Lucas 10

Setenta unicama Jesusan bana ñuixunun quixun xua

1Usaía ꞌicëbëtan ca Jesusan bëtsi bëtsi me ꞌimainun bëtsi bëtsi ëmanu bana ñuixuni cuanti sináncëxa. Usaquin sinánquin ca aín ꞌunánmicë uni mëcën rabë́ ꞌimainun rabë́ acama xuquinma, uni raíri setenta caístancëxun rabë́ rabë́, uinu cuanti cara an sinánxa anu atux pain cuanun xuacëxa. 2Xuquin ca cacëxa:

—ꞌAisamaira uníxa ꞌëmi sinánti ꞌaínbi ca an atu ꞌëmi sinánun ꞌaquinti uni ꞌitsamashi ꞌicën. Usa ꞌaish ca naënua ꞌaisamaira ñu bimi ꞌaínbia an biti uni ꞌitsamashi, usaribi ꞌicën. Usa ꞌain camina Nucën Papa Dios axa ëmi sináncë unicaman ꞌibu, a ñucáti ꞌain, an uni ꞌëmi sinánun ꞌaquinti unia ꞌitsa xunun, bimi ꞌibu unían an bimi biti uni xucësaribi oquin. 3Camina cuanti ꞌain. ꞌËn cana carnero ꞌinúan nëëcë nëbë́tsinu ꞌicësaribi ꞌinun mitsu xutin. Nëëquin ca ꞌinúanën carnero binuxun bëaratia. Usaribi oquin ca axa mitsumi nishcë unin mitsu ꞌatimocatsi quixun sinánti ꞌicën. Usaquian sináncëbëbi camina axa mitsumi nishcë uni ami nishi abë ꞌatimonantima ꞌain. 4Burasacëñun camina curíqui buántima ꞌain, taxaca itsi camina buántima ꞌain. Bain cuani camina niracëax ꞌuran unibë banatima ꞌain. 5Anumi ꞌiti xubunu atsínquin camina anu ꞌicë unicamaxa chuámashi ꞌinun Nucën Papa Dios ñucáxunti ꞌain. 6A xubunu ꞌicë unin mitsubë upí ꞌixun mitsun bana cuati ca mitsúxmi anu ꞌain cuëëni chuámashi ꞌiti ꞌicën. ꞌAínbi ca mitsubë upí ꞌiisama tanquian an mitsun bana cuaisama tancë unicamax usai ꞌitima ꞌicën. 7Camina xubu itsi xubu itsinu ꞌibë́quintima ꞌain, anu paínmi atsíncë xubu anuishi camina ñantan ñantan ꞌuxti ꞌain. Anuxun camina piti ñu ꞌimainun xëati ñu a anu ꞌicë xanúan mitsu ꞌináncëxun piti ꞌain. An ñu mëëxuncë uni a ca an ñu mëëmicë unin cupíoia. Usa ꞌain camina atúan mitsu ꞌináncë ñu a piishiti ꞌain. 8Cuanx ëmanu bëbaia upí oquin mitsu biquian mitsun bana cuaisa tancëbëtan camina anu ꞌixun uisa piti ñu cara mitsu ꞌinania a piti ꞌain. 9Camina anua ꞌicë ꞌinsíncë unicama pëxcuquin, ꞌëmi catamëtia Nucën Papa Diosan anun a ainan ꞌimiti nëtë ca ꞌurama ꞌicë quixun cati ꞌain. 10Cuanx ëmanu bëbaia anu ꞌicë unicaman mitsu upí oquin biquinma mitsun bana cuaisama tancëbëtan camina anu ꞌitsa uni ꞌicë bai, anuxun ësaquin cati ꞌain: 11Nunu mitsu cacë bana cuatíma ca Nucën Papa Diosan iscëx ꞌaisama ꞌicë quixun mitsun ꞌunánun cananuna nun taxacanua ꞌicë mitsun ëmanu ꞌicë me cupúcë tërë́nbianin. Nux cuancë ꞌaínbi camina ꞌunánti ꞌain, axa Jesúsmi catamëcëcama Nucën Papa Diosan anun ainan ꞌimiti nëtë ca ꞌurama ꞌicë quixun. 12ꞌËn cana mitsu cain, Sodoma ëmanu ꞌicë unicama ca aín bana cuaisama tancë cupí Nucën Papa Diosan castícancëxa. Usamaira oquin castícancë ca a ëmanu ꞌicë unicama an mitsu bicëma cupí ꞌiti ꞌicën.

