Mateo 19

Unix ca aín xanubë́ ënanántima ꞌicë quicë bana

(Mr 10.1-12; Lc 16.18)

1Usaquin a ñucama ñuiquin cabiani ca Jesús Galilea menuax cuanx Judea me Jordan cacë baca ꞌucë manan anu bëbacëxa. 2Bëbaquin ca ꞌaisamaira uníxa timë́cëbëtan Jesusan uni ꞌinsíncëcama pëxcüacëxa.

3Usa ꞌain ca fariseo unibunën anu timë́xun Jesús uisai caraisa quia ami manánuxun cuacatsi quixun ñucáquin cacëxa:

—¿Uisai cara ꞌiashia unin aín xanu ënti cara asábi ꞌic?

4Ñucácëxun ca Jesusan cacëxa:

—Camabi ñu unioquin ca Nucën Papa Diosan bëbu ꞌimainun xanu uniocëxa. ¿Acama ñuiquin Nucën Papa Diosan bana cuënëo caina iscëma ꞌain? 5Uniotancëxun ca Nucën Papa Diosan cacëxa: “ꞌËn usoquin uniocë ꞌixun ca unin aín xanu biquin, aín titacëñun aín papa ëni, aín xanubë ënananquinma ꞌiquinti ꞌicën. A rabëtaxbi ca achúshisa ꞌiti ꞌicën”. 6Usa ꞌain ca uni aín xanubë rabë́ ꞌaíshbi achúshisa ꞌicën. Usaia achúshishi ꞌinúan Nucën Papa Diosan ꞌimia ꞌaish ca uni aín xanubë ënanantima ꞌicën, uni itsínribi ca ënánanmitima ꞌicën.

7Cacëxun ca fariseo unicaman Jesús cacëxa:

—Mixmi quicë bana ënë́xa asérabi ꞌaínbi ca Moisésnëan cuënëo banax ësai quin, ënquin ca unin —ënë xanu ca bërí ꞌën xanuma ꞌicë —quixun quirica ꞌatancëxun ꞌinánquin aín xanu ënti ꞌicën. ¿Uisai cara usai quin?

8Cacëxun ca Jesusan cacëxa:

—Judíos unicamaxa mitsusaribi masáquin sináncë ꞌain ca Moisésnën a bana cuënëocëxa. ꞌËn Papa Diosan ca bëbu ꞌimainun xanu unioquin —unin ca aín xanu ënti ꞌicë —quixun cáma ꞌicën. 9ꞌËn cana ësoquin mitsu cain, an aín xanúxa uni itsibë ꞌicëma ꞌicëbi ënxun, xanu itsi bicë uni ax ca ꞌuchaia, aín xanuma ꞌaínbi xanu itsibë ꞌia ꞌicësaribiti.

10Usaquian cacë́xa fariseo unicamax riquiancëbëtan ca aín ꞌunánmicë unicaman Jesús cacëxa:

—Unin ca aín xanu ëntima ꞌicë quiaxmi mix quicë ꞌain sapi ca unin xanu bitima asábi ꞌicën.

11Cacëxun ca Jesusan cacëxa:

—Usaia uni ꞌiti ca asábi ꞌicën, ꞌaínbi ca camáxirama, a Nucën Papa Diosan usai ꞌinun quixun sinánmicë, axëshi usai ꞌiti asábi ꞌicën. 12Bëtsi bëtsi unin ca aín nami ꞌaisama cupí bacë bëchima, usa ꞌixun ca xanu bitsima. Bëtsi bëtsi unin ca uni itsían axa bëchicëñuma ꞌinun mëníocë ꞌixun xanu bitsima. Bëtsi bëtsi unin ca Nucën Papa Diosmishi sinánquin aín bana quicësabi oquin upí oquin ꞌanuxun xanu bitsima. Usa cupía axa xanuñuma ꞌiisa tancë uni ax xanuñuma ꞌiti ca asábi ꞌicën.

Jesusan ramëquin tuácama Nucën Papa Dios ñucáxuan

(Mr 10.13-16; Lc 18.15-17)

13Usa ꞌain ca ainsa sinánxunquin ramëquin Nucën Papa Dios ñucáxunun quixun tuáracama Jesúsnu bëcancëxa. Bëiabi ca Jesusan ꞌunánmicë unicaman an bëcëcama ñu caquin —tuá xuracama ënu bëxunma ca buántan —quixun cacëxa. 14Caiabi ca Jesusan cacëxa:

—Cuantánun caxunma ca tuá xuracama ꞌënua unun ën. ꞌËmi catamëtia Nucën Papa Diosan ainan ꞌimicë unicamax ca ënë tuá xuracamasaribi ꞌicën.

15Usaquin catancëxun ca Jesusan a tuácama ramëquin Nucën Papa Dios ñucáxuancëxa. Ñucáxuntancëx ca Jesús anuax cuancëxa.

Jesúsbëa ꞌitsaira ñuñu bëná uni bana

(Mr 10.17-31; Lc 18.18-30)

16Anuaxa cuania ca bëná uni achúshinën anu cuanquin Jesús cacëxa:

—Mix camina upí uni ꞌain. Usa ꞌixun camina ꞌë ñuixunti ꞌain, ¿ꞌëx nëtë́timoi Nucën Papa Diosan nëtënu abë ꞌinuxun carana uisa ñu upí ꞌati ꞌain?

