Lucas 9

Bana ñuixunuan aín ꞌunánmicë unicama Jesusan xua

(Mt 10.5-15; Mr 6.7-13)

1Usa ꞌain ca Jesusan aín ꞌunánmicë uni mëcën rabë́ ꞌimainun rabë́ a timëxun cacëxa:

—Anúnmi uninua ñunshin ꞌatimacama chiquíanan uni ꞌinsíncëcamaribi pëxcunun cana ꞌën cushi mitsu ꞌinanin.

2Usoquin catancëxun ca —Nucën Papa Diosan ca ꞌëmi catamëcë unicama ainan ꞌimiti ꞌicë —quixun unicama ñuixuanan ꞌinsíncëcama pëxcunun quixun aín ꞌunánmicë unicama xuacëxa. 3Xuquin ca cacëxa:

—Bain cuanquin camina ñu buántima ꞌain. Tsati, burasa, piti, curíqui buanima camina ñancáishi cuanti ꞌain. Rabë́ camina ami pañuti chupa buántima ꞌain. 4Uinu ꞌicë unin xubunu caramina anu ꞌinux atsini, anuishi camina ñantan ñantan ꞌuxti ꞌain, anúnmi a ëmanuax cuanti nëtëa utámainun. 5Uinu ꞌicë ëmanu ꞌicë unicaman cara mitsu biisama tanan mitsun bana cuaisama tania, aín ëmanuax cuani camina anu ꞌicë unicaman, mitsun bana cuatíma ca Nucën Papa Diosan iscëx ꞌaisama ꞌicë quixun ꞌunánun, mitsun taxacanu ꞌicë me cupúcë tacabiani cuanti ꞌain.

6Usaquin caquian Jesusan xucëx camabi ëmanu cuanquin ca anu ꞌicë unicama upí bana, anúan atux Nucën Papa Diosnan ꞌi cuëënun, ñuixuancëxa. Ñuixuanan ca uni ꞌinsíncëcama pëxcüacëxa.

Juan, an uni nashimicë, ax bama

(Mt 14.1-12; Mr 6.14-29)

7Unicaman Jesusan ꞌacë ñucama chanioia cuati ca Galileanu ꞌicë ꞌapu, Herodesnëx —ui cara ax ꞌicë —quiax sináncasmacëxa. Raírinëx ca —Juan, an uni nashimicë, ax ca bamaxbi baísquiaxa —quiax quiacëxa. 8Raírinëx —Elías ca utëcëanxa —quimainun ca raírinëx —an Nucën Papa Dios quicë bana uni ñuixuan unicama achúshi sapi ca bama ꞌaíshbi baísquiaxa —quiax quiacëxa. 9Usai quicëbë sináncasmai ca Herodes quiacëxa:

—ꞌËnbi cana Juan tëbíscamian. ¿Usa ꞌaínbi cara a uni camabi unin chaniocë ax ui ꞌic?

Quinquinbi ꞌunánquinma ca Jesús istisa tancëxa.

Jesusan cinco mil uni pán pimia

(Mt 14.13-21; Mr 6.30-44; Jn 6.1-14)

10Usa ꞌain ca aín ꞌunánmicë unicaman, an xucëx cuanx anu utëcënxun atun ꞌacë ñucama Jesús ñuixuancëxa. Ñuixuncëxun cuatancëxun ca Jesusan Bëtsaida ëma ꞌurama anu aín ꞌunánmicë unicama buáncëxa. 11Usa ꞌain ca —anu ca Jesús ꞌicë —quixuan chanioia cuabiani, a nuibiani cuanx ꞌaisamaira uni anua Jesús ꞌicë anu cuancëxa. Usaía ꞌitsa uni riquiania ca Jesusan acama nuibaquin, Nucën Papa Diosan ca axa ꞌëmi catamëcë unicama ainan ꞌimiti ꞌicë quixun ñuixuancëxa. Ñuixuanan ca ꞌinsíncë unicama pëxcüacëxa.

12Usaquin ꞌacëbëa bari cuabúcëbëtan ca aín ꞌunánmicë unicama mëcën rabë́ ꞌimainun rabë́, an anu cuanxun Jesús cacëxa:

—Ënë mex ca anu uni ꞌicëma me ꞌicën. Ënu ꞌiaxma unicama cuantánun camina cati ꞌain. Cuanxuan ꞌuri ꞌicë ëmacama ꞌimainun a mecamanua atúxa anu ꞌuxti barianan atun piti bitánun camina xuti ꞌain.