Bëtsi bëtsi ëmanu ꞌicë unicaman Jesusan bana cuaisama tan

(Mt 11.20-24)

13Ësaquinribi ca Jesusan cacëxa:

—Corazín ëmanuax ucë unicama ꞌimainun Betsaidanuax ucë unicama, mitsu cana asérabi cain, mitsun ëmanuxun ꞌën cushínbi ꞌën ñu ꞌacësaribi oquin Tiro ꞌimainun Sidón anuxun ꞌën ꞌá ꞌain ca anu ꞌicë unicama aín ꞌuchacama ëni ꞌëmi sinan ꞌitsíanxa. Aín ꞌucha cupí masá nuituti sinanati ca chupa chëquicë pañuanan chimaputan mashiquia ꞌitsíanxa. 14Usa ꞌain ca anúan an camabi uni aín ñu ꞌacë isti nëtën, Tiro ꞌimainun Sidónu ꞌicë unicama ꞌacësamaira oquin Nucën Papa Diosan mitsu ꞌuchoquin castícanti ꞌicën. 15Capernaúmnuax ucë unicama, ¿mitsun caramina sinanin, camina Nucën Papa Diosan nëtënu ꞌiti ꞌai quixun? Camina anuma, anua uni ꞌaisamacama bamatancëx cuancë, anu ꞌiti ꞌain.

16Caxun ca a xuti unicama ësaquinribi cacëxa:

—An mitsun bana cuacë uni, an ca ꞌën banaribi cuatia. ꞌImainun ca an mitsun bana cuaisama tancë uni, an ꞌën banaribi cuaisama tania. An ꞌën bana cuaisama tancë uni, an ca Nucën Papa Dios, an ënë menu ꞌë xua, aín banaribi cuaisama tania.

Setenta unicama axa Jesúsnu utëcëan

17Bana ñuixunuan xucëxun ca a setenta unicaman ñuixunbëtsini utancëxun Jesús usoquian ñu ꞌacëcama ñuixunquin ësaquin Jesús cacëxa:

—Minmi nu xucë ca ñunshin ꞌatimanënbi nun bana cuaxa, nun nu —ca chiquít —cacëx ca uninuax chiquíaxa.

18Cacëxun ca Jesusan cacëxa:

—Usa ca. Caná naínuax menu bënëtishi ꞌibúcësaria ñunshin ꞌatimanën ꞌapu Satanás naínuax nipacëtia cana isacën. 19Camina ꞌunánti ꞌain, ꞌën cushi cana mitsu ꞌinan. ꞌËn mitsu ꞌináncë ꞌain camina runu ꞌimainun nibanta amatibi asábi ꞌiti ꞌain, uisoquin cara mitsu ꞌaisa tania, tanquinbi ca ñunshin ꞌatimanën mitsu ꞌatima ꞌicën, uisa ñunbi ca mitsu uisabi oima. 20Ñunshin ꞌatimanën mitsun bana cuacë cupí cuëëncësamaira oi camina mitsun anëcama ca Nucën Papa Diosan nëtënu ꞌicë quiricanu ꞌacë ꞌicë quixun ꞌunani cuëëinra cuëënti ꞌain.

