Popular Bible Verses from Mateo 19

Share

Usai quia isquin ca Jesusan cacëxa: —ꞌAisamaira ñuñu uníxa ië́tisama ꞌaínbi ca an ꞌacasmati ñu ꞌaíma ꞌain Nucën Papa Diosan ñuñu uniribi ainan ꞌinun ië́miti ꞌicën.

Usa ꞌain ca uni aín xanubë rabë́ ꞌaíshbi achúshisa ꞌicën. Usaia achúshishi ꞌinúan Nucën Papa Diosan ꞌimia ꞌaish ca uni aín xanubë ënanantima ꞌicën, uni itsínribi ca ënánanmitima ꞌicën.

Ñucácëxun ca Jesusan cacëxa: —Camabi ñu unioquin ca Nucën Papa Diosan bëbu ꞌimainun xanu uniocëxa. ¿Acama ñuiquin Nucën Papa Diosan bana cuënëo caina iscëma ꞌain? Uniotancëxun ca Nucën Papa Diosan cacëxa: “ꞌËn usoquin uniocë ꞌixun ca unin aín xanu biquin, aín titacëñun aín papa ëni, aín xanubë ënananquinma ꞌiquinti ꞌicën. A rabëtaxbi ca achúshisa ꞌiti ꞌicën”.

Caiabi ca Jesusan cacëxa: —Cuantánun caxunma ca tuá xuracama ꞌënua unun ën. ꞌËmi catamëtia Nucën Papa Diosan ainan ꞌimicë unicamax ca ënë tuá xuracamasaribi ꞌicën.

Usa ꞌaínbi ca bëría uni —cha ca a uni ꞌicë —quixun sináncë uni a Nucën Papa Diosan aín nuitu ꞌunánquin ñuumara isti ꞌicën. ꞌImainun ca bërí unin iscë́xa ñuuma ꞌicë uni a Nucën Papa Diosan aín sinan upí ꞌunánquin a uníxa cha ꞌicë isti ꞌicën.

Ësaquinribi cana mitsu cain, uinu ꞌicë unin cara ꞌëx cuëëncësabi oquin ꞌanuxun aín xucën, aín chirabacë, aín papa, aín tita, aín bëchicë, aín naë, añu ñu cara, abi ëanxa, a unix ca ëncë ñuñu ꞌicësamaira oi ñuñu ꞌiti ꞌicën. ꞌIanan ca Nucën Papa Dios quicësabi oi aín nëtënu abë nëtë́timoi ꞌiti ꞌicën.

Cacëxun ca Jesusan cacëxa: —Mix Nucën Papa Dios cuëëncësabi oi ꞌiisa tanquin camina cuanxun min ñucama maruquin curíqui bixun ñuñuma unicama ꞌinánti ꞌain. Usotancëx camina mix ñuñushi ꞌiti sinanima ꞌëmi sinani ꞌëbë cuani uti ꞌain. Usaquin ꞌatancëx camina Nucën Papa Diosan nëtënu ꞌianan usaquin ꞌacë cupí anuax cuëëinra cuëënti ꞌain.

Cacëxun ca Jesusan cacëxa: —¿Uisa cupí caramina min ꞌëx isana upí ꞌai quixun ꞌë cain? Nucën Papa Diosaxëshi ca asérabi upí ꞌicën. Mix aín nëtënu abë ꞌiisa tanquin camina aín bana quicësabi oquin ꞌati ꞌain.

Amiribishi cana mitsu cain, camello, ax ca chaira ꞌaish xumuxan quini chamaratsu ꞌain, anun atsínquiantima ꞌicën. A ñuina chaxa a quinin atsíncasmacësamaira oi ca ꞌaisamaira ñuñu unix Nucën Papa Diosnan ꞌitima ꞌicën.

ꞌËn cana ësoquin mitsu cain, an aín xanúxa uni itsibë ꞌicëma ꞌicëbi ënxun, xanu itsi bicë uni ax ca ꞌuchaia, aín xanuma ꞌaínbi xanu itsibë ꞌia ꞌicësaribiti.

Usoquin cacë́xa cuancëbëtan ca Jesusan aín ꞌunánmicë unicama cacëxa: —ꞌËn cana asérabi micama cain, ꞌaisamaira ñuñu unix ca ainan ꞌiti ꞌaíshbi ñuñu ꞌitishi sinani Nucën Papa Diosnan ꞌitima ꞌicën.