13-14Quia ca Jesusan cacëxa:

—Mitsun ca piti ꞌinan.

Cacëxun ca anua ꞌaisamaira, cinco mil uni ꞌain, aín ꞌunánmicë unicaman cacëxa:

—Nun piti ñura ca mëcën achúshi pán ꞌimainun tsatsa rabë́ishi ꞌicën. Sapi cananuna unicama piti maruxuni cuanti ꞌain.

Quia ca Jesusan cacëxa:

—Unicama basinu cincuenta cincuenta bucubunun ca cat.

15Cacëxun ca unicama tsóbunun cacëxa. 16Cacë́xa unicama bucubuan ca Jesusan mëcën achúshi páncëñun tsatsa rabë́ bixun manámi bësuquin isquin Nucën Papa Dios —asábi ca —catancëxun páncëñun tsatsa tucapaxun aín ꞌunánmicë unicama ꞌináncëxa, axa bucubucë unicama ꞌinánun quixun. 17Jesusan ꞌináncëxuan aín ꞌunánmicë unicaman mëtícacëxun ca unicama camaxunbi pucháquin piacëxa. Pucháquin piia sënë́an ca usai ꞌiisa ꞌaímabia tëxëcë páncëñun tsatsa aín ꞌunánmicë unicaman mëcën rabë́ ꞌimainun rabë́ caquí buácaquin biacëxa.

Pedronëan —mix camina Cristo ꞌai —quixun Jesús ca

(Mt 16.13-28; Mr 8.27-29)

18Nëtë itsían Jesús aín Papa Diosbë banamainun ca aín ꞌunánmicë unicamaxëshi abë ꞌiacëxa. Anu ꞌicë ca Jesusan aín ꞌunánmicë unicama ñucáquin cacëxa:

—¿Ui caraisana ꞌëx ꞌai quiax cara unicama quin?

19Cacëxun ca cacëxa:

—Raírinëx ca quia, mix ismina Juan, an uni nashimicë, a ꞌain. Raírinëx ca quia, mix ismina Elías a ꞌain. Raírinëxribi ca quia, mix ismina an Nucën Papa Dios quicë bana unicama ñuixuncë unicamaxa bama a achúshinëxa baísquicë a ꞌain.

20Cacëxun ca Jesusan aín ꞌunánmicë unicama cacëxa:

—¿Atúxa usai quimainun caramina mitsux ꞌëx caraisna ui ꞌai quin?

Quia ca Pedronën cacëxa:

—Mix camina Cristo, Nucën Papa Diosan ënu unun xuti, axa uti nun caíncë, a ꞌain.

ꞌËx cana unin ꞌacëx bamati ꞌai quiáxa Jesús quia

(Mt 16.20-28; Mr 8.30–9.1)

21Ësaquian Pedronën cacëxun ca Jesusan uibi Pedro quicë bana ñuixunxunma ꞌanun quixun aín ꞌunánmicë unicama cacëxa. 22Canan ca cacëxa:

—Uni ꞌinux Nucën Papa Diosnuax uá, ꞌëx cana ꞌatimocë ꞌiti ꞌain. ꞌImainun ca caniacëcëcamabë judíos sacerdotenën cushicama ꞌimainun an Moisésnën cuënëo bana ꞌunáncë unicamax, ꞌën bana cuaisama tani, ꞌëmi nishti ꞌicën. ꞌËmi nishquin ca ꞌë uni itsi ꞌamiti ꞌicën. Usaquian ꞌë ꞌacëx bamatancëx cana rabë́ nëtë ꞌiónxa pëcaracëbë baísquiti ꞌain.

