Marcos 7

Aín nuitu upíma cupía unin ꞌatima ñu ꞌacë bana

(Mt 15.1-20)

1An Moisésnën cuënëo bana ꞌunáncë unicamax Jerusalénuaxa ucë, abë ca fariseo unicamax Jesúsnu ai timë́acëxa. 2Timë́xun ca Jesusan ꞌunánmicë unicama raírinën aín rara quiásabi oi ꞌiquinma, mëchucaxunmashi piia isacëxa. 3Isquin ca sináncëxa: Nun cananuna nucën chaitiocë quiá bana a tani usabi ꞌicë ꞌixun Nucën Papa Diosan iscëx upí ꞌiti sinánquin nun mëcën upíira upiti mëchucaxunma pán piman, 4anua ñu marutinuax uxun cananuna nashixunma piman. Nun chaitiocëcaman ꞌásabi oquin cananuna nun manë xampa, nun ꞌó ñutë, nun manë ñutë, a ꞌimainun nun ꞌuxtiribi chucaian. Usonan cananuna ñu raíriribi nun chaitiocëcaman ꞌásabi oquin ꞌain. 5Usaquin sinánquin ca fariseo unibu ꞌimainun an Moisésnën cuënëo bana ꞌunáncë unicaman Jesús cacëxa:

—¿Uisacasquin cara min ꞌunánmicë unicaman nucën chaitiocëcama quiá bana tanimin? Ca mëchucaxunmashi piia.

6Cacëxun ca Jesusan ësaquin atu cacëxa:

—Mitsúxmi cëmë ꞌicë mitsu ñuiquian Isaíasnën cuënëo bana ca ësai quia:

Ënë unicaman ca aín cuëbitanshi ꞌë rabia, ꞌixunbi ca aín nuitu mëu ꞌë sinanima. 7Nucën Papa Diosan bana isa quixun ca unínbi ñuicë banaishi unicama ñuixunia. Usa ꞌixun ca ñancábi ꞌë rabia.

Isaíasnën cuënëo bana quicësabi oi camina mitsux ꞌin. 8Mitsun camina Nucën Papa Diosan bana quicësabi oquin ꞌati a ënquin mitsun chaitiocëcaman sinan bana a tanquin axa quicësabi oquin ꞌain, mëchucanan ñutë chucati, acama.

9Usai quiquin ca Jesusan ësaquinribi atu cacëxa:

—Mitsun chaitiocëcaman ñuia banaishi cuati cupí camina Nucën Papa Diosan bana ënquin a sinaniman. 10Moisés ca quiacëxa: “Min papa, min titan cacëxun ca aín bana cuat” quianan ca “an aín papa aín tita ꞌatimaquin ñuicë uni, a camina asérabi bamamiti ꞌain”. 11Usa ꞌaínbi camina mitsux ësa quin: Unin ca aín papa, aín tita cati ꞌicën, ñu mi ꞌinánti ꞌixunbi cana mi ꞌinaniman, ca Corbán ꞌicën, ca Nucën Papa Dios ꞌinánti ꞌicën, Nucën Papa Dios usai quiá ꞌaínmabi. 12Usai qui camina mitsux quin: Usai quicë unían aín papa, aín tita ꞌaquinima ꞌianan ñu ꞌinántima ca asábi ꞌicë quiax. 13Usa ꞌixun camina mitsúxmi quicë bana ashi ꞌunánmianan mitsun chaitiocëcama ꞌiáishi ꞌunánmiquin unicama Nucën Papa Dios axa quiá bana ënun quixun sinánmin. Usaribi oquin camina ꞌitsa ñu ꞌunánmiquin unicama Nucën Papa Dios quiá bana ënun quixun sinánmin.

Usaquin ca Jesusan fariseo unicama ꞌimainun an Moisésnën cuënëo bana ꞌunáncë unicama cacëxa.

14Catancëxun ca ësaquinribi Jesusan cuënxun unicama cacëxa:

—Camaxunbi ca ꞌën bana ñuimainun upí oquin cuat. 15An ñu aín cuëbitan picë cupí ca Nucën Papa Diosan uni upíma isima. Ama. Aín nuitu ꞌatima ꞌixun ꞌatima ñu ꞌanan ꞌatimati banacë, a cupí ca Nucën Papa Diosan uni upíma isia. 16An aín pabitan ënë bana cuacë unin ca aín nuitunënbi sinánquin cuati ꞌicën.

17Ësaquin catancëxun unicama ëbiani cuanxa aín ꞌicënu atsíncë ca aín ꞌunánmicë unicaman Jesús ñucáquin cacëxa:

—Unían picë ñu ñui quicë bana ax cara uisai quicë ꞌicë ca nu ñuixun.

