Kyananaka 13

Ɔɔ Balanaba nʉ Saulo ɓʉsa kʉɓɨakɨa Ɨsaʉ yɛɛ Iɗo akʉ kɨnda ngia yɨ pɛɛ

1Amati ʉ kanisa wʉ Atiokia yi꞉nye nʉ lɨgbɛ nʉ ɓapananakɨa: Balanaba, nʉ Simioni (iya ɓi꞉nye musoko ɓɔ mombi ɔɔ nzi), nʉ Lukio (iya wʉ ɨkʉmbʉ yɨ Kulɛnɛ), nʉ Manaeni (iya ɓa꞉yokoko nʉ ngama Ɛlɔdɛ), nʉ Saulo. 2Ɓisi mʉngana, ɓi꞉nye kubibiso Makʉʉɓɨɨ, ɨzɔ nʉ táa idyo akʉ wati. 'Ʉtʉma wɔɔ Tu wambʉyakanaka naɓɔ ɓɔ: « Napɨeni ɔɔ Balanaba nʉ Saulo kʉ di akʉ kuu ngia ma꞉ɓusukio. » 3Iya ɓa꞉táa nayɔ idyo akʉ wati nʉ nɨta, kija ɓa꞉napɨa lɨkɔndɔ ekoo ʉ ɔɔ Balanaba nʉ Saulo, ɓambuɓunzo kɨnda.

Ɔɔ Balanaba nʉ Saulo ɓʉsa kʉɓɨakɨa Ɨsaʉ yɛɛ Iɗo anʉ Kipulio

4Kija 'Ʉtʉma wɔɔ Tu wa꞉tʉma ɔɔ Balanaba nʉ Saulo kʉsa anʉ Selukia. Tiga nani ɓambuɗito masʉa wʉ mepo kʉsa akʉ oji wʉ Kipulio. 5Iya ɓa꞉ɓʉya‑ɔɔ anʉ Salamina akʉ oji wʉ Kipulio, ɓambʉsa kʉɓɨakɨa ɨsaʉ yɨ Asʉɓɨɨ amati ʉ lɨkáa lʉ nɨta ngila lʉ Ɓayuda. Ɓi꞉nye ɨzɔ nʉ ɔɔ Yʉanɨ ngia ɓi꞉nye musoko ɓɔ Malɨkɔ ɓɔ uɓio naɓɔ kʉsalɨa. 6Ɓambʉtapʉa oji nguʉnanɨ kʉ uɓomu kʉɓʉya anʉ Pafɔ. Nanɨ ambʉgbʉka 'Uyuda mungono ino ɓɔ Bala‑Yeso, ɛyɔ i꞉nye ɨgbɛ yɨ yakanaka nʉ kʉ mombi ʉ nɔkɔ. 7Mombi ngiinanɨ ɓi꞉nye ɨzɔ nʉ Selegio Paulɔ, mombi ʉ mbɨmbanaka nʉ kʉ ngama ʉ oji nguʉnanɨ. Ngama ngiinanɨ i꞉nye kʉkʉnda kʉkɔ ʉpanʉ wʉ Asʉɓɨɨ, kija a꞉soko ɔɔ Balanaba nʉ Saulo. 8Ɨkyɛmɨngana, Ɛlɨmasɨ (ino yɨ igiliki yɨ mombi ʉ nɔkɔ ngiinanɨ), ambʉyaa moni ngika ɓi꞉nye kusigo, nʉ kʉhata kʉnangyo ngama ʉ gɨpa ngiinanɨ ɓɔ ɔɔbayakɔmʉ Yeso.

