Kyananaka 4

Ɓʉka nʉɔɔ Pɛtɛlɔ nʉ Yʉanɨ apɛɛ ʉ Ubua wɔɔ ʉja ngua wʉ ɓakumu‑kumu

1Ati ngia ɔɔ Pɛtɛlɔ nʉ Yʉanɨ ɓi꞉nye‑zʉ‑ɔɔ tʉkʉ kʉngakɨa ungbutu wʉ ɓombi moni ngikʉnanɨ, ɓakumu‑kumu, nʉ ngama ʉ ɓapɨmakɨa ɓʉ ɨkáa yɨ Asʉɓɨɨ, ɨzɔ nʉ Ɓasadukayɔ, ɓambʉɓʉɓwanɨa. 2Ɛɓɔ ɓi꞉nye nʉ 'ʉnganga nadɨndɨ kʉna ɓɔ ɔɔ Pɛtɛlɔ nʉ Yʉanɨ ɓakʉpanɨa ungbutu wʉ ɓombi nʉ ɓɨakɨa ɓɔ ɓombi ngiɓa ɓa꞉dʉka ɓa꞊jʉkana akʉ ingyo jʉkanaa ngbanga kʉndʉ iya Yeso a꞉jʉkana. 3Kija ɓa꞉ɓʉfa, ɓambuɓugiso akʉ boloko kʉɓʉya kʉɓa, jʉ wati wi꞉nye wʉɓaeni tiga ɓaa. 4Ɓombi ɓaja ati ʉ ɓiga ngiɓa ɓa꞉kɔ moni ngikʉnanɨ ɓambʉbaya Yeso. Mboi yɨ ɓombi ngiɓa ɓa꞉baya yambʉsɨnganaka nʉpɛɛ, ɓambʉka tiga tine tine ndʉ ɓombi ɛlɛfʉ ɓɔkɔ.#4:4 Chʉkɔmʉ kupoo ɓoi nʉ ɓana

5Kʉɓa ɔngɔ, ɓangama ɓʉ Ɓayuda nʉ ɓagʉgʉ, nʉ ɓapananakɨa ɓʉ mapanʉ ɓambʉmʉmanɨa anʉ Yelusalɛma. 6Ɓombi ngiɓa ɓi꞉nye nanɨ, yi꞉nye kumu‑kumu ngia ɔɔ ʉja ino ɓɔ Anasɨ, nʉ Kayafa, nʉ Yʉanɨ, nʉ Alɛkɨjandɛlɛ, nʉ ɓombi kʉ ɓuɓomu ngiɓa ɓa akʉ ɨkáa yɨ anza ngia yɨ kumu‑kumu ngia ɔɔ ʉja. 7Ɓambiso ɔɔ Pɛtɛlɔ nʉ Yʉanɨ apɛɛ ʉ ʉndaɓʉ, ɓambuɓuɓukuo ɓɔ: « Nuhiiso mombi ɔɔ 'ʉjʉnganakɛ ngia nʉ angu tɨmanɨ, nʉ akʉ ino yanɨ? »

8Kija Pɛtɛlɔ 'uhue nʉ 'Ʉtʉma wɔɔ Tu, ambuɓutisio ɓɔ: « Inu ɓangama nʉ inu ɓagʉgʉ, 9isu kʉkyɨa mombi mʉngana ɔɔ 'ʉjʉnganakɛ iɗo, nʉ ɓʉɓʉnɨ ɓa tiga nisu kuɓukuo ɓɔ mombi ngiinanɨ ʉhɨa tanɨ. 10Inu kʉ ɓuɓomu nʉ Ɓaɨsalaɛlɛ kʉ ɓuɓomu, pimiseni iɗo kusigo ɓɔ mombi ngia a 'ʉmaɨ apɛɛ ʉndɛnʉ akɛ iya a tiga kʉ 'ʉhɨɛ, ʉ꞉hɨa tʉkʉ akʉ angu wʉ ino yɨ Yeso Klisito ngia ʉ Najalɛtɛ. Yeso ngiinanɨ iiya inu na꞉mʉɓakaka ekoo ʉ mʉsalaba, ɨkyɛmɨngana Asʉɓɨɨ ambʉmʉjʉkaniso akʉ ingyo. 11Ɛyɔ a mombi ngia Mubio ka꞉sigo ekoo angɔ ɓɔ:

‹ Ikopi ngia inu ɓombi ɓɔɔ ɓʉtɨɛ lɨkáa na꞉igiso

ya꞉nɨtanaka tiga ikopi yɨ ɨjangɨa nadɨndɨ. ›#Popoko Mʉm 118:12

12Kakwanana kʉnyɨa nʉ ɓʉhɨa tʉkʉ ekoo angɔ kʉ nangana, jʉ Asʉɓɨɨ a꞉nzokɔmʉ ino nga yɛmɔ gʉkʉ mɨngana akʉ ɨtaka iya yakwanana nisu kuhiiso. »