18-19Cacëxun ca Jesusan cacëxa:

—¿Mitsúnribi caramina ꞌën cacëxun ꞌën bana cuatiman? Piti, ax ca unin nuitunu atsinima. Picëx ca aín pucunuishi atsíntancëx amiribishi chiquitia. ¿Usa cat? Usa ꞌain ca Nucën Papa Diosan aín cuëbitan ñu picë a cupí uni upíma isima.

Ësai qui ca Jesús, camabi ñu ca piti asábi ꞌicë, quiacëxa. 20Catancëxun ca Jesusan ësaquinribi cacëxa:

—Aín nuitunën ꞌatimaquin sinánquian ñu ꞌacë cupíshi ca Nucën Papa Diosan uni upíma isia. 21Aín nuitu mëu ca unin ꞌatima ñu ꞌati sinania, xanu cuaioti, uni itsin ñu mëcamati, uni ꞌati, aín xanuma ꞌaínbi xanubë ꞌiti, 22uni itsin ñu cuëënti, ꞌatima nuituñu ꞌiti, uni paránti, ꞌatima ꞌicëbi tënëquinma ñu ꞌati, nutsiti cëmëquin uni ñuiti, rabíti, nuituñuma ꞌiti, acama. 23Aín nuitunën sinánquian a ñucama ꞌacë unicamax ca Nucën Papa Diosan iscëx upíma ꞌicën.

Usaquin ca Jesusan unicama cacëxa.

Judíosma xanu Jesúsmi catamëa

(Mt 15.21-28)

24Anuax cuanx ca Jesús anua Tiro ꞌimainun Sidón ꞌicë menu bëbacëxa. Bëbatancëx ca, ꞌëx cana ënu ꞌai quixunma unin ꞌunania quixun sinani achúshi xubunu atsíancëxa. Usaquian sinaniabi ca unicaman ꞌunáncëxa. 25Usa ꞌain ca —anu ca —quixun cuabëtsini ñunshin ꞌatimañu xanu tuacën titax uax Jesús tanáin rantin puruni tsóbuacëxa. 26A xanux ca judíosma, Sirofenicia menu ꞌicë ꞌiacëxa. Usa ꞌixun ca aín tuánua isa ñunshin ꞌatima chiquínun quixun Jesús cacëxa. 27Cacëxunbi ca —judíos unicama pain ꞌaquini cana uacën —quixun sinánquin Jesusan ësaquin cacëxa:

—Tuá xura pimiti bixunbi camun pimiti ca ꞌaisama ꞌicën. Tuá xuratsucun pain ca piti ꞌicën.

28Cacëxun ca a xanun cacëxa:

—Usa ca. Usa ꞌaínbi ca cuënan tëmúxun tuá xuan rëupatia piti sani camunan piia.

29Cacëxun ca Jesusan cacëxa:

—Upiti camina quian. Usa ꞌain ca min tuánuax ñunshin ꞌatima chiquíaxa, camina cuanti ꞌain.

30Cacëx cuanx aín xubunu bëbaquin ca aín tuá anuaxa ñunshin ꞌatima chiquícë ꞌain, anua ꞌuxcënu, mëní sinan ꞌaish, racácë mëracëxa.

Pabë ꞌaish banañuma uni Jesusan pëxcüa

31Usaquiani anua Tiro ëma ꞌicë menuax cuanx ca Jesús Sidón ëma ꞌimainun Decapolis cacë me aribi rëxcëbiani, parúmpapa Galileanu cuantëcëancëxa. 32Cuanía bëbacëbëtan ca pabë ꞌaish banaibi upitiira banacëma uni bëxun unicaman Jesús aín mëcënan isa ramënun quixun cacëxa. 33Cacëxun ca Jesusan unicama ꞌuri amo nitsinaxun aín pabínu, aín mëcën rëbu atsínmianan tushuquixun cuñunan aín mëcën rëbu chabóxun, aín ana mëëacëxa. 34Usoquin mëëi manámi bësuquin isi munuma uínquin ca cacëxa:

—“Efata”. Efata quicë ax ca —ca asábi ꞌit —qui quicë ꞌicën.

35Usocëxuinshi pabë ꞌixunbi bana cuanan ca upitiira banacëma ꞌaíshbi upiti banacëxa. 36Usoquin a uni pëxcutancëxun ca Jesusan anu ꞌicë unicama uinu ꞌicë unibi ñuixunxunma ꞌanun quixun cacëxa. Usaquin cacëxunbi ca ñuiacëxa. Ñuia asérabi ñuixunxunma ꞌanun Jesusan catëcëncëxunbi ca a unicaman usai ca a uni pëxcúaxa quixun ñuiaraishiacëxa. 37Ñuiquian chanioia cuati ca unicamax ratuti quiacëxa:

—Camabi ñu ca an upí oquin ꞌaia, pabë unínbi ca an pëxcucëxun cuatia, banañuma uníxbi ca an pëxcucëx banaia.

Currently Selected:

Marcos 7: cbrPB

Highlight

Copy