Lucas 13

Sinanatía Nucën Papa Diosmi sinánuan Jesusan ca

1Unicama bana ñuixunia ca anu ꞌicë uni raírinën Jesús ësaquin cacëxa:

—Galilea menuaxa ucë uni raírinëan sacerdote ꞌinánti aín ꞌaracacë ñuina bëquin anuxun Nucën Papa Dios rabiti xubu rapasunuxun rëtia ca Pilatonën an ñuina bëcë unicama ꞌamiaxa.

2Cacëxun ca Jesusan cacëxa:

—¿A unicamaxa usai baman caramina sinanin, atux ca Galileanu ꞌicë uni raíri ꞌicësamaira oi ꞌuchaxa quixun? 3ꞌËn cana mitsu cain, ca usama ꞌicën. Mitsúxribi mitsun ꞌucha ëni ꞌëmi sinanacëma ꞌaish camina a judíos unicamax ꞌicësaribiti bamai cëñúcë ꞌiti ꞌain. 4¿Siloénu ꞌicë torre manáinra ꞌaish chaxcë́ira, ax atunu rurucubucëbëa bamacë dieciocho uni ax isa Jerusalénu ꞌicë uni raíri ꞌicësamaira oi ꞌuchaxa quixun caramina sinanin? 5ꞌËn cana mitsu cain, ca usama ꞌicën. Mitsúxribi mitsun ꞌucha ëni ꞌëmi sinanacëma ꞌaish camina atúxa ꞌicësaribiti bamai cëñúcë ꞌiti ꞌain.

Bimiñuma higuera ñuicë bana

6Catancëxun ca Jesusan bana itsi ñuicësoquin ësaquin cacëxa:

—Ënëx ca ësa ꞌicën. Aín naënu ꞌapácë i, cara tuaxa quixun isi cuanxunbi ca naë ꞌibun tuáñumoxa. 7Tuáñumoxun ca aín ꞌibun an naë bërúancë uni caxa:

—Rabë́ ꞌimainun achúshi baritian cana, ënë in cara tuaxa quixun isquinbi tuáñumoin. Tuaímabi ca ñancábi anu nitsaxa. Usa ꞌain camina rëti ꞌain. 8Cacëxun ca an naë bërúancë unin caxa: Cara tuaia quixun isti camina ënë barínshi ënti ꞌain. Usa ꞌain cana a tanáin mëníoquin ñuinacan pui tabucunti ꞌain. 9Usaquin ꞌacëxun sapi ca bari itsin tuati ꞌicën. ꞌAcëxunbia tuaíama camina ꞌë rëmiti ꞌain.

Anun ñu mëëtima nëtë́an Jesusan catúbucë xanu

10Anun ñu mëëtima nëtën ca anu judíos unibu timë́ti xubunuxun Jesusan bana ñuixuancëxa. 11Ñuixunmainun ca achúshi xanu dieciocho baritian ꞌinsíncë anu ꞌiacëxa. A xanux ca ñunshin ꞌatimanën ꞌimicëx catúbua ꞌaish chairucëma ꞌiacëxa. 12Usa ꞌicë isquin cuënxun ca Jesusan cacëxa:

—Min ꞌinsin ca nëtë́axa, camina pëxcúcë ꞌain.

13Caquian ramëcëxëshi ca chairui asábi ꞌiacëxa. Usai ꞌiquin ca Nucën Papa Dios rabiacëxa. 14Usa ꞌaínbi ca Jesusan anu ñu mëëti nëtën xanu pëxcüan, axa anu judíos unicama timë́ti xubunu ꞌicë ꞌapu nishacëxa. Nishquin ca anu ꞌicë unicama cacëxa:

—Anun ñu mëëti nëtëx ca mëcën achúshi ꞌimainun achúshi ꞌicën. Anun ñu mëëtima nëtën camina utima ꞌain, anun ñu mëëti nëtë́inshi camina pëxcucë ꞌinux uti ꞌain.