Jesús cuëë́an

(Mt 11.25-27; 13.16-17)

21Usaquin catancëxun ca Jesusan, aín Bëru Ñunshin Upitan sinánmicëx upiti cuëënquin, aín Papa Dios cacëxa:

—Ën Papa Dios, mixmi naí ꞌimainun menu ꞌicë ñucaman ꞌIbu ꞌicë cana mi rabin. Ami uni ꞌunánmiti ñu a camina an ñu ꞌunáncë unicama ꞌunánmiquinma an ñu ꞌunáinracëma unicama ꞌunánmian. Usaquinmi ꞌacë cupí cana mi rabin. Usaquin ꞌati camina mix cuëëan.

22Usaquin aín Papa Dios catancëxun ca Jesusan anu ꞌicë unicama amiribishi cacëxa:

—ꞌËn Papa Diosan ca camabi aín sinan ꞌë ꞌunánmiaxa. Uinu ꞌicë unínbi ca uisa uni ꞌianan añu ꞌai carana ꞌëx uacën quixun ꞌunanima. ꞌËn Papa Diosan cuni ca ꞌunania. Usaribi oquin ca uinu ꞌicë unínbi, uisa cara Nucën Papa Dios ꞌicë quixun ꞌunanima. Aín Bëchicë, ꞌën cuni cana ꞌunanin, ꞌimainun ca a ꞌën uisaira cara ax ꞌicë quixun ꞌunánmisa tancë unicama anribi ꞌunania.

23-24Catancëxun ca Jesusan uni raírinëan cuatima ꞌimainun atúinshi cuanun quixun aín ꞌunánmicë unicama ësaquin cacëxa:

—ꞌËn cana mitsu cain, ꞌëx ucëma pan ꞌain ca bëráma an Nucën Papa Dios quicë bana uni ñuixuncë unicama ꞌimainun ꞌapu unicamanribi, Cristo ca uti ꞌicë quixun ꞌë ñuiquin cuënëo bana ꞌunánquin, uisai cara ꞌiti ꞌicë quixun istisa tanquinbi isáma ꞌicën. Uisa bana carana ñuixunti ꞌai quixun cuaisa tanquinbi ca cuama ꞌicën. Usa ꞌaínbi ca an, mitsun ꞌacësaribi oquin, ꞌën ñu ꞌaia isanan ꞌën uni bana ñuixunia cuacë unicamax cuëëinra cuëënia.

Samarianu ꞌicë uni Jesusan ñuia

(Mt 22.34-40; Mr 12.28-34)

25An Moisésnën cuënëo bana ꞌunáncë uni achúshinën ca uisoquin caraisa caia quixun ꞌunáncatsi quixun sinánquin Jesús ësaquin ñucácëxa:

—¿Añu carana ꞌëx ainan ꞌaish xënibua ꞌaínbi Nucën Papa Diosbë ꞌinuxun ꞌati ꞌain?

26Cacëxun ca Jesusan cacëxa:

—¿Moisésnën cuënëo banax cara uisai quin? ¿Min iscëx cara uisai quin?

27Cacëxun ca a unin Jesús cacëxa:

—Ca quia, “Min ꞌIbu Diosmi camina asérabi cuëëni cëmëima sinánti ꞌain. Usa ꞌaish camina ami catamëti ax cuëëncësabi oíshi ꞌiti ꞌain. ꞌIanan camina mixmi bërúancacësaribi oquin min aintsicama nuibanan axa ꞌaquinsa ꞌicë ꞌaquinti ꞌain”.

28Cacëxun ca Jesusan cacëxa:

—Upí oquin camina ꞌë can. Usoquin ꞌai camina ainan ꞌaish xënibua ꞌaínbi Nucën Papa Diosbë ꞌiti ꞌain.

29Usoquin cacëxun ca an Moisésnën cuënëo bana ꞌunáncë unin amiribishi ñucátëcëncatsi quixun Jesús catëcëancëxa:

—¿ꞌËn aintsicama ꞌacësaribiquin carana ui unicamaribi nuibaquin ꞌaquinti ꞌain?

