꞌësëquin cacëxa:

—Bain cuanquin camina ñu buántima ꞌain. Pán, burasa, curíquibi buánquinma camina tsatishi buánti ꞌain. 9Taxaca upíiramashi camina tañubianti ꞌain, ꞌimainun camina a pañuti chupa rabë́ma achúshishi pañubianti ꞌain.

10Ësaquinribi ca cacëxa:

—Uinu ꞌicë unin xubunu caramina anu ꞌinux atsini, anuishi camina ñantan ñantan ꞌuxti ꞌain, anúnmi a ëmanuax cuanti nëtëa utámainun. 11Uinu ꞌicë ëmanu ꞌicë unicaman cara mitsu biisama tanan mitsun bana cuaisama tania, aín ëmanuax cuani camina anu ꞌicë unicaman, mitsun bana cuatíma ca Nucën Papa Diosan iscëx ꞌaisama ꞌicë quixun ꞌunánun, mitsun taxacanu ꞌicë me cupúcë tacabiani cuanti ꞌain. ꞌËn cana asérabi mitsu cain, Sodoma ëmanu ꞌicë unicama ꞌimainun Gomorra ëmanu ꞌicë unicama ca aín bana cuaisama tancë cupí Nucën Papa Diosan castícancëxa. Usamaira oquin castícancë ca a ëmanu ꞌicë unicama an mitsu bicëma cupí ax ꞌiti ꞌicën.

12Usaquin caquian xucëx cuanquin ca —ainan ꞌinux camina Nucën Papa Diosmi sinanati ꞌai —quixun caquin unicama bana ñuixuancëxa. 13Usonan ca ñunshin ꞌatima uninua chiquíanan uni ꞌinsíncëcamaribi xëni ron ronquin pëxcüacëxa.

Juan an uni nashimicë bana

(Mt 14.1-12; Lc 9.7-9)

14Usa ꞌain ca uni itsían ꞌacëma ñua Jesusan ꞌaia unicaman chaniocëxa. Chanioia cuati ca Galileanu ꞌicë ꞌapu, Herodes, quiacëxa:

—Ax ca Juan, an uni nashimicë, a ꞌicën. Bamaxbi ca baísquiaxa. Usa ꞌixun ca uni itsían ꞌacëma ñu ꞌaia.

15Usai quicëbëa raírinëx —ax ca Elías ꞌicë —quimainun ca raírinëxribi —ax ca an Nucën Papa Dios quicë bana uni ñuixuncë unicamaxa bëráma ꞌiásaribi uni a ꞌicë —quiax quiacëxa. 16Quia cuati ca Herodes quiacëxa:

—Ax ca Juan, a ꞌën tëbíscamia, a ꞌicën. Usa ꞌaish ca ax bërí baísquiaxa.

17-18Herodesnën Juan tëbíscamia, ax ca ësa ꞌiacëxa: Herodes an ca aín xucën Felipenën xanu, Herodías cacë, a biacëxa. Usa ꞌain ca —minmi min xucënan xanu biti ca ꞌaisama ꞌicë —quixun Juanën Herodes cacëxa. Cacëxun ca Herodesnën Juan bimixun nëamitancëxun sipuamiacëxa.

19Juan sipuacë ꞌaínbi ca ami nishquin Herodías an Juan ꞌamicatsi quixun sináncëxa. Usa ꞌixunbi ca uisabi oma ꞌicën. 20Herodías an ami nishquin ꞌamiti ꞌicëbi ca Herodesnën —Juan, ax ca mëní sinánñu ꞌaish upí uni ꞌicë —quixun sinani ami racuë́quin unínma ꞌaia quixun bërúancëxa. Usa ꞌixun ca aín bana uisai cara quia quixun upí oquin cuaquinmabi an bana ñuia cuacëxa. Usa ꞌain ca Herodíasnën Juan ꞌamiama ꞌicën. 21Usa ꞌaínbi ca achúshi nëtë anun Juan ꞌati nëtë ꞌiacëxa. Axa anun bacë́an nëtë ꞌain ca Herodesnën aín tucuricubu ꞌimainun aín suntárunën ꞌapucama ꞌimainun Galileanu ꞌicë aín cushi uniburibi abëtan pi unun camiacëxa. 22Camicëx uxuan Herodesbëtan acaman picëbë ca Herodíasnën tuá xanu xuntacu, ax anuax upiti bairani ransacëxa. Usai ꞌia isi ca anu ꞌicë unicamax Herodesbë chuáma tani cuëëancëxa. Cuëënquin ca Herodesnën xanu xuntacu cacëxa:

—Uisa ñu caramina cuëëni ca ꞌë cat, cacëxun cana a mi ꞌinánti ꞌain.

23Caxun ca cacëxa:

—Mi cana paraniman, sinanatëcëntimoquin cana asérabi mi cain, añu ñu caramina mi ꞌinánun ꞌë ñucatin, ꞌëx anu ꞌapu ꞌicë me ënëbi cana ꞌëmi ñucácëxun amo ꞌicë mi ꞌinánti ꞌain.

24Cacëx cuanquin ca aín tita cacëxa:

—¿ꞌËa ꞌinánun carana añu ñu ñucáti ꞌain?

Quia ca aín titan cacëxa:

—Juan, an uni nashimicë, aín maxcá ca ñucát.

25Cacëx bënëtishi uquin ca cacëxa:

—Bëríbi camina Juan, an uni nashimicë, a tëbíscamixun aín maxcá manë xampami ꞌë ꞌinánti ꞌain.

26Ësaquian cacëx masá nuituiraquin ca Herodesnën ꞌaisama tancëxa. ꞌAisama tanquinbi ca —sinanatëcëntimoquin cana mi cain —quixun cacë a sinánan anu ꞌicë unicamaribia cuacë cupí masá nuituiraquinbi xanu xuntacu parántisama tanquin, 27bënë́nquinshi aín suntáru achúshi Juanën maxcá isa bëxunun quixun xuacëxa. 28Xucëx cuanxun sipunuabi tëbíscabëtsinquin manë xampami bëxun ca suntárunën xanu xuntacu Juanën maxcá ꞌináncëxa. ꞌInáncëxun buánxun ca xanu xuntacun aín tita ꞌináncëxa.

29Usocë cuabiani cuanxun ca aín ꞌunánmicë unicaman Juan bibianquin buánxun maíancëxa.

Jesusan cinco mil uni pán pimia

(Mt 14.13-21; Lc 9.10-17; Jn 6.1-14)

30Usa ꞌain ca aín ꞌunánmicë unicaman, an xucëx cuanx anu utëcënxun, atúan ꞌacë ñucama ñuixuanan a uni ꞌunánmicë banacamaribi Jesús ñuixuancëxa. 31Ñuixuncëxun ca Jesusan ꞌaisamaira uni ampan ucë axa cuanmainun raírinëxribi aia, bana ñuixunquin piama ꞌicën. Usai ꞌiquin ca Jesusan aín ꞌunánmicë unicama cacëxa:

—ꞌUri pain cuanun ca cuan, anua uni ꞌicëma menuax nuxëshi tanti cuanun ca cuan.

32Cabiani ca manë nuntin a camáxbi anu uni ꞌicëma menu cuancëxa. 33Cuania isquin —ax ca Jesús ꞌicë —quixun ꞌunánbiani atux pain men abáquiani bëtsi bëtsi ëmanuax cuanx ca anua cuantinuxun Jesús caini uni timëcamëꞌëocëxa. 34Manë nuntinuax ꞌibúquian Jesusan iscëx ca anua timë́cë unicamax an atu Nucën Papa Diosmi sinánun ꞌaquinti ꞌaíma ꞌain, ꞌaracacë ñuinanëxa an bërúanti aín ꞌibu ꞌaíma ꞌain sináncasmai bënë́cësaribi ꞌiacëxa. Usai ꞌia isquin ca Jesusan unicama nuibacëxa. Nuibaquin ca ca ꞌitsa ñu ñuiquin atu bana ñuixuancëxa. 35Usaquin ꞌacëbëa bari xupíbucëbëtan ca aín ꞌunánmicë unicaman anu cuanxun Jesús cacëxa:

—Bari ca xupíbutia, ënë mex ca anu uni ꞌicëma me ꞌicën. 36Atúan piti ñu ca ꞌaíma ꞌicën. Ënu ꞌiáxma unicama cuantánun camina cati ꞌain. Cuanxuan ꞌuri ꞌicë ëmacama ꞌimainun a mecamanua atun piti bitánun camina xuti ꞌain.

37Quia ca Jesusan cacëxa:

—Mitsun ca piti ꞌinan.

Cacëxun ca atun cacëxa:

—¿Nun caranuna doscientos curíquinën atu ꞌinánti pán maruti ꞌain?

38Usaquian cacëxun ca Jesusan cacëxa:

—¿Uiti pánñu caramina mitsux ꞌain? Tain ca istan.

Cacëxun istancëxun ca cacëxa:

—Mëcën achúshi pán ꞌimainun ca tsatsa rabë́ anu ꞌicën.

39Cacëxun ca Jesusan basinua bucubunun quixun unicama cacëxa. 40Cacëx ca unicama cien uni cien uníxa tsómainun cincuenta cincuentanëxribi tsóbuax bucüacëxa. 41Usai unicama bucubuan ca Jesusan mëcën achúshi páncëñun tsatsa rabë́ bixun manámi bësuquin isquin Nucën Papa Dios —asábi ca —catancëxun pán tucapaxun aín ꞌunánmicë unicama ꞌináncëxa, axa bucubucë unicama ꞌinánun quixun. Usaribi oquin ca tsatsa rabë́ aribi tucapaxun ꞌináncëxa. 42ꞌInáncëxun bixun ca unicama camaxunbi pucháquin piacëxa. 43Pucháquin piia sënë́an ca usai ꞌiisa ꞌaímabia tëxëcë páncëñun tsatsa aín ꞌunánmicë unicaman mëcën rabë́ ꞌimainun rabë́ caquí buácaquin biacëxa. 44An pucháquin picë unicamax ca ꞌaisamaira ꞌaish cinco mil nucë bënë ꞌiacëxa.

Jesús parúmpapa camánanën niquiani cuan

(Mt 14.22-27; Jn 6.16-21)

45Usotancëxun ca an tsiánquianquin unicama cabianmainuan, atux pain manë nuntinu cëñúruquiani ꞌucë manan Betsaida ëmanu cuanun quixun Jesusan aín ꞌunánmicë unicama xuacëxa. 46Xutancëxun anu ꞌicë unicama cabiani ca Jesús matánu Nucën Papa Diosbë banai cuancëxa. 47Cuanx Nucën Papa Diosbë banacëbëa bari atsíncëbë ca baquíshacëxa. Baquíshcëbëa Jesús axëshi matánu ꞌimainun ca aín ꞌunánmicë unicamax manë nuntinu parúmpapa nëbë́tsi ꞌiacëxa. 48Usa ꞌaish ca suñúan cuainsamoquin bëcacëxun bamaira bamaxun inabacëxa. Usaía ꞌia isbiani ca pëcaracëbë Jesús parúmpapa camánanën niquiani atunu cuancëxa. Cuanquin ca Jesusan atun nunti inuquinbi ië́tancëxa. 49Parúmpapa camánanën niquiani Jesús cuania isi ca —ñunshin sapi ca —quixun sinani sharárui, aín bëmánan pëqui ratúcancëxa. 50Camaxunbi a isia racuë́ira racuëtiabi ca Jesusan atu cacëxa:

—Camina cushicanti ꞌain. Racuë́axma ca ꞌit, ꞌë cana ꞌain.

51Ësaquin cai manë nuntinu ꞌirucëbë ca suñúan nëtë́acëxa. Nëtë́cëbë ca aín ꞌunánmicë unicama ratuti —¿uisa ꞌain cara ësa ꞌia —quixun sinani sináncasmacëxa. 52Jesusan aín sinanënshi pán ꞌitsamia isquinbi uisaira cara aín cushi ꞌicë quixun sinanima ca suñúan nëtë́cëbë sináncasmacëxa.

Genesaret menuxuan Jesusan ꞌinsíncë unicama pëxcüa

(Mt 14.34-36)

53Parúmpapa ꞌucë manan cuani Genesaret cacë menu bëbaquin ca anu aín nunti tëcërëcacëxa. 54Tëcërëcaxa manë nuntinuax ꞌibutia isquin ca anu ꞌicë unicaman —axa ucë ux ca Jesús ꞌicë —quixun ꞌunáncëxa. 55ꞌUnani abáquiani, anu ꞌicë mecamanu cuanquin ca uni ꞌinsíncëcama aín bacë́tinën, anu ca Jesús ꞌicë quixuan ñuia cuabëtsinquin bëacëxa. 56Uinu cara Jesús cuania, ëma chucúmara ꞌimainun ëma chacamanuribi cara cuania, anuxun ca me mëníocënu uni ꞌinsíncëcama Jesusan chupa ticanun quixun bëquin racáncëxa. Bëcëxun ca ñucë unicaman Jesus —min chupa cuëbíshi ca nu ticamit —quixun cacëxa. Ësaquin caquin ticáishi ca ꞌinsíncë unicamax pëxcúacëxa.

Currently Selected:

Marcos 6: cbrPB

Highlight

Copy