Mateo 18

Uix cara bëtsi unicamabëtan sënë́nmaira ꞌicë quicë bana

(Mr 9.33-37; Lc 9.46-48)

1Usai ꞌicëbëtan ca anu cuanquin aín ꞌunánmicë unicaman Jesús ñucáquin cacëxa:

—¿Nucën Papa Diosan nëtënu cara uix anu ꞌicë unicamabëtan sënë́nmaira ꞌiti ꞌic?

2Cacëxun ca Jesusan, tuá achúshi cuënxun atu nëbë́tsi nitsínxun cacëxa: 3—Asérabi cana mitsu cain, mitsux cha ꞌiisa tanquin usaquin ꞌë ñucati camina sinanati ꞌain. Sinanacëma ꞌianan tuácamaxa cha ꞌiti sinanima an a bërúancë unimi catamëcë, usaribiti ꞌëmi catamëcëma ꞌaish camina mitsux Nucën Papa Diosnan ꞌitima ꞌain. 4Ui unix cara ënë tuásaribi ꞌaish cha ꞌiti sinanima ꞌëmi catamëtia, ax ca Nucën Papa Dios naínu ꞌicë an iscëx aín uni raírisamaira ꞌicën. 5Uicaman cara ꞌëmi sinánquin ënë tuásaribi ꞌicëa —ñuumara ca —quixun unin sináncë uni a ꞌaquinsa ꞌicë nuibaquin ꞌaquinia, an ca ꞌëribi ꞌaquinia.

ꞌUchati rabanan bërúancati Jesús quiá bana

(Mr 9.42-48; Lc 17.1-2)

6Usa ꞌain ca an ꞌëmia sináncë uni ꞌimainun tuá ꞌëmia sinánti ënun quixun ꞌatima ñu ꞌamiquin ꞌuchamicë unix aín ꞌucha chaira ꞌicën. Usa ꞌaish ca ꞌaisamaira oquin castícancë ꞌiti ꞌicën. A unix ca anun ñu rënti maxax ami tëtëcërëcatancëxun parúnmapa nëbë́tsi nicë́xa uni nanë́cësamaira oi castícancë ꞌiti ꞌicën. 7Ësaribiti ca ꞌia. Bëtsi unían ñu ꞌatima ꞌanun sinánmicëxun ꞌai ca uni aín ꞌucha cupí ꞌitsaira tëmëraia. Camabi unix ca ñu ꞌatima ꞌanun quixuan bëtsi unin sinánmicë ꞌicën. Usa ꞌaínbi ca an bëtsi uni ꞌatima ñu ꞌamicë ax ꞌuchañuira ꞌaish ꞌaisamaira oquin castícancë ꞌiti ꞌicën, aín ꞌucha cupí.

8Min mëcën, min taë anun ꞌaisama ñu ꞌati cuëëncë ꞌixun camina ashiquin manuquin ënti ꞌain. Usoquin ꞌai camina min mëcëm, min taë tëaxun nicësa ꞌiti ꞌain. Mix mëcën rabë́ñu ꞌaíshmi manë tsinu anuax tëmërai cuantima cupími min mëcën, min taë tëaxun niti ca asábi ꞌicën. 9Min bëru anun ñu isi ꞌatima ñu ꞌati cuëëncë ꞌixun camina ashiquin manuquin ënti ꞌain. Usoquin ꞌai camina min bëru achúshi ëchíxun nicësa ꞌiti ꞌain. Mix bëru rabë́ñu ꞌaíshmi manë tsinu anuax tëmërai cuantima cupími min bëru achúshi ëchíxun niti ca asábi ꞌicën.

Carnero nëtë́cë ñui Jesús quiá bana

(Lc 15.3-7)

10ꞌËn unicamax ca tuáratsusa ꞌaish ñuuma ꞌicë quixun camina sinántima ꞌain. ꞌËn cana mitsu cain, ca ñuumama ꞌicën. An a bërúancë ángelcamax ca Nucën Papa Diosbëbi ꞌicën. 11Uni ꞌinux cana ꞌëx Nucën Papa Diosnuax uacën, unicama ami sináncëma ꞌaish ainanma ꞌicëbi ainan ꞌinun ꞌië́minux.

12Ësaribi oquin ca Jesusan cacëxa:

—Ca ësa ꞌicën. ¿Cien carneroñua ꞌaínbia achúshi amanu cuani nëtëtia cara unin a baritima ꞌic? Raíri noventa y nueve an matá menuxun pasto piia ëbianxun ca axa nëtë́cë a bariti ꞌicën, ¿usa cat? 13ꞌËn cana asérabi mitsu cain, bariquin mërax ca bëtsi carnerocama isia cuëëncësamaira oi axa nëtë́cë a mërax cuëënia. 14Usaribiti ca mitsun Papa Dios naínu ꞌicë ax aín unicama achúshiratsunënbia a ënti cuëënima.

Usoquin axa numi ꞌuchacë uni aín ꞌucha manumiti bana

(Lc 17.3)

15Jesusan ca ësaquinribi aín ꞌunánmicë unicama cacëxa:

—Axa mix ꞌicësaribiti Nucën Papa Diosmi sináncë uníxa mimi ꞌuchaia camina abëishi banaquin —ësai camina ꞌëmi ꞌucha —quixun a cati ꞌain. Usoquinmi cacëxun cuati sinanati ca mibë upí ꞌitëcënti ꞌicën. 16Min cacëxuan cuaisama tancëbë camina bëtsi uni an a ñucama ꞌunáncë, a buani, axa mimi nishcë uni anu cuantëcënti ꞌain. Abëmi cuancë uni anribia cacëxun ca axa mimi nishcë uni an, asérabi ca minmi ñuicë bana ax ꞌicë quixun ꞌunánti ꞌicën. ꞌUnánan ca mix camina asérabi abë upí ꞌiisa tani quixun ꞌunánti ꞌicën. 17Usaquin ꞌacëxunbia min bana cuaisama tancëbëtan camina axa ꞌëmi catamëcë Nucën Papa Diosan unicamax timë́cë a ñuixunti ꞌain. Ñuixuncëxun ca atúnribi a uni ꞌësëti ꞌicën. ꞌËsëcëxunbia atun bana cuaisama tania camina, a unix ca axa Nucën Papa Diosmi sináncëma unisa ꞌianan an ꞌapu buánmiti curíqui bicë uni ꞌicësaribiti ꞌuchañu ꞌicë quixun isti ꞌain.

18ꞌËn cana asérabi ꞌëmi catamëcë ꞌicë mitsu cain, asérabi ꞌën sinánmicë ꞌixunmi mitsun, ꞌën unicama uisai cara ꞌiti ꞌicë quixun sinánquin —ësa ñu ca ꞌati ꞌicë —quixun canan —ësa ñu ca ꞌatima ꞌicë —quixun cacëbëtan ca Nucën Papa Dios naínu ꞌicë, an —usa ca —quixun sinánti ꞌicën.

19-20ꞌËn unicamaxa ꞌëmi sinani timë́cëbë cana ꞌëx atu nëbë́tsi ꞌain. Rabë́ ꞌimainun achúshia ꞌëmi sinani timë́cëbë cana ꞌëx atu nëbë́tsi ꞌain. ꞌImainuan rabëtaxribi timë́cë ꞌain cana ꞌëx atubë ꞌain. ꞌËx atubë ꞌixun cana añu ꞌati cara asábi ꞌicë quixun ꞌunánmiti ꞌain. Usa ꞌain cana ësaquinribi ꞌën mitsu cain, mitsu rabëtan camina uisaínu ꞌiti cara Nucën Papa Dios cuëënti ꞌicë quixun upí oquin sinántancëxun an mitsu ꞌaxunun ñucáti ꞌain. Ñucácëxun ca an mitsúnmi cacësabi oquin mitsu ꞌaxunti ꞌicën.

21Ësaquian aín ꞌunánmicë uni raíricëñun cacëxun ca Pedronën Jesús cacëxa:

—¿Min uni itsíxa ꞌëmi nishi ꞌuchaia carana uiti oquin aín ꞌucha abë mëníonanquin manumiti ꞌain? ¿Carana mëcën achúshi ꞌimainun rabë́ oi abë mëníonanti ꞌain?

22Cacëxun ca Jesusan cacëxa:

—Mëcën achúshi ꞌimainun rabë́ oquinmi manuminun cana mi caiman. Uiti oi cara ꞌuchati ꞌicë a camabi camina manumiti ꞌain.

An uni ñu mëëxuncë unían axa ami ꞌuchacë uni aín ꞌucha manumisama tan bana

23Jesusan ca ësaquinribi cacëxa:

—Nucën Papa Diosnan ꞌitix ca ësa ꞌicën: Achúshi unin ca an ñu mëëxuncë unicama uiti curíqui cara achúshi achúshi unin ribinia quixun istisa tanxa. 24Istisa tancëbëtan ca aín unin an ꞌaisamaira ꞌitsa milliones curíqui ribíncë uni bëaxa. 25Bëcëx uxun ca curíquiñuma ꞌixun cupíocasmaxa. Cupíocëxunma ca an ñu mëëmicë unin aín uni itsi caxa: Camina acëñun aín xanu ꞌimainun aín bëchicëcamaribi bëtsi unia ñu mëëxunun maruti ꞌain. Maruxun curíqui bixun camina ꞌëa ribíncë a cupíoquin mi bicë curíqui a ꞌë ꞌinánti ꞌain. 26Usaquian cacëbë a tanáin rantin puruni tsóbuquin ca an ribíncë uni a ñu mëëmicë uni caxa: ꞌËn cana mi cupíoti ꞌain, camabi a ꞌën mi ribíncë curíqui. ꞌËn mi munu cupíonun camina caínpainti ꞌain. 27Cacëxun cuaquin ca an a ñu mëëmicë unin caxa: ꞌË cupíoima camina cuanti ꞌain. Minmi ꞌë cupíocëxmabi ca asábi ꞌicën. 28Cacëx cuanquinbi ca an abëtan a uni ñu mëëxuncë uni mëraxa. Mëraquin ca —ënën ca ꞌë ribinia —quixun sinánquin ꞌitsamashi curíquia ribíncëxunbi aín tëxatan biquin tëtsë́caquin caxa: Minmi ꞌë ribíncë ca ꞌë cupíot. 29Cacëxun ca caxa: ꞌËn cana mi cupíoti ꞌain, camabi a ꞌën mi ribíncë curíqui. ꞌËn mi munu cupíonun camina caínpainti ꞌain. 30Cacëxunbi ca caxa: Cana ꞌëmi cupíonun cainiman. Caxun ca a ribíncë curíquicama a cupíoia sipunu ꞌinun sipuaxa. 31Usoquian ꞌaia isi masá nuituti ca an abëtan ñu mëëxuncë uni raíricamax an a ñu mëëmicë uni ñuixuni cuanxa. 32Cuanxun ñuixuncëxun cuaquin camicëxa ucë ca an ñu mëëmicë unin an ribíncë uni caxa: Mix camina ꞌaisama ꞌain. Minmi ꞌë cacëxun mi nuibaquin cana ꞌëmi ribíncë curíquicamami ꞌë cupíoxunma ꞌanun mi can. 33ꞌËn mi ꞌacësaribi oi camina an mi ribíncë uni a sipuamima upiti abë mëníonanti ꞌian. 34Cai ami nishquin ca an ñu mëëmicë unin an sipu bërúancë uni caxa: An ꞌë ribíncë curíquicama cupíoquin sënë́ontamainun camina ënë uni sipunu tëmëraminun xëputi ꞌai —quixun.

35Usaribi oquin ca ꞌën Papa Dios naínu ꞌicë, an axa mimi ꞌuchacë unimi aín ꞌuchacama abë mëníonanquin manumicëma ꞌicë, mitsun ꞌuchacama manuquinma uisoquin cara ꞌati ꞌicë usoquin ꞌati ꞌicën.

Currently Selected:

Mateo 18: cbrPB

Highlight

Copy