Kyananaka 14

Ɔɔ Pɔlɔ nʉ Balanaba ɓakʉɓɨakɨa Ɨsaʉ yɛɛ Iɗo anʉ Ikonio

1Ati ngia ɔɔ Pɔlɔ nʉ Ɓalanaba ɓa꞉ɓʉya‑ɔɔ anʉ Ikonio, ɓambukumunio akʉ ɨkáa yɨ nɨta ngia yɨ Ɓayuda. Kija nanɨ ɓa꞉ɓɨakɨa ʉpanʉ wʉ Asʉɓɨɨ ikanzi ngia ɓɔ Ɓayuda ɓaja nʉ ɓombi ngiɓa ɓambikinye Ɓayuda ɓa꞉baya Yeso tʉkʉ bayaa. 2Ɨkyɛmɨngana, Ɓayuda ngiɓa ɓa꞉yaa baya Yeso ɓambufaniso pʉpɨa ɓombi ngiɓa ɓambikinye Ɓayuda moni ɓɔ ɓuɓio nʉ 'ʉtʉma wɔɔ ɓɨɓɨ ekoo ɓombi ɓʉ baya. 3Ɔɔ Pɔlɔ nʉ Balanaba ɓa꞉kwaa nanɨ anʉ Ikonio makwaa maja. Ɓambʉpanɨa Ɨsaʉ yɨ Makʉʉɓɨɨ chʉkɔmʉ nʉ ʉɓa. Makʉʉɓɨɨ a꞉ɓunzo angu ɔɔ kyɨɛ ɓamoni ɓɔɔ ɓʉmbangɛ nʉ ɓakɔkɔ. Nɨngbaa ngiinanɨ a꞉pananiso ɓɔ Ɨsaʉ ngia ɓi꞉nye kʉyaka ekoo 'ʉtʉma wʉ ɨjɨɔ nguangɔ ya kingono. 4Ɓombi ɓʉ gʉlʉ ngiinanɨ ɓambudyokono, ɓɔmɔ ɓi꞉nye nʉ wagba ngua wʉ Ɓayuda, ɓɔmɔ nʉ wagba ngua wʉ Ɓatitima.

5Kija ɓombi ngiɓa ɓambikinye Ɓayuda nʉ Ɓayuda, ɨzɔ nʉ ɓangama ngiɓʉndaɓʉ ɓambukwaisio ɓɔ ɓakyananaka ɔɔ Pɔlɔ nʉ Balanaba, nʉ ɓɔ ɓaɓʉwa naɓɔ kʉɓɛnda nʉ mukopi. 6Iya ɔɔ Pɔlɔ nʉ Balanaba ɓambɨa ididi ngiinanɨ, ɓambʉsa kʉɓatanɨa akʉ ɓagʉlʉ ɓʉ Lisitula nʉ Dɛlɛbɛ, iɓa ɓi꞉nye amati ʉ gɨpa ʉ Likonia nʉ ɓagɨpa nga ɓɔmɔ anambamba ɔngɔ. 7Ɓa꞉ɓɨakɨa Ɨsaʉ yɛɛ Iɗo nani akʉ ɓagɨpa ngiɓʉnanɨ.