9Kija Saulo (iya ɓi꞉nye musoko yɛmɔ ɓɔ Pɔlɔ), 'uhue nʉ 'Ʉtʉma wɔɔ Tu, ambʉmukanga ɓʉ ngba ngba ngba, 10ambumusigio ɓɔ: « Ɔwɛ ngia waapɨtaka ɓombi, mombi ʉ mɨgbʉ yɨ ɓʉɓɨɓɨ kʉ iɓomu, mwana ʉ Abɨa, nʉ makwa wʉ ɓungbingbii kʉ ɓuɓomu, ajʉ wambʉkʉsɨa sina tiga‑zʉ bunzo lɨngbaa lɔɔ ngbingbii ngila lʉ Makʉʉɓɨɨ ɓiɛ? 11Ʉna tɔ, ɨtakɨ‑takɨ ngiakɛ Makʉʉɓɨɨ unaɓoto tiga ɓotoo. Asʉɓɨɨ akʉsa nɔwɛ kʉɓɛnda, nʉ wa꞊nɨtanaka mombi ɔɔ chwie mesu. Wambukuɓio‑zʉ kʉna amati ʉ makwaa ɗɛkɛkɛ. » Tʉkʉ nɨma ngiinanɨ, mesu ngika kʉ Ɛlɛmasɨ kambukutunio nʉ indindi ɨzɔ nʉ umomo. Ambufaniso kanaka mʉa kʉhata ɓombi ngiɓa ɓamʉkɨndakiso. 12Kʉna moni ngikʉnanɨ ka꞉kyɨanɨa, ngama ngiinanɨ ambʉbaya Yeso jʉ mapanʉ kʉ Makʉʉɓɨɨ ka꞉muɓoto akʉ 'ʉtʉma.

Ɔɔ Pɔlɔ nʉ Balanaba ɓʉɓʉya anʉ Atiokia amati ʉ gɨpa ʉ Pisidia

13Ɔɔ Pɔlɔ ɨzɔ nʉ ɓombi ngiɓa ɓa꞉kɨndaka naɓɔ, ɓambuɗito masʉa wʉ mepo kʉʉngwa anʉ Pafɔ kʉɓʉya anʉ Pɛlɛgɨ ɨkʉmbʉ mɨngana amati ʉ gɨpa ʉ Pafilia. Yʉanɨ ngia ɓi꞉nye musoko ɓɔ Malɨkɔ a꞉sɨana naɓɔ nanɨ ambʉtʉa anʉ Yelusalɛma. 14Kija ɓa꞉ʉngwa anʉ Pɛlɛgɨ ɓambʉɓʉya anʉ Atiokia, ɨkʉmbʉ mɨngana yɨ Pisidia. Akʉ ɓisi ɓʉ humuo ngiɓa ɓʉ Ɓayuda, ɓambukumunio amati ʉ ɨkáa yɨ nɨta ngia yɨ Ɓayuda ɓambuwulo ɨsɨ. 15Iya ɓa꞉popoko nayɔ mubio kʉ mapanʉ, nʉ ika kʉ lɨgbɛ, kija ngama ʉ ɨkáa yɨ junikio a꞉tʉmɨa ɔɔ Pɔlɔ iyo kusigo ɓɔ: « Inu ɓambinoo, ndʉ naɓio nʉ moni kɔɔ munze ɓombi igue‑gue yakeni yakaa. »

16Pɔlɔ ambʉmaa, ambʉɓʉgbʉma nʉ ɨkɔndɔ, ambusigo ɓɔ: « Inu Ɓaɨsalaɛlɛ nʉ inu ɓombi ngiɓa naakumo Asʉɓɨɨ ukeni. 17Asʉɓɨɨ ngia wʉ ɓana ɓʉ Ɨsalaɛlɛ a꞉chwa ɓakuku ngiɓʉndɛsʉ, kija ɓa꞉cho ɓaja akʉ angu ʉ Asʉɓɨɨ ati ngia ɓi꞉nye‑ɔɔ ɓɛɛka anʉ Misili. Kija a꞉ɓiso nani akʉ ɨkɔndɔ yɨ angu ngiangɔ. 18Asʉɓɨɨ i꞉nye 'ʉtʉma ʉta kʉpɨa ɨkyananakɨa ngiindaɓʉ akʉ 'ukengu amati ʉ mugo ndʉ makumi ɓʉgɨna. 19Ambʉdʉka lɨkáa lʉ ɓanza ʉmalɨanɨka amati ʉ ɨkʉmbʉ yɨ Kanana, ambuɓunzo maɓɨɨ wɔngɔ 20amati ʉ mugo ndʉ mɨa ɓʉgɨna nʉ makumi ɓɔkɔ.

