Kyananaka 5
5
'Ʉkɔmbɔ ngua wʉ ɔɔ Anania nʉ Safila
1Ʉna tɔ, yi꞉nye tiga nʉ gue mʉngana ino ɓɔ Anania ɛɓɔ nʉ moi angɔ Safila, ɓa꞉kɔnɔ ɓɔ ɓugabiso mʉa nguʉndaɓʉ. 2Amati ʉ falanga ngia a꞉kwa, a꞉naya wɔmɔ, iya wɔmɔ a꞉tukuo ambʉka nayɔ apɛɛ ʉ ɓatitima. Moi angɔ ambʉmbɨa moni kɔngɔ kʉ mbɨaa. 3Kija Pɛtɛlɔ a꞉musigio ɓɔ: « Anania, jʉtanɨ wʉ꞉sɨa Sɨtanɨ kukumunio amati ʉ 'ʉtʉma nguʉsɔɔ? Wʉpɨta 'Ʉtʉma wɔɔ Tu pɨtaa, falanga ngia wa꞉gabiso bɛ nayɔ watɨnɨ, iya wɔmɔ wʉ꞉naya nayaa. 4Watɨnɨ ngua wa꞉gabiso bɛ ajʉ wa꞉mbikinye bɛ‑zʉ pɛɛ tʉkʉ wʉsɔɔ ɓiɛ? Mbise ngia wa꞉ugabiso bɛ‑ɔɔ ajʉ falanga ɔngɔ ambikinye bɛ tʉkʉ wasɔɔ ɓiɛ? Yɨkwa‑zʉ tiga tanɨ iya wʉkwaisio‑ɔɔ kʉkyɨa ɨkanzi yɨ moni ngikʉnanɨ? Wʉpɨtakɔmʉ mombi, ɨkyɛmɨngana wʉpɨta tʉkʉ Asʉɓɨɨ. »
5Anania kʉkɔ tʉkʉ moni ngikʉnanɨ, ambʉkwa nʉ kuwo gbɛgbɛ tʉkʉ ananɨ. Ɓombi kʉ ɓuɓomu ngiɓa ɓa꞉kɔ moni ngikʉnanɨ ɓambʉkwa ʉɓa nadɨndɨ. 6Tiga ananɨ, ɓandambʉ ɓambʉka, ɓambupokoɓo mʉnda wangɔ nʉ malikana, ɓambumufuɓuo ɓambʉsa nayɔ kʉhʉna.
7Mbise ngiinanɨ, kʉka ndana ndʉ saa ɓeetu, moi ʉ Anania ambʉka, chʉkɔmʉ ɛyɔ kʉmbɨa moni ngika ki꞉nye kʉkyɨanɨeni. 8Pɛtɛlɔ ambumuɓukuo ɓɔ: « Ajʉ falanga ngia na꞉gaba bɛ nayɔ mʉa nguʉndɛnʉ, ɛyɔ kʉ uɓomu tʉkʉ iyakɛ ɓiɛ? » Ambumutisio ɓɔ: « Ɛɛ, ɛyɔ kʉ uɓomu tʉkʉ iinanɨ. » 9Kija Pɛtɛlɔ a꞉musigio ɓɔ: « Jʉtanɨ na꞉kɔnɔ bɛ ɨzɔ kukanyo 'Ʉtʉma wʉ Makʉʉɓɨɨ? Ʉkɔ, ɓombi ngiɓa ɓʉhʉna aɓaʉ ɓa tiga anʉ umongu. Ɓa tiga kʉ kʉka nɔwɛ kufuɓuo. »
10Tʉkʉ nɨma ngiinanɨ, Safila ambʉkwa akʉ mɨtɨndɨ yɨ Pɛtɛlɔ ɓʉ kpruu, ambuwo. Ɓandambʉ ɓambukumunio, ɓambʉmʉgbʉka tii tʉkʉ mʉnda. Ɓambumufuɓuo, ɓambʉmʉhʉna anambamba ʉ swaɨ. 11Kanisa kʉ uɓomu nʉ ɓombi kʉ ɓuɓomu ngiɓa ɓa꞉kɔ moni ngikʉnanɨ, yambuɓukiso kʉ ʉɓa nadɨndɨ.