Ɔɔ Pɔlɔ nʉ Balanaba ɓuhiiso mombi anʉ Lisitula

8Gue mʉngana i꞉nye anʉ Lisitula jakɛsɨ ɔngɔ kʉʉngwa tʉkʉ nʉtanɨa yangɔ. Kʉ ɓwanɨ, i꞉nye ɓɔ ambʉkɨndakenikɔmʉ sina, chʉkɔmʉ ikanzi ngia amaa‑ɔɔ. I꞉nye kyɨa tʉkʉ ɓuwei. 9Mombi ngiinanɨ a꞉kɔ ʉpanʉ wʉ Asʉɓɨɨ nguwa Pɔlɔ i꞉nye kyɨa kʉpanɨa. Pɔlɔ ambʉmʉkanga ɓʉ gbɔɔ, ndʉ a꞉na ɓɔ anʉ baya ikanzi ngia yamuhiiso, 10kija a꞉sigo nʉ iyo yɛɛ ɓʉmʉ ɓɔ: « Maa nʉ mɨtɨndɨ ngiisɔɔ! » Ɛyɔ jakɛsɨ ngiinanɨ ambʉmaa tʉkʉ gagaa, ambufaniso kɨndaka. 11Ungbutu wʉ ɓombi ngiɓa ɓa꞉na moni ngikʉnanɨ Pɔlɔ a꞉kyɨa, ɓambufaniso natɨa nʉ ʉɗaɗa nguʉndaɓʉ wʉ Ɓalakonia kusigo ɓɔ: « Ɓamʉngʉ iɓa ɓutijio akɛ, ɓakʉnyɨa ndʉ ɓombi! » 12Ɓambʉsʉa Balanaba ino ɓɔ Jeusi, inyi yɛngɔ ɓɔ ngama ʉ ɓamʉngʉ ɓʉ yakanaka, nʉ Pɔlɔ ɓɔ Ɛlɛmasɨ,#14:12 Amati ʉ ɨtanda ngia yɨ Ɓagiliki inyi yɛngɔ ya ɓɔ mombi ngia aayaka moni akʉ ubua. jʉ ɛyɔ i꞉nye yaka moni yakaa. 13Kija kumu‑kumu ngia wʉ ɨkáa yɨ mʉngʉ ngiinanɨ yɨ Jeusi, iya yi꞉nye aɓei ʉ gʉlʉ, a꞉ka nʉ ɓangɔmbɛ ɨzɔ nʉ maʉa apɛɛ ʉ umongu wʉ gʉlʉ. Ɛyɔ nʉ ungbutu wʉ ɓombi ɓi꞉nye kʉkʉnda kʉyɨa ɔɔ Balanaba nʉ Pɔlɔ 'ʉtʉmbɨa.

14Iya ɔɔ Balanaba nʉ Pɔlɔ, iɓa ɓi꞉nye ɓatitima ɓa꞉kɔ nayɔ moni ngikʉnanɨ, ɓambunachokoko lɨpʉkʉ ngilʉndaɓʉ, ɓambufaniso nɨsa bangʉ akʉ ungbutu wʉ ɓombi wi꞉nye‑ɛɛ nʉ tʉɓɨa ɓɔ: 15« Inu ɓadii yɨ꞉kwa tiga tanɨ iya na‑ɔɔ kʉkyɨa ikanzi yɨ moni ngikakɛ? Isu ka tʉkʉ ɓombi ngbanga kʉndʉ inu. Kaninu kʉɓɨakɨa Ɨsaʉ yɛɛ Iɗo aka ekoo ngia ɓɔ sieni ɓamʉngʉ ɓʉ yakanaka ɓɔɔ ɨsʉkʉɓwanɨ ngiɓa. Kija na꞊nɨtana kʉkpata tiga Asʉɓɨɨ ngia a kʉkʉʉ, iya a꞉kyɨa ekoo ʉ ɓisi nʉ ɨtaka nʉ ɓaɗei, nʉ ɓamoni kʉ ɓuɓomu ngiɓa ɓa amati ɔngɔ. 16Jɛnɛ pɛɛ, Asʉɓɨɨ a꞉sɨa lɨkáa lʉ ɓanza kʉ liɓomu kʉkpata lɨngbaa ngilʉndaɓʉ ɓi꞉nye kʉkʉnda. 17Ɨkyɛmɨngana, makwaa kʉ muɓomu, Asʉɓɨɨ aapananiso ɓɔ a kʉkʉʉ 'upi akʉ iɗo ngiangɔ. Aaninyiisio ʉgbaa kʉʉngwa ekoo ɓisi, ambuninzo lɨjɔ lɔɔ bʉɛ mudyo akʉ wati wɔngɔ, kija aaninzo idyo ambuhuiso mɨtʉma ngiindɛnʉ nʉ ɨgyagya. »

18Abana ndʉ ɓatitima ɓa꞉sigo moni ngikʉnanɨ kititi, ɓa꞉gbʉma ungbutu wʉ ɓombi tʉkʉ nʉ angu ɓɔ ɓʉsɨa naɓɔ kʉyɨa 'ʉtʉmbɨa.