Mbise ngiinanɨ Asʉɓɨɨ ambunzo ɓakuku ngiɓʉndɛsʉ ɓajuji kʉɓʉya akʉ ɨgbɛ Samwɛlɛ. 21Kʉʉngwa nanɨ ɓambʉta ngama. Asʉɓɨɨ ambuɓunzo Saulo mwana ʉ Kisi akʉ anza wʉ Benzamina. Ɛyɔ ambʉdya ɓʉngama amati ʉ mugo makumi ɓʉgɨna. 22Iya a꞉ʉngwiso nayɔ Saulo, Asʉɓɨɨ ambuɓunzo tiga Daudi ɓʉngama. Asʉɓɨɨ a꞉ɓwɨa Daudi ɓʉtɛmʉ ɓɔ: ‹ Mʉ꞉na Daudi mwana ʉ Yɛsɛ, mombi ngia anɛmɛ kʉkataa akʉ 'ʉtʉma nguʉsɛmɛ. Ɛyɔ a꞊kyɨa sina ɓʉkʉnda ngiɓʉsɛmɛ kʉ ɓuɓomu. › 23Asʉɓɨɨ a꞉nzo Yeso kuɓio Muhiiso ngua wʉ Ɨsalaɛlɛ amati ʉ ɨkáa yɨ anza ngia yɨ Daudi, kʉkpatanakɨa nʉ moni ngika a꞉mʉpanaka jɛnɛ. 24Pɛɛ ʉ Yeso kʉnɨka, Yʉanɨ a꞉sigio Ɓaɨsalaɛlɛ kʉ ɓuɓomu ɓɔ ɓunicho mɨtʉma ngiindaɓʉ, ɓambuɓuɓatiso. 25Ati ngia Yʉanɨ i꞉nye‑ɔɔ tinene kupipo kuu, ambufaniso ɓukuo ɓɔ: ‹ Naasigo‑zʉ ɓɔ ɛmɛ ma anɨ? Ɛmɛ mambʉkɔmʉ mombi ngia nanayɔ kusiɓo. Ɨkyɛmɨngana, siɓeni mombi mʉngana ngia akʉka mbise asɛmɛ, iya mambʉkʉkwanana kuɓono miki yɨ lɨkpakʉ ngilangɔ gʉkʉ ɗɛkɛkɛ. ›

26Inu ɓambinoo, ɓanɔnɔ ɓʉ Abalama, nʉ ɓombi kʉ ɓuɓomu ati ʉ ʉndɛnʉ ngiɓa naakumo Asʉɓɨɨ, ɛyɔ a꞉tɨtʉmɨa bɛ‑zʉ tʉkʉ isu ɨsaʉ yɨ ɓʉhɨa ngiakɛ. 27Ʉna tɔ, ɓombi ɓʉ Yelusalɛma nʉ ɓangama ngiɓʉndaɓʉ ɓa꞉pimisokɔmʉ Yeso ɓɔ a Masɨa, nʉ ɓa꞉pimisokɔmʉ inyi yɨ moni ngia lɨgbɛ la꞉yaka nʉ ika ɓaapopoko akʉ makwaa kʉ humuo kʉ Ɓayuda kʉ muɓomu. Ɨkyɛmɨngana, ɓa꞉kyananakɨa moni ngika lɨgbɛ la꞉yaka 'upi akʉ wisiso Yeso. 28Abana ndʉ ɓa꞉nakɔmʉ moni ngika ɓakwanana‑ɔɔ kʉtɨna 'ʉkɔmbɔ nguangɔ ɓɔ uwo woni, ɓa꞉ta Pilato ɓɔ ʉmʉwa tʉkʉ waa. 29Mbise ʉ kyɨa moni kʉ muɓomu ngika Mubio ka꞉ngaka ekoo angɔ, ɓambumijiso ekoo ʉ mʉsalaba, ɓambʉmunapɨa amati ʉ ɓʉnzaʉ.