15Quia ca Nucën ꞌIbu Jesusan cacëxa:

—Mitsux camina cëmë ꞌain. Mitsux, ꞌaracacë ñuina tëcërëcacëñu ꞌixun, camina nëtë camabi ꞌacësaribi oquin anun ñu mëëtima nëtë́nribi min ñuina ꞌunpax ꞌanun xëxánu buanin. 16¿Mitsun ñuinami usoquin ꞌacë ꞌain carana mitsusaribi ꞌaísha Abrahamnën rëbúnqui ꞌicë, ñunshin ꞌatimanën ꞌapun dieciocho baritian ꞌinsínmicë xanu, ënë anun ñu mëëtima nëtë ꞌaínbi pëxcutima ꞌain? Cana ꞌati ꞌain.

17Usaquian cacëx ca axa Jesúsmi nishcë unicamax rabíancëxa. Rabínmainun ca uni raíricamax Jesusan aín cushínbi ñu ꞌacëcama isi cuëëancëxa.

Mostaza bëru ñui quicë bana

(Mt 13.31-32; Mr 4.30-32)

18Jesusan ca ësaquinribi cacëxa:

—¿Nucën Papa Diosan cara ainan ꞌiti unicama uisoquin ainan ꞌimiti ꞌic? ¿Uisa ñuribi ñui caranuna a ñui quiti ꞌain? 19Ënëx ca ësa ꞌicën. Mostaza bëru chamaratsu a ca unin bixun aín naënu ꞌapatia. ꞌApácëx cani iisaribi ꞌinun pëñanacëcëbëtan ca manan nuáncë ñuinacaman anu noia. Usaribiti ca Nucën Papa Diosan unicamax ꞌitsamashi pain ꞌiaxbi ꞌitsaira ꞌitánun uatia.

Anun pán chamiti ñu ñuicë bana

(Mt 13.33)

20Ësaquinribi ca Jesusan cacëxa:

—¿Nucën Papa Diosan cara ainan ꞌiti unicama uisoquin aín uni ꞌimiti ꞌic? 21Uisoquin cara ꞌati ꞌicë quiax cana anun pán chamiti ñu ñui quin. Xanúan xuicëma pain ꞌixun anun pán chamiti ñucëñun mëscucëx ca aín xëquíon mësioti rëncë ax chaia. Usaribiti ca Nucën Papa Diosan unicama ꞌitsamashi pain ꞌiaxbi ꞌitsaira ꞌitánun uatia.

Bai chucúma ñuicë bana

(Mt 7.13-14, 21-23)

22Jerusalénu cuani, ëma chacamanu cuanan, ëma chucúmacamanuribi cuanquin ca anu ꞌicë unicama Jesusan, bana ñuixunquin ꞌunánmiacëxa. 23ꞌUnánmicëxun ca uni achúshinën ñucáquin cacëxa:

—¿Axa Nucën Papa Diosan nëtënu ꞌiti unicamax cara ꞌitsama ꞌiti ꞌic?