19Ɓayuda ngiɓa ɓa꞉ʉngwa anʉ Atiokia ɨkʉmbʉ mɨngana yɨ Pisidia nʉ anʉ Ikonio, ɓa꞉pʉpɨa ungbutu wʉ ɓombi moni, kʉɓʉya tʉkʉ aka ɓa꞉ɓɛnda‑ɔɔ Pɔlɔ nʉ mukopi tinene nayɔ kʉwa. Ɓambumuɗuɗuo aɓei ʉ gʉlʉ jʉ ɓi꞉nye kuyo ɓɔ u꞉wu woni. 20Ɨkyɛmɨngana, ati ngia ɓakpataka ɓamukunguo‑ɔɔ, ambʉʉngwa ɨkʉʉ, ambʉtʉa kʉ akʉ gʉlʉ. Tiga kʉɓa ɔngɔ ɓambʉsa nʉ Balanaba anʉ Dɛlɛbɛ.

Ɔɔ Pɔlɔ nʉ Balanaba ɓʉtʉa anʉ Atiokia

21Ɔɔ Pɔlɔ nʉ Balanaba ɓambʉɓɨakɨa Ɨsaʉ yɛɛ Iɗo amati ʉ gʉlʉ ngiinanɨ nʉ nicho ɓombi ɓaja kuɓio ɓakpataka. Kija ɓa꞉tʉa anʉ Lisitula, nʉ anʉ Ikonio, nʉ anʉ Atiokia ɨkʉmbʉ mɨngana yɨ Pisidia. 22Ɓambʉ 'ʉtandakiso mɨtʉma ngia yɨ ɓakpataka, nʉ naɓɔ kunzo igue‑gue amati ʉ baya, ɓambuɓusigio ɓɔ: « Yɨkwanana isu kʉɓaa amati ʉ ɓʉka‑ɓʉkaɨ ɓaja pɛɛ ngia kakumunio‑ɔɔ akʉ Ɓʉngama ɓʉ Asʉɓɨɨ. » 23Ɔɔ Pɔlɔ nʉ Balanaba ɓambʉchwa ɓʉkʉʉ amati ʉ ɓakanisa kʉ nangana nangana. Mbise ʉ nɨta nʉ táa idyo akʉ wati, ɓambʉnapɨa ɓʉkʉʉ ngiɓʉnanɨ akʉ lɨkɔndɔ lʉ Makʉʉɓɨɨ ngia ɓa꞉mʉbaya.

24Iya ɓa꞉ɓaa nayɔ gɨpa ʉ Pisidia, ɓambʉɓʉya tiga akʉ gɨpa ʉ Pafilia. 25Kija ɓa꞉ɓɨakɨa ʉpanʉ wʉ Asʉɓɨɨ anʉ Pelegi, ɓambʉsa tiga anʉ Atalia. 26Kʉʉngwa nanɨ ɓambuɗito masʉa wʉ mepo, ɓambʉsa anʉ Atiokia ɨkʉmbʉ mɨngana yɨ Sulia. Yi꞉nye amati ʉ gʉlʉ ngiinanɨ iya kanisa a꞉ɓʉnapɨa‑ɔɔ lɨkɔndɔ ɓɔ ɓʉnyɨa nʉ ɨjɨɔ yɨ Asʉɓɨɨ aka ekoo kuu ngia ɓi꞉nye ɓu꞉kyɨeni.

27Ati ngia ɓa꞉ɓʉya‑ɔɔ anʉ Atiokia, ɓambʉmʉma ɓombi ɓʉ kanisa, ɓambʉɓʉngakɨa moni kʉ muɓomu ngika Asʉɓɨɨ a꞉kyɨa 'upi akʉ ɛɓɔ, nʉ aka a꞉ganɨa‑ɔɔ ɓombi ɨngbaa yɨ baya abana iɓa ɓambikinye Ɓayuda. 28Kija ɔɔ Pɔlɔ nʉ Balanaba ɓa꞉kwaa nanɨ makwaa maja ɨzɔ nʉ ɓakpataka.

Currently Selected:

Kyananaka 14: BudKoya

Highlight

Copy