30Ɨkyɛmɨngana, Asʉɓɨɨ ambʉmʉjʉkaniso akʉ ingyo. 31Amati ʉ makwaa maja, Yeso i꞉nye kyɨa kʉɓwanakɨa ɓombi ngiɓa ɓa꞉mʉnapɨa kʉʉngwa anʉ Galilaya kʉɓʉya anʉ Yelusalɛma. Ɨtakɨ‑takɨ ngiakɛ ɓombi ngiɓʉnanɨ ɓa tiga ɓatɛmʉ ɓʉ Yeso apɛɛ ʉ Ɓaɨsalaɛlɛ. 32-33Isu kʉka aka ninu kunzo Ɨsaʉ yɛɛ Iɗo ngia Asʉɓɨɨ a꞉sigo jɛnɛ aɓɨakɨa ɓakuku ngiɓʉndɛsʉ. Ɨtakɨ‑takɨ ngia Asʉɓɨɨ ʉkwananakiso tiga moni ngikʉnanɨ ekoo ʉndɛsʉ ngiɓa ka ɓanɔnɔ ɓʉndaɓʉ kwananakisoo, 'upi akʉ jʉkaniso Yeso akʉ ingyo. A꞉kyɨa ɓwanɨ kʉndʉ akʉ ɓa꞉tɨndakɨa‑ɔɔ amati ʉ ɨtaɓʉ yɨ Mʉmbɔ magba kɔngɔ kapɨnɨ ɓɔ:

‹ Ɔwɛ wa mwana ngiasɛmɛ,

ɓʉɓʉnɨ ɛmɛ ma tiga atɔ. ›

34Asʉɓɨɨ a꞉sigo ɓɔ a꞊mʉjʉkaniso akʉ ingyo jʉ ɔɔpʉakɔmʉ amati ʉ ɓʉnzaʉ. Kija a꞉sigo ɓata kʉ ɓɔ: ‹ Ma꞊natio ʉmbʉa wɔɔ tu, ʉwa wʉ ingono, ʉwa ma꞉panaka jɛnɛ Daudi. ›

35Tiga kʉ ananɨ, amati ʉ wagba wʉ ɨtaɓʉ yɨ mʉmbɔ nga wɔmɔ yakusigo ɓɔ:

‹ Wambʉkʉsɨa bayo asɔɔ ɔɔ tu kʉpʉa amati ʉ ɓʉnzaʉ. ›

36Tiga kʉ ɓwanɨ, Daudi a꞉kyɨa kuu kʉkpatanakɨa nʉ ɓʉkʉnda ɓʉ Asʉɓɨɨ akʉ ɓɔndɔ ngiɓangɔ, mbise ɔngɔ ambuwo, ɓambʉɓʉhʉna ɨzɔ nʉ ɓɨsʉngʉɛ, ndʉtʉ ngiangɔ yambʉpʉa. 37Ɨkyɛmɨngana, Yeso ngia Asʉɓɨɨ a꞉mʉjʉkaniso akʉ ingyo, a꞉pʉakɔmʉ yangɔ. 38-39Inu ɓayoo, pimiseni iɗo ɓɔ ya tʉkʉ aka ekoo Yeso iya ɓa‑ɔɔ ninu kʉɓɨakɨa ɨsaʉ yɨ nyɨa nʉ ʉpɨa wʉ ɓʉɓɨɓɨ. Nʉ ya tʉkʉ aka ekoo angɔ iya mombi kʉ uɓomu ngia anayɔ kʉbaya a‑ɔɔ kuɓununukio akʉ ɓubayo ɓʉ ɓʉɓɨɓɨ, iɓa mapanʉ nga kʉ Mʉsa kambikinye ikanzi ngia ka꞉kwanana‑ɔɔ ninu kuɓono. 40Pɨmɨeni pɨmɨaa ɓɔ moni ngika lɨgbɛ la꞉tɨndakɨa kɔɔnyɨakɔmʉ ati ʉndɛnʉ kusigo ɓɔ:

41‹ Ukeni inu ɓombi ngiɓa naana moni ɨsʉkʉɓwanɨ.

Yɨnɨmbangɨa mbangɨaa, nʉ yangaeni yangaa!

Jʉ akʉ ɓɔndɔ ngiɓʉndɛnʉ, ma꞊kyɨa ɨkyɛmɛ

ikanzi ngia nambʉkʉbaya abana tʉkʉ mombi ʉnɨngakieni. › »