30Cacëxun ca Jesusan ësaquin cacëxa:

—Ënëx ca ësa ꞌicën. Achúshi unix ca bain Jerusalénuax, Jericó ëmanu cuanxa. Cuaniabi ca an ñu mëcamacë unicaman bixun aín ñucama bianan aín chupacamaribi bianan bamatisoquin mëëxun racánbianxa. 31Usobiania an mëcamacë unicamax cuan ca judíos sacerdote achúshi, ax a bain uquin uni racácë mëraquin isaxa. Isquinbi ca ratáinshibianxa. 32Ratánbiania a sacerdote cuan ca bëtsi sacerdoteribi, Levitan rëbúnqui, ax uaxa. Uquin ca bai amo racácë uni isaxa. Isquinbi ca anribi a uni ratáinshibianxa. 33Usoquian a rabëtan ratánbiancëbëbi ca Samaria menu ꞌicë uni achúshi a baínribi uaxa. Uquin bai amo racácë isquin ca an cuni a uni nuibaxa. 34Nuibaquin ca anu cuanxun ronquin xëni ro ꞌimainun vino anun ꞌaxa. ꞌAtancëxun ca anua tëacëcamaribi chupa sanin tëcërëcaxa. Usotancëxun anúan nicë aín ñuinanu ꞌarubianquin buánxun ca achúshi unin xubunu racánxa. Usoxun ca anuxun ronan pimiquin bërúanxa. 35Usoquian ꞌoon pëcaracëbë cuanquin ca a unin, curíqui ꞌinánquin xubu ꞌibu caxa: Ënë uni camina ꞌë bërúanxunti ꞌain. Bërúanquinmi ënë curíqui cëñuquin minanënribi ꞌaquinia cana utëcënquin mi cupíotëcënti ꞌain.

36Usoquin Samaritano ñuiquin catancëxun ca Jesusan an Moisésnën cuënëo bana ꞌunáncë uni cacëxa:

—An ñu mëcamacë unicaman mëëtancëxun bai rapasu ëbiancë uni a ca rabë́ ꞌimainun achúshi unin mëraxa. ¿Mëraquin cara min sináncëxun a unicama uinu ꞌicëinra racácë uni a nuibaquin aín aintsi ꞌaquincësaribi oquin ꞌaquianx?

37Usaquin cacëxun ca cacëxa:

—An aín aintsi ꞌaquincësaribi oquian axa racácë uni ꞌaquicë ax ca axira tsiancuatsini ucë uni a ꞌiaxa.

Usaquin cacëxun ca Jesusan cacëxa:

—Usa ca. Usaribi oquin camina minmi min aintsi nuibaquin ꞌaquincësaribi oquin uni itsiribi nuibaquin ꞌaquinsa ꞌicë ꞌaquinti ꞌain.

Marta ꞌimainun María ñui quicë bana

38Bain cuanía achúshi ëmanu bëbaia ca anu ꞌicë Marta cacë xanun aín xubunu Jesús atsínmiacëxa. 39ꞌAtsíntancëxuan bana ñuixunia ca Martanën xucën, María, axribi anu ꞌixun, a tanáin tsóxun Jesusan bana upí oquin cuacëxa. 40Maríanëan bana cuamainun ca Martanën Jesusan bana cuaquinma piti ꞌaruanan bëtsi bëtsi ñu ꞌacëxa. ꞌAquin ca anu cuanquin Jesús cacëxa:

—Caramina isiman, ꞌën xucënan ca ꞌë ꞌaquinima, ꞌëinshi cana ñu ꞌain. ꞌËa ñu ꞌaquini unun ca cat.

41Cacëxun ca Jesusan cacëxa:

—Marta, Marta, mix camina ꞌitsa ñu ꞌati sinani bënëtin. 42Usa ñucama ꞌati asábi ꞌaínbi ca ꞌën bana cuati, ax bëtsi ñu ꞌati sináncësamaira oquin sinánti asábiira ꞌicën. Maríanën ca usaquin ꞌati sinánxa. Usa ꞌain cana ꞌën a ꞌaxunma ꞌanun catima ꞌain.

Currently Selected:

Lucas 10: cbrPB

Highlight

Copy