Lucas 14

Jesusan aín quisi ꞌimainun aín pëñan uácë uni pëxcüa

1Anun ñu mëëtima nëtë́an fariseo unicaman cushi achúshinën xubunuxun pi cuancë ca fariseo unicaman Jesús utúancëxa. 2Anu acamax ꞌimainun ca achúshi uni aín nami chaira ꞌinun uácë anu ꞌiacëxa. 3A isquin ca Jesusan an Moisésnën cuënëo bana ꞌunánquin unicama ꞌësëcë unicama ꞌimainun fariseo unicama ñucáquin cacëxa:

—¿Anun ñu mëëtima nëtën uni pëxcuti cara asábi ꞌic? ¿Cara asábima ꞌic?

4Ñucácëxunbi ca cáma ꞌicën. Cacëxunma ca Jesusan aín nami uácë uni pëxcuquin, camina cuanti ꞌai quixun cacëxa. 5Catancëxun ca anu ꞌicë unicama cacëxa:

—¿Micama uinu ꞌicën caramina anun ñu mëëtima nëtë́an mitsun burro, mitsun vaca bënë, anua ꞌunpax biti naëcë quininu nipacëtia bënë́nquinshi biquinma isëshiti ꞌain? Isëshiquinma camina biti ꞌain, ¿usa cat?

6Ësoquin ñucácëxunbi ca cáma ꞌicën.

An xanu bicë unían pi unun camicë unicama

7Pi unun quixuan unin camicë unicaman uxun, anua aín cushicama tsóti anu tsónuxun caisia isquin ca Jesusan bana itsi ñuicësoquin, ësaquin atu cacëxa: 8—An xanu biti unían pi cuanun camicëx cuanx camina anua min cushi tsóti anu tsótima ꞌain. Anumi tsotanbi sapi ca aribia camicë ꞌaish uni itsi misama cushiira ax uti ꞌicën, anu tsónux. 9Ucëbëtan ca an mi camicë unin minu uquin mi cati ꞌicën: Ënë uníxa ënu tsómainun camina mix ꞌuri unu tsóti ꞌain. Cacëx camina rabini, anua uni cushimacama tsóti, anu tsoti cuanti ꞌain. 10Usaquian mi cati rabanan camina anua uni aín cushimacama tsóti, anu tsóti ꞌain. Anu tsócë ca an mi camicë unin minu uquin isquin mi cati ꞌicën: Camina anua uni cushicama tsóti, anu tsoti cuanti ꞌain. An mi camicë unían usaquin mi caia isquin ca anu ꞌicë unicaman, mix camina cushi unisa ꞌai quixun isti ꞌicën. 11Usaribi oquin ca anbia rabíquin —ꞌëx cana cha ꞌai —quixun sináncë uni a Nucën Papa Diosan aín uni itsicamabëtan sënë́nmara ꞌimiti ꞌicën. ꞌImainun ca cha ꞌiti sinani rabícëma uni, a cuni Nucën Papa Diosan cha ꞌimiti ꞌicën.

12Catancëxun ca an a camicë uni Jesusan cacëxa:

—Unicama pi unun camiquin camina axa mibë nuibanancë unicama ꞌimainun min xucë́antu ꞌimainun min aintsi ꞌibucama ꞌimainun ñuñu uni, acamaishi camitima ꞌain. Usa unicaman bëtsi nëtën miribi pi unun camicë ꞌaíshmi atubë cuëëniabi ca Nucën Papa Diosan mi upí isima. 13Usa ꞌain camina atuishi camiquinma ñuñuma unicama ꞌimainun axa aín quisi, aín pëñan bëtsicë ꞌimainun aín niti bëtsicë ꞌimainun bëxuñu unicama camiti ꞌain. 14Usa unicaman ca min ꞌacësaribi oquin miribi pi cuanun quixun camitima ꞌicën. Camicëma ꞌicëbi ca an iscë́xmi upí ꞌicë, anúan bama unicamax baísquiti nëtë ꞌicëbëtan Nucën Papa Diosan aín nëtënuaxmi cuëënun mi ꞌimiti ꞌicën.

Pi unun quixun camicëxbia unicama cuainsama tan

(Mt 22.2-14)

15Quia cuaquin ca anuxun piia tsócë uni achúshinën Jesús cacëxa:

—An Nucën Papa Diosan nëtënuxun aín unicamabëtan picë uni ax ca cuëëinra cuëënti ꞌicën.

16Cacëxun ca Jesusan cacëxa:

—Ënëx ca ësa ꞌicën. Achúshi unin ca piti aín uni raíri ꞌamiquin, pi unun quixun unicama canun, aín uni itsi xuaxa. 17Usaquin piti mëníocë ꞌain ca xutëcënquin ësaquian camicë unicama catánun quixun caxa: Piticama ca mëníocë ꞌicën. Usa ꞌain ca camáxbi pi ucan. 18Usaquin caxun xucëx cuanxuan cacëxunbi ca cuainsama tanquin a paían cacë uni an ësaquin caxa: Cana mibë cuanti ꞌain, ꞌaínbi cana me maruan, a cana isi cuanin. Usa ꞌaish cana mibë cuantima ꞌain. 19Bëtsi unin ca caxa: Cana mibë cuanti ꞌain, ꞌaínbi cana mëcën rabë́ vaca bënë maruan, a cana uisa cara quixun isi cuanin. Usa ꞌaish cana mibë cuaniman. 20Bëtsi unin ca caxa: Cana mibë cuanti ꞌain, ꞌaínbi cana xanu bitsin. Usa ꞌaish cana mibë cuantima ꞌain. 21Usaía quicëbëtan ca an ñu mëëxuncë uni anu cuantëcënxun an a ñu mëëmicë uni ñuixuanxa, uisai cara an camicëxbi unicama quiaxa quixun. Ñuixuncëxun cuati nishquin ca an ñu mëëxuncë uni xutëcënquin caxa: Camina bënëtishi cuantëcënquin ëmanu ꞌicë bai chacamanu ꞌimainun bai chucúmacamanu cuanquin, anu ꞌicë ñuñuma unicama ꞌimainun axa aín quisi, aín pëñan bëtsicë ꞌimainun aín niti bëtsicë ꞌimainun bëxuñu unicama bëti ꞌain. 22Caquian xucëx cuanx utëcënquin ca an ñu mëëxuncë unin caxa: Minmi ꞌë cacësabi oquin cana unicama bëan, camáxbi ca uaxa, usa ꞌaínbi ca ꞌiti tsitsícëma pain ꞌicën. 23Usaquin cacëxun ca an a ñu mëëmicë unin caxa: Bai chacamanu cuanan a rapasu ꞌicë mecamanu cuanquin camina uisa uni caramina isi, a camabi pi unun quixun cati ꞌain, ꞌitsa unia ꞌën xubunu atsini buáquiti cana cuëënin. 24ꞌËn cana mitsu cain, a pain ꞌën camicëxbia ucëma unicaman ca ꞌëbëtan pitima ꞌicën.

An aín cuëëncësa oishi ꞌiti ëncë uni axa Cristonan ꞌiti

25ꞌAisamaira uníxa abë cuania ca a isi cuainacëquin Jesusan ësoquin cacëxa: 26—Uix cara ꞌën uni ꞌiisa tania an ca aín papa, aín tita, aín xanu, aín bëchicë, aín xucën, aín chirabacë, acama nuibacësamaira oi ꞌëmi sinánti ꞌicën. Usai ꞌianan ca ax upiti tsótishi sinanima ꞌëmi sinani ꞌëx cuëëncësabi oishi ꞌiti ꞌicën. Ui unix cara usai ꞌiisama tania ax ca ꞌën uni ꞌitima ꞌicën. 27An asérabi ꞌëmi catamëquin a ꞌai bamanuxunbi ꞌëmi catamëti bana quicësabi oquin ꞌacëma uni, ax ca ꞌën uni ꞌitima ꞌicën. 28Ënëx ca ësa ꞌicën: Torre ënën ménma chaioruquin ꞌaisa tanquin ca ꞌanuxun pan unin upí oquin sinánquin añu ñucama cara a ꞌati maruti ꞌicë quixun sinánan uiti curíquibëtan sënën cara a ñucaman cupí ꞌicë quixun sinánti ꞌicën. Cara aín curíqui a ñucama maruti sënë́nti ꞌicë quixun ca isti ꞌicën. 29Upí oquin sinánxunma ꞌaquin ca aín cimíntocama ꞌatancëxunbi anun aín cënë ꞌimainun aín mascuan ꞌaticama maruti ꞌaíma ꞌain, aín torre ancëcasmati ꞌicën. Sënë́oianma isi ca an a iscë unicamax a uni ñuixun ꞌusani quiti ꞌicën: 30Torre ꞌaquinbi ca a unin ancëcasmaxun ëanxa.

31Ësaquinribi ca Jesusan cacëxa:

—Ësaribi ca. Aín suntárucamaxa ꞌapu itsin suntárucamabë ꞌacananun xucëma pan ꞌixun ca ꞌapun upí oquin sinánquin, —¿cara ꞌën suntárucaman diez mil ꞌixun, ꞌapu itsin suntárucama veinte mil ꞌicë, abë ꞌacananquin ñusmoti ꞌic? —quixun sinánti ꞌicën. 32Usoquin pain sinánquinbi —ca ꞌatima ꞌicë —quixun sinántancëxun ca aín uni xuquin —cananuna ꞌacanantima ꞌai —quixun, ꞌuracëo ꞌapu itsi a camiti ꞌicën. 33Usaquin ñuiquin cana ësaquin mitsu ꞌunánmin, an ax cuëëncësari ꞌiti ëinsama tanan aín ñucama cuëënquin ëinsama tancë uni ax ca ꞌën uni ꞌitima ꞌicën.

Mucañuma tashi ñuicë bana

(Mt 5.13; Mr 9.50)

34Canan ca ësaquinribi Jesusan cacëxa:

—Ësa ca. Tashix ca asábi ꞌicën. Asábi ꞌaíshbia aín muca nëtëtia ca unin uisaxunbi amiribishi mucotëcëntima ꞌicën. 35Mucotëcëncëma ꞌaish ca a tashix mucañuma ñancáishi ꞌicën. Ñu ꞌapácë tanáin tabucunuxun ñun puicëñun mëscuti ꞌaíshbi ca a tashix mucañuma ꞌaish a puicëñun mëscucëxbi ñancáishi ꞌicën. Usa ꞌicë ca unin putia. An aín pabitan ënë bana cuacë unin ca aín nuitunënbi sinánquin cuati ꞌicën.

Currently Selected:

Lucas 14: cbrPB

Highlight

Copy