23Usa ꞌain ca anu ꞌicë unicama Jesusan ësaquin cacëxa:

—Uix cara ꞌën uni ꞌiisa tania an ca a ꞌai bamanuxunbi ꞌëmi catamëti quicë bana ënquinma ꞌati ꞌicën. 24Uin cara aín cuëëncësa oquin ꞌai, ënë nëtënu upitax tsótishi sinania, ax ca Nucën Papa Diosnan ꞌitima ꞌicën. Usa ꞌaínbi ca uinu ꞌicë unin cara ënë nëtënushi upitax tsóti sinánquinma uisai cara ꞌiquinbi ꞌëmi catamëquin ꞌëx quicësabi oquin ꞌaia, ax Nucën Papa Diosnan ꞌaish aín nëtënu abë ꞌiti ꞌicën. 25Unix ca ënë nëtënuax ꞌitsaira ñuñu ꞌiti ꞌicën, ꞌaíshbi ca Nucën Papa Diosmi sináncëma ꞌaish aín nëtënu abë ꞌitima ꞌicën. Usa ꞌain ca axa bamacëbë aín ñucama ax ñancábia bicë ꞌicën. 26Ui unix cara ꞌënan ꞌitimi rabianan ꞌën bana quicësai ꞌitimi rabinia, a uníxa ꞌënan ꞌitimi cana uni ꞌinux anuax uá ꞌaish cuantancëx ꞌëxribi rabínti ꞌain, ꞌën Papa Diosbë ꞌApu ꞌitancëx aín ángelcamabë utëcëni. 27Usa ꞌaínbi cana asérabi mitsu cain, axa ënu ꞌëbë ꞌicë uni raírinën ca bamacëma pain ꞌixun ꞌëmi catamëtia ainan ꞌimicëxun, Nucën Papa Dios ca asérabi atun cushi ꞌicë quixun isti ꞌicën.

Jesús bëtsia

(Mt 17.1-13; Mr 9.2-8)

28Usaquin aín ꞌunánmicë unicama catancëx ca mëcën achúshi ꞌimainun rabë́ ꞌimainun achúshi nëtësa ꞌicëbë aín ꞌunánmicë uni raíri ëbiani Pedrocëñun Juan, Jacobo, acamaíshi buani Jesús matánu Nucën Papa Diosbë banai cuancëxa. 29Anu cuantancëx bëbatancëx aín Papa Diosbë banai ca aín bëmánan bëtsiacëxa. Bëtsicëbë ca aín chuparibi uxuira ꞌaish ichu ichuquicë ꞌiacëxa. Usaía ꞌia ca Pedro, Juan, Jacobo, acaman isacëxa. 30Usa ꞌicë isanan ca rabë́ uni, Moisés ꞌimainun Elías, Jesúsbë banaia isacëxa. 31Atun iscëx ca a uni rabëtax Nucën Papa Diosan cushían ichúquin pëcacë nëbë́tsi ꞌiacëxa. Usa ꞌaish abë banaquin ca Jesús, unían bicëxa Jerusalénuax bamati, acama ñuiquin cacëxa. 32Usa ꞌain ca ꞌuxcënan tënáncëxbi ꞌuxquinma Pedro ꞌimainun abë ꞌicë uni rabëtan Jesús bëtsicë isanan abë ꞌicë uni rabë́ aribi isacëxa. 33Moisésbëtan Elíasnën a ëbiania isquin ca Pedronën Jesús cacëxa:

—Nuxnu ënu ꞌicë ca asábiira ꞌicën. ¿Uisa cara rabë́ ꞌimainun achúshi xubura mitsu ꞌaxúnti ꞌiti ꞌic? Minan achúshi ꞌimainun Moisésnan achúshi ꞌimainun Elíasnanribi achúshi cananuna ꞌati ꞌain.

Upí oquin sinanima ca Pedro usai quiacëxa. 34Usaía quicëbëtainshi ca cuinan acama mapuacëxa. Usocëx ca Pedro, Juan, Jacobo, acamax racuë́acëxa. 35Racuë́quin ca cuín mëucüaxa ësai banaia cuacëxa:

—Ënëx ca ꞌën nuibacë bacë bëchicë ꞌicën. Aín bana ca cuacan.

36Ësai banaia cuatancëxuan iscëx ca Jesúsëshi anu ꞌiacëxa. Usaía ꞌia isanan cuaxunbi ca Pedro ꞌimainun Juan, Jacobo, acaman ui unibi ñuixuanma ꞌicën.