42Ati ngia ɔɔ Pɔlɔ nʉ Balanaba ɓi꞉nye‑ɔɔ kʉɓʉa amati ʉ ɨkáa yɨ Asʉɓɨɨ ngiinanɨ, ɓombi ngiɓʉnanɨ ɓambuɓusoko ɓɔ ɓʉ́ka ɓata kʉngaka tʉkʉ moni mʉngana ngikʉnanɨ akʉ ɓisi ɓʉ humuo ngiɓa ɓa꞉kpata. 43Iya majunikio nguʉnanɨ wa꞉sio nayɔ, Ɓayuda ɓaja nʉ mababa kʉ ɓombi nga kɔmɔ ika ka꞉baya ɨtanda ngia yɨ Ɓayuda ɓambʉkpata ɔɔ Pɔlɔ nʉ Balanaba. Ɛɓɔ ɓatitima ɓa꞉yaka moni naɓɔ kunzo igue‑gue ɓɔ ɓɔɔsɨanakɔmʉ nʉ 'ʉtʉma wʉ ɨjɨɔ ngua wʉ Asʉɓɨɨ.

44Tiga ɓisi ɓʉ humuo ngiɓa ɓa꞉kpata, ɓombi ɓʉ gʉlʉ ngiinanɨ ɓambʉka kʉ ɓuɓomu kʉkɔ ɨsaʉ yɨ Makʉʉɓɨɨ. 45Ɨkyɛmɨngana, iya Ɓayuda ɓa꞉na ndiba ʉ ɓombi ngiɓʉnanɨ ɓambʉkwa imi, ɓambufaniso zɨaka Pɔlɔ nʉ nicho moni ngika i꞉nye kʉyaka engo. 46Ɨkyɛmɨngana, ɔɔ Pɔlɔ nʉ Balanaba ɓambuɓutisio chʉkɔmʉ nʉ ʉɓa kusigo ɓɔ: « Ya꞉kwanana pongo ɓɔ ɓʉkpanga‑zʉ pɛɛ tʉkʉ ninu kʉɓɨakɨa ɨsaʉ yɨ Asʉɓɨɨ. Ɨkyɛmɨngana, jʉ nʉ꞉ɨyaa yaa, nʉ nʉna ɓɔ nʉkwananakɔmʉ nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá, kʉ ɓwanɨ ka꞊nɨsɨa sɨaa, kambʉsa ɔɔ ɓombi ngiɓa ɓambʉkɔmʉ Ɓayuda. 47Jʉ Makʉʉɓɨɨ a꞉tinzo ʉpanʉ ɓɔ:

‹ Ma꞉nʉnapɨa ɔwɛ kuɓio wanga wʉ ɓombi ngiɓa ɓambʉkɔmʉ Ɓayuda ambʉ ɨtaka kʉ iɓomu yɨnyɨa nʉ ɓʉhɨa. › »#Popoko Ɨsa 49:6

48Iya ɓombi ngiɓa ɓambikinye Ɓayuda ɓa꞉kɔ nayɔ moni ngikʉnanɨ, ɓambʉkwa ɨgyagya, ɓambubibiso ʉpanʉ wʉ Asʉɓɨɨ. Kija ɓombi kʉ ɓuɓomu ngiɓa Asʉɓɨɨ a꞉ɓʉchwa kʉnyɨa nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá ɓambʉbaya. 49Ʉpanʉ wʉ Asʉɓɨɨ wa꞉ndanaka gɨpa ngiinanɨ kʉ uɓomu. 50Ɨkyɛmɨngana, Ɓayuda ɓambʉpʉpɨa ɓangama ɓʉ gʉlʉ nʉ ɓoi ɓɔɔ ɓʉmbɨanɨɛ ngiɓa ɓi꞉nye bibiso Asʉɓɨɨ ɓɔ ɓufaniso kyananaka ɔɔ Pɔlɔ nʉ Balanaba, ɓambuɓukpinyo na akʉ gɨpa ngiʉndaɓʉ. 51Kija ɔɔ Pɔlɔ nʉ Balanaba ɓa꞉ɓɛndaka aɓungu ʉ mɨtɨndɨ ngiindaɓʉ,#13:51 Gʉ kʉ ɓɔ, kʉsɨa mʉgwɛ akʉ ʉmʉa nguʉnanɨ. ɓambʉsa anʉ Ikonio. 52Ɨkyɛmɨngana, ɓakpataka ngiɓa ɓʉ Atiokia, ɓa꞉huo tʉkʉ nʉ ɨgyagya nʉ 'Ʉtʉma wɔɔ Tu.

Currently Selected:

Kyananaka 13: BudKoya

Highlight

Copy