Ɓatitima ɓʉkyɨa moni kɔɔ mʉmbangɛ nʉ ɓakɔkɔ
12Ɓatitima ɓa꞉kyɨa moni kɔɔ mʉmbangɛ nʉ ɓakɔkɔ ɓaja ati ʉ ɓombi. Ɓombi ngiɓa ɓa꞉baya Yeso ɓi꞉nye kʉ ɓuɓomu ɨzɔ amati ʉ basa ʉ Sɔlɔmɔnɔ. 13Mombi gʉkʉ mʉngana nga kɔmɔ a꞉kanyokɔmʉ tii kʉka kukumunio akʉ undindo wʉndaɓʉ. Abana ɓwanɨ kititi ɓombi ɓi꞉nye naɓɔ kʉbɨba nadɨndɨ. 14Kija ɓombi ɓaja ɓugue nʉ ɓoi ɓa꞉baya Makʉʉɓɨɨ, ɓambukumunio akʉ undindo wʉ ɓakpataka. 15Kija ɓa꞉faniso kʉka nʉ ɓombi ɓʉ ɓakwisikiso kʉʉngwa akʉ mɨngyɛndʉ, ɓambʉɓʉkwaikiso ekoo ʉ mukwei nʉ lɨbabaɨ, ambʉ ati ngia Pɛtɛlɔ aɓio‑ɔɔ kʉɓaa, umwendu nguangɔ wʉɓaa ekoo ɓombi ngana ngana ati ʉndaɓʉ. 16Ungbutu wʉ ɓombi wɔɔ ʉja wambʉmʉmanakɨa kʉʉngwa akʉ ɓagʉlʉ ngiɓa ɓa anambamba ʉ Yelusalɛma, ɓambʉka nʉ ɓombi ɓʉ ɓakwisikiso nʉ iɓa ɓʉ mɨtʉma yɨ ɓabɨa ya꞉ɓʉjʉnganakiso, ɓambuɓuhiiso tʉkʉ kʉ ɓuɓomu ɓʉ gba.
Ɓʉfa ɓata Ɓatitima
17Mbise ngiinanɨ, kumu‑kumu ngia ɔɔ ʉja ɨzɔ nʉ ɓombi ngiɓangɔ, iɓa ɓi꞉nye amati ʉ ɨtanda yɨ Ɓasadukayɔ ɓambʉnɨa ɓatitima imi tiga nadɨndɨ, ɓambufaniso naɓɔ sagia. 18Kija ɓa꞉fa ɓatitima, ɓambuɓugiso akʉ ɨkáa yɨ boloko ngia yɛɛ ɨja. 19Ɨkyɛmɨngana, tiga nuɓutu malaika mungono wʉ Makʉʉɓɨɨ wambʉɓʉganɨa mimongu yɨ ɨkáa yɨ boloko, ambiso ɓatitima aɓei, ambuɓusigio ɓɔ: 20« Seni akʉ ɨkáa yɨ Asʉɓɨɨ, nambʉɓɨakɨa ɓombi ɨsaʉ yɨ ʉɓɨɨ wʉ ɨtakɨ‑takɨ nguʉnanɨ. » 21Ɓambʉkyananakɨa ʉpanʉ nguʉnanɨ. Kʉɓa ɔngɔ ɓʉ kpi, ɓambukumunio amati ʉ aga wʉ ɨkáa yɨ Asʉɓɨɨ, ɓambufaniso panɨa ɓombi.