Ñunshin ꞌatimanën bërërumicë tuá Jesusan pëxcüa

(Mt 17.14-21; Mr 9.14-29)

37Usaía ꞌion pëcaracëbëa Jesús matánuax ubúcëbë ca ꞌaisamaira uni a bëñai cuancëxa. 38A unicama achúshinën ca cuëníshquin Jesús cacëxa:

—ꞌËn bëchicë ca is. Bëchicë itsiñuma cana ꞌain. ꞌAisa tanquin camina ꞌë pëxcuxunti ꞌain. 39Ñunshin ꞌatimanën ꞌimicëx ca ꞌitsai cuëncëni aín cuñun bacux bëanan aín namiribi nimëti bërëruia. Usaquin ꞌai ca ꞌën bëchicënuax chiquítisama tania. 40Usa ꞌain cana min ꞌunánmicë unicama ꞌëa chiquínxunun can, cacëxunbi ca ꞌacasmaxa.

41Quia cuaquin ca Jesusan anu ꞌicë unicama cacëxa:

—Mitsun camina Nucën Papa Dios ax ca asérabi cushi ꞌicë quixun sinaniman. Camina ami catamëisama tanin. ¿Mitsúxmi ami catamënun carana uiti nëtën mitsu ꞌunánmiti ꞌain? ¿Uitishi oi nëtën carana ꞌëx mitsu cupí masá nuituti ꞌain?

Usaquin caquin ca a uni —ꞌënu ca min bëchicë bët —quixun cacëxa. 42Cacëxuan bëcë́xa aia ca ñunshin ꞌatimanën menu nipacëmiquin aín nami nimëtia bërërunun ꞌimitëcëancëxa. Usaquian ꞌimia chiquínun caquin ñunshin ꞌatima chiquínxun ca Jesusan a tuá pëxcüacëxa. Pëxcuquin ca aín papa —ca asábi ꞌicën, ca ꞌiquin —quixun cacëxa. 43Usaquin ꞌaia isi ca anu ꞌicë unicama —Nucën Papa Diosan cushínshi ca Jesusan usaquin ꞌaxa —quixun sinánan —aín cushix ca bëtsi cushisamaira ꞌicë —quixun sinani ratúacëxa.

ꞌËx cana unin ꞌacëx bamati ꞌai quiáxa Jesús quitëcëan

(Mt 17.22-23; Mr 9.30-32)

An ca bëtsi unían ꞌacëma ñu ꞌaia quixuan unicaman ñuimainun ca Jesusan aín ꞌunánmicë unicama ësaquin cacëxa: 44—Camina upí oquin cuati ꞌain. Cuaquin camina mitsun uisa ꞌixunbi manutima ꞌain, uni ꞌinux Nucën Papa Diosnuax uá ꞌë ca unin an raíri uni ꞌaminun uni ꞌinánti ꞌicën.

45Usaía quiabi ca atun cuama ꞌicën. Atúan cuaxunma ꞌanun ca Nucën Papa Diosan atu cuamiama pain ꞌicën. Usa ꞌain ca upí oquian ñuixunun Jesús catimi aín ꞌunánmicë unicama racuë́acëxa.

Uix cara bëtsi unicamabëtan sënë́nmaira ꞌicë quicë bana

(Mt 18.1-5; Mr 9.33-37)

46Jesusan ꞌunánmicë unicamax ca —uinu ꞌicë nucama achúshinëxira cara nubë sënë́nma ꞌicë —quiax atúxbi ñucacanáncëxa. 47Ñucacanania atun sinan ꞌunánquin ca Jesusan tuá achúshi bixun a rapasu nitsíancëxa. 48Nitsínxun ca aín ꞌunánmicë unicama cacëxa:

—Uicaman cara ꞌëmi sinánquin ënë tuásaribi ꞌicëa, ñuumara ca, quixun unin sináncë uni a ꞌaquinsa ꞌicë nuibaquin ꞌaquinia, an ca ꞌëribi ꞌaquinia. Usaquin ꞌaquin ca ꞌëishima, ꞌën Papa Dios, an ënu unun ꞌë xua, aribi ꞌaquinia. An cha ꞌiti sinánquinma uni itsi ꞌaquincë uni a ca Nucën Papa Diosan bëtsi unibëtan sënë́nmaira isia.

