Lucas 15

Axa nëtë́cë carnero ñuicë bana

(Mt 18.10-14)

1An ꞌapu buánmiti curíqui bicë unicama ꞌimainun ꞌuchañu uni, acamax ca Jesusan bana ñuia cuati anu cuancëxa. 2Usoquian aín bana camaxunbi cuaisa tania isi ca fariseo unicama ꞌimainun an Moisésnën cuënëo bana ꞌunáncë unicamax nishi canancëxa, ënë unin ca ꞌuchañu unicamabë timë́xun abëtan piia.

3Usaria canania ꞌunánquin ca Jesusan bana itsi ñuicësoquin ësaquin cacëxa:

—Ënëx ca ësa ꞌicën. 4¿Uinu ꞌicë micama achúshinën cara cien carneroñu ꞌaínbia achúshi nëtëtia baritima ꞌic? Raíri noventa y nueve an anu uni ꞌicëma menuxun pasto piia ëbianxun ca axa nëtë́cë a mëranuxun bariti ꞌicën, ¿usa cat? 5Bariquin mëraxun bitsi cuëënquin ca a ꞌiábëtsinti ꞌicën. 6ꞌIábëtsini xubunu bëbaquin ca an nuibacë unicama ꞌimainun axa a rapasu ꞌicë unicama timëtancëxun cati ꞌicën: ꞌËn carnero nëtë́cë cana mëran. Usa ꞌain cananuna cuëënti ꞌain. 7Asérabi cana ꞌën mitsu cain, achúshi uníxa sinanati ami sináncëbë ca Nucën Papa Dios ꞌimainun aín ángelcamaxribi cuëënia. Usa ꞌaish ca noventa y nueve uni an —ꞌëxbi cana asábi ꞌai —quixun sináncë acama isía cuëëncësamaira oi achúshinëxa ꞌaisama ꞌaíshbi sinanati ami catamëtia isi Nucën Papa Dios cuëënia.

Curíqui nëtë́cë Jesusan ñuia bana

8Ësaribi ca. ¿Xanu achúshinën cara mëcën rabë́ curíquiñu ꞌixunbi, achúshi, nëtë́mixun lamparín bimixun, mëranuxun munu upí oquin baritima ꞌic? 9Barixun mëraquin ca axa abë nuibanancë xanucama ꞌimainun axa a rapasu ꞌicë xanucama timëtancëxun cati ꞌicën, —ꞌën curíqui nëtë́cë cana mëran. Usa ꞌain cananuna cuëënti ꞌain. 10ꞌËn cana mitsu cain, usaribiti ca achúshi uníxa ꞌaisama ꞌaíshbi sinanati Nucën Papa Diosmi sináncëbë aín ángelcamax cuëënia.

Aín papan ꞌináncëxuan bëná unin curíqui cëñua bana

11Ësaquinribi ca Jesusan cacëxa:

—Ënëx ca ësaribi ꞌicën. —Achúshi unix ca rabë́ bëchicëñu ꞌiaxa. 12Aín bëchicë ꞌanácanën ca aín papa caxa: Papan, min bamaquin casunancëxa ꞌënan ꞌiti ñucëñun camina ꞌënan ꞌiti curíqui a ꞌë ꞌinánti ꞌain. Cacëxun ca aín papan atunan ꞌiti ñu aín bëchicë rabë́ ꞌinánxa. 13ꞌInáncëx ca ꞌitsamashi nëtë ꞌicëbë aín ꞌanácanëx aín ñucamacëñun aín curíqui mëníobiani ꞌura ꞌicë menu ꞌi cuanxa. Cuanxun ca upí oquin sinanima aín cuëëncësari ꞌianan anun bëtsi bëtsi ñu ꞌaisama ꞌaquin, camaishi aín curíqui cëñuaxa. 14Usoquin cëñutancëx ca, a nëtënu ꞌicë unicamax a piti ñuñuma ꞌaish panancëbë, a bëná uníxribi panancëxa. 15Usa ꞌaish ca a nëtënu ꞌicë cuchiñu uni a ñu mëëxunuxun ñucati cuanxa. Cuanxuan ñucácëxun ca aín cuchia pastonuxun bërúanun quixun caxa. 16Cacëxun ñu mëëxunibi pananquian cuchin piti abi piisa taniabi ca uinu ꞌicë unínbi piti ꞌináncëma ꞌicën. 17Piti, chupa, ñuñuma ꞌaish sináncasmatancëx sinanaquin ca sinánxa: ꞌItsaira ca ꞌën papan ñu mëëmicë uni ꞌicën. ꞌItsa ꞌixunbi ca a piti ñua ꞌitsaira ꞌicë atun pucháquin piia. Piti ꞌitsanuxuan atun pucháquin pimainun cana ꞌëx ënuax ꞌacëñuma bamain. 18Usa ꞌain cana ꞌën papanu cuanti ꞌain. Cuanx bëbaquin cana ësaquin cati ꞌain: Papan, cana Nucën Papa Diosmi ꞌuchanan mimiribi ꞌuchan. 19Usa ꞌain camina ꞌëx cana min bëchicë ꞌai quiax quitima ꞌain. An mi ñu mëëxuncë unisa camina ꞌë ꞌimiti ꞌain.

20Usaquin sinántancëx ca aín papanu cuanxa. Cuania ca ꞌuránxunbi aín papan mëraxa. Mërai nuibati cuëëni abáquiani cuanxun ca ꞌicúquin biquin bëtsucucaxa. 21Usaquian bicëxun ca aín papa caxa: Papan, cana Nucën Papa Diosmi ꞌuchanan mimiribi ꞌuchan. Usa ꞌain camina ꞌëx cana min bëchicë ꞌai quiax quitima ꞌain. 22Cacëxun ca aín ñu mëëmicë unicama a aín papan caxa: Chupa upíira bëxun pañumianan camina mëñusuti mëñumiti ꞌain, ꞌanan camina taxaca tañumiti ꞌain. 23ꞌAnan camina vaca bacë rëracacë bëxun rëti ꞌain. A pi cananuna cuëënti ꞌain. 24—Ca bamaxa —quixun ꞌën sináncëbëbi ca ꞌën bëchicë ënëx ꞌëmi bëbaxa. Usa ꞌaish ca nëtë́a ꞌaíshbi bërí nubë ꞌicën. Ësai quicëbëtan ca ꞌatancëxun cuëënquin picanxa.

25Usaía ꞌimainun ca aín bëchicë apanën naënuxun ñu mëëaxa. Ñu mëëbaiti xubu rarobëtsini uquinbi ca pacon bana ocëbëa sharati cuëënia cuaxa. 26Cuaquin ca cuënxun an aín papa ñu mëëxuncë uni achúshi ñucáxa: ¿Uisacasquin cara usaquin ꞌain? —quixun 27Cacëxun ca caxa: Min xucë́n ca uaxa, ꞌinsíncëma asábi ꞌaish. Usa ꞌain ca min papan cuëënquin vaca bacë rëracacë rëmiaxa. 28Usaquian cacëxun cuati nishi ꞌatimaquin sinani ca xubunu atsíntisama tanxa. Usai ꞌicëbë uquin ca aín papan cuënquin atsínun quixun caxa. 29Cacëxunbi ca aín papa caxa: ꞌItsa baritian cana mi ñu ꞌaxuan, min bana cana uisaquinbi parë́cëma ꞌain. Usa ꞌicëbi camina ꞌëx abë nuibanancë unicamabëtan cuëënquin pinun achúshi chivo bacëratsubi ꞌë ꞌináncëma ꞌain. 30Usa ꞌixunbi camina an min curíquicama xanu ꞌaisamabë ꞌiquin cëñucë min bëchicë ënë́xa uan vaca bacë rëracacë rëmian. 31Usaquin cacëxun ca aín bëchicë apan aín papan caxa: Mix camina camabi nëtën ꞌëbë ꞌain. Usa ꞌain ca ꞌën ñucama ënëx camáxbi minan ꞌicën. 32Min xucën —ca bamaxa —quixun ꞌën sináncëbëbi ca ꞌëmi bëbaxa. Usa ꞌaish ca nëtë́a ꞌaíshbi bërí nubë ꞌicën. Usa ꞌaían cuëënquin picánti ca asábi ꞌicën.

Currently Selected:

Lucas 15: cbrPB

Highlight

Copy