Kyananaka 6
6
Ɓʉchwa ɓombi ʉmalɨanɨka kʉsalɨa ɓatitima
1Amati ʉ makwaa ngikʉnanɨ ɓakpataka ɓi꞉nye kʉka tiga ɓaja, Ɓayuda ngiɓa ɓaayaka Igiliki#6:1 Yɛmɔ ɓɔ, ɓa꞉nʉtanɨa akʉ lɨkʉmbʉ nga lɔmɔ. ɓambufaniso yakanakɨa ɓombi ngiɓa ɓi꞉nye yaka Ɨbalanɨa kusigo ɓɔ, ɓi꞉nye paa ɓawoko ngiɓʉndaɓʉ makwaa kʉ muɓomu wati wɔɔ ɨpakɛ idyo. 2Kija ɓatitima kumi nʉ ɓapɨnɨ ɓa꞉mʉma ungbutu wʉ ɓakpataka, ɓambusigo ɓɔ: « Yambʉkɔmʉ iɗo isu kʉsɨa panɨa ʉpanʉ wʉ Asʉɓɨɨ ekoo ʉ moni kɔɔ mʉɨpakɛ mudyo. 3Kʉ ɓwanɨ, inu ɓayoo, chweni ɓombi ʉmalɨanɨka ati ʉndɛnʉ iɓa ɓaaɓʉchwa uduɓa uɗo, ɓuhue nʉ 'Ʉtʉma wɔɔ Tu nʉ 'ʉtʉma wɔɔ pimise moni. Ɓombi ngiɓʉnanɨ ka꞊ɓunzo ɛɓɔ kuu ngiinanɨ, 4ambʉ kʉsɨa wati nguʉndɛsʉ kʉ uɓomu tii tʉkʉ kʉta nʉ panɨa ʉpanʉ wʉ Asʉɓɨɨ. »
5Moni ngikʉnanɨ ka꞉kataa ungbutu wʉ ɓombi kʉ ɓuɓomu. Kija ɓa꞉chwa Sɨtɨfana mombi ɔɔ 'uhue nʉ 'Ʉtʉma wɔɔ Tu nʉ baya, Filipo, Pɔlɔkɔlɛ, Nikanoli, Timoni, Palamɛna nʉ Nɨkɔla, mombi ʉ ɨkʉmbʉ yɨ Atiokia, ɛyɔ i꞉nye ɓɔ ukumunieni akʉ ɨtanda yɨ Ɓayuda. 6Kija ɓa꞉ɓumaiso apɛɛ ʉ ɓatitima, ɓatitima ɓambʉta, nʉ kʉnapɨa lɨkɔndɔ ekoo ʉndaɓʉ.
7Ɨsaʉ yɨ Asʉɓɨɨ yi꞉nye kʉsɨnganaka tʉkʉ nʉpɛɛ. Mboi yɨ ɓakpataka yi꞉nye kʉsɨnganaka kʉ nʉ ɨkʉʉ anʉ Yelusalɛma, ɓakumu‑kumu ɓaja ɓambʉbaya Yeso.
Ɓʉfa Sɨtɨfana
8Asʉɓɨɨ a꞉mbuiso Sɨtɨfana 'upi nayɔ kunzo angu 'ʉja,#6:8 Yɛmɔ ɓɔ, angu ngia wʉ 'Ʉtʉma wɔɔ Tu kija a꞉kyɨa moni kɔɔ mʉmbangɛ nʉ ɓakɔkɔ ɓaja ati ʉ ɓombi. 9Ɨkyɛmɨngana, ɓugue nga ɓɔmɔ ɓambuɓuɗongoko. Yi꞉nye ɓombi ɓʉ ɨkáa yɨ nɨta yɨ Ɓayuda, iɓa ɓʉ ɨbaba yɨ ɓombi ngia ɓi꞉nye isoko ɓɔ: « Ɓombi ngiɓa ɓa꞉ɓʉa akʉ ɓubayo ». Ɛɓɔ ɓi꞉nye Ɓayuda ngiɓa ɓʉ Kulɛnɛ nʉ Alɛkɨjandɛlɨa nʉ ɓɔmɔ ɓata Ɓayuda ɓʉ Kilikia nʉ Azia. Ɓambufaniso wai nʉ ɔɔ Sɨtɨfana. 10Ɓa꞉nyɨakɔmʉ nʉ moni ngika ɓatisio, jʉ i꞉nye kʉyaka nʉ 'ʉtʉma wɔɔ pimise moni ngua 'Ʉtʉma wɔɔ Tu wa꞉munzo.
11Kija ɓa꞉nzo ɓombi falanga ɓɔ ɓusigo ɓɔ: « Kʉgbʉka mombi ngia kʉyakɨa Mʉsa moni kɔɔ ɓɨɓɨ nʉ kʉ kʉzɨaka Asʉɓɨɨ. » 12Kʉ ɓwanɨ, ɓambʉpʉpɨa moni ɓɔ ɓombi nʉ ɓagʉgʉ nʉ ɓapananakɨa ɓʉ mapanʉ ɓʉchakanaka. Kija ɓa꞉ka kʉfa Sɨtɨfana ɓambʉsa nayɔ apɛɛ ʉ Ubua wʉ ɓakumu‑kumu. 13Mbise ɔngɔ ɓambʉka nʉ ɓatɛmʉ ɓʉ yakanaka kusigo ɓɔ: « Mombi ngia aakyɨa kina kʉyaka moni kɔɔ ɓɨɓɨ ekoo Ɨkáa yɨ Asʉɓɨɨ ngiindɛsʉ iya ya mʉa wɔɔ tu, nʉ ekoo ʉ mapanʉ ngika kʉ Mʉsa tʉkʉ makwaa kʉ muɓomu. 14Ka꞉mʉkɔ bɛ i꞉nyeni kusigo ɓɔ Yeso ngia wʉ Najalɛtɛ a꞊panza ɓisi ɨkáa yɨ Asʉɓɨɨ, ambunicho ɨkɔɔ ngia ka꞉nyɨa nayɔ kʉʉngwa ɔɔ Mʉsa. »
15Ɓombi kʉ ɓuɓomu ngiɓa ɓi꞉nye amati ʉ Ubua wɔɔ ʉja wʉ ɓakumu‑kumu ɓambʉkanga Sɨtɨfana ɓʉ ngba ngba ngba, ɓambʉna mesu ngikangɔ tiga ndʉ ika kʉ malaika.
Currently Selected:
Kyananaka 6: BudKoya
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