13Moni ngikʉnanɨ ka꞉mbangɨa ɓombi ɓʉ ubua nguʉnanɨ nadɨndɨ jʉ ɓi꞉nye kʉna ɔɔ Pɛtɛlɔ nʉ Yʉanɨ kʉngaka moni chʉkɔmʉ nʉ jatuoko nʉ ɓi꞉nye kʉmbɨa ɓɔ ɓa ɓombi ɓɔɔ ɨsʉkʉɓwanɨ ngiɓa ɓambakambɨa balʉa. Ɓi꞉nye naɓɔ kʉmbɨa tʉkʉ ɓɔ ɓa ɓombi ngiɓa ɓi꞉nye ɨzɔ nʉ‑ɔɔ Yeso. 14Ɨkyɛmɨngana, ɓi꞉nye kʉna mombi ngia a꞉hɨa 'ʉmaɨ kʉ ananɨ anambamba ʉ ɔɔ Pɛtɛlɔ nʉ Yʉanɨ, nʉ ɓambikinye tii ɓata nʉ moni ngika ɓatisio. 15Kija ɓa꞉ɓunzo ʉpanʉ ɓɔ ɓʉɓʉa aɓei ʉ basa wʉ Ubua wɔɔ ʉja ngua wʉ ɓakumu‑kumu, ɓambutukuo kʉyakanaka‑zʉ tii tʉkʉ ati ʉ ʉndaɓʉ. 16Ɓambusigo ɓɔ: « Ka꞊kyɨa moni kʉ ɓombi ngiɓa tanɨ? Jʉ ɓombi ngiɓa ɓʉ Yelusalɛma kʉ ɓuɓomu ɓakʉmbɨa ɓɔ ɓugue ngiɓa ɓʉ꞉kyɨa moni kɔɔ mʉmbangɛ. Nʉ kambʉkɔmʉ aka ka꞊kwanana‑ɔɔ nakɔ kuningunio. 17Ɨkyɛmɨngana, yɨkwananakɔmʉ ɓɔ ɨsaʉ yɨ moni ngikʉnanɨ yɨndanaka tii ɓombi kʉ ɓuɓomu. Kʉ ɓwanɨ, kʉɓʉngbayakɨeni tʉkʉ ngbayakɨaa, kambʉɓʉgbʉma ɓɔ ɓɔɔngakɨakɔmʉ ɓata mombi gʉkʉ mʉngana moni ekoo ʉ ino yɨ Yeso. »

18Kija ɓa꞉ɓusoko ɓata kʉ mbise, ɓambuɓunzo ʉpanʉ nʉ angu ɓɔ ɓɔɔyakakɔmʉ ɨngbaa yɨ moni, gʉkʉ panɨa ɓata akʉ ino yɨ Yeso. 19Ɨkyɛmɨngana, ɔɔ Pɛtɛlɔ nʉ Yʉanɨ ɓambuɓutisio ɓɔ: « Tʉkʉ inu ɓakʉɓɔngɔ tɨneni moni ngika. Ajʉ ya ngbingbii apɛɛ Asʉɓɨɨ kukumo ʉpanʉ nguʉndɛnʉ gʉ ɓɔ uwa wʉ Asʉɓɨɨ? 20Akʉ isu, kʉkwanana tʉkʉ kʉngaka moni ngika ka꞉na nʉ ika ka꞉kɔ. » 21Ɓombi ɓʉ ubua ɓambʉɓʉngbaakɨa ɓata, ɓambʉɓʉsɨa. Ɓa꞉nakɔmʉ ɨngbaa ngia ɓa꞉ɓʉkyananaka‑ɔɔ nayɔ jʉ ɓombi kʉ ɓuɓomu ɓi꞉nye kubibiso Asʉɓɨɨ ekoo ʉ moni ngika ka꞉kyananakɨa. 22Mombi ngiinanɨ a꞉nyɨa nʉ ɓʉhɨa ɓɔɔ ɓʉmbangɛ ngiɓʉnanɨ i꞉nye nʉ mugo kʉɓaa makumi ɓʉgɨna.

Ɓaklisito ɓakʉta Asʉɓɨɨ

23Ati ngia ɓa꞉sɨa‑ɔɔ ɔɔ Pɛtɛlɔ nʉ Yʉanɨ, ɓambʉsa kʉgbʉka ɓombi ngiɓa ɓɔmɔ ɓa꞉baya. Ɓambʉɓʉngakɨa moni kʉ muɓomu ngika ɓangama ɓʉ ɓakumu‑kumu nʉ ɓagʉgʉ ɓa꞉ɓusigio. 24Iya ɓombi ɓʉ baya ɓa꞉kɔ ɨsaʉ ngiinanɨ, ɓambʉta Asʉɓɨɨ nʉ 'ʉtʉma mungono kusigo ɓɔ: « Makʉʉɓɨɨ, ɔwɛ kʉ wa꞉kyɨa ɓisi nʉ ɨtaka nʉ ɓaɗei nʉ kumbo kʉ 'uɓomu ngia a amati ɔngɔ. 25Ɔwɛ kʉ wa꞉sigo jɛnɛ 'upi akʉ 'Ʉtʉma wɔɔ Tu nʉ akʉ moni kʉ kuku Daudi ngia a bayo asɔɔ ɓɔ:

‹ Mababa kʉ ɓombi ka꞉chakanaka akʉ moni kʉ ɨmanɨ?

