Mateo 17

Axbia Jesús bëtsia

(Mr 9.2-13; Lc 9.28-36)

1Usaquin aín ꞌunánmicë unicama catancëx ca mëcën achúshi ꞌimainun achúshi nëtë ꞌicëbë aín ꞌunánmicë uni raíri ëbiani, Pedrocëñun Jacobo ꞌimainun aín xucën Juan, acamaishi buani Jesús matánu cuancëxa. 2Anu cuantancëx ca a unicaman ismainunbi Jesús bëtsiacëxa. Bëtsii ca barin pëcacësa ꞌinun aín bëmánan ichúacëxa. Aín chuparibi ca uxuira ꞌaish bari upí uruia iscësa ꞌiacëxa. 3Usa ꞌicë isanan ca Elíasbëa Moisés chiquiracëti Jesúsbë banaia isacëxa. 4Usai ꞌia abë banaia isquin ca Pedronën Jesús cacëxa:

—Nuxnu ënu ꞌicë ca asábiira ꞌicën. Mix cuëëncëbëtan cananuna rabë́ ꞌimainun achúshi xuburatsu ꞌati ꞌain. Ax ca minan achúshi ꞌimainun Moisésnan achúshi ꞌimainun Elíasnanribi achúshi ꞌiti ꞌicën.

5Usaquian Pedronën cacëbëtainshi ca acama cuin pëquicësanën tupë́oncëxa. Usocëxun ca Pedro, Jacobo, Juan acaman nëtë cuin mëucüaxa ësai banaia cuacëxa:

—Ënëx ca ꞌëx amiira sinani cuëëncë, ꞌën bacë bëchicë ꞌicën. Aín bana ca cuacan.

6Ësai quia cuati ca ꞌaisamairai racuëti memi bëúmpucuti racábuacëxa.

7Usai ꞌia racuëtan bamaiabi ca Jesusan anu cuanquin ramëquin cacëxa:

—Ca nirucan, racuëaxma ca ꞌit. 8Ësaquian cacëx bëpë́qui chairuquin iscëxbi ca uíbi ꞌaíma ꞌimainun Jesúsëshi anu ꞌiacëxa.

9Usaquiani matánuax cuanquin ca Jesusan atu cacëxa:

—Mitsúnmi isanan cuacë ënë ñucama camina uinu ꞌicë unibi ñuixuntima ꞌain. Uni ꞌinux Nucën Papa Diosnuax uá ꞌaish, ꞌëx bamatancëx baísquicëbëtan cuni camina ënë ñucama unicama ñuixunti ꞌain.

10Usaquin cacëxun ca aín ꞌunánmicë unicaman Jesús ñucáquin cacëxa:

—¿Mixmi asérabi Cristo ꞌaínbi cara uisacatsi an Moisésnën cuënëo bana ꞌunáncë unicamax, Elías pain ca uti ꞌicë quiax quin?

11Cacëxun ca Jesusan cacëxa:

—Elías ax pain ca uti ꞌicë quicë bana ax ca asérabi ꞌicën. Uxun ca unicama Nucën Papa Diosmia sinánun sinánmiti ꞌicën, usai quicë banax ca asérabi ꞌicën. 12Asérabi ꞌaínbi cana mitsu cain, Elías pain ca uaxa. Ucëbi ca judíos unicaman ui cara ax ꞌicë quixun ꞌunáncëma ꞌicën. ꞌUnánquinma ca atúxa cuëëncësa oquinshi a ꞌatimoxa. A ꞌatimocësaribi oquin ca uni ꞌinux Nucën Papa Diosnuax uá ꞌicë ꞌëribi ꞌatimoti ꞌicën.

13Usaquian Jesusan cacëxun ca aín ꞌunánmicë unicaman ꞌunáncëxa, —Elías ca uti ꞌicë quiá bana, ax ca Juan, an uni nashimicë, a ñuia quiá ꞌicë —quixun.

An upí ꞌicëbi aín nami bërë́rumiquin uni bënánmicë ꞌinsínñu tuá Jesusan pëxcüa

(Mr 9.14-29; Lc 9.37-43)

14Matánuax cuanx ca anua ꞌaisamaira uni timë́cë anu Jesús bëbacëxa. Bëbacëbë anu cuani aín bëmánon rantin puruni tsóbuquin ca achúshi unin cacëxa: 15—¿ꞌËn bëchicë caramina ꞌë pëxcuxuntima ꞌain? Aín namix nimëti bërërui saquiquiquin ca paë tania. Nimëti saquiqui ca ꞌitsai tsinu ꞌiruanan bacanu nipacëtia. 16Usaia ꞌia cana min ꞌunánmicë unicamanu ꞌëa pëxcuxunun quixun bëan. Bëiabi ca ꞌë pëxcuxuncëma ꞌicën.

17Quia cuaquin ca Jesusan anu ꞌicë unicama cacëxa:

—Mitsun camina Nucën Papa Dios ax ca asérabi cushi ꞌicë quixun sinaniman. Camina ami catamëisama tanin. ¿Mitsúxmi ami catamënun carana uiti nëtën mitsu ꞌunánmiti ꞌain? ¿Uitishi nëtën carana ꞌëx mitsu cupí masá nuituti ꞌain? ꞌË ca a tuá bëxun.

18Cacëxuan bëcëbëtan ca Jesusan a tuánu ꞌicë ñunshin ꞌatima chiquínun caquin chiquíancëxa. Chiquícëbë ca pëxcuti asábi ꞌiacëxa.

19Usaquian ꞌacë ca atúxëshi abë ꞌixun aín ꞌunánmicë unicaman Jesús ñucácëxa:

—¿Uisa cupí caranuna nun a tuánu ꞌicë ñunshin ꞌatima chiquíncasman?

20Cacëxun ca Jesusan cacëxa:

—Mitsun camina uisaira cushi cara Nucën Papa Diosan cushi icë quixun sinaniman. Mostaza bëru ax ca chamaratsu ꞌicën. Asaribi ꞌaish ꞌitsamaratsushi Nucën Papa Diosmi sináncë ꞌixun, Ënë ñu cana ꞌatima ꞌai, quixun sinánquinbi asérabi ami catamëquin ñucáquin camina uisa ñu caramina ꞌaisa tani a ꞌati ꞌain. Mitsux ami ꞌitsamashi catamëcë ꞌixunbimi ënë matá, Ënuax ca ꞌuri tacút, cacëx ca ꞌuri tacúti ꞌicën. 21Ësa ñunshin ꞌatima chiquíntix ca pima samáquin Nucën Papa Dios ñucáquin chiquínti ꞌicën.

—ꞌËx cana unin ꞌacëx bamati ꞌai —quiáxa Jesús quitëcëan

(Mr 9.30-32; Lc 9.43-45)

22Usoxun ca abëa Galilea menu cuania Jesusan aín ꞌunánmicë unicama cacëxa:

—Uni ꞌinux Nucën Papa Diosnuax uá ꞌicë ca ꞌë unin an raíri uni ꞌaminun uni ꞌinánti ꞌicën. 23ꞌInáncëxun bixun ca ꞌë ꞌati ꞌicën. ꞌAcëx bamatancëx cana rabë́ nëtë ꞌiónxa pëcaracëbë baísquinuxun ꞌain.

Quixuan cacëxun cuati ca aín ꞌunánmicë unicamax masá nuituacëxa.

Anuxun Nucën Papa Dios rabiti xubu anun mëníoti curíqui ñui quicë bana

24Capernaúmnu cuanxa Jesús ꞌimainun aín ꞌunánmicë unicamax bëbacëbëtan ca an anuxun Nucën Papa Dios rabiti xubu anun mëníoti curíqui bicë unin anu cuanquin Simón Pedro ñucáquin cacëxa:

—¿Mitsun ꞌibun cara curíqui, anun anuxun Nucën Papa Dios rabiti xubu mëníoti, ꞌinanimin?

25Cacëxun ca Pedronën cacëxa:

—Ca ꞌinania.

Usaquin catancëxbia a ñucánux xubunu atsinia ca Jesusan Simón Pedro ñucácëxa:

—Simón, ¿uisaquin caramina sinanin? ¿Ënë nëtënu ꞌicë ꞌapucaman cara a curíqui ꞌinánun ui cain? ¿A curíqui ꞌinánun quixun cara aín aintsicama cain? ¿A curíqui ꞌinánun cara bëtsi unicama cain?

26Cacëxun ca Simón Pedronën cacëxa:

—Aín aintsicamama, bëtsi unicama ca a curíqui ꞌinánun quixun caia.

Cacëxun ca Jesusan cacëxa:

—Ca usa ꞌicën. Aín aintsicaman ca a curíqui ꞌinanima. 27Usa ꞌain curíqui ꞌinántima ꞌaínbi camina an curíqui bicë unínma numi nishquin masá sinania quixun ësaquin ꞌati ꞌain. Camina parúmpapanu mishqui cuanti ꞌain. Mishquiquinmi a pain bicë tsatsa, aín ana ꞌucë mëu isquin camina anua curíqui mërati ꞌain. Mëraquin a curíqui bixun camina an curíqui bicë uni ꞌinánti ꞌain. A curíquinëx ca ꞌiti ꞌicën, minan ꞌinánanmi ꞌëribi ꞌinánxuncë.

Currently Selected:

Mateo 17: cbrPB

Highlight

Copy