Cacëxun ca Jesusan cacëxa: 24—Bai chucúma anun atsínti ca sinan. Cana asérabi mitsu cain, ꞌitsa unix ca anun atsínti sinanibi anun atsíntima ꞌicën. 25Ësa ca: Xubu ꞌibun ca niruquin xubu xëcuë xëputi ꞌicën. Xëpucë camina mitsun ëman nixun xëcuë taxcaquin —nu ca xëócaxun —quixun cati ꞌain. Cacëxunbi ca mitsu cati ꞌicën: Uinuax ucë caramina mitsux ꞌai quixun cana ꞌunaniman. 26Cacëxun camina mitsun cati ꞌain: Nun cananuna mibëtan pianan xëan, min camina nun ëmanuxun nu bana ñuixuan. 27Cacëx ca quiti ꞌicën: Cana mitsu can, uinuax ucë caramina ꞌai quixun cana ꞌunaniman. Ñu ꞌatima ꞌacë ꞌaish camina mitsux ꞌëbë ꞌitima ꞌain. Ca cuantan. 28Usoquin ꞌën cacëx cuanx camina, Abraham, Isaac, Jacob, acama ꞌimainun an Nucën Papa Dios quicë bana uni ñuixuncë unicamaxa anua Nucën Papa Dios ꞌicë anu ꞌëbë ꞌain, mitsux anuma ꞌaish masá nuituirai bënëti inti ꞌain. 29ꞌImainun ca ꞌaisamaira judíosma uni aucüaxa bari urucë amiax uanan anúan bari cuabúcë amiaxribi ꞌimainun camabi nëtënuax unuxun ꞌaia. Ai ca axa ꞌëmi catamëcë ꞌaish Nucën Papa Diosan nëtënu tsotax chuámarua ꞌaish cuëënti ꞌicën. 30A unin —ñuumara ca ax ꞌicë —quixun sináncë unicama a ca Nucën Papa Diosan aín sinan upí ꞌunánquin a unicamaxa cha ꞌicë isti ꞌicën. ꞌImainun ca a unin iscë́xa cha ꞌicë unicama a Nucën Papa Diosan aín nuitu ꞌunánquin ñuumara isti ꞌicën.

Jerusalénu ꞌicë unicama sinani Jesús ian

(Mt 23.37-39)

31A nëtë́nbi anu cuanquin ca fariseo uni raírinën Jesús cacëxa:

—Herodesnën ca mi aín uni ꞌamitisa tania. Usa ꞌain camina bënëtishi ënuax cuanti ꞌain.

32Cacëxun ca Jesusan cacëxa:

—Cuanxun camina uni paráncatsa, Herodes, a cati ꞌain, cana ꞌën ꞌacësabi oquin ñunshin ꞌatima unicamanua chiquíanan ꞌinsíncë unicama pëxcuti ꞌain. Usa ꞌain cana ꞌën ꞌati ñucama sënë́onti ꞌain, bërí, imë́ishi, pëcaratëcëncëbëtanribi nëtë camabi ꞌën ꞌacësabi oquin ꞌaquin. 33Usaía Herodes quicëbëbi cana bërí cuanan imë́ishi cuanan pëcaratëcëncëbëribi cuani Jerusalénu cuanti ꞌain. Jerusalénuax ca an Nucën Papa Dios quicë bana uni ñuixuncë uni ꞌitsaira bamacëxa. Usaribiti cana ꞌëx bëtsi ëmanuax bamaima Jerusalénuax bamai cuanti ꞌain.

34Ësaquinribi ca Jesusan cacëxa:

—Jerusalénu ꞌicë unicama, mitsu cana cain, mitsux camina an Nucën Papa Dios quicë bana uni ñuixuncë unicama ꞌanan a an aín bana ñuixunun xucë unicamaribi maxaxan ꞌá, mitsun raracama axa ꞌiásaribi ꞌain. ¿Uitishi oquin carana mitsu nuibaquin bërúanquin ꞌaquinsa tan? ꞌAtapanëan aín tuácama cuëntancëxun aín pëchin mapuxun bërúancësaribi oquin cana mitsu bërúanquin ꞌaquinsa tan. ꞌAquinsa tancëxbi camina mitsux cuëëncëma ꞌain. 35Usa ꞌain camina ꞌunánti ꞌain, ꞌën cana ꞌaquinquinma usabimi ꞌinun mitsu ënti ꞌain. ꞌËn cana mitsu cain, mitsun camina utëcënia isquin —Nucën ꞌIbu Diosan xucëxa ucë bërí aia, a ca camabi unin rabiti ꞌicë —quiax quiquin ꞌë rabiti ꞌain. A nëtë utámainun camina ꞌë istëcëntima ꞌain.

Currently Selected:

Lucas 13: cbrPB

Highlight

Copy