Ɓombi ɓa꞉kyɨa lididi lɔɔ ɓɨɓɨ tʉkʉ ɨsʉkʉɓwanɨ akʉ moni kʉ ɨmanɨ?

26Ɓangama ɓʉ ɨtaka ɓa꞉suo ɗite

kija ɓa꞉mʉmanɨa ɨzɔ

kʉmana ɗite nʉ Makʉʉɓɨɨ nʉ Masɨa ngiangɔ. ›

27Ya tʉkʉ kingono ɓɔ ɔɔ Ɛlɔdɛ nʉ Pɔtiɔ Pilato, ɨzɔ nʉ mababa kʉ ɓombi ɓɛɛka ɓɔngɔ, nʉ Ɓaɨsalaɛlɛ ɓa꞉mʉmanakɨa akʉ gʉlʉ ngia, kuwulio Yeso ididi ekoo ʉ bayo asɔɔ ngia ɔɔ tu Yeso ngia wa꞉mʉchwa. 28Kʉ ɓwanɨ, ɓa꞉kyananakɨa tʉkʉ moni ngika wa꞉kwaisio jɛnɛ kʉpɛɛ akʉ angu nʉ ɓʉkʉnda ngiɓʉsɔɔ. 29Ɨtakɨ‑takɨ ngiakɛ, Makʉʉɓɨɨ ʉna moni ngika ɓʉtɨnyakɨa‑ɔɔ nʉ nzo ɓabayo ɓʉsɔɔ angu kʉɓɨakɨa ɨsaʉ ngiisɔɔ chʉkɔmʉ nʉ jatuoko. 30Pananiso angu ngiasɔɔ kuhiiso ɓakwisikiso, nʉ kyɨa moni kɔɔ mʉmbangɛ nʉ ɓakɔkɔ akʉ ino yɨ Yeso, bayo ngiasɔɔ ɔɔ tu. » 31Ati ngia ɓa꞉pipo‑ɔɔ kʉta, izi ngia ɓi꞉nye‑ɔɔ ɓʉmʉmanakɨɛ yambʉgʉgʉma. Ɛɓɔ kʉ ɓuɓomu ɓambuhuo nʉ 'Ʉtʉma wɔɔ Tu, kija ɓa꞉faniso ɓɨakɨa Ɨsaʉ yɨ Asʉɓɨɨ chʉkɔmʉ nʉ jatuoko.

Ɓombi ngiɓa ɓa꞉baya Yeso ɓa ɨkyɛmɛ mɨngana

32Ungbutu wʉ ɓombi ɓʉ baya ɓi꞉nye tii tʉkʉ ɨkyɛmɛ mɨngana amati ʉ 'ʉtʉma nʉ itungwio kʉtaa. Mombi gʉkʉ mʉngana ati ʉ ʉndaɓʉ ambikinye sigo ɓɔ kumbo ngiangɔ a tʉkʉ wangɔ kʉ nangana, ɨkyɛmɨngana i꞉nye tʉkʉ ɨzɔ akʉ ɛɓɔ kʉ ɓuɓomu. 33Ɓatitima ɓi꞉nye kʉɓʉa ɓʉtɛmʉ ɓʉ jʉkana yɨ Makʉʉɓɨɨ Yeso akʉ ingyo nʉ angu kʉ uɓomu, Asʉɓɨɨ ambuɓumbuiso ɛɓɔ kʉ ɓuɓomu nadɨndɨ. 34Ati ʉ ʉndaɓʉ mombi gʉkʉ mʉngana ambikinye nʉ nangyɨa yɨ ɨkyɛmɛ. Jʉ ɓombi ngiɓa ɓi꞉nye nʉ matɨnɨ yɛmɔ lɨkáa ɓi꞉nye ligabiso, ɓambʉka nʉ falanga ɔngɔ, 35ɓambunzo ɓatitima. Kija ɓi꞉nye ɨpakɨa ɓombi falanga ɔngɔ, mombi kʉ nangana nangana kʉkpatanakɨa tʉkʉ nʉ ɓanangyɨa ngiɓangɔ.

36Yi꞉nye nʉ mombi mʉngana ʉ ɨkáa yɨ anza ngia yɨ Lawi iya a꞉nʉtanɨa anʉ Kipulio ino ɓɔ Yɨjɛfʉ. Ɓatitima ɓa꞉mʉsʉa ino nga yɛmɔ ɓɔ Balanaba inyi yɛngɔ ɓɔ: « Mombi ngia aanzo igue‑gue. » 37Ɛyɔ a꞉gabiso watɨnɨ nguangɔ, ambʉchɨka falanga ɔngɔ ambʉka nayɔ apɛɛ ʉ ɓatitima.

Currently Selected:

Kyananaka 4: BudKoya

Highlight

Copy