17Cacëxun ca Jesusan cacëxa:

—¿Uisa cupí caramina min ꞌëx isana upí ꞌai quixun ꞌë cain? Nucën Papa Diosaxëshi ca asérabi upí ꞌicën. Mix aín nëtënu abë ꞌiisa tanquin camina aín bana quicësabi oquin ꞌati ꞌain.

18Cacëxun ca a bëná unin cacëxa:

—¿Uisaia ax quicë banacama carana ꞌati ꞌain?

Cacëxun ca Jesusan cacëxa:

—Uni camina ꞌatima ꞌain. Uni itsin xanubë camina ꞌitima ꞌain. Uni itsin ñu camina mëcamatima ꞌain. Camina bëtsi unimi cëmëi manántima ꞌain. 19Min papa, min titan bana camina upí oquin cuaquin tanti ꞌain. Mixmi bërúancacësaribi oquin camina min aintsicama nuibaquin ꞌaquinsa ꞌicë ꞌaquinti ꞌain.

20Cacëxun ca a bëná unin cacëxa:

—Chamaratsu ꞌaíshbi minmi ꞌë cacë banacama quicësabi oi ꞌiá ꞌaish cana usabii ꞌin. ¿Añu ñuribi carana ꞌacëma pan ꞌain?

21Cacëxun ca Jesusan cacëxa:

—Mix Nucën Papa Dios cuëëncësabi oi ꞌiisa tanquin camina cuanxun min ñucama maruquin curíqui bixun ñuñuma unicama ꞌinánti ꞌain. Usotancëx camina mix ñuñushi ꞌiti sinanima ꞌëmi sinani ꞌëbë cuani uti ꞌain. Usaquin ꞌatancëx camina Nucën Papa Diosan nëtënu ꞌianan usaquin ꞌacë cupí anuax cuëëinra cuëënti ꞌain.

22Usaquian Jesusan cacëxun cuabiani ca aín ñua ꞌitsaira ꞌain, a bëná uni masá nuituti utë́nbuax cuancëxa.

23Usoquin cacë́xa cuancëbëtan ca Jesusan aín ꞌunánmicë unicama cacëxa:

—ꞌËn cana asérabi micama cain, ꞌaisamaira ñuñu unix ca ainan ꞌiti ꞌaíshbi ñuñu ꞌitishi sinani Nucën Papa Diosnan ꞌitima ꞌicën. 24Amiribishi cana mitsu cain, camello, ax ca chaira ꞌaish xumuxan quini chamaratsu ꞌain, anun atsínquiantima ꞌicën. A ñuina chaxa a quinin atsíncasmacësamaira oi ca ꞌaisamaira ñuñu unix Nucën Papa Diosnan ꞌitima ꞌicën.

25Usaía quia cuati ca aín ꞌunánmicë unicamax, a banax ca asérabi ꞌicë quixun sináncasmai —asérabi a bana ꞌain ca ui uníxbi Nucën Papa Diosnan ꞌinux ië́tima ꞌicë —quiax canancëxa. 26Usai quia isquin ca Jesusan cacëxa:

—ꞌAisamaira ñuñu uníxa ië́tisama ꞌaínbi ca an ꞌacasmati ñu ꞌaíma ꞌain Nucën Papa Diosan ñuñu uniribi ainan ꞌinun ië́miti ꞌicën.

27Usaquian atu cacëxun ca Pedronën Jesús cacëxa:

—Nun cananuna mibë ninuxun nun ñucama ëan. ¿Usa ꞌain caranuna Nucën Papa Diosan nëtënu ꞌaish uisa ñuñu ꞌiti ꞌain?

28Cacëxun ca Jesusan aín ꞌunánmicë unicama cacëxa:

—Asérabi cana ꞌën mitsu cain, uni ꞌinux anuax uá, ꞌëx Nucën Papa Diosan mëníosabi oi nëtë iótëcëncëbë ꞌapuira ꞌain camina, asérabi ꞌën bana cuacë ꞌaish mitsun ꞌëbë cushi ꞌixun Israelnën bëchicë mëcën rabë́ ꞌimainun rabë́ aín rëbúnqui judíoscamax cara atúan ñu ꞌacë cupí, uisai ꞌiti ꞌicë quixun cati ꞌain. 29Ësaquinribi cana mitsu cain, uinu ꞌicë unin cara ꞌëx cuëëncësabi oquin ꞌanuxun aín xucën, aín chirabacë, aín papa, aín tita, aín bëchicë, aín naë, añu ñu cara, abi ëanxa, a unix ca ëncë ñuñu ꞌicësamaira oi ñuñu ꞌiti ꞌicën. ꞌIanan ca Nucën Papa Dios quicësabi oi aín nëtënu abë nëtë́timoi ꞌiti ꞌicën. 30Usa ꞌaínbi ca bëría uni —cha ca a uni ꞌicë —quixun sináncë uni a Nucën Papa Diosan aín nuitu ꞌunánquin ñuumara isti ꞌicën. ꞌImainun ca bërí unin iscë́xa ñuuma ꞌicë uni a Nucën Papa Diosan aín sinan upí ꞌunánquin a uníxa cha ꞌicë isti ꞌicën.

Currently Selected:

Mateo 19: cbrPB

Highlight

Copy