Kumu‑kumu ngia ɔɔ ʉja ɨzɔ nʉ ɓombi ngiɓangɔ, nʉ ɓʉkʉʉ kʉ ɓuɓomu ngiɓa ɓʉ Ɓaɨsalaɛlɛ ɓambusukio Ubua wɔɔ ʉja wʉ ɓakumu‑kumu. Kija ɓa꞉tʉma ɓombi kʉsa kʉchɨka ɓatitima akʉ boloko. 22Ɨkyɛmɨngana, iya ɓakʉndatʉma ɓa꞉ɓʉya nani, chʉkɔmʉ ɓambʉɓʉgbʉka akʉ ɨkáa yɨ boloko. Ɓambʉtʉa akʉ Ubua kunzo ɨsaʉ ngiinanɨ 23kusigo ɓɔ: « Kʉgbʉka ɨkáa yɨ boloko ɨdɨkpɛ iɗo, nʉ ɓapɨmakɨa tʉkʉ akʉ lizi lʉ kuu ngilʉndaɓʉ apɛɛ ʉ mimongu. Ɨkyɛmɨngana, ati ngia kʉgana‑ɔɔ umongu, chʉkɔmʉ kambʉgbʉka mombi amati gʉkʉ mʉngana. »
24Iya ngama ʉ ɓapɨmakɨa ɓʉ ɨkáa yɨ Asʉɓɨɨ nʉ ɓangama ɓʉ ɓakumu‑kumu ɓa꞉kɔ nayɔ moni ngikʉnanɨ, ɓambiakɔmʉ ɓɔ ɓa꞊kyɨa tanɨ. Ɓambufaniso ɓokono ati ʉndaɓʉ ɓɔ moni ngikakɛ ka꞊pipinikio tanɨ. 25Kija mombi mʉngana ambʉka naɓɔ kusigio ɓɔ: « Ɓombi ngiɓa na꞉ɓʉfa bɛ ɓakʉpanɨa ɓombi amati ʉ ɨkáa yɨ Asʉɓɨɨ. »
26Kija ngama ʉ ɓapɨmakɨa a꞉sa ɨzɔ nʉ ɓombi ngiɓʉnanɨ kʉchɨka ɓatitima. Ɨkyɛmɨngana, chʉkɔmʉ ɓambʉɓʉkyɨa nʉ ɓʉka‑ɓʉkaɨ jʉ ɓi꞉nye kukumo ɓɔ ɓombi ɓɔɔɓugisokɔmʉ nʉ mukopi. 27Iya ɓa꞉ka naɓɔ, ɓambuɓumaiso apɛɛ ʉ Ubua wɔɔ ʉja wʉ ɓakumu‑kumu. Kija ngama ʉ ɓakumu‑kumu a꞉faniso naɓɔ ɓokoko moni. 28Ambuɓusigio ɓɔ: « Ajʉ ka꞉nɨgbʉmakɔmʉ bɛ‑zʉ nʉ angu ɓɔ sɨeni kʉpanɨa akʉ ino yɨ mombi ngia, ɨkyɛmɨngana inu nʉ꞉nanzaniso mapanʉ ngikʉndɛnʉ anʉ Yelusalɛma tʉkʉ nanzaniso. Na ɓata kʉ kʉhata nisu kʉndandiso 'ʉkɔmbɔ wʉ miniki kʉ mombi ngiinanɨ! »
29Ɔɔ Pɛtɛlɔ ɨzɔ nʉ ɓatitima ɓambuɓutisio ɓɔ: « Yɨkwananakɔmʉ isu kʉkɔ ɓombi kambʉsɨa Asʉɓɨɨ! 30Yeso ngia na꞉mʉwa 'upi nayɔ kʉɓakaka ekoo ʉ mʉsalaba, Asʉɓɨɨ wʉ ɓakuku ngiɓʉndɛsʉ a꞉mʉjʉkaniso akʉ ingyo jʉkanisoo. 31Asʉɓɨɨ ambumuɗitiso akʉ ɨkɔndɔ yɨ guɔngɔ ngiangɔ, ambumumaiso kuɓio ngama nʉ muhiiso kʉganɨa Ɓaɨsalaɛlɛ ɨngbaa yɛɛ niche mɨtʉma nʉ nyɨa nʉ ʉpɨa wʉ ɓʉɓɨɓɨ. 32Isu ka ɓatɛmʉ ɓʉ moni ngikʉnanɨ, nʉ 'Ʉtʉma wɔɔ Tu ngua Asʉɓɨɨ a꞉nzo ɓombi ngiɓa ɓaamukumo, wa kʉ kʉɓʉa ɓʉtɛmʉ ɓʉ moni kɔngɔ. »
33Ati ngia ɓombi ɓʉ Ubua ɓa꞉kɔ nayɔ moni ngikʉnanɨ, kambʉɓʉjʉka ɓʉkaɨ nadɨndɨ, ɓambʉhata ɓɔ ɓʉwa ɓatitima tʉkʉ waa. 34Ɨkyɛmɨngana, yi꞉nye nʉ 'Ufalisayɔ mungono ati ʉndaɓʉ ino ɓɔ Gamalɨɛlɛ. I꞉nye mʉpananakɨa wʉ mapanʉ, nʉ ɓombi kʉ ɓuɓomu ɓi꞉nye mukumo. Ambʉmaa na ati ʉ Ubua wʉ ɓakumu‑kumu, ambʉta ɓɔ ɓiso ɓatitima aɓei ati ɗɛkɛkɛ. 35Kija a꞉sigio ɓombi ɓʉ Ubua wʉ ɓakumu‑kumu ɓɔ: « Inu Ɓaɨsalaɛlɛ, moni ngika nakʉhata kyɨa ɓombi ngiɓaɓɛ, kanganakieni tɔ tʉkʉ iɗo. 36Yambʉɓaakɔmʉ makwaa maja aka mombi mʉngana ino ɓɔ Teuda a꞉ɓwanɨa pongo‑ɔɔ. A꞉chɨkana ndʉ mombi ɔɔ ʉja nʉ ɓombi tine tine ndʉ mɨa ɓʉgɨna ɓambʉmʉkpata. Ɨkyɛmɨngana, iya ɓa꞉mʉwa nayɔ, ɓakpataka ngiɓangɔ ɓambʉnanzana, ɨtanda ngiangɔ yambusio.
37Mbise angɔ Yuda 'Ugalilaya wɔngɔ ambʉɓwanɨa ati ngia ɓi꞉nye‑ɔɔ kupoo ɓombi. Ɛyɔ a꞉mʉma ungbutu wʉ ɓombi ambise angɔ. Ɓambʉmʉwa ɛyɔ kʉ wanɨ, ɓakpataka ngiɓangɔ kʉ ɓubomu ɓambʉnanzana kʉnanzanaa. 38Ɨtakɨ‑takɨ ngiakɛ, maninu kusigio ɓɔ nɔɔkpatakɔmʉ tii ɓata moni kʉ ɓombi ngiɓa. Ɓʉsieni ɓʉsa saa. Ndʉ yaɓio ɓɔ moni, yɛmɔ itungwio ngiindaɓʉ yɨʉngwanakieni nʉ ɓombi, ya꞊sio tʉkʉ sioo. 39Ɨkyɛmɨngana, kuu ngia ɓa꞉kʉkyɨa engo ndʉ yaɓio yɨʉngwanakieni nʉ Asʉɓɨɨ, nambʉkʉkwanana nayɔ kʉpanza. Tɔ, kanganɨeni iɗo, nɔɔmanakɔmʉ agbanga nʉ Asʉɓɨɨ. »
Ɓombi ɓʉ Ubua ɓambʉbaya moni ngika Gamalɨɛlɛ a꞉sigo. 40Ɓambusoko ɓatitima kʉ mbise, ɓambuɓuɓindiso fimbo. Ɓambuɓunzo ʉpanʉ ɓɔ ɓɔɔyaka tii ɓata ɨngbaa yɨ moni akʉ ino yɨ Yeso. Kija ɓa꞉ɓʉsɨa. 41Ɓatitima ɓa꞉ʉngwa tiga na akʉ izi yɨ Ubua wʉ ɓakumu‑kumu nʉ ɨgyagya nadɨndɨ, jʉ ya꞉kataa Asʉɓɨɨ ɓɔ ɓʉkwanana kʉdya ɓʉka‑ɓʉkaɨ nʉ ndapa akʉ ino yɨ Yeso. 42Makwaa kʉ muɓomu, ɓi꞉nye kʉpanɨa chʉkɔmʉ nʉ ndokono amati ʉ ɨkáa yɨ Asʉɓɨɨ nʉ lɨkáa ngilʉndaɓʉ kʉtaa nʉ ɓɨakɨa Ɨsaʉ yɛɛ Iɗo ngia yɨ Yeso Klisito.
Currently Selected:
Kyananaka 5: BudKoya
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