An nu ñuicëma uni, ax ca nubë upí ꞌicë quicë bana

(Mr 9.38-40)

49Ësaquin Jesusan cacëxun ca aín ꞌunánmicë uni, Juan, an cacëxa:

—Nun cananuna uni achúshinëan, Jesús ca ënë uninuaxmi chiquíti cuëënia quixun caquinshi ñunshin ꞌatima uninua chiquinia isan. Isquin cananuna nubë nicëma ꞌicë, usoquin ꞌaxunma ꞌanun can.

50Cacëxun ca Jesusan cacëxa:

—Usoquin ꞌaxunma ꞌanun camina catima ꞌain. Axa nu ñui quicëma uni ax ca nubë upí ꞌicën.

III. JERUSALENUA JESUS CUAN (9.51-19.28)

Jesusan Jacobo ꞌimainun Juan ñucá

51Anúan aín Papa Diosnu cuantëcënti nëtë ꞌurama ꞌain ca Jesusan Jerusalénu cuantëcënti sináncëxa. 52Cuanuxun ca uni raíri anpan rëcuë́nquiani cuanun xuacëxa. Xucëx cuanx Samaria menu ꞌicë ëma achúshinu bëbaxun ca uinu cara Jesús aín ꞌunánmicë unicamabë ꞌuxti ꞌicë quixun bariacëxa. 53Bariabi ca anu ꞌicë unicaman —ax ca Jerusalénu cuania —quixun ꞌunánquin aín ëmanu ꞌimiti cuëëanma ꞌicën. 54Usaía ꞌia oi nishquin ca Jacobobëtan Juanën Jesús cacëxa:

—¿Naínuax uxúan tsin atu cëñunun nu cati caramina cuëënin?

55Cacëx cuainacëquin isquin ca Jesusan ñu caquin cacëxa:

—Usaquin cananuna ꞌatima ꞌain. Mitsux ꞌënan ꞌixunbi camina uisaira cara ꞌën uni ꞌiti ꞌicë quixun ꞌunaniman. 56Nucën Papa Diosnuax uá, ꞌëx cana uni ꞌatimonux uáma ꞌain. Atux upiti bucunun ꞌië́minux cana uacën.

Catancëx cuanx ca bëtsi ëmanu cuancëxa.

Abë cuainsa tancë uni raíri ñui Jesús quia

(Mt 8.18-22)

57Bain cuania ca achúshi unin Jesús cacëxa:

—Uinu caramina mix cuani anuribi cana ꞌëx mibë cuanti ꞌain.

58Cacëxun ca Jesusan cacëxa:

—Ñu pëchiñunëx ca anua batsi oti nañu ꞌicën. Capa ꞌinúxbi ca aín anu ꞌuxti quiniñu ꞌicën. Usa ꞌaínbi cana uni ꞌinux Nucën Papa Diosnuax uá, ꞌëx anu ꞌuxtiñumabi ꞌain. Usa ꞌain sapi camina ꞌëbë cuantima ꞌain.

59Catancëxun ca Jesusan uni itsi —ꞌëmi sinani ca ꞌëbë cuani ut —cacëxa. Cacëxun ca cacëxa:

—Mibë cuanti ꞌaínbi cana ꞌën papanu pain cuainsa tanin. A bamaia maíntancëx cana mibë cuanti ꞌain.

60Quia ca Jesusan cacëxa:

—Axa Nucën Papa Diosmi sinántisama tancë uni, an bamacë uni maínun ëanan camina min, ꞌëmi catamëtia ca Nucën Papa Diosan uni ainan ꞌimia quixun unicama ñuixuni cuanti ꞌain.

61Cacëbëtan ca uni itsínribi cacëxa:

—ꞌËx cana mibë cuanti ꞌain, ꞌaínbi cana axa ꞌën xubunu ꞌicëcama pain bërúanxa ꞌinun cai cuanti ꞌain.

62Quia ca Jesusan cacëxa:

—Ënëx ca ësa ꞌicën. An vaca bënën buáncëxuan me tucabianmainun manë paránën xo tuíncë uni an ca amami amamia isquin ꞌatimaquin aín ñuina ꞌamia. Usaribiti ca uni Nucën Papa Dios cuëëncësabi oquin ñu ꞌati manuquin bëtsi bëtsi oquin sináncë ax aín uni ꞌiisama ꞌicën.

Currently Selected:

Lucas 9: cbrPB

Highlight

Copy