Marcos 5

Jesusan ñunshin ꞌatimañu uni pëxcüa

(Mt 8.28-34; Lc 8.26-39)

1Parúnpapa ꞌucë manan cuantancëx ca Gadara cacë menu bëbacëxa. 2Bëbatancëxa manë nuntinuax ꞌibúquiani cuaniabi ca ñunshin ꞌatimañu uni, anu uni maíncënuax uquin, Jesús mëracëxa. 3Anu uni maíncë, anu ca a unin ꞌuxti ꞌiacëxa. A uni ca uinu ꞌicë unínbi manë risínbi nëáma ꞌicën. 4Usa ꞌicë unin aín manë risin tanianan mëtanicëxunbi anun nëacë a tëcapacëxa. Axa unin cushisama ꞌicë ca uinu ꞌicë unínbi a nëama ꞌicën. 5Usai ꞌi ca nëtë́nbi, imë́bi anu uni maíncë anu ꞌianan aín bashinuribi nitsi cuëncëni banai, maxaxan axbi rachacacëxa. 6Usa ꞌaish ca ꞌuránxun mërabëtsini, abácuatsianx Jesús tanáin rantin puruni tsóbuacëxa. 7-8Usaria ca Jesusan ñunshin ꞌatima cacëxa:

—Ñunshin ꞌatima, ënë uninuax ca chiquit.

Cacëxun ca munuma cuëncë́nquin Jesús cacëxa:

—Dios, naínu ꞌicë, aín Bëchicë Jesús camina mix ꞌain. ¿Uisati caramina ꞌë ubíoin? Diosan cuamainun cana mi cain, ꞌë tëmëramixunma ca ꞌat.

9Cacëxun ca Jesusan ñucácëxa:

—¿Uisa cara min anë ꞌic?

Quia ca cacëxa:

—Nuxnu ꞌitsa ꞌain ca ꞌën anëx ꞌËxcuira ꞌicën.

10Caxun ca a menua xuxunma ꞌanun quixun bënë́quin cacëxa. 11Catancëxun ca ꞌaisamaira cuchi matá manan pushían pi bucucë isquin cacëxa: 12—Cuchinu ca anu atsínun nu xut.

13Cacëxun ca Jesusan —ca cuantan —cacëxa. Cacëx ca ñunshin ꞌatima a uninuax chiquíquianx cuchinu atsíancëxa. Atsíncëbë ca cuchicama camáxbi ꞌaisamaira, rabë́ milsa ꞌaish, tsuáquiquiani abáquiani cuanx cuëtúnuax parúmpapanu rëucubuti bacamiqui cëñúacëxa.

14Usacëbëtan ca an cuchi bërúancë unicaman abáquiani cuanxun, ëma chanu ꞌicë unicama ꞌimainun ëma chucúmanu ꞌicëcamaribi, xubu itsi, xubu itsinu cuanquin ñuixuancëxa. Ñuixunquian chanioia cuati ca uisai cara a ñucama ꞌiaxa quixun isi riquiancëxa. 15Riquianx anua Jesús ꞌicë anu bëbaquin ca a uni anua ꞌaisamaira ñunshin ꞌatima ꞌiá, a an isásama ꞌaish, chupa pañuax sinan mëníñushi ꞌaish tsócë isacëxa. Usa ꞌicë a uni isi ca racuë́cancëxa. 16Usa ꞌain ca an iscëcaman, usai ca ꞌiaxa quixun, ñunshin ꞌatimañu unia pëxcucë ꞌimainun cuchinua ñunshin ꞌatima atsíncë, acama axa riquiancë unicama ñuixuancëxa. 17Ñuixuncëxun ca camaxunbi bënë́quin atun nëtënuaxa cuantánun quixun Jesús cacëxa.

18Cacë́xa manë nuntinu ꞌiruiabi ca Jesús ñunshínñu ꞌicëa pëxcucë uni, an abë cuancatsi quixun cacëxa. 19Cacëxunbi ca Jesusan abë cuanxma ꞌinun caquin cacëxa:

—Min xubunu ca cuantan. Cuantancëxun camina min aintsicama uisoxun cara Nucën ꞌIbu Diosan mi nuibaquin pëxcüaxa quixun ñuixunti ꞌain.

20Usaquian cacëx cuanxun ca Decapolis cacë me, anu ꞌicë unicama uisaquin cara Jesusan a ꞌaxa quixun ñuixuancëxa. Ñuixuncëxuan chanioia cuati ca camáxbi ratúacëxa.

Jaironën bëchicë baísquimianan xanu ꞌinsíncë Jesusan pëxcüa

(Mt 9.18-26; Lc 8.40-56)

21Usa ꞌain ca ꞌucë manánuax Jesús manë nuntin anuaxa cuanpuncë nëcë manan utëcëancëxa. Utëcëníbi ca ꞌaisamaira uni anu aia isi, Jesús parúnpapa cuëbíbi tiquiacëxa. 22Anu Jesús ꞌain ca anua judíos unicama timë́ti xubunu ꞌicë ꞌapu achúshi, Jairo cacë, ax uacëxa. Uquin a mërai aín bëmánon rantin puruni 23tsóbuquin ca Jesús cacëxa:

—ꞌËn ini bëchicë ca bamaia. Usa ꞌain camina min mëcënan ramëquin pëxcuxuni ꞌëbë cuanti ꞌain.

24Cacë́xa a unibë cuaniabi ca atúxribi a nuibiani cuanquin ꞌaisamaira unin Jesús chacatisaira ocëxa. 25A unicama nëbë́tsi ca achúshi xanu ꞌinsíncë ꞌiacëxa. Usa ꞌaish ca a xanu mëcën rabë́ ꞌimainun rabë́ baritia imia ꞌaíshbi aín imi nëtë́cëma ꞌiacëxa. 26A xanux ca ꞌaisamaira rucuturucamanuax pëxcúcasi ro mëëquin paë tënëquin aín ñucama ñancábi cëñuibi pëxcúama ꞌicën. 27-28Usa ꞌaish ca a xanu Jesús ñuicania cuabiani —aín chupa ticaishi cana pëxcúti ꞌai —quixun sinánquin unicama nëbë́tsinën, a caxu cuanquin, Jesusan chupa ticacëxa. 29Ticaíshi ca aín imicë nëtë́acëxa. Usai nëtë́quin ca aín nami chuámarua tancëxa. 30Usai ꞌicëbë ca Jesús —ꞌën cushin ca uni pëxcúaxa —quixun aín sinanënbi ꞌunani, ꞌitsa uni nëbë́tsinuxun caxu bësuquin isi quiacëxa:

—¿Uin cara ꞌën chupa ticax?

31Quia ca aín ꞌunánmicë unicaman cacëxa:

—¿Mia unin chacatisaira oia isibi caina, uin cara ꞌën chupa ticaxa quiax quin?

32Cacëxun ca Jesusan uin cara isa aín chupa ticaxa iscatsi quixun, amo bariaráquin isacëxa. 33Iscëbë ca axa pëxcúcë xanu, ax —an ca ꞌë pëcüaxa —quixun ꞌunani racuëti bërërui, anu cuani aín bëmánon rantin puruni tsóbuquin, usai cana ꞌia quixun chiquinaquin Jesús cacëxa. 34Cacëxun ca Jesusan cacëxa:

—ꞌËn cana mi pëxcuti ꞌai quixun asérabi sinani camina pëxcúan. Usai camina ꞌitëcëniman. Chuámashi ꞌaish ca cuantan.

35Usaquian Jesusan cacëbëtanbi ca aín xubunuax uquin unin anua judíos unicama timë́ti xubunu ꞌicë ꞌapu, Jairo, a cacëxa:

—Min bëchicë ca ñuaxa. Ca ꞌaíma ꞌicën. Usa ꞌain ca Jesús ñancábi buánxunma ꞌat.

36Caia cuaquin ca Jesusan a ꞌapu cacëxa:

—Racuë́axma ca ꞌit. ꞌËn cana mi ꞌaquinti ꞌai quixun ca sinan.

37Usaquin cabiani cuanbaiti a ꞌapun xubunu bëbaquin ca Pedro ꞌimainun Jacobo ꞌimainun Jacobonën xucën Juan, acamaishi abëa cuanun cacëxa. 38Cabiani cuanx bëbaquian cuacëxbi ca a ꞌapun xubunuax ꞌaisamaira uni shaquiabati rarumabacëxa. 39Rarumabatiabi ca xubunu atsínquin cacëxa:

—¿Uisacatsi caramina masá nuituti rarumati shaquiquin? Xu xanu ca bamacëma ꞌicën, ca ꞌuxaxa.

40Ësaquian cacëxunbi ca ꞌusáncancëxa. ꞌUsáncancëxunbi anu ꞌicë unicama xubu ëman xutancëx ca Jesús xanun papa ꞌimainun aín tita ꞌimainun abë ucë uni, acamaishi buani, anua xu xanu ꞌicënu atsíancëxa. 41Atsínxun mëínquin biquin ca xu xanu cacëxa:

—“Talíta cumi”. Talíta cumi quicë ax ca: Xu xanu, mi cana cain, ca nirut, qui quicë ꞌicën.

42Usoquian cacëxëshi ca a xu xanu mëcën rabë́ ꞌimainun rabë́ baritiañu ꞌaish nirutancëx niacëxa. Usai nitsia isi ca aín bëmánan pëqui ratúcancëxa. 43Ratutia ca Jesusan anu ꞌicë unicama cacëxa:

—ꞌËn mitsu cacësabi oquin camina mitsúnmi iscë ñu ënë uibi ñuixuntima ꞌain —quixun canan ca —xu xanu ca pimit —quixun cacëxa.

Currently Selected:

Marcos 5: cbrPB

